Markus 10

Pohunsaꞌa

10:1-12

Mat 19:1-9; Luk 16:18

1Nomaiꞌao ne itu Yesus nokalamo we kadieno Yudea bhe kadie we sewetano umeleno Yordan. Mie bhahi domaimo toha dolibue. Peda kaneano, Yesus nofoinaꞌudamo toha.

2Domaimo dua miendo Farisi, patudhundo damoꞌalae. Dofeenamo ambado, “Weo tubhono agamantoomu, bhahaa naembali o moꞌane nopohunsa bhe mieno lambuno?”

3Yesus notobhoosidamo ambano, “Nowaꞌangkoomu pahinta ae gahaꞌa anabii Musa?”

4Dotobhoosi ambado, “Musa miina nafoꞌeleꞌaoa dopohunsa, sumanomo debuhiane bhe suhano.” #Ul 24:1-4

5Ambano toha Yesus, “Musa nobuhiangkoomu pahinta anaꞌa hampano katuꞌano fotumiu. 6Kapaꞌamo pakatandano dhunia, Ompu Lahataꞌala nefokonandoo manusia, o moꞌane bhe hobhine. #Kej 1:27 7Dadiꞌanomo o moꞌane tetewei nahumunsa inano bhe amano maka naseꞌise bhe hobhineno, 8sampe kohoduando daembalimo seemie. Dadiꞌanomo andoa maitu paemo dahoduaꞌa tamaka seemie. #Kej 2:24 9Nefoseꞌiseno Lahataꞌala, koise dopogaatiane manusia.”

10Sahatondo se lambu, anaguhuꞌino dofeenaꞌaomo toha kafoinaꞌuno saꞌituini. 11Nofohatodamo ambano, “Ane o moꞌane nohunsa mieno lambuno maka nogaa toha bhe hobhine sigaoꞌano, nomonsuleꞌao mieno lambuno. 12Pedamo dua aitu ane o hobhine nohunsa moꞌaneno maka nogaa toha bhe moꞌane sigaoꞌano, nomonsule dua.”

Yesus nebarakati anaꞌi

10:13-16

Mat 19:13-15; Luk 18:15-17

13Nandoo dua mie meowano anaꞌi kahobu ne Yesus, defekadampada, tamaka anaguhuꞌino doꞌeleꞌaanda. 14Sanowohada peda maitu, Yesus noꞌamahakimo anaguhuꞌino bhe nopugau ambano, “Hunsaꞌanomo anaꞌi andoa itu damai se Idi! Koise eleꞌaandaomua, hampano mie medandomo andoa ini so mieno Kafopahintaꞌano Lahataꞌala. 15Amohatokoomu, kotu-kotuꞌu ane pae datumahima Lahataꞌala so mahintangino dadindo nameda anaꞌi kahobu, pae naembalia damesua weo Kafopahintaꞌano Lahataꞌala.” 16Pada nopugau peda anaꞌa, nokakopudamo anaꞌi maitu maka notei limano te wawondo bhe nobarakatida.

Mie hangkaea noꞌali damesua surugaa

10:17-27

Mat 19:16-26; Luk 18:18-27

17Wakutuuno Yesus noehe nakumala toha, gahaꞌa nomaimo seemie bhe notende. O mie aitu nofongkoha tuuno ne wiseno Yesus bhe nofeena ambano, “Guru, hintu metaano lalo, aeafa bhahaa so adumadiꞌao suhue dhamani?” 18Notobhoosimo Yesus, ambano, “Noafa gahaꞌa kona kanauꞌao metaano lalo? Ingka miina bhe metaano lalo, mpahinomo wutono Ompu Lahataꞌala. 19Ingka pandeꞌaanemo padaa pahintano Ompu Lahataꞌala, ‘Koe fopongko, koe monsule, koe mbolaku, koe membali sakusii kopaha, koe fobhohe-bhoheꞌi, fosibhala inamu bhe amamu!’ ” #Kel 20:12-16

20Ambano toha mie maitu, “Guru, kosasawiꞌae pahinta anaꞌa adhalangiemo mpini kaanaꞌiku.”

21Noꞌondo mie amaitu, Yesus noasiane maka nopugau ambano, “Tasehonda nekaemimua! Sulimo, asoe sabhaha fehebuaꞌamu, olino dawu-dawuandae mie mokae, maka meꞌawa arataa te surugaa. Mada anaꞌa maimo angkafi kanau.” 22Nofetingke pugauno Yesus naꞌa, nobatalamo lalono, lasao nokala. Nosabha handano mbaꞌinomo nohangkaea sepaliꞌa.

23Sapalusino aitu, Yesus nofolilimo matano maka nopugau ne anaguhuꞌino ambano, “Kaꞌali maka mie kokanandoo damesua weo Kafopahintaꞌano Lahataꞌala.”

24Anaguhuꞌino domente dofetingke pugauno naꞌa. Tamaka Yesus nopugaumo toha ambano, “Anaꞌiku, noꞌali daanumo damesua Kafopahintaꞌano Lahataꞌala. 25Nomuda seꞌulu kahumbau #10:25 Sakotuꞌuno: seꞌulu unta. namangka ne kabhentano deu bhe seemie hangkaea namesua weo Kafopahintaꞌano Lahataꞌala.”

26Dofetingke pugauno Yesus maitu sedhuluꞌa dua kamentendo bhe dokohedu, sampe dopugaumo sapada-pada andoa ambado, “Ane peda naꞌa, laꞌae dua so sumalamatino?”

27Yesus noꞌondodamo bhe nopugau, “Uumbe daanumo, so manusia pae bhe kapoolia nakumadhadhiaꞌa peda amaitu, tamaka so Lahataꞌala miina bhe pata nemondoino.”

Ponambo doangkafi Yesus

10:28-31

Mat 19:27-30; Luk 18:28-30

28Maka ambano Petrus ne Yesus, “Ingka insaodi ini tapadaemo tahunsae bhahi-bhahiꞌae maka taangkafiko!” 29Notobhoosimo Yesus, ambano, “Amohatokoomu! Kotu-kotuꞌu ane dohunsa lambudo, bhahitieꞌindo, inando, anaꞌindo bhahaꞌi kaampondo hampano doangkafi Idi bhe Bhihita Metaa, nandoo so neꞌawando. 30Ne dhamani aini daeꞌawa moꞌono paku kabhahino: o lambu, o bhahitie, o ina, o anaꞌi bhe kaampo, tamaka daenamisi dua kafodee-dee. We dhamani mbuhumai daeꞌawa dadi suhue dhamani. 31Kapaꞌamo dabhahi mie maꞌinduluno sumuli dambuhumai, mie mbuhumaino sumuli damaꞌindulu.”

Katolu pakuno Yesus nofohatoanda so kamateꞌano

10:32-34

Mat 20:17-19; Luk 18:31-34

32Yesus bhe anaguhuꞌino tangasano we laano sala dahumope we Yerusalem. Yesus nopaꞌindulu. Anaguhuꞌino domihiane lalondo, mie mangkafie doteꞌiane. Nosaliꞌimo toha anaguhuꞌino ompulu hoduano bhe nofohatoanda so netompaloino. 33Ambano, “Fetingkeomu! Aitu dahumopeomu we Yerusalem. Ne watu Anano Manusia - Idimo ini - damowae ne limando neangkaꞌindo imamu bhe pande-pande Kitabi. Andoa dabhotusie damongkoe. Mada anaꞌa damowae toha ne limando mie pata mandeꞌaono Ompu Lahataꞌala. 34Andoa naꞌa damele-elee, dakumapehasie, dahumambisiane habuta maka damongkoe. Tamaka ne katolu oleono nadumadimo toha.”

Kamesalondo Yakobus bhe Yohanes

10:35-45

Mat 20:20-28

35Pada aitu Yakobus bhe Yohanes, anaꞌino Zebedeus, domaꞌotimo Yesus maka dopugau ambado, “Guru, nandoo bhe kamesalo mani. Sio-siomo tumahimae!” 36Notobhoosimo Yesus ambano, “Amafaꞌiangkoomu gahaꞌa gaomiu?” 37Ambado toha, “Gao mani mpuu nahumato fopahintangi weo kakalabhiamu, insaodi ini taengkoha ne sohihimu; seemie ne suanamu, seemie ne kemamu.”

38Tamaka notobhoosida Yesus ambano “Ingka miina mandeꞌaaneomua maꞌanano kamesalomiu naꞌa. Mondoiꞌeomu mohoꞌuomu ne kampohoꞌuꞌa so kafohoꞌuꞌaku, tawa dakumadiuangkoomu oe kakadiuku?” #10:38 Maꞌanano: mondoiꞌeomu menamisiomu sabhaha kakadee-dee nameda so nenamisiku?

39“Tamondoiꞌe,” ambado. Yesus nopugaumo toha ne andoa, ambano, “Uumbe daanumo, mohoꞌuomu ne kampohoꞌuꞌaku bhe dakumadiangkoomu oe kakadiuku. 40Ampamo kaowu daengkoha ne suanaku bhahaꞌi ne kemaku, suano Idi so motantue. Kaengkohaꞌa anaꞌa pada dofontaa-ntaaꞌandae so mie nepilino Ompu Lahataꞌala.”

41Dofetingke peda naꞌa, anaguhuꞌi sigaoꞌano doꞌamahamo ne Yakobus bhe Yohanes. 42Tamaka Yesus nosaliꞌidamo maka nofohatoda ambano, “Ingka pandeꞌaaneomu, mahintangino sabhaha liwu pata mandeꞌaono Ompu Lahataꞌala dofodee-dee raꞌeatindo, neangkando nokii sepaliꞌa dofodhala pahintando. 43Nopoꞌala bhe hintimiu. So moindalono membalino kabhala, tabeano naꞌumondofao kadeki kafaraluundo mie bhaino. 44So moindalono membalino mie neangka, tabeano naembali palima-limando sigaoꞌano. 45Kapaꞌamo wutono Anano Manusia - Idimo ini - nomai pae naefeꞌondofaoa, tamaka nafoꞌondofao bhe nafowaꞌao inawano so katolosindo mie bhahi.”

Yesus nofekaꞌosa Bartimeus

10:46-52

Mat 20:29-34; Luk 18:35-43

46Yesus bhe anaguhuꞌino dohatomo we Yeriko. Dalumimbaki kaowu Yeriko, dobhahi mie mangkafie, gahaꞌa nandoo seemie kabunto nengkoha-ngkoha ne wiwino sala nesalo-salo. Neano Bartimeus, anano Timeus. 47Sanofetingke lumalono maitu Yesus miendo Nasaret, nokeimo kabunto naꞌa ambano “Yesus, sampuꞌano Daud, mobhela kanau lalo!” 48Dobhahi umamahakie so pae nakodiuꞌao, tamaka tanodhulu kahaaꞌi nokei, “Sampuꞌano Daud, mobhela kanau lalo!”

49Yesus nofetumpumo maka nopugau ambano, “Loꞌoiꞌeomu!” Lasao dosaliꞌi kabunto maitu bhe dofohatoe, “Fekatangka lalomu! Ehemo, nosaliꞌiko!” 50Tanolembi dhubano, nosieheꞌa, lasao nokala nopoꞌawaꞌao Yesus. 51Yesus nofeenaemo, “Amafaangko gahaꞌa gaomu?” Notobhoosimo, “Guru, gaoku afowoha.” 52“Kalamo,” ambano Yesus, “Hampano kaparasaeamu ne Inodi, moꞌosamo!” Wakutuu anaꞌa lasao nofowoha, maka noangkafi Yesus.

Currently Selected:

Markus 10: mnbSD

Highlight

Copy