Ap'u 19
19
A Mlin Eia iutakm a v'anu a Satam m'a v'anu a Kamara
1Laha, ensel la arru hara arma arna nut a Satam knarev', naran a Lut ilak asn pn liu na nut a Satam. Laha, a Lut ilar kap'tir kadav'a asnr kaiaul nahn ier nadep' kavr ti a, 2“U armlinak, parma eim al nmahak, nv'i dui na m'akarienam'i, karlak lihat laha karsila tlm'i, sarei parthal ml m'etav'aran karsapa navanelam'i.” Laha, arvr ti a, “Ikahei, lihat laha kam'em' p'erlak av'aran uaki arna v'anu laha.”
3V'eti imiman anr ihua sena ti irn ti aparsapei karma eim al nmahan. Laha, arsapei karv'a eim al nmahan. Sarei, hin ien tim'ah lil sanar. Kan p'ret iis nen ihei, sarei kavhatat. 4V'eti naran adarm'atr uam, ardu na v'anu lera, arv'i ardu a Satam, m'ertarep' m'er malakal, m'ertu udlani avrama kavmldenkar nmahan a Lut. 5#MAH 19:22-24.Kavv'ara an a Lut, kavvr ani kavvr ti a, “?Ardu la arma asnm lihat laha ha, hiri? Pauirmar av'aran asnm'em' a ti p'vm'atr m'er.”
6Laha, a Lut iv'a av'aran kap'leskar liu a tahn, kavr ti a, 7“Tv'alk, nmiman a kam'i ihua, mavan si stu lil lera. 8Pavlei, kana a natk tav'et arru adarm'atr m'a dui. Nmiman a kam'i ihua, pavm'ahu a ti p'euirmar av'aran asnm'i. Kam'i pavan sei kvrn ti pavan anr. V'eti mavan si stu kinkin anr ardu laha, sena ti arma eim al nmahak sanan.”
9V'eti hir avvr ani ml, kavvr ti a, “Paruh, matukar kam'em',” kavvri ml kavvr ti a, “Aulaha ikalak p'arei atlaha, v'eti ien hin, inep'a m'ertu irn ti ipav'ana hua m'a m'ertu nakl. Hilaha p'vutakm anh ipasiv'r.” Laha, avtp' a Lut ihua, nut pa ti apavkapr liu. 10V'eti ardu lera arah lm'ar karrv'luei a Lut ima eim asnr al nmah, karp'leskar liu. 11#2 Armlin 6:18.Sarei, karani ti m'ertu, la avlak av'aran a karliu na nmah ha, m'ertarep' m'er malakal, m'atar iprs udlani. Hir avuaut a karliu dav'a, v'eti ahavpaslei. Sarei, np'r istu, avlni.
12Sarei, ardu lera arvr an a Lut karvr ti a, “?Arm'ertuam kinkin avlak atlaha? ?Ipavr ti iv'i a leliam, v'aha a natm dui m'er tav'et, v'aha m'ertuam kinkin arna v'anu laha? Pav'av'ar kavruh arna v'anu laha. 13Sena ti kam'em' p'erutakm a v'anu laha, sena ti a Mlin Eia ila ti avan si stu arna nahn, istu istudau. Sarei, itep'a kam'em' a ti p'erutakm ani.”
14Sarei, a Lut iv'a kav'ana m'er a lelian la aparm'arit m'er a natn tav'et ha, kavr ti a, “Parp'tir karruh arna nut laha, sena ti a Mlin Eia iputakm a v'anu laha.” V'eti a lelian arv'ah ti hin ivr mamln uaki.
15Naran neiel itpeia, arensel arrakn an a Lut karvr ti a, “Pap'tir, kalev' a naum m'er a natm tav'et arru la avlak atlaha ha kavruh, imahei ti pavmln m'a v'anu laha udlani naran p'erutakm ani.” 16#2 P'ita 2:7.V'eti naran arla ti hin ikanut uam, a Mlin Eia irn istu ani. Laha, karuada lm'an, m'a lm'an a naun, m'er a natn tav'et arru, karuirmar av'aran na v'anu lil. 17Laha, naran atruirma sarar av'aran, nki iamk ivr anr, kavr ti a, “Pavruh, imahei ti pavram'a. Mavklum'alet ml, v'aha mavlak ml arna nut kinkin arna m'lden laha. Pavruh kavrav'a eia asn ptha, imahei ti pavmln.”
18V'eti a Lut ivr anr kavr ti a, “U, imahei, armlinak. 19Palei, ktv'iv'en sera vtmienam a kana, nv'i dui na m'akarienam, kamhmah a silv'ienak istudau. V'eti nkaruhdri kadav'a eia arna ptha lera, imahei ti der kinkin ipaier kana, laha p'am'a. 20Palei, v'anu lera imima uaki a ti p'eruh kadav'a aranan, kasusupa uaki. Pam'ahu a ti p'eruh kadav'a atlera. V'anu lera isusupa uaki, laha kana p'esilv'.”
21Laha, dui lera ivr ani, kavr ti a, “Palei, kana ntm'ahu sarei a sei kmimani. Nkautakm a v'anu la kmimani ha. 22Parakn karuh kadav'a atlera, sena ti nkdan si kinkin uam, dav'a nakm paier v'anu lera.” Sena si lera atu naha v'anu lera iv'i a Suar.
23Hin a Lut ier a Suar naran neiel itpeia sarei. 24#Mat 10:15; 11:23,24; Luk 10:12; 17:29; 2 P'ita 2:6; Sut 1:7.Sarei, a Mlin Eia itep'a salva m'a nep'v'en irs dan eia arna v'anu a Satam m'ei a Kamara inep'a sera nu iu. 25Kautakm udlen v'anu lera, m'a m'lden udlani, m'er arm'ertu udlani avlak arna v'anu lera, m'a si udlani isi arna nadep'.
26 #
Luk 17:32. V'eti a naun iklup'la, itauatah a hin, laha kadama kanep'a sera nav'et iv'i sul, kah hin.
27Laha, a Epraham ithal m'etav'aran nrnren kadav'a a nut ip'tir itauamu arna nahn a Mlin Eia, 28kap'a nut a Satam m'ei a Kamara, m'a nadep' udlani iv'i m'lden atlera. Kala ti ienap' iendan arna v'anu lera kadav'a eia. Inep'a sera ienap' iendan al tah lil na nap', la iv'en istudau ha. 29Itauatah a ti Atua iutakm a v'anu udlani arna m'lden, Hin iv'ahur a Epraham. Sarei, kav'av'ei a Lut, kani hin iruh a p't nut na der lil. Der lil lera itu hin arna nut a Lut ilak aranan itauamu.
30Sarei, hin a Lut iln nut a Suar kadav'a eia kalak arna ptha m'er a natn tav'et arru, sena ti hin idedrn a ti ipalak a Suar. Iv'av'ar a natn tav'et arru, kavrav'a kavlak al navap iamk. 31Avlak dav'a, titiamu ivr a titiatah kavr ti a, “A tetiad ittrtarep' dau. Dui apavm'atr m'a nakd ihei atlaha, ipanep'a nut m'ertu udlani arna nadep' avani inap'ei. 32Pama, p'erani ti a tetiad ipam'n naui m'iel, sarei karm'atr m'ei, a ti p'erlev' a natn, nut na ti nl nam'elan ipaiak uam.” 33Laha, arani ti a tetiar im'n naui m'iel lihat lera. Sarei, titiamu iv'a kam'atr m'ei, v'eti a tetian iarndu naran im'atr m'ei v'aha naran ithal ml.
34Sarei, m'ih nen, titiamu ivr a titiatah kavr ti a, “Parn, kana ntm'atr sarei m'ei a tetiak lihat nanv'. P'erani hin ipam'n naui m'iel ml dika lihat, sarei nakm pav'a kam'atr m'ei, a ti p'erlev' a natn, nut na ti nl nam'elan ipaiak uam.” 35Laha, arani ti a tetiar im'n naui m'iel lihat lera ml. Sarei, titiatah iv'a kam'atr m'ei, v'eti hin iarndu naran im'atr m'ei v'aha naran ithal ml.
36Sena si lera, a vnpan a Lut arru kartkar asn a tetiar. 37Titiamu ilev' a natn dui iamk, katu nahan iv'i a Muap. Hin iv'i a tetiar ardu a Muap udlani dav'a ier dika. 38Sarei, titiatah ml ilev' a natn dui iamk, katu nahan iv'i a P'enami. Hin iv'i a tetiar ardu Amun dav'a ier dika.
Currently Selected:
Ap'u 19: nmb
Highlight
Share
Copy
Want to have your highlights saved across all your devices? Sign up or sign in
© 2023 Presbyterian Reformed Church of Australia
