Juan 5

Jesús mynguera pente kuimbai vatamba vekua

1Kova mbai ikovaivi mbovy aramajyrã Jesús oho Jerusalenpe, Judiore jy'arete ñynoĩvape. 2Haipe Jerusalenpe avishare hõche he'iashua hyvache, ĩme'ẽ pente yy mbyhyruhapya hebreo ĩñeepe he'iashua Betesda#5:2 En los manuscrito antiguo se decian “Betesda” o “Betzata”., ĩmereva pandepo hõche. 3Haipe heta'ẽ ñeno ohova ñymbairasy vekuare; heshamba kũvaĩpiare, japava hareka vatamba vekuare, hãrõtẽ'õre yy õmyĩrã verã. 4#5:4 Arykai mbyparaha vekuape kova ñee koĩpĩ'õ (versículo) mba'ety hai.Haipe sapypy'ãĩ vejy pente Tũpa jokueva my'õmy verã yy, hãrã yy my'õmyãrã tynonde vejypya, kuerahe mbairasykue. 5Hãma haire mbytepe ĩme'ẽ pente kuimbai 38 ãñoma ñymbairasyva. 6Jesús hesha ñenotẽ'i yvyperã, hareka kuaa kuriã kyrã'irã, pyrãndushu: Ripotara rykuera? 7Hãrã kuimbai ñymbairasy'ia heishu: Sheja, mba'ety rãnga mbava shymbyvejypy verã yy õmyĩmãrã; potatẽ avejypyva, yngava ñymytynondejy shyhevi. 8Jesús heishu: Pũ'ã, hupi ndurupa, ekuajyvy! 9Haipevãĩ hoka kuimbai kuera, hupi huparã vatajy. Hokava iko putu'uava jy'ara ẽrã, 10hãrã Judiore juhuvisha heishu hoka kuimbai kuerava: Putu'uava jy'ara rãnga'ẽ, ẽãnde ryraha verã ndurupa. 11Tẽvã hai heishu reta: Shymynguerava rãnga heisheje: “Hupi ndurupa, ekuajyvy”. 12Haipe haire pyrãndushu: Mbavara heindeje: “Hupi ndurupa, ekuajyvy?” 13Tẽvã kuimbai kuãã mbavara mynguera, shara kuareta hetava haipe'õ mbyteivi Jesús õhẽjy oho. 14Haivi Jesús heshajy kuimbai tũpaoperã heishu: Ã'ẽ rykuerama. Mãĩkavi, ãteñoma japokui mbai porãmbava, mãhẽ jehundekui mbai porãmba'eiteveva. 15Ko kuimbai oho Judiore juhuvisha ẽvãpe, haipe mbeushu reta Jesús mynguerava. 16Hãrã Judiore moña jyre Jesús, shara putu'uava jy'arape hokava mbai japo. 17Tẽvã Jesús heishu reta: Sheru rãnga mba'apoñõĩ hai ã'ẽpeve, hãrã she amba'apoñoĩ jyve. 18Kova rehe Judiore potaiteve jukajyre Jesús, shara japo pente mbai japohamba verã putu'uava jy'arape harekajy ñimbivache'i hãndi Tũpa, hei Tũpa haiva Tuu.

Tũpa Tay ñymbaikatukue

19Haivi Jesús heishu reta: Añetevape hai pee, Tũpa Tay katuãã japo maĩnunga ijuhuvireii; Tuu hesha japovãĩ japo jyve. Opa maĩnunga Tuu japova, Tay japo jyve. 20Shara Teru haihu Tay, hãrã opa mbai heshakashu hai japova rupii; hãmã heshakave teriposhu maĩnunga tivishaveva, kyrã mbyrypymãĩ verã. 21Tuu mũpũãjyva rãĩmi mano vekuare hareka meẽjyshu tykove, kyrãĩ jyve Tay meẽ jyveshu tykove hai pota meẽshuare. 22Hãrã Tuu jahẽãhe kuaretare, koñeĩ meẽshu Tay mbaikatu jahe pyryrehe verã, 23opaiteva kuaretare õmombai verãre Tay, Tuu õmombaiva rãĩmi. Tay õmombaimbava, õmomba'eã jyveshu Tuu hai mbou vekua. 24Ãñeteĩte hai pee, she haiva henduva hareka jyrojahea shymbou vekua, ĩmemare tykove opambava. Jahehããpohe shara hasama ñymanoivi tykove opamba kyty. 25Ãñeteĩte hai pee, ouma ara hareka ã'ẽvãĩpo, manovare hẽndukui Tũpa Tay ĩñee hareka hẽndushua kuerajypokui. 26Shara Tuu ĩmere ijehe tykove, kyrãĩ jyve Tay, meẽshu tykove hai reko ijehe verã. 27Hãrã Tũpa meẽshu mbaikatu jahe pyryrehe verã, shara hai kuareta Tay. 28Avy pykyje kyrã haiperã. Vãhẽpokui ara mano vekuare, hendu verã jyve shiñee, 29hareka puãjypo ñotỹã vekuaivi. Hãrã heko kavivare kuerajypokui reko verã tykove, tẽvã mbai porãmba japo'i vekuare kuerajypokui jaheahe verã.

Jesús japo vekua heshaka hai ĩmereva mbaikatu

30She, shijuhuvii katuãã mbai ajapo. She ajahe pyryrehe Tũpa heisheva rãĩmi, hareka hekope kavipo ajahe pyndyrehe, shara ajapoã she aipotava; koñeĩ Sheru shymbou vekua potavãĩ ajapo. 31Sheii aijeta kavi ai shijeherã, kova shiñee hai vekua mba'ẽãpo, 32ĩme'ẽ yngava ijeta shyreheva, hareka aikuaa añeteva hai hei shyreheva. 33Juan Bautista pypyrãndukashurã vẽkua, hai añeteva mbeupe. 34Tẽvã aikoteveã kuaretare ijeta kavi shyrehe; hareka ãmbe'uipe, peojepe verã jyve. 35Juan rãnga hai mbai myhendyava hareka sapeva, potatẽ sapy'aite pyvyapipy hai mykõĩvãpe. 36Tẽvã Juan hei vekuaivi ĩme'are mbava ijeta kavive shyreheva. Hãma maĩnunga ajapova, hai Sheru japokasheva, hokava heshaka kavi ãñete Sheru shymbouva. 37Sheru shymbou vekua ijeta kavi shyrehe, ajemaĩ pyhenduãã hai ijetarã pyheshããvãĩjy marãvara Hai. 38Hai ĩñee icheã pyndypyape; shara pyrojãã hai mbou vekua. 39Pee rãnga piñymbo'eka kavihe Tũpa ĩñee kuatiape'õ, shara pimoãtẽ pyheshapy tykove opambavarã, ajemaĩ Ñee mbyparahava ijetatẽ shyreheva, 40tẽvã patẽy pei ãĩvape pyreko verã hokava tykove. 41She ahekãã kuaretare ijeta kavi shyrehe verã. 42Tẽvã she apyrykuaa kavi, hareka aikua Tũpape pyhaihuã. 43She rãnga ai Sheru heepe, tẽvã shymyvãhẽãpi; hãrã ĩme'ẽ ijuhuvii ouvarã, ĩmerã pymyvãhẽposhu haikui. 44Marãrapo piroja shyrehe, pota kuareta retaĩ ijeta kavi pyndyreheva, hareka pirojããhe Tũpa penteĩ'õ? 45Avy pimõã porãã aijeta pyndyrehekui Sheru hỹnonde. Porãmba ijeta pyndyrehe verã rãnga hai Moisés, pirojapihe vekua. 46Hãma Moisés pirojaherã, pirojatẽ jyve shyrehe verã, shara hai shyrehe mbypara kuatia. 47Tẽvã pyrojãã Moisés mbypara vekuarã, hãmera marãpo pyrojajy shiñee?

Currently Selected:

Juan 5: TPJ

Highlight

Copy