Mateo 20
20
Ñee ñymyhã'ãnga mba'apo'iare ryheva
1Huvisha vasu vate arapy'õ, ova koo ija õhẽva kõ'ẽĩ heka mba'aposhu verã ju'uva rẽndape. 2Opa ijeta kavi hãndi reta mba'apo verãre, hareka mbyhepyshu verã hoka arape pente nikere, haivi mondoshu reta ju'uva rẽndape. 3Haivi kõ'ẽĩ nũnga õhẽjyrã heshajy ikorei'iare plazape. 4Hãrã heishu reta: “Pekuã pymba'apo jyveshu uva rẽndape, hekope kavipo ãmbyhepypekui”. Hãrã haire opa jyraha. 5Koo ija õhẽjy ara mbyteipima'orã, haivi ka'arumima ohorã kyrãĩi japojy. 6Haivi ka'aruitemarã hykuãĩ õhẽ ohojy plazape, heshajy haipe mbaimba japo'õre, hãrã heishu reta: “Marã'ĩrãra pee pikorei mbaimba pijapopẽĩva?” 7Haire heishu: “Mbaveã rãnga yrokue mba'apoha verã”. Haipe heishu reta: “Pekua pymba'apove shu'uva rẽndape, hekope kavipo ãmbyhepypekui”. 8Pyntumarã, koo ija heishu ju'uva rẽnda ñyngareko'ẽheã: “Hẽno mba'apo'iare meẽshu reta japova hepykue. Tynõnde mbyhepyshu reta taykueite ichevare, tynondeite icheva retapo taykueite rymbyhepyshukui”. 9Hãma jyveru ka'aruiterã ichevare, pente ara mba'apova rãĩmi pepenteĩ me'ẽãshu reta nikere. 10Haivi vãhẽ jyveru jyve tynondeite ichevare, moãtẽ hetave me'ẽãshu hai retarã, tẽvã ĩrũre rãĩmi me'ẽã jyveshu reta pente nikere. 11Hãrã me'ẽãmashu mba'apoheare hepyrã, õñepyrõ ijeta porãã jyreshu koo ija. 12Hei reta: “Taykue icheva reta rãnga sapy'aiteĩ mba'apo, tẽvã rymeẽshu reta ore rymeẽva rãĩmi, ore rãnga ko ãño mba'apoava kuarasy hakupe”. 13Tẽvã koo ija heishu penteva: Shi'ĩrũ, ajapoã rãnga ndyrehe porãmbava. Ja'ẽãra ijupeje ambyhepynde verã pente nikere? 14Me'ẽãma rãnga nde rijapova hepy, ekuajy nyrẽtape. Potai ameẽ jyveshu taykue icheva ameẽ ndeva rãĩmi. 15Katuãra she sha'ãpova ajaposhi pota ajapova? Maĩrã shypya kavirãra ndyposhy she? 16Kyrãpo tynonde'õre mbytaykueha, hareka taykue'õre mytynõndeapo. Hetavape rãnga hẽnohã, tẽvã mbovyi'ẽ pyhyrõãvare.#20:16 Arykai mbyparahava imere: “Heta ẽ hẽnoava, tẽvã mbovy hekahapya”.
Jesús mbeujy mano verã
17Jesús oho Jerusalen kytyrã raha 12 mboireare hã'ẽĩ õpe, hãrã heishu reta: 18Jaha rãnga jai Jerusalen kyty, haipe kuareta Tay mẽ'ẽhaposhukui pai juhuvishare hareka Moisés mbypara vekua pyrỹmboi'iheare, haire jururepo shukaha verã. 19Haivipo shyme'ẽãkui haimba Judiovare ipope, ñymbyhory shyrehe verã, shunũpa hareka shymbysavavaha kurusure. Tẽvã mbahapy arapepo shykovejyrã ãpuãjykui manovare mbyteivi.
Santiago hareka Juan ishy jurureva
20Haivi ñymboja Jesús ẽvãpe Zebedeo hyreko, membyre hãndi Santiago hareka Juan, hãrã ĩñesu Jesús hỹnonde jurureshu verã pente mbai. 21Jesús pyrãndushu: Mbaivara ripota? Hãrã taupe heishu: Aipota ereshu, kova shymemby mõkue'iare tyvapykui rẽivape mburuvisha vasurã, pente ndakata kyty hareka ĩrũ ndasu kyty. 22Tẽvã Jesús heishu reta: Pee pikuãã pirureva. Pẽĩra pyhasa'asy verã, she ahasa'asy verã rãĩmi?#20:22 Pẽĩra pyhasa'asy verã, she ahasa'asy verã rãĩmi? Mbyparahava ĩmerea: “Peera katu pimbyupy shy yy hyruivi she ãĩmbyu aĩpy verã?” Haire hei: Õĩha rãnga hasaha verã. 23Jesús heishu reta: Ãñete rãnga pyhasa'asypokui she rãĩmi. Tẽvã pyvapy verã shasu hareka shakata kyty sheeãpo ameẽpe, Sherupo meẽ hokava hai mỹhẽvã'ẽshua retape. 24Hãrã ĩrũre 10 mboireare hendurã, poshy jyreshu tyvyre mõkue'õ. 25Jesús hẽnoshu retarã hei: Pee rãnga pikuaa mãrãra jyrojambare yngava tenta juhuvishare, hareka mãrãra karaivasure reko'asyshu reta. 26Tẽvã pynymbytepe ha'ẽã kyrãĩ verã. Ĩme'ẽ pota vateve'ia pynymbyteperã, opava retapo jokuereiishu, 27hareka pota tynonde'ia pynymbyteperã, ikopo jyve jokuehareirea yngava retape. 28Kyrã, kuareta Tay oũã ñyngareko pyryrehe verã, jokueha'i verã rãnga jyve hareka meẽ verã tykove, mondo jepe verã hetavape mbai porãmbaivi.
Jesús mynguera mokue heshamba kuvãĩpia
29Hãrã Jesús hareka mboireare õhẽma tenta Jerikoivirã, heta'ẽ kuaretare ohova haykue. 30Mõkue heshamba kuvãĩpiare vapy ñynõĩ pe hỹmbeype. Henduma Jesús hai hasa ohovarã, sapuke jyre: Sheja, David Tay yryparekomĩtẽvẽ! 31Heta'ẽ poshyshuare pota jasakarã, tẽvã haire hỹnatuve sapuke jyrerã hei: Sheja, David Tay yryparekomĩtẽvẽ! 32Haipe Jesús oho ñymboyrã, hẽno mokue heshamba kũvãipiarã heishu: Mbaivara pipota ajapo pyndyrehe? 33Haire heishu: Yreja, pota rãnga heshaha jyve kũvãĩpi. 34Haipe Jesús parekoiterã pokoheshu hesare, hãrã haipevãĩ heshamba kũvãĩpiare, heshajy hareka jyrahahipi reta.
Currently Selected:
Mateo 20: TPJ
Highlight
Share
Copy
Want to have your highlights saved across all your devices? Sign up or sign in
©2023 LETRA Paraguay
