Lucas 8

Taupere Jesús mboryreare

1Haivi Jesús oho hãndi 12 mboireare heta tenta vãsu hareka tentamire õipi, ñimiñee hareka mbeu Tũpa ẽvãpe'õ ryheva. 2Kyrã mi'iru jyve heta taupere mbaiposhy mohẽ shi vekuare hareka mynguera vare mbairasyivi. Haire mbytepe ẽ Maria, Magdalena he'iashua, Jesús mohẽ shi vekua 7 mbaiposhyre. 3Oho jyve Juana, Chuza hyreko, Herodes jy kyrypoti ñyngareko ihea; hareka Susana, hãndi heta yngare mboryva imẽreare ryheve.

Ñymyhã ãnga ñimity ia ryheva

4Heta õhẽva kuaretare tenta retaivi hesha verã Jesús, hãrã heta ñymbaty reta. Haipe mbeushu reta ko ñee ñymyhã'ãnga: 5Pente ñymity'ia õhẽ ñõty verã timĩty. Hãrã ma ẽtymãrã, ĩme'ẽ oava pehupi, opa pyrõãhe, hareka vyrare opa hou. 6Ĩme'ẽjy oava ita mbytepe; heñoteã opa jipi yvy ñakyãshurã. 7Ĩrũre oajy juu heta õ mbytepe, heñotẽa ñanava jyvache hẽñõ hãndirã opa jasoi. 8Tẽvã ĩme'ẽ timĩty oava yvy kaviape. Hẽñorã ia 100 peve pente timityivi. Jesús opa hei kovarã hỹnatu heishu reta: Japysa iare, tyhendu.

Mbai verãra ñee ñymyhã ãnga

9Hãma Jesús mboireare pyrãndushu: Mbaivara he'ise hokava ñee ñymyhã'ãnga? 10Jesús heishu reta: Pee rãnga Tũpa pynymbykuaaka mbai iko verã Tũpa ẽvãpe'õ ryheva; tẽvã yngava retape aijetashu ñee ñymyhã'ãnga rupii, hãrã mãĩte'ivare heshambava rãĩmi, hareka hendutẽvare kuãã reta.

Jesús mbeu kavijy ñee ñymyhã'ãnga ñimity ia ryheva

11Kova rãnga he'ise ñee ñymyhã'ãnga ñimity'ia ryheva: Timity rãnga hai Tũpa ĩñee; 12timĩty oava pehupi, hai henduva Tũpa Ĩñee. Tẽvã ou Ãña opa hekyjyshi pyaivi Ñee kaviva, potã jyroja hareka ohojeperã. 13Timĩty oa vekua ita mbytepe rãnga hai Tũpa Ĩñee hendurã, vy'ape rojava; tẽvã hapo pukuãrã, sapy'aiteĩ jyroja, oumashu pya hã'ãvaperã, poi jyroja. 14Timĩty oava ñana mbytepe hai henduva Tũpa Ĩñee. Tẽvã ohorã mbeve katu kangy, jepy'apy, mbai pota kuere, hareka mbai porãmba pota japo i, hãrã i'ãã. 15Timĩty yvy kaviape oava hai henduva Tũpa ĩñee, pya kavipe hareka hekope kavi nãtuva, hareka japova ñee hendu vekua, hãrã ia kavi hasa asytẽ'ia.

Ñee ñymyhã ãnga mbai sapeka ryheva

16Mbaveã myhendy mbai sapeka ñono verã mbai hyrupe maĩrã ojeahea ipe; vateĩpo ñono iche ouvare sapehe verã. 17Kyrã jyve mba'ety mbai javai õ heshamba verã, mba'ety mbai ñemiape õ kuaamba verã, hareka õhẽmba verã kõĩvape. 18Hãrã pyhendu kavipo kova: Ko imẽrea mẽ'ẽhave poshu hetavere verã, tẽvã mba'ety reva mishi imẽte rea mikue opapo hekyajy shi.

Jesús ishy hareka tyvyre

19Haivi ou Jesús ishy hareka tyvyre hai ẽvãpe, tẽvã katuã vahẽ ohoshu reta hetaite kuaretarã. 20Ĩme'ẽ mbeushua Jesús: Ndesy hareka ndyryvyre katuape jyre, pota ndyresha reta. 21Jesús heishu reta: Shesy hareka shichey reta rãnga Tũpa ĩñee hendurã japovare.

Jesús joko yvytu vasu hareka yy ñarõva

22Pente arape Jesús jupi kanoape mboireare hãndi, hãrã heishu: Jahasa yyvasu hyvaisho kyty. Haivi oho reta. 23Haivi ohoma retarã Jesús oche. Haipe sapy'ãi vãhẽ yy iãrẽ yvytu vasu ñakua ouva, õñepyrõ kanoa opa tynyhẽshi reta yy miñapyvỹi verãima õ. 24Haivi momba reta Jesús perã heishu: Pyrỹmboi'ia! Pyrỹmboi'ia! Ñañapỹvyima rãngapo! Jesús puã hareka poshy ryheve heishu yvytu vasu hareka yy porãmba ouva. Haipe poo'ẽrã ara kavijy. 25Haivi Jesús heishu mboireare: Mbaivara ikoshi pirojakue? Tẽvã haire mbyrymaĩ hareka kyje ryheve pyrãndu ijupe reta: “Mbavarajy ko kuimbai ijetashu yvytu hareka yyvasurã, japoshu heiva?”

Kuimbai Gadarape ia mbaiposhy ĩmerea

26Hasype vãhẽ jyraha yvy Gadarape yyvasu hyvaishu kyty, Galilea hyvache. 27Jesús vejymarã vãhẽ oushu pente kuimbai hoka tentape õ, kurimba mbaiposhy ĩmereva. Ñimimonde jymba hareka ikojy mbava hentape, tã õvere õipi i. 28Heshama Jesús perã iñesu hỹnonderã sapuke: Jesús, Tũpa vateve õ Ray, mbaivara nde imẽryre shendie? Airure nde avy jahe shyrehe. 29Kyrã hei shara Jesús heishu mbaiposhy õhẽshi verã. Hetajy mbaiposhy pysy jyshu, hãrã pyta verã pente hendapẽi, ñapitĩha kadenape ipo hareka ipyre, tẽvã opaĩ myndoso ijuhuvi, hãrã mbaiposhy rahashu yvy ikoambaipi. 30Jesús pyrãndushu: Mãrãra hei o ndyree? Hãrã hai hei: Legion he ia rãnga she. Kyrã hei shara heta jyre mbaiposhy ichepy vekua. 31Hãrã ko mbaiposhyre jurureshu Jesús, avy mondo verãre yvykua vasupe. 32Haipe mbyryã karu ñynõi kushi hetava yvyturusure, hãrã mbaiposhyre jurureshu Jesús ma ẽihe ichepy verã kushire hetepy. Hãrã Jesús ma ẽihẽ reta. 33Hãmã mbaiposhyre õhẽshi ko kuimbai hãrã opa jyraha ichepy kushire, kushi hetava vateivi opa oapy yyvasu, haipe opa mano. 34Kushi ñyngareko iheare heshama ikovarã, opa myngyje, hãrã oho mbeu reta tentaipi hareka ñuu hupi mbaivara iko. 35Hãmã kuaretare opa jyraha mãihe iko vekua, vãhẽ jyraha Jesús ẽvã perã hesha reta kuimbai mbaiposhy õhẽshi vekua, vapy ẽ Jesús hỹnonde, ñimi mondema hareka hai kavi jyma ẽ; hãrã opa kyje reta. 36Haipe heshavare mbeushu reta, marãra myngueraha hoka mbaiposhy ĩmere vekua. 37Haipe Gadarape'iare jurure jyreshu Jesús ohẽjy verã haivi, kyjeite jyrerã. Jesús jupi kanoa perã ohojy. 38Ko kuimbai mbaiposhy õhẽshi vekua jurureshu Jesús mi ĩrũ verã, tẽvã Jesús he'iãshu oho hãndi verãrã heishu: 39Ekuajy nyrẽtape, mbeu Tũpa japo ndyreheva. Ko kuimbai ohorã, õñepyrõ mbeu opa tenta retaipi Jesús japohe vekua.

Jairo tajy hareka taupe ñymbairasy ia Jesús mondeva pokohea

40Jesús oujyma yyvasu hyvaishoivirã, kuareta hetava vy'ai jyre, shara opaiteva hãrõ jyre. 41Haivi vãhẽ ou pente kuimbai Jairo he'iashua, Judiore ñymbatyseape õ huvisha, haipe iñesu Jesús hỹnonderã, jurureshu oho verã hẽtape; 42shara ĩmere pente'ia tajy, 12 ãñoma rea, mano verãima õ. Jesús oho marã, kuareta hetava oho hipi, hãrã opa jopy rahashu reta. 43Haire mbytepe ẽ pente taupe japomava 12 ãño hasyva tuvy vasuivi, opama meẽva ĩmerea pajeva retape, tẽvã mbaveã katu mynguerashu. 44Ko Taupe ñymbojahe Jesús haykueivirã pokohe mondeva hymbeyre, haipe vãi ñandu pytashi tuvykue. 45Haipe Jesús pyrãndu: Mbavara poko shy rehe? Opaiteva ñomi reta pokohaheva, Pedro hareka ñi'irure hei: Pyrỹmboi'ia, ko kuareta hetava rãnga opa ndasoi hareka opaivi nymaña ñynõi reta, hãrãra rỹpyrãndujy: “Mbavara poko shyrehe?” 46Jesús hei jyvyi: Ĩme'ẽ poko shy reheva, aikua ãi imẽ amynguerava shy mbaikatupyrã. 47Hãmã taupe kuahe ñemiãrã, ryry ryheve ou iñesu Jesús hỹnonde. Haipe mbeu opavare hỹnonde mãrã'irãra pokohe, hareka marãra kuera. 48Haipe Jesús heishu: Shyrajy, rirojarã rykuera. Kapyryĩ ekuajy. 49Jesús ijeta teri õ vãhẽ ou Jairo ẽvãpe pente jokueavarã heishu: Ndy rajy manoma, ỹteño mãihe pyrỹmboi'ia. 50Jesús hendu hokavarã heishu Jairo: Avy kyje. Jyrojaĩño, hãrã ndyrajy ohojepepokui. 51Vãhe jyraha Jairo hentaperã. Jesús mã ẽiã he iche hãndi yngavare, koñeĩ Pedro, Jacobo, Juan, hãndi kuñatãĩray ishy hareka tuu. 52Opaite jaheo hareka mbasy ñynõihe reta kuñatãiray manorã. Tẽvã Jesús heishu reta: “Avy pijaheo. Ko kuñatãĩray manoã, ochei rãnga'ẽ”. 53Haivi joje jyre Jesús, shara kuaa reta manomava. 54Jesús pysy ipoperã, hỹnatu ijetashurã hei: “Kuiñatãi ray, pu ã!” 55Haipe hykovejyrã, puã; hãrã Jesús me'ẽkashu hou verã. 56Tuu hareka ishy reta opa myngyje; tẽvã Jesús heishu reta, potamba mbavape mbeuvare ko iko vekua.

Currently Selected:

Lucas 8: TPJ

Highlight

Copy