Markus 8

Yesus nepakande mie dapefato hewu

8:1-10

Mat 15:32-39

1Miina naomponaa pada anaꞌa nandoo toha mie bhahi dopofoꞌo-foꞌonu. Mbaꞌinomo miina dakoꞌotia, Yesus nosaliꞌimo anaguhuꞌino maka nopugau ambano, 2“Nobhelaanda sepaliꞌa laloku mie bhahi ini. Tolu oleomo doangkafi kanau, miinamo dakoꞌotia. 3Ane atumududa dasumuliꞌao kulino handado, dakumamposola we sala. Kapaꞌamo nandoo maiꞌaono we kodoꞌono.”

4Dotobhoosimo anaguhuꞌino ambado, “Ne kalinoꞌa aini ne amai daeꞌawa gahaꞌa roti so daomaa mie kabhahi peda ini?” 5Yesus nofeenadamo, “Tafee onu gahaꞌa roti ndumandooꞌano?” Ambado, “Tafitu onu.”

6Pada aitu Yesus notudumo mie bhahi maitu daengkoha ne wite. Noalamo roti fitu onuno naꞌa, nefoampe katumpuno lalo ne Lahataꞌala, maka nobhebhehae. Roti anaꞌa nowaꞌandae anaguhuꞌino dadumawu-dawuandae mie bhahi, lasao dodawu-dawue. 7Nandoo dua kenta mohobuꞌi seendai. Yesus nefoampe toha katumpuno lalo maka kenta amaitu dodawu-dawuandae dua mie bhahi. 8Mie bhahi dohumaa ampa doweꞌi. Pada dohumaa, roti kabhilaꞌando dotawunaane, nopono fitu kalangka. 9Kabhahindo momaano dapefato hewu. Pada peda naꞌa Yesus notududamo dasumuli. 10Anoa bhe anaguhuꞌino lasao dosawi ne bhangka maka dokala we kadieno Dalmanuta.

Miendo Farisi desalo tanda timenteꞌaono ne Yesus

8:11-13

Mat 16:1-4

11Domaimo miendo Farisi dopuga-pugau bhe Yesus, deꞌondofi tingku damoꞌalae. Desalomo naehabuanda giu timenteꞌaono so katandaino putae Anoa ini nomaiꞌao te surugaa. 12Pada nokaꞌuu we lalono, Yesus notobhoosidamo ambano, “Noafa gahaꞌa mie dhamani aini desaloꞌao tanda timenteꞌaono? Amohatokoomu, paise! Pae sepaliꞌa aehabuanda tanda kamesalondo.”

13Nopalusi anaꞌa nohunsadamo, nosawi toha ne bhangka maka nopolimba we sewetano.

Podiundo miendo Farisi bhe kolaki Herodes doposandahaane bhe ragi kaefoꞌendeꞌa roti

8:14-21

Mat 16:5-12

14Anaguhuꞌino Yesus dolimpu daewowoꞌo roti, mpahinomo seꞌonu we bhangka. 15Yesus nofodhagadamo ambano, “Posiꞌondoomu ne ragi kaefoꞌendeꞌa rotindo miendo Farisi bhe ragino kolaki Herodes.” 16Anaguhuꞌino detula-tulamo sapada-pada andoa ambado, “Kapugauꞌano peda naꞌa mbaꞌinomo miina bhe rotintoomua.”

17Gahaꞌa Yesus nopandeꞌaane dua nepuga-pugauꞌaondo maitu, dadiꞌanomo nofeenadamo ambano, “Noafa gahaꞌa pugauꞌaoꞌomu miina bhe rotia? Miinaꞌo mandeꞌaaneomua gahaꞌa? Miinaꞌo dua lumosangieꞌomua? Ingka notosungku sepaliꞌa fekihimiu! 18Ingka bhe matamiu, noafa gahaꞌa miina fowohaꞌaoꞌomu? Ingka bhe tingalamiu, noafa gahaꞌa miina fofetingkeꞌaoꞌomu? Molimpuꞌaanemoomu gahaꞌa, 19aebhebheha lima onu roti mbali dohumaa mie dolima hewu. Fee kalangka gahaꞌa kabhilaꞌandoa netawunaomiu?” Dotobhoosimo ambado, “Ompulu haa kalangka.”

20“Ne oleono aebhebheha fitu onu roti mbali dohumaa mie dofato hewu, fee kalangka gahaꞌa kabhilaꞌando netawunaomiu?” Ambado, “Fitu kalangka.” 21Pada anaꞌa Yesus nopugaumo toha ambano, “Peda ae? Miinaꞌo dua lumosangieꞌomu gahaꞌa?”

Yesus nefekaꞌosa kabunto we Betsaida

8:22-26

22Yesus bhe anaguhuꞌino dohatomo we Betsaida. Ne itu deowaane seemie kabunto maka desalo namedampae. 23Yesus nointaha limano kabunto maitu maka notonda-tondae, noowae we simbalino liwu. Pada aitu nopuntohimo matano maka notei limano te wawono bhe nofeenae ambano, “Koniwohamo?”

24Mie anaꞌa noꞌondomo te wise maka nopugau ambano, “Uumbe, awohamo mie dekala-kala, tamaka kabeangaꞌida puꞌuno sau.”

25Yesus nofedampa toha matano mie aitu, maka matano notilengka, netaamo kofowohanoa. Sabhaha newohano nentaleamo bhe notindamo. 26Pada anaꞌa Yesus notuduemo nasumuli se lambuno tamaka nofohatoe ambano, “Koemo sulia se liwu saꞌituini!”

Petrus noꞌakui putae Yesus o Mesias

8:27-30

Mat 16:13-20; Luk 9:18-21

27Yesus bhe anaguhuꞌino dokala we liwu-liwu we kadieno Kaisarea Filipi. We laano sala, Yesus nofeenadamo ambano, “O mie dokona kanau laꞌae gahaꞌa Idi inia?”

28Dotobhoosimo ambado, “Nandoo kumonako Yohanes Fokadiuno, nandoo dua kumonako Elia, sigaꞌa dokonako dua seemie anabii.”

29Yesus nofeenadamo dua ambano, “Ane hintimiu, kona kanauꞌomu laꞌae?” Notobhoosimo Petrus, ambano, “Hintu ini Mesias, Omputo Fosalamatino!”

30Tamaka Yesus noꞌeleꞌaanda sepaliꞌa daekapuna ne mie sigaoꞌano laꞌae Anoa maitu.

Yesus nofofohatoꞌao kakadee-dee so nenamisino bhe so kamateꞌano

8:31-38

Mat 16:21-28; Luk 9:22-27

31Nopalusi anaꞌa Yesus notandamo nofohato anaguhuꞌino ambano, “Anano Manusia - Idimo ini - tetewei nabhahi naenamisi kakadee-dee. Anoa dabansie kamu-kamungkulaꞌi, neangkaꞌindo imamu bhe pande-pande Kitabi. Damongkoe, tamaka ne katolu oleono nadumadimo toha.” 32Yesus nofohatoda mentalea-mentalea, tamaka Petrus nohelae ne sohihino maka nofeꞌalae. 33Yesus nodoliki anaguhuꞌino maka nofeꞌala Petrus ambano, “Gampi seetani! Nefekihimu itu suano nefekihino Lahataꞌala, tamaka nefekihino manusia.”

34Pada aitu Yesus nosaliꞌimo mie bhahi bhe anaguhuꞌino maka nopugau ambano, “Ane dopoindalo damangkafi kanau, tetewei dahumunsa kapoindalondo wutondo. Mada anaꞌa datumongku sau salipundo ⸤ maꞌanano doꞌunda mahingga damate⸥ maka damangkafi kanau. 35Kapaꞌamo laꞌae mongaheno namate, tetewei namate; tamaka laꞌae mateno mbaꞌinomo noangkafi Idi bhe Bhihita Metaa, anoamo itu so dumadino. 36O ae fahalaano seemie manusia naeꞌawa kosasawiꞌae kahangkaeano dhunia ini, gahaꞌa inawano nabinasa? 37Naembali bhahaa o inawa maitu dalumoliane kahangkaea?

38Ane doambano doangkafi kanau bhahaꞌi doambano doangkafi kafoinaꞌuku ne olotando mie modai bhe mie kodhosa dhamani aini, Anano Manusia - Idimo ini - naoambanoane dua mie aitu ane namai weo kakalabhiano Amano, dalumibu-libue malaꞌekati mongkilono.”

Currently Selected:

Markus 8: mnbSD

Highlight

Copy