Ap'u 23
23
A Epraham iul nadep' a ti ipatin a Sera
1A Sera im'a naran paian inelnal iv'amk pln inelru neltl nen isaru (127). Ki lera iv'i paian a Sera udlani. 2Hin a Sera im'a arna nut a Kirsat Apa (iv'i nut a Eprun arna v'anu a Kenan). Laha, a Epraham ima a ti ipatakal sanan a Sera, kavalau sanan.
3Sarei, a Epraham ip'tir kaln nut na m'ien, la itu hin asnn ha, kadav'a asnr a natn a Het, kavr anr, kavr ti a, 4#Isrel 11:9,13; Parei 7:16.“Kana nv'i v'anudl kadama kalak asnm'i atlaha. Pavtu kana nadep' pa kinkin ipamk ipav'i nkak, a ti ipav'i nut p'etinkar nah m'ertuak, a ti nkalar ml naran kinkin.”
5Laha, hir a natn a Het avvrpren a Epraham, kavvr ti a, 6“Mlin, pav'rn a sei kam'em' p'vvr anh. Nakm kv'i mlin lil iamk klak a p't nut nam'em' atlaha. Nakm uaki paledu navap p'as ipamk asnr navapam'em' udlani, a ti patinr m'ienam a nln. Pala nki ip'as kasiv' nki udlani. Kam'em' kinkin ikahamk iktukarh a ti patinr m'ienam al navapan.”
7Sarei, a Epraham ip'tir kaiaul asnr ardu na v'anu lera, avv'i a natn a Het. 8Kav'ana m'er kavr ti a, “Ipavr ti kvrn ip'as a ti kana p'etinkar nah m'ienak, pavv'rn a kana. Pavua v'nenak laha kavuirv'a asn a Evrun, iv'i a natn a Suhar, sanak. 9A ti ipatu kana navap a Mahpela, la iv'i nkan ha, kadater arna pna nadep'an. Nvr ti ipatu kana arna ulien nen ipaviviln ani, ipav'i nkak. Ipav'i nut p'vtin m'ertuam'em' asnm'i.”
10Hin a Evrun ilak asnr a natn a Het. A Evrun, iv'i dui a Het, ivrpren v'nenan a Epraham arna nahr a natn a Het, hir udlani la avrama asn pn liu na v'anuan ha, kavr ti a, 11“Ikahei, mlinak. Parn kana. Nadep' lera p'etau anh m'a navap iter aranan. Ntau anh arna nahr tv'alk. Ntau anh uaki. Patin m'ertuam im'a.”
12Laha, a Epraham iaul arna nahr m'ertu na v'anu lera, 13kavr an a Evrun arna drlna m'ertu na v'anu lera, kavr ti a, “Nmiman anh a ti parn v'nenak uaki. P'etu nav'et anh sena nadep' laha. Palav'i asnk, laha p'etin m'ertuak im'a atlera.”
14Laha, a Evrun ivrpren v'nenan a Epraham kavr ani, kavr ti a, 15“Mlinak, parn kana. Uliena nadep' laha iv'i nav'et inelnal iv'av'a (400). Asnd, si lera iv'i si kaka uaki. Patin m'ertuam im'a uaki.” 16A Epraham iv'rn a v'nenan a Evrun. Sarei, a Epraham ispan nav'et katau an Evrun, iviviln a nut itaui inap'ei arna drlnar a natn a Het, nav'et nen inelnal iv'av'a (400), iviviln a nav'et aul a sei nakl.
17Laha, nadep'an a Evrun la iter a Mahpela ha, imima asn nut a Mamrei, iv'i nadep' m'a navap iter aranan, m'a nai udlani iter arna nadep' lera udlani a nl dari nen udlani, 18ataui a ti ima kav'i nadep'an a Epraham, arna nahr a natn a Het, avv'i nelnal udlani avrama asn pn liu na v'anu nakl.
19Itauatah a si lera, a Epraham itin a Sera, iv'i a naun, al navap arna nadep' a Mahpela, iter mima asn nut a Mamrei (iv'i nut a Eprun) arna v'anu a Kenan. 20Laha, a natn a Het avtu nadep', m'a navap iter a nln, ima kav'i nkan Epraham, ipav'i nut atin m'ertu.
Currently Selected:
Ap'u 23: nmb
Highlight
Share
Copy
Want to have your highlights saved across all your devices? Sign up or sign in
© 2023 Presbyterian Reformed Church of Australia
