Markus 11

Yesus nopesua we Yerusalem, dobhidha-bhidhae peda seemie omputo

11:1-11

Mat 21:1-9; Luk 19:28-38; Yoh 12:12-15

1Yesus bhe anaguhuꞌino domaꞌotimo Yerusalem. We owano Betfage bhe Betania, liwu ne laano kabhawono Zaitun, Yesus netudumo dohodua anaguhuno damaꞌindulu. 2Nofohatoda ambano, “Kalaomu we liwu te wise watu! Samesuaꞌomu, mohaomu seꞌulu anano keledai dotapue, miinaꞌo sepaliꞌa natisawikia. Lenseeꞌomu maka tondaeꞌomu se ini. 3Ane bhe so meenano, ‘Noafa lenseaneomu?’ fohatodaomu putae, ‘Nofaraluuꞌe Ompu, ingka pae naomponaa damosuliemo toha.’ ”

4Pada aitu dokalamo maka dowoha seꞌulu anano keledai, dotapue te wiseno lambu, ne wiwino kaangkaꞌa. Lasao dolensee. 5Mie meehe-eheno ne itu dofeenamo, “Noafa gahaꞌa lenseaneomu keledai itua?”

6Dotobhoosi peda pugauno Yesus saꞌituini, maka doꞌundaꞌaandamo dokala. 7Keledai aitu dotondae se Yesus, towuno dolempesiane pakeando mbali kaengkohaꞌano, maka nosawikie. 8Dobhahi tumalesaono pakeando ne kaangkaꞌa. Nandoo dua metalesaono haꞌano sau bhe hoo-hoono nealando we kaampo. 9Mie maꞌinduluno bhe mangkano kundono kosasawindo debhidha-bhidha ambado,

“Hosana, pudhi Ompu!

Notibarakati maino weo neano Ompu! #Mzm 118:25-26

10Notibarakati Kafopahintaꞌano awuantoomu Daud humatono ini!

Hosana, pudhi kaitaomu Lahataꞌala te wawono wawo!”

11Sahatono we Yerusalem, Yesus nopesuamo weo lambuno Lahataꞌala. Ne itu nofolili matano, tamaka mbaꞌinomo nohondomo oleo, Anoa bhe anaguhuꞌino ompulu hoduano dosuli we Betania.

Yesus nebhatataꞌiao puꞌuno ara

11:12-14

Mat 21:18-19

12Hato nomentae, tangasano dokala domaiꞌao we Betania, Yesus noꞌahomo. 13Nandoo se kodoꞌono nowohamo sepuꞌu ara nokohoomo. Nokalamo nofeꞌondoe bhahaꞌi kaowu bhe bhakeno. Gahaꞌa miina nakoniwohaa, taꞌo hoo, mbaꞌinomo suano wulano kakobhakeꞌano. 14Yesus nobhatataꞌiao sau aitu ambano, “Notanda aitu ampa suhue dhamani, bhe naseemie paemo bhe so momaano bhakemu!” Pugauno naꞌa dofetingkee dua anaguhuꞌino.

Yesus negihasi podaoano weo Lambuno Lahataꞌala

11:15-19

Mat 21:12-13; Luk 19:45-48; Yoh 2:13-16

15Pada aitu Yesus bhe anaguhuꞌino dohatomo toha we Yerusalem. Nopesua kaowu weo kadeteno Lambuno Lahataꞌala, Yesus negihasimo podaoano ne itu. Medhando mebhase-bhaseno dhoi bhe bhangko-bhangko kapahaasoꞌando dhaadhaha nobhansualeda. 16Miina naꞌumundaꞌaandaa daeowa pahaaso weo kadeteno Lambuno Lahataꞌala maitu. 17Pada aitu nofoinaꞌudamo ambano, “Notibuhi weo Kitabino anabii, ‘Lambuku dakumonae lambu kasambaheaꞌando sabhaha liwu. Tamaka hintimiu habueꞌomu mbali lia kaꞌonuꞌando mie modai!’ ” #Yes 56:7; Yer 7:11

18Neangkaꞌindo imamu bhe pande-pande Kitabi dofetingke dua kadhadhia amaitu, maka deꞌondofi akala damongkoe. Andoa doteꞌie, mbaꞌinomo mie bhahi domenteane kafoinaꞌuno.

19Nohondo kaowu oleo Yesus bhe anaguhuꞌino dohunsamo toha kota.

Yesus nofofoinaꞌuꞌao kaparasaea bhe sambahea

11:20-26

Mat 21:20-22

20Samentaeno Yesus bhe anaguhuꞌino dolalo toha ne owano puꞌuno ara endewi. Gahaꞌa dowohae nomatemo, nokekele bhe paha-pahakano. 21Petrus nofeꞌulaimo kadhadhia endewi, sampe nopugau ne Yesus, “Guru, soba ondo, puꞌuno ara nebhatataꞌiaomu maitu nomatemo!”

22Notobhoosimo Yesus ambano, “Parasaeaꞌomu ne Lahataꞌala. 23Amohatokoomu, kotu-kotuꞌu ane dopugau ne kabhawo aini, ‘Sangke wutomu maka oho wutomu we teꞌi’, tetewei nakumadhadhia, sumanomo koe nopoibhaha lalondo, tamaka doparasaea pugaundo maitu nakoꞌula. 24Dadiꞌanomo, amohatokoomu, o ae maka dua kamesalo weo sambaheamu, taparasaeamo umawae, maka tetewei umawae. 25Tamaka taenomo sumambahea, ane nokohobu-hobu totono lalomu ne mie bhaimu, maꞌafuane kadeki, neanomo Amamu te surugaa naꞌumamponiko dua. 26[Ane pae fomaꞌafuꞌao, Amamu te surugaa pae dua naꞌumamponiea dhosa-dhosamu.]”

Dofeenaꞌao kuasano Yesus

11:27-33

Mat 21:23-27; Luk 20:1-8

27Yesus bhe anaguhuꞌino dohatomo toha we Yerusalem. Tangasano Yesus nekala-kala ne kadeteno Lambuno Lahataꞌala, gahaꞌa domaiꞌiemo neangkaꞌindo imamu, pande-pande Kitabi bhe kamungkulaꞌi. 28Andoa ini dofeenaemo ambado, “O ae gahaꞌa kaengkohaꞌano kuasamu kaehabuꞌamu sabhaha giu maitu? Nowaꞌangko laꞌae gahaꞌa kapooli sampe mehabu bhahi-bhahiꞌae maitu?”

29Notobhoosidamo ambano, “O Idi ameena dua. Tobhoosi kanauꞌomu, maka amohatoangkoeꞌomu kuasa medando ae nepakeku aehabu giu andoa maitu. 30Kuasano Yohanes nofokadiu, nomaiꞌao ne Lahataꞌala kaa nomaiꞌao ne manusia? Tobhoosi kanauꞌomu!”

31Pada aitu dopuga-pugaumo sapada-pada andoa ambado, “Ane damugauꞌomu, ‘Nomaiꞌao ne Lahataꞌala’, tetewei namugau, ‘Noafa miina marasaeaꞌaneomu?’ 32Tamaka koasi dua damugauꞌomu, ‘Nomaiꞌao ne manusia.’ ” Andoa doteꞌi mie bhahi hampano kosasawindo mie dokona Yohanes seemie anabii. 33Dadiꞌanomo tadotobhoosimo, “Miina tamandeꞌaanea.” Ambano dua Yesus, “Ane peda naꞌa, pae amohatokoomu dua, kuasa medando ae nepakeku aehabu giu andoa maitu.”

Currently Selected:

Markus 11: mnbSD

Highlight

Copy