Ap'u 18
18
A Mlin Eia ituran ti Aisak ipaiak
(Isrel 13:2)
1Sarei, a Mlin Eia iv'iv'en Hin ani asn pla neier a Mamrei, naran ilak a karliu na nmah kanuisan. Naran lera nut ivuvet. 2#Isrel 13:2.Iklau eia kalar dui artl avp'tir mima asn nut ilak. Naran ilar, iln nmah kanuisan kavrvr kadav'a ti ipavr ip'as anr, kasisihpu a nadep' asnr, kavr ti a, 3“Mlinak, ipavr ti nakm krn ip'as a kana, nv'i dui a m'akarienam, mdav'el uam. 4Nmiman anh, pam'ahu a ti apauirma naui pa a ti pavsila tlm'i, sarei pavlak a nut m'aln a m'lk nai laha. 5P'euirma pna p'ret papa kinkin a ti ipani ti pavrn ipap'as. Sarei ti pavp'hv'el, sena ti kvrama asn m'ertu na m'akarienam'i.” Laha, avvr ti a, “Pani ipanep'a nut nakm ktvr sarei.”
6Sarei, a Epraham irakn kadav'a al nmah kanuisan a Sera kavr ti a, “Palalahaml katven panikin ipatl na vlaua p'as, sarei kauhei kan p'ret kinkin.” 7Sarei, a Epraham ivrvr kadav'a asn nut plukan avlak, kauada malamal p'as na pluk iamk, katau a malakal iamk. Laha, malakal nen irakn kakap'rhei ilalahml a ti ipam'ah. 8Sarei, ilev' pata m'a m'ilik m'a m'it na pluk la atkap'rha sarei ha, katau anr. Sarei, kap'tir asnr a nv' nai naran avhatat.
9Laha, avvr ani kavvr ti a, “?Tav'etam, a Sera, hini?” Ivr ti a, “Hin ilak atlahatu, al nmah kanuisan.”
10 #
Rum 9:9. Sarei, ivr ti a, “Nvrdaui, p'em'alet ml asnm arna naran laha arna pai lahadei. Parni, a naum, a Sera, ipalev' dui ipamk.” Naran lera, a Sera ilak a karliu na nmah kanuisan, la iter a tahn ha, karn ti ivr si lera. 11A Epraham m'ei a Sera atrv'i sera m'ertarep', paiar itstudau. A Sera itsiv' sera naran ipalev' sei. 12#1 P'ita 3:6.Naran a Sera irn v'nen lera, ivtma papa arna nln kavr ti a, “Kana m'ei a mlinak nttrtarep' sarei. ?P'ern ipap'as a ti p'em'atr m'a dui uam?”
13Laha, a Mlin Eia ivr an a Epraham, kavr ti a, “?A Sera ivtma sena v'ata? ?Inap'i hin ivrvr a hin, kavr ti a, ‘?Kana p'elev' sei ipanap'i naran nttrtarep' sarei?’ 14#Luk 1:37.?Si kinkin ihua par asn a Mlin Eia? Arna napn nttu sarei anh, p'em'alet ml asnm, arna pai lahadei. Arna naran lera, a Sera ipalev' a natn dui ipamk.”
15V'eti a Sera ip'ep'ni kavr ti a, “Kana navtma,” sena ti idedrn. V'eti ivr ti a, “Ihei, nakm kvtma.”
A Epraham itu tamat sena v'anu a Satam
16Sarei, ardu lahara avp'tir kavp'a navanel iv'a a Satam. Laha, a Epraham iv'el m'er kav'av'ar isusupa arna navanel. 17Laha, a Mlin Eia ivr ti a, “Nkatutuan an a Epraham sei nrn ti p'ani, 18sena ti, nvrdaui, a Epraham ipav'i pt v'anu lil ipamk, nut hua nen ipalil ipastudau, laha p'emhmah a v'anu udlani arna nadep' sanan. 19Sena ti Kana nrdu mamahi, a ti hin ipatu v'nen hua anr a natn, m'er arm'ertu udlani avlak al nmahan, a ti apavsapei kavuada mamh navanelan a Mlin Eia, kavan sei ip'as kaviviln. Laha, a Mlin Eia ipatu sei itvr sarei an a Epraham ani.” 20Laha, a Mlin Eia ivr ti a, “Si stuar arm'ertu a Satam m'ei a Kamara ilil istudau kav'ara eia asnk. 21Hilaha P'av'a auei kala p'kl istu lera, inep'a nut ntrn sarei itnap'ei. V'aha, ipavr ti ihei, Kana p'erndaui.”
22Sarei, ardu lera arvavp'la nahar karv'el karln nut lera karv'a a Satam, v'eti a Epraham ip'tir uam arna nahn a Mlin Eia. 23Laha, a Epraham imima asnn kavr ti a, “?Nakm krndu ti putakm anr arm'ertu p'klr iviviln m'er arm'ertu p'klr istu? 24?Ipavr ti m'ertu p'klr iviviln arnellm' (50) avlak arna v'anu lera, krndu ti putakm a v'anu lera? ?Kv'ah ti mkarn istu anr arm'ertu a Satam sanar m'ertu viviln arnellm' (50) la avlak arna v'anu ra? 25Nakm mkan sei ipanap'i lera. Mkarp m'ertu p'klr iviviln m'er arm'ertu p'klr istu. Mkahani ti m'ertu p'klr iviviln apavnap'amk m'er arm'ertu p'klr istu. Si lera ikahei asnm. A Mlin Eia, la ipav'ana hua m'er arm'ertu udlani arna nadep' ha, Hin ipan sei uaki iviviln.”
26Laha, a Mlin Eia ivr ti a, “Ipavr ti p'epasla m'ertu aparnellm' (50) arna nut a Satam la p'klr iviviln ha, nkautakm a v'anu udlani lera sanar.”
27Sarei, a Epraham ivrprani, kavr ti a, “Kana nv'i neiev' m'a tih nap' uaki, v'eti nma a ti p'ev'ana m'ei a Mlin Eia. 28?Ipavr ti m'ertu p'as aharnellm' (50), v'eti arnelv'a pln ilm' (45) uaki, nakm putakm a v'anu lera udlani sanar m'ertu la arnelv'a pln ilm' uaki ha?” Laha, a Mlin Eia ivr ti a, “Ipavr ti p'epasla m'ertu aparnelv'a pln ipalm' (45) uaki, nkautakm a v'anu lera.”
29Sarei, a Epraham ivr an Atua ml kavr ti a, “?Ipavr ti m'ertu p'as aparnelv'a (40) atlera?” V'eti Atua ivr ti a, “Nkahani sanar m'ertu arnelv'a.”
30Sarei, ivri ml kavr ti a, “Mlin Eia, nlm imahrer a kana ipavr ti p'ev'ana m'ah ml. ?Ipavr ti m'ertu p'as aparneltl (30) atlera?” Laha, Atua ivr ti a, “Nkahani ipavr ti p'epaslar m'ertu aparneltl (30) atlera.”
31Sarei, ivri ml kavr ti a, “Hilaha p'ev'anadina li ml m'ei a Mlin Eia ipav'amk. ?Ipavr ti m'ertu p'as aparnelru (20) atlera?” Atua ivrprani, kavr ti a, “Nkautakm ani sanar m'ertu arnelru.”
32Sarei, ivri ml kavr ti a, “Mlin Eia, nlm imahrer a kana, p'ev'ana m'ah ipav'amk mau. ?Ipavr ti m'ertu p'as aparnal atlera?” Atua ivrprani, kavr ti a, “Nkautakm ani sanar m'ertu arnal.” 33Sarei, a Mlin Eia iln nut lera, naran itv'ana sarei m'ei a Epraham. Laha, a Epraham iv'el kadahau a utan.
Currently Selected:
Ap'u 18: nmb
Highlight
Share
Copy
Want to have your highlights saved across all your devices? Sign up or sign in
© 2023 Presbyterian Reformed Church of Australia
