Ap'u 20
20
A Epraham ihap'il m'ei Apimelek
1A Epraham iln nut lera ml kav'el kadav'a kalak arna nut a Kerar. V'anu lera iter a p't nut na nut a Kates m'ei a Sur. 2#Ap'u 12:13; 26:7.Laha, a Epraham ivrur tav'etan, a Sera, kavr ti a, “Hin iv'i a v'nk.” Sarei, Apimelek, iv'i mlin a Kerar, itep'a m'ertuan avrav'a kavlev' a Sera.
3V'eti Atua ima asn Apimelek naran im'atr lihat kala sei, kavr ani, kavr ti a, “Parn, nakm pam'a sena tav'et la klav'i ha, sena ti a naun itiak sarei.”
4V'eti Apimelek idamima asn a Sera uam, laha kavr ti a, “?Mlin Eia, Nakm parp v'anu la iviviln ha? 5Dui nen ivr a kana kavr ti a, ‘Hin iv'i a v'nk.’ Tav'et nen ml ivr ti a, ‘Hin iv'i a m'ank.’ Kana nen si lera arna v'ahien p'asak. Kana narn ti p'en si kinkin la iaviviln ha.”
6Atua ivr ani ml naran im'atr kala sei, kavr ti a, “Aau, nrndu ti kan si lera arna v'ahien p'asam. Sena si lera, ntukarh a ti mkahan si stu kamlen Kana. Sena si lera nam'ahu a ti paier p'akn. 7V'eti hilaha patum'alet a tav'et lera an a naun ml, sena ti hin iv'i pruvet. Sarei, hin ipatu tamat sanam a ti pasilv'. V'eti ipavr ti mkatum'alet ani, nakm parndu mamh a ti kam'i pavram'a, nakm m'er m'ertuam udlani.”
8Sena si lera Apimelek ithal m'etav'aran nrnren, kav'ara anr arm'ertu na m'akarienan udlani, kavrp'ep'a si udlani lera a ti apavrni, laha ardu lera avdedrn istudau. 9Sarei, Apimelek iv'ara an a Epraham kavr ani, kavr ti a, “?V'ata la hin kani a kam'em' ha? ?Kana nen si stu lil v'ata anh, hin krn ti putakm a kana m'a v'anuak sanan? Nakm kan si kinkin iaviviln a ti pan a kana.” 10Apimelek ivr an a Epraham ml kavr ti a, “?Nakm kla v'ata hin kan si lera?”
11A Epraham ivr ti a, “Sena ti nv'ah ti m'ertu arna nut laha ahavdedrn an Atua, laha avrndu ti apavrp kana sena tav'etak. 12V'eti nvrdaui, hin iv'i a v'nk. Iv'i a vnpan a tetiak, v'eti iav'i a vnpan a uniak. Sena si lera, hin ima kav'i tav'etak. 13Sarei, sei itu hin iv'i ti naran Atua iani ti kana nln nl nam'elan a tetiak, nvr a tav'et, kavr ti a, ‘Pamhmah a kana arna si laha. Arna nut udlani p'erv'a, nakm pavr ti a, “Hin iv'i a m'ank.” ’ ”
14Sarei, Apimelek ilev' sivsiv, m'a pluk, m'er dui m'a tav'et na m'akarien, kataur an a Epraham, katum'alet an a Sera, iv'i a naun ml ani. 15Apimelek ivr ani ml kavr ti a, “Palei, nadep' udlani la klei ha iv'i nadep'ak. Nakm pav'li nut krn ti palak aranan.” 16Hin ivr an a Sera ml kavr ti a, “Palei, kana nttu sera nav'et iv'i silva iv'i tausen ilm' (500,000 vt) an a m'anm. Si lera ipulla mamihienam arna nah nelnal avlak m'ah, m'er nelnal unanut. Hilaha, kviviln arna nah nelnal.” Si la iani ra, inep'a ti iv'ana hua m'ei a Sera.
17Sarei, a Epraham itu tamat asn Atua, laha Atua imhmah an Apimelek, m'a tav'etan, m'er tav'et na m'akarienan udlani, sarei avlev' sei ml. 18Sena ti a Mlin Eia ittukar sera tav'et udlani al nmahan Apimelek a ti akavtkar ml, sanan a Sera, iv'i tav'etan a Epraham.
Currently Selected:
Ap'u 20: nmb
Highlight
Share
Copy
Want to have your highlights saved across all your devices? Sign up or sign in
© 2023 Presbyterian Reformed Church of Australia
