Lucas 11

Jesús mboihe mboireare marãrapo jurure

1Pente arape, Jesús oho ñymboi pente hendape. Opama ñymboirã mboirea penteva heishu: “Yreja, yrỹmboivehe marãrapo jurureha, Juan mboiva rãĩmi mboirea retape”. 2Jesús heishu reta: Pirurerã pere: “Sheru vate arapy rẽĩva, toñemombai ndyree. Tou rẽĩvãpe'õ ryheva. Tijijapo nde ripotava, ko yvy'ĩãrẽ vate arapy'õ rãĩmi. 3Opa ara pevarã meẽ'ore ho'ua verã. 4Hejareii yryhevi mbai porãmba japoa vekua, shara ore hejareii jyveshi mbai porãmba japo yryrehevare. Avy ma'ẽĩhe to'aha yrypya ãhã verãpe, yryrekyshi mbai porãmbava”. 5Jesús heijyshu reta: Ñañonoshu peeva, pente ĩmere ñi'ĩrũrãrea, pyhare mbytepe oho hentape heishu: “Shi'ĩrũ, porykaveshe mbahapy pãhã, 6shara pente shi'ĩrũ kurite mbyryivi vãhẽ ou shyrẽntape, hãma mba'ety'are maĩnũnga ameẽshu verã”. 7Ñañonoshu ñi'ĩrũ oo ivĩĩ heishu: “Avy'ei shymangãtuã'ẽ; ãmbotyma rãnga õche, shyrayre ãñenoma'ãĩ hãndi; katũã'ãpũã ameẽnde maĩnunga”. 8She hai pee, ñatẽytẽ pũã meẽshu mãĩnũngava ñi'ĩrũ, potãã hykũaĩ ou magãtuã'ẽjyrã, pũãñoĩpo meẽshu opa mbai hai ikotẽvẽa. 9Hãrã haijy pee: Pirure Tũpaperã, meẽpo pee; pyhekarã, pyvãĩposhu; pyhẽno hãrã õche pe'ahapo pee. 10Shara jurureva, me'ẽãñoĩposhu; hãrã hekava, vãhẽposhu, hareka õchepe hẽnõvã, pe'añoĩposhu. 11Mbavara terure mbytepe, tay jurureshu pãhãrã, meẽposhu ita? Maĩrã, jurureshu pirarã, piraĩte verã meẽraposhu mboi? 12Maĩrã jurureshu uru hipiarã, meẽraposhu vãkyrãpe? 13Pee piniñarõva pikatu mbai haikavivãĩ pymeẽshua pyndyrayre, ñopyĩãra hai Peru vate arapy'õ meẽñoĩposhu Espiritu Santo jurureshua.

Jesús he'iahe ĩmerea mbaiposhy ñymbaikatu

14Jesús mohẽshi pente kuimbai mbaiposhy miña'ẽngureva. Mbaiposhy õhẽmashirã, ña'ẽngu vekua ĩjetajy, kuaretare opa mbyrymaĩ reta. 15Tẽvã ĩme'ẽ heiva: “Beelzebu, mbaiposhyre juhuvisha rupii rãnga, ko kuimbai mohẽ mbaiposhyre”. 16Yngavare pyahããshu verã Jesús, jurureshu reta mbaikavi heshaha verã vate araivi ouva. 17Tẽvã Jesús kuaa'ẽ haire pyape'õrã, heishu reta: Mburuvishare ijupi pũãva, hareka ñyrãrõva opapo ñymbai; pente oope'õre ijupi pũãva, opaĩpo ñymbaĩ jyve. 18Kyrã jyve Satanas ẽvãpe'õ ryheva pũã ijeherã, marãrapo pyrãta'ẽ? Kyrã hai pee shara pereshyrehe, Beelzebu mbaikatu rupii ãmohẽva mbaiposhyre. 19Hãma Beelzebu rupii mbaiposhyre ãmohẽrã, pyndyryhevare, mbava ñymbaikatu rupiira mohẽ mbaiposhyre? Hãrã Pymboivare japova rupii ijyhesha, pee pijavyva. 20Tũpa mbaikatu rupii rãnga she ãmohẽ mbaiposhyre, hãma hokava he'ise Tũpa ẽvãpe'õ ryheva vãhẽma peeva. 21Hãma Jesús hei ko ñee ñymyhã'ãnga: Pente kuimbai pyrãtava ñymboka ryheve, vy'ape ñyngarekohe hoorã, opa hoo'ipe'õre haikavi'ẽ. 22Tẽvã ou ynga kuimbai pyrãtãveshivarã, hekyshi ñymboka jyroja'ihea, haivi hekyshi vekuare mẽmẽshu ñi'ĩrũre. 23Potamba ñimi'ĩru shyreheva oñemoĩ shyrehe; hãrã shymborymbava ãmynoverã timity, opa momohẽ.

Mbaiposhy oujyva

24Hãma mbaiposhy õhẽ kuimbaivirã, oho iko yvy haivimbaipi putuu verãipi heka; heshãmarã, hei: “Ahajypo shyrẽntape, ãhẽ vekuaivi”. 25Hãrã oujymarã hesha oo typeihava hareka opa ñonoa kavijyva rãĩmi. 26Hãma oho veru 7 mbaiposhy porãmba'aiteveshiva, hãrã opa ichepy reta kuimbai. Hãrã ko kuimbai ikoveama arykaiva rãĩmi, heko porã'ãĩtevejy tynonde vekuaivi.

Vya añeteĩteva

27Jesús ijetateri'ẽ vẽkua, pente taupe hetavare mbyteivi sapukerã hei: Vy'apo'i taupe ndyveru vekua ko yvy'ĩãrẽ, hareka nymykambu'i vekua! 28Jesús heishu: Vy'apo jyve Tũpa ĩñee hendu hareka japova!

Kuareta heko porãmbare jurure mbaikavi heshaha verã

29Hetavema kuaretare ñymbatyherã, Jesús õñepyrõ hei: Kuaretare ã'ẽvã hai tykove ñarõva, jurure ñynoĩ mbaikavi heshaha verã. Tẽvã heshahakãposhu reta; koñeĩpo heshahakashu Tũpa ĩñee mbeu'ia Jonas ryheva. 30Jonas ẽvã rãĩmi heshaha verã, tenta Ninivepe'i vekuare pevarã, kyrãpo kuareta Tay kova kuareta ã'ẽ ñymoñava vãre pevarã. 31Kuareta ã'ẽvãre ñimbivache arape, taupe huvisha vasu rovai kyty'õ, pũãpokui hareka ijetapo pyndyrehekui Tũpa jahe pyndyrehe verã. Shara ko taupe huvisha vasu ou yvy japyvaivive hendu verã Salomon ñy'ãrãndukue; ã'ẽ kope ĩme'ẽ mbai vasuveshiva Salomon. 32Kuareta ã'ẽvãre ñimbivache arape, Ninivepe'õre pũãpojyvekui hareka ijetapo pyndyhekui Tũpa jahe pyndyrehe verã. Shara haire oujy Tũpa jykoty, henduma Jonas mbeu Tũpa ĩñeerã; hãrã ã'ẽ kope ĩme'ẽ mbai vasuveshiva Jonas.

Mbai sapeka ñandyretepeva

33“Mbaveã myhendy mbai sapeka ñono verã ñemi'ẽ verãpe, maĩrã, ñono verã mbai hyru ipe, vateñõĩpo ñonoha sapeshu verã iche ouvare. 34Ndyrete sapeka rãnga hai ndyresa; hãrã ndyresa haikavirã opaite ndyrete sape jyve; tẽvã ndyresa porããrã, ndyrete tĩmimbiape'ẽ. 35Rỹmãi kavipo, mãhe sapekava ẽẽ ndyreheva, ikojyshi timĩmbiva. 36Ndyrete opa sapea kaviherã, mba'etyhe tĩmimbivarã, opa mbai ryhesha kavipo, mbaisapeka sape kaviva rãĩmi”.

Jesús ijeta pohyhe fariseo hareka Moisés mbypara vekua pyrỹmboi'iheare

37Jesús poima ijetarã, pente fariseo jurureshu oho karu hãndi verã hentape. Hãrã Jesús oho, vapy mesape. 38Hãma fariseo hesha Jesús jypoiã karu verãrã, mbyrymaĩ hesha hokavarã. 39Tẽvã Ñandeja heishu: Pee fariseore ĩãrẽĩ pijohe yy ho'uhapya hareka yyare; tẽvã pyndypya tynyhẽ manarõse hareka piniñarõkue. 40Tykove mbaimba kuaava! Pikuãra ĩãrẽ japova, japojy hapyperãme? 41Hãma pymeẽ pã'ãpova mba'etyrea retape, hãrã ky'ãpo'ẽkui pyndypya. 42Tengapope fariseore! Pymeẽva Tũpa ña'ãpova diesmo, menta, hareka ruda ryheva, hãndi opaite tĩmĩtykue; tẽvã pimbijiche hekope kavi'õ hareka Tũpa jyhaihukue. Hoka'ẽhai pijapo verã, pymeẽñoĩpo diesmo, tẽvã pypyryhaihupo hareka pyndyreko kavipo. 43Tengapope fariseore! Potañoĩ Judiore ñymbatyseape vapyhapya tynonde'õ pyvapypy, hareka potañoĩ pe vataha'õĩpi pynymarãnduha mbaivasuva rãĩmi. 44Tengapope Moisés mbypara vekua pyrỹmboi'iheare hareka fariseore, hova mokue'iare! Pyndy'ova manova ñotyhã vekua heshahambava, kuaretare kuããrã hasañynoĩ'ĩãrẽ. 45Haipe Moisés mbypara vekua pyrỹmboi'ihea heishu: Pyrỹmboi'ia, ko rereva rãnga yrỹmymãrãka jyve. 46Tẽvã Jesús hei: Tengapope Moisés mbypara vekua pyrỹmboi'iheva!, piñonova kuimbaire ĩãrẽ mãĩnũnga pohyva katumba jepyhea, tẽvã pypokõĩmbahepea. 47Tengapope! Pumupũãvã Tũpa ĩñee mbeu'iare ñotyhã vekua hendakuepe, pynytynondeva arykaivare juka vekua! 48Kyrã, pee pymbeu haikavi peeva pynytynõndevare japo vekua; haire juka Tũpa ĩñee mbeu'ia, haivi pee pumũpũã hendakuepe manovare ñotyhã verãpe. 49Hãrã Tũpa ñymbai kuaakuepy hei kavi pyndyrehe: “Ãmondoposhu reta Tũpa ĩñee mbeu'iare hareka apostolre; a'ãmore jukapo retakui hãrã ĩrũre heshatãrã moñapo retakui”. 50Tũpa jurureposhukui kuaretare ã'ẽvãre, opaite Tũpa ĩñee mbeu'iare jukahava huvy ĩñohẽ vẽkua, ko yvy japoharãvãĩ. 51Hãma Abel huvykueivive Zacarías huvykuepeve, jukaha vekua altar hareka tũpao pãũpe. Ãñete hai pee, opaiteva jaheapo pyndyrehekui hokava rehe. 52Tengapope Moisés mbypara vekua pyrỹmboi'iheare! Piiñimbi'ijapihe mbai kuaakue pe'ahapyarerã; peemba picheva hareka pyma'ẽĩãhe iche yngavare. 53Hãma Jesús opa hei kovarã, Moisés mbypara vekua pyrỹmboi'iheare hareka fariseore poshyite jyreshu, hãrã õñepyrõ opavareii pyrãndushu reta, 54ñeñemĩ jyre, hesha verã javyãrapo ĩñee rupii, kyrã ĩmere verãre mbaivarapo heihe reta.

Currently Selected:

Lucas 11: TPJ

Highlight

Copy