Markus 9

1Ambano toha, “Amohatokoomu, kotu-kotuꞌu ne olotamiu ini nandoo so pataꞌo mateno, ane pae kadeki daoha Kafopahintaꞌano Lahataꞌala nahumato bhe kuasano.”

Anaguhuꞌino dowoha kakalabhiano Yesus te kabhawo

9:2-13

Mat 17:1-13; Luk 9:28-36

2Nopalusi nomo oleo, Yesus noowamo Petrus, Yakobus bhe Yohanes dofoni te kabhawo melangkeꞌano. Ne itu domoisa kaowu. Gahaꞌa Yesus notibhaliimo wohaꞌano ne wisendo. 3Pakeano nopupute sepaliꞌa bhe nokosilo. Pae nandumandooa bhe naseemie te dhunia ini so mandeno metofano ampa naopute peda amaitu. 4Pada aitu tadowohamo dua anabii Elia bhe anabii Musa dopuga-pugau bhe Yesus. 5Nopugaumo Petrus ne Yesus ambano, “Guru, ingka netaa domaiꞌomu ne ini. Naetaamo taefongkoha bhantea natolu onu, seꞌonu so Hintu, seꞌonu so anabii Musa bhe seꞌonunoa so anabii Elia.” 6Kapugauꞌano peda maitu, mbaꞌinomo miina namandeꞌaane bhahaꞌi napugauꞌao ae, kaꞌosano kateꞌindo. 7Gahaꞌa nokaolumidamo olu, maka nomaiꞌao weo olu maitu notifetingkemo suaha ambano, “Ainiꞌaemo anaku nemoasiꞌaoku. Fetingkeeꞌomu pugauno.” 8Setolindaꞌa, dofolili matando miinamo dakoniwohaa, tamo Yesus nomoisa.

9Wakutuuno dosampu maiꞌao te kabhawo Yesus nofohatodamo ambano, “Koise mekapunaomu ne mie sigaoꞌano newohamiu saꞌituini. Sembali Anano Manusia - Idimo ini - namanumo namaiꞌao ne mate maka naembali mekapunaomu ne mie sigaoꞌano.” 10Andoa doangkafie pugauno, tamaka tadopofee-feenamo ambado, “O ae bhahaa maꞌanano namanu maiꞌao ne mate?”

11Pada anaꞌa dofeenamo ne Yesus ambado, “Noafa gahaꞌa ambado pande-pande Kitabi, anabii Elia so maino wawo?” #Mal 4:5 12Notobhoosimo Yesus, “Uumbe daanumo, Elia so maino wawo, namosintuwuꞌao sabhaha giu. Ampamo kaowu nada amai Anano Manusia, Idi ini? Ingka weo Kitabino anabii notibuhi nabhahi naenamisi kakadee-dee, pae dakumonaꞌie mie. 13Tamaka amohatokoomu, sakotuꞌuno Elia padamo nomai, tamaka mie bhahi miina dakumonaꞌie mie, dohabue ampa kapoindalondo. Nopobutu peda tibuhino weo Kitabino anabii.” #9:13 Aeati aini nopulaoꞌao Yohanes Fokadiuno.

Yesus nefekaꞌosa anaꞌi nepesuakino seetani

9:14-29

Mat 17:14-21; Luk 9:37-43

14Yesus bhe anaguhuꞌino totoluno maitu dosulimo toha we anaguhuꞌino sigaoꞌano, gahaꞌa dowohadamo nandoo dolibu-libuda mie bhahi. Nandoo dua pande-pande Kitabi tangasano dopotaga-tagali bhe andoa. 15Nelaa dowoha Yesus, mie bhahi naꞌa domente, lasao dotende dosumpuiꞌe. 16Yesus nofeenadamo, “O ae gahaꞌa nepotaga-tagaliꞌaomiu bhe pande-pande Kitabi maitu?”

17Notobhoosimo seemie ne olotando mie bhahi maitu ambano, “Guru, aowaangko anaku ini. Miinamo namandea nopugau mbaꞌinomo nopesuakie seetani. 18Taenomo nohatoe seetani maitu, lasao notihambitao ne wite; nokida koseꞌulu-uluno, wobhano tanokobuha-buhamo, nokuꞌi bhe wangkano. Padamo dua aesalo ne anaguhuꞌimu damolimbaeꞌao, tamaka miina damooliea.”

19Maka Yesus nopugaumo ambano, “Pahasili hintimiu ini, mie pata marasaeano! Tana seꞌae gahaꞌa beano so kaomponano aeate bhe hintimiu? Tana seꞌae gahaꞌa so sabahaku? Owaeꞌomu se ini anaꞌi itu.” 20Anaꞌi amaitu doowaemo se Yesus. Sanowoha Yesus, seetani naꞌa kansuhu nogegohao anaꞌi maitu sampe notihambitao ne wite. Newalo-walole, nokobuha-buhamo bhe wobhano. 21Yesus nofeenamo amano anaꞌi maitu, “Seꞌaemo kaomponano nopeda aini?” Notobhoosi amano, “Notanda mpini kahobuno. 22Nentelamo dua seetani maitu nodhudhulaane weo efi bhahaꞌi weo oe, patudhuno namobinasae. Tamaka ane moolie, tulumi kainsami, mobhela kainsami lalo.”

23Notobhoosi Yesus, “Noafa gahaꞌa pugauꞌao, ‘Ane moolie’? Sumanomo doparasaea, o ae maka dua tetewei dopoolie!”

24Amano anaꞌi naꞌa lasao nokei, “Aparasaea Ompu! Tamaka tulumi kanau weo kakaeno kaparasaeaku ini!”

25Yesus nowohamo mie dodhulu kabhahi dolibuda, maka noꞌamahaki seetani maitu ambano, “Hintu seetani! Mefobhohe bhe mefopongke mie! Atuduko limbaꞌo toha maiꞌao ne anaꞌi aini, maka koemo suli-sulikiea!”

26Anaꞌi naꞌa nogegohaane toha seetani aitu, lasao nolimba bhe nopokakei-kei. Anaꞌi naꞌa wohaꞌano tapedamo mie mate, sampe ambado mie bhahi, “Ingka nomatemo.” 27Tamaka Yesus nointaha limano anaꞌi naꞌa maka nofowanue, lasao noeheꞌao wutono.

28Dohato kaowu se lambu, Yesus bhe anaguhuꞌino tadomoisa, dofeenamo ne Yesus ambado, “Noafa gahaꞌa ingka insaodi miina tamooliea tafolimba seetani saꞌituinia?”

29Notobhoosi ambano, “Seetani medano saꞌituini miina natifolimba, simbali dosambaheaꞌane.”

Yesus nopugauꞌao toha so kamateꞌano

9:30-32

Mat 17:22-23; Luk 9:43-45

30Domaiꞌao ne itu Yesus bhe anaguhuꞌino dokalamo toha doangka we kadieno Galilea. Anoa nongahe damandeꞌaane kakalaꞌano, 31mbaꞌinomo nandoo nofoinaꞌu anaguhuꞌino. Ambano, “Anano Manusia - Idimo ini - damowae ne limando mie kokuasano, maka damongkoe. Tamaka ne katolu oleono nadumadimo toha.”

32Anaguhuꞌino miina dalumosangiea pugauno, tamaka doteꞌi dameenae.

Laꞌae foliuno kabhala?

9:33-37

Mat 18:1-5; Luk 9:46-48

33Pada anaꞌa dohatomo toha we Kapernaum. Dopesua kaowu weo lambu, Yesus nofeenamo ne anaguhuꞌino, “Puga-pugauꞌaoꞌomu ae gahaꞌa we sala saꞌituinia?”

34Tamaka miina dakodiua mbaꞌinomo saꞌituini we sala dopotaga-tagaliꞌao laꞌae foliuno kabhala ne olotando andoa maitu. 35Nengkoha kaowu, nosaliꞌidamo koompulu hoduando anaguhuꞌino, maka nofohatoda ambano, “Dopoindalo dembali so neangka tabeano dombuhumai, doꞌondofao kadeki kafaraluundo mie bhaindo.” 36Pada anaꞌa, Yesus netondamo seemie anaꞌi kahobu, nofoehe-ehee ne wisendo maka nokakopue bhe nopugau, 37“Dotahima kaowu anaꞌi medando aini weo neaku, dotahimamo Idi. Dotahima Idi, suano kaowu o Idi, tamaka dotahima dua Tumudu kanau.”

Laꞌae pata foewangino, o sabhangka

9:38-41

Luk 9:49-50

38Nopugaumo Yohanes ne Yesus, “Guru, tawoha seemie nefolimba seetani nopake neamu, lasao taꞌeleꞌaane hampano suano mie mangkafino intaodiomu ini.”

39Tamaka Yesus notobhoosi, “Koise eleꞌaaneomua, hampano pae bhe so mehabuno giu timenteꞌaono namake neaku, lasao dua naꞌumumbu kanau. 40Ane miina dafoewangi, ingka o sabhangkamo. 41Amohatokoomu inia, kotu-kotuꞌu o mie maꞌangkoomu oe kafohoꞌu mbaꞌinomo hintimiu anaguhuꞌino Mesias, Omputo Fosalamatino, tetewei naetaa dawuano.”

Sabhaha giu nekodhosaꞌao

9:42-50

Mat 18:6-9; Luk 17:1-2

42“Ane nandoo mie mefekakolilinono totono lalono anaꞌi kahobu medando ini, sampe miinamo namarasaea ne Idi, selabhiꞌaku dakumantaiane kagili kontu ne wuꞌuno maka damotondue we teꞌi. 43Ane ibahano limamu naehabuangko dhosa, totoe; naetaa mesua surugaa nasembali kaowu limamu bhe mesua narakaa kohaambaliꞌae limamu, weo efi pata tipeonino. 44[Ne watu o kaꞌule-ule miina bhe kamatea, efino miina bhe kapeoa.] #9:44 Maꞌanano kanahakaa suhue dhamani; Yes 66:24 45Ane ibahano aꞌemu naehabuangko dhosa, totoe; hampano naetaa mesua surugaa weo kakempamu bhe daꞌumohoko weo narakaa kohaambaliꞌae aꞌemu. 46[Ne watu o kaꞌule-ule miina bhe kamatea, efino miina bhe kapeoa.] 47Ane ibahano matamu naehabuangko dhosa, sungkie; hampano naetaa mesua weo Kafopahintaꞌano Lahataꞌala nasembali matamu bhe daꞌumohoko weo narakaa kohaambaliꞌae matamu. 48Ne watu o kaꞌule-ule miina bhe kamatea, efino miina bhe kapeoa.

49Kapaꞌamo seemie-seemie damekangkiloanda kakadee-dee, peda adhono kapopanga so Lahataꞌala dofewaniuane gaha. 50O gaha daanumo netaa, tamaka ane nasimotembeꞌa, kiha-kiha damekakahaane dua ae? Dadiꞌanomo, tabeano membaliomu peda gaha, pometa-metaaꞌomu.”

Currently Selected:

Markus 9: mnbSD

Highlight

Copy