Matius 20
20
Kapalendano mealano ponambo te kaampono angguru
20:1-16
1“Kafopahintaꞌano Lahataꞌala tapedamo seemie kafeompuꞌa, nandoo samentaeno nokalamo neꞌondofi so kumahadhaano te kaampono angguruno. 2Pada kaowu dopobhotuꞌao ponambodo sewoka dhoi pera seꞌoleo, notududamo te kaampono angguruno.
3Hambi-hambi siua mata hangkowine nokalamo toha, gahaꞌa newohamo mie tapa kokaha-kahadhaano tadeehe-ehemo we daoa. 4Nopugauandamo ambano, ‘Kalaomu dua bhe hintimiu te kaampono angguruku, amaꞌangkoomu ponambo mantasiꞌano.’ Andoa maitu lasao dokala. 5Hambi-hambi ompulu haa mata pana oleo bhe hambi-hambi tolu mata kamaꞌoleo nokalamo toha nesaliꞌi mie peda saꞌituini.
6Hambi-hambi lima mata maꞌoleo, nokalamo toha maka newoha dua mie sigaoꞌano deehe-ehe. Nofeenadamo ambano, ‘Noafa gahaꞌa seꞌoleomo taꞌomeehe-eheomu ne ini miina bhe kaha-kahadhaamiu?’ 7Dotobhoosimo ambado, ‘Ingka miina bhe monambo kainsamia.’ Ambano dua, ‘Kalaomu dua bhe hintimiu te kaampono angguruku bahangka.’
8Hato nohondo oleo nopugaumo kokaampono naꞌa ne mandoro ambano, ‘Saliꞌida kumahadhaano itu maka waꞌanda ponambodo seemie-seemie, natumanda ne mesuano mbuhumai ampa mesuano kabhao-bhaono.’ 9Dadiꞌanomo domaimo kumahadhaano tumandano hambi-hambi lima mata kamaꞌoleono. Andoa ini detahima ponambo sewoka dhoi pera seemie. 10Pada anaꞌa domaimo dua kabhao-bhaono mesuano, kunaꞌendomo ponambodo damekolabhiiꞌe, gahaꞌa dowaꞌanda dua sewoka dhoi pera seemie. 11Hato dotahima, dofedeemo ne kafeompuꞌa naꞌa. 12Ambado, ‘Ingka mesuano mbuhumai ini sedhamu kaowu dokahadhaaꞌa. Noafa pototoanda bhe insaodi kumahadhaa mobhieno, suhue oleo taetohu kasodono oleo?’ 13Tamaka kafeompuꞌa naꞌa notobhoosimo ne seemie kumahadhaano maitu, ambano, ‘Bhahitie, miina akokaꞌala ne hintu. Ingka padamo dopobhotuꞌao sewoka dhoi pera seꞌoleo. 14Alamo dawumu itu maka suli. Kapoindaloku wutoku amaꞌao humatono mbuhumai napototo bhe kawaꞌaoku ne hintu. 15Paise naembalia bhahaa amake fehebuaꞌaku ampa kapoindaloku? Nokoula lalomu mbaꞌinomo netaa laloku?’ ”
16Ambano toha Yesus, “Pedamo anaꞌa mie humatono mbuhumai sumuli damaꞌindulu, maꞌinduluno sumuli dambuhumai.”
Kafohato tolu pakuno putae Yesus nakumadee-dee
20:17-19
Mrk 10:32-34; Luk 18:31-34
17Wakutuuno Yesus nakumala we Yerusalem, nosaliꞌimo anaguhuꞌino ompulu hoduano domoisa kaowu. We laano sala nofohatodamo, 18ambano, “Aitu dakumalaomu we Yerusalem. We naꞌa Anano Manusia damowae ne limando neangkaꞌindo imamu bhe pande-pande Kitabi. Andoa maitu dabhotusie damongkoe. 19Anoa damowae ne bansano liwu suano Yahudi, damele-elee, dahumambisiane habuta bhe dakumantaiꞌe te sau salipu. Tamaka ne katolu oleono namanu namaiꞌao ne mate.”
Kamesalondo inano Yakobus bhe Yohanes
20:20-28
Mrk 10:35-45
20Pada aitu nomaimo hobhineno Zebedeus bhe anaꞌino ne Yesus. Sahatono notaohaomo sombano nakonisalo. 21Nofeenamo Yesus ambano, “Mesalo ae bhahaa?” Ambano, “Tapugaumo, gaoku anaku hoduano ini namada kaowu weo Kafopahintaꞌamu, daengkoha ne sohihimu, seemie ne kema seemie ne suana.” 22Tamaka Yesus tanotobhoosi ambano, “Ingka miina mandeꞌaaneomua uluꞌano kamesalomiu itua. Mondoiꞌeomu bhahaa mohoꞌuomu ne kampohoꞌuꞌaku?” #20:22 Maꞌanano: sabhaha kakadee-dee so nenamisino. Ambado, “Tamondoiꞌe.” 23Ambano dua Yesus, “Uumbe daanumo, mohoꞌuomu ne kampohoꞌuꞌaku, tamaka kaengkohaꞌa ne kema tawa ne suana suano Idi so motantue. Kaengkohaꞌa anaꞌa pada dofontaa-ntaaꞌandae mie toka nepilino Amaku.”
24Dofetingke peda naꞌa anaguhuꞌino ompuluno doꞌamahakimo sabhangkando hoduano sekakutano maitu. 25Tamaka Yesus nosaliꞌida bhe nopugau ambano, “Ingka pandeꞌaaneomu mahintangino sabhaha bansano liwu pata mandeꞌaono Lahataꞌala dofodee-dee raꞌeatindo, neangkando nokii sepaliꞌa dofodhala pahintando. 26Tamaka hintimiu pae naembalia nada naꞌa. So moindalono membalino kabhala ne olotamiu, tabeano naꞌumondofao kafaraluundo mie bhaindo. 27So moindalono membalino mie neangka ne olotamiu, tabeano naembali bhatuando sigaoꞌano. 28Kapaꞌamo wutono Anano Manusia - Idimo ini - nomai pae naefeꞌondofaoa tamaka nafoꞌondofao bhe nafowaꞌao inawano so katolosindo mie bhahi.”
Yesus nefekaꞌosa kabunto dohodua
20:29-34
Mrk 10:46-52; Luk 18:35-43
29Wakutuuno Yesus bhe anaguhuꞌino dohunsamo kotano Yeriko, dobhahi mie dosipumpu doangkafie. 30Nandoo dohodua kabunto dengkoha-ngkoha ne wiwino sala. Sadofetingke lumalono maitu Yesus, dokeimo ambado, “Ompu sampuꞌano Daud, mobhela kainsami lalo.” 31Tamaka mie bhahi doꞌamahakida bhe dopugauanda koemo dokadiu-diua, tamaka tanodhulu kahaaꞌino dokei. 32Nofetingke peda naꞌa Yesus nofetumpumo maka nosaliꞌida. Nofeenadamo ambano, “Amafaꞌiangkoomu gahaꞌa gaomiu?” 33Ambado, “Ompu, gao mani tafowoha.” 34Nobhela sepaliꞌa totono lalono Yesus, maka nofedampa matando lasao dofowoha. Pada anaꞌa doangkafimo Yesus.
Currently Selected:
Matius 20: mnbSD
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
