Ap'u 24
24
Avul tav'et sanan Aisak
1Laha, a Epraham iv'i m'ertarep' dau, paian inelnal istudau. A Mlin Eia itmhmah sarei an a Epraham arna si udlani. 2Laha, a Epraham ivr a dui na m'akarienan, nki itrtarep' kasiv' m'ertu udlani avm'akaran al nmahan, kap'aur sian udlani, kavr ti a, “Nmiman anh, pah lm'am kaier p'akk a nv' lihak. 3Laha, p'ani ti paturan arna nahan a Mlin Eia, iv'i Atua na nut eia, kav'i Atua na nut a nadep', a ti mkalev' tav'etan a natk asnr tav'et arna nut a Kenan la nlak asnr ha. 4V'eti nakm pav'a a utak asn nl nam'elak kalev' tav'et ipamk ipav'i a naun a natk, iv'i Aisak.”
5Laha, dui na m'akarienan ivr ani, kavr ti a, “Nsarei tav'et lahara ikarn ti iksapa kana kadama arna v'anu laha. ?Ipavr ti ipanap'i lera, krn ti p'elev' a natm ipam'alet ml arna v'anu nakm kma dan?”
6V'eti a Epraham ivr ani, kavr ti a, “Pav'ahah, imahei ti palev' a natk ipam'alet ml atlera. 7A Mlin Eia, la iv'i Atua na nut eia ha, katlev'la sera kana al nmahan a tetiak, m'a v'anu na nl nam'elak, kavr a kana, katuran ani kavrdaui, kavr ti a, ‘P'etu nadep' laha an a natm udlani,’ Hin ipatep'a enselan ipatauamu arna nahm, dav'a ti palev' tav'et ipav'i a naun a natk ipadan atlera. 8V'eti ipavr ti tav'et lera ikarn ti iksapah, turanien laha ikauadah ml. V'eti malev' a natk ipam'alet ml atlera.” 9Sarei, dui na m'akarienan iah lm'an kaier p'akn a Epraham, iv'i mlinan, a nv' lihan, katuran ani sena si lera.
10Laha, dui na m'akarienan ilev' kam'el inal, avv'i nkan a mlinan, kav'el, kaua sian a mlinan udlani. Iv'el kadav'a a nut a Mesuputemia, arna v'anuan a Nahur. 11Kani ti kam'elan avsisihpu av'aran a v'anu, asn tah na nauei knarev', arna naran tav'et avrama nakl a ti apavev' nauei. 12Laha, ivr ti a, “U Mlin Eia, kv'i Atuan a mlinak, a Epraham, pamhmah a pariak dika, kav'iv'en vtmienam an a mlinak, iv'i a Epraham. 13Palei, np'tir asn tah na nauei. A natr tav'etar ardu na v'anu laha avrama a ti apavev' nauei. 14Laha, pani ti uarav'aran la nmiman ani, kavr ti a, ‘Patu paketam a nadep' a ti p'em'n naui ki,’ ipavr ti hin ipavr ti a, ‘Pam'nm'n, p'av' ki ml katau a kam'elam a ti apavm'ni,’ pani ti hin ipav'i tav'et la nakm ktaui ipav'i tav'etan a dui na m'akarienam, iv'i Aisak ha. Arna si lera p'erndu ti ktv'iv'en sera vtmienam an a mlinak.”
15Dav'a, naran idv'ana uam, parn, a Ripeka ima. Hin iv'i a natn a Petuel, la iv'i a natn a Milka ha, iv'i tav'etan a Nahur, titiatah nan a Epraham. Iua paketan arna van. 16Vitar nen ip'eset a ti apalei, iv'i uarav'aran, dui kinkin idam'atr m'ei. Laha, iv'a auei al tah na nauei kav' paketan kadama eia ml. 17Sarei, dui na m'akarien ivrvr a ti ipalei kavr ti a, “Pam'ahu a ti p'em'n nauei kinkin al paketam.”
18Laha, ivr ti a, “Mlinak, pam'ni.” Sarei, irakn katu paket arna lm'an katu nauei ani a ti ipam'ni. 19Naran itm'ahu sarei ani a ti ipam'nm'n, ivr ti a, “P'av' nauei sena kam'elam ml, dav'a ti hir udlani apavm'nm'n.” 20Sarei, irakn kahsran nauei iter al paketan al tav lil, iv'i nut kam'el avm'nm'n nakl, sarei kavrvr ml asn tah na nauei a ti ipav' ki ml, dav'a ti iav' naui m'am'ar kam'elan udlani. 21V'eti dui nen ip'ei uaki, kalak ms, a ti iparndu ti a Mlin Eia itmhmah sarei a alan, v'aha ihei.
22Dav'a, naran kam'el atvm'nm'n sarei, dui nen ilev' hapir iamk la idv ha, iv'i pna sekel, ani a kul, kalev' lulu iru ani a kul, ardv arv'i sekel inal. 23Laha, ivr ti a, “?Nakm kv'i a natn a hin ak? ?Pavr a kana, m'lnak iak al nmahan a tetiam a ti kam'em' p'vlak atlera?”
24Ivr ani, kavr ti a, “Kana nv'i a natn a Petuel, iv'i a natn a Milka, la ilav'i asn a Nahur ha.” 25Ivr ani ml kavr ti a, “Nina m'a tim'ah iak asnm'em', m'a m'lnam'i a ti pavlak.”
26Sarei, dui nen iaul kan ptn iv'a a nadep' kapatei a Mlin Eia, 27kavr ti a, “Npatei a Mlin Eia, iv'i Atuan a mlinak, a Epraham, la ialev'la vtmienan m'a v'nen duan asn a mlinak ha. Kana, naran nsapa navanel, Atua iv'ev'a kana dama kaier nmahar tv'aln a mlinak.” 28Laha, vitar nen ivrvr kavr si lera anr arm'ertu avlak al nmahan a unian.
29Hin a Ripeka a m'ann iak, nahan iv'i a Lapan. Laha, a Lapan ivrvr kadav'a av'aran asn dui ilak asn tah na nauei. 30Naran itla sera hapir m'a lulu arna lm'an a v'nn, katrn sera v'nenan a v'nn, iv'i a Ripeka, naran ivr ti a, “Dui nen iv'ana m'a kana inap'i lera,” hin iv'a asn dui nen. Laha, parn, ip'tir asn kam'el asn tah na nauei. 31Laha, ivr ti a, “Pama eim. Nakm la a Mlin Eia imhmah anh istudau ha. ?Inap'i hin kp'tir av'aran? Sena ti ntmhmah sarei a nmah m'a m'lnar kam'el.”
32Sarei, dui nen ima asn nmah kahsla sitrav arna kam'el katu nina m'a suada kam'el, katu nauei a ti ipasila tln m'er tlr dui avlak asnn. 33Laha, atu tim'ah ani a ti ipahani, v'eti ivr ti a, “Nkdahatat ipaier naran p'evrp'ep'a sera sei nma sanan.” Laha, ivr ti a, “Pavri.”
34Sarei, ivr ti a, “Kana nv'i dui na m'akarienan Epraham. 35A Mlin Eia imhmah an a mlinak istudau dav'a ti ima kav'i dui lil iamk, katu sivsiv ani m'er pluk, nav'et m'a kul, dui m'a tav'et na m'akarienan, kam'el m'er tuki. 36A Sera, iv'i a naun a mlinak, ilev' a natn dui asn a mlinak naran ittrtarep' sarei. Hin ittu sera sian udlani ani. 37Laha, a mlinak iani ti kana nah lm'ak katuran ani, kavr ti a, ‘Malev' tav'etan a natk asnr tav'et arna nut a Kenan la nlak asnr ha. 38V'eti pav'a asn nmahan a tetiak m'a nl nam'elak kalev' tav'et ipamk ipav'i a naun a natk.’ 39Laha, kana nvr an a mlinak kavr ti a, ‘?Nsarei tav'et nen iarn ti ipasapa kana, v'aha?’ 40V'eti hin ivr a kana kavr ti a, ‘A Mlin Eia, la nsapa navanelan arna nahn ha, hin ipatep'a enselan ipalak m'ah kamhmah anh arna navanelam, dav'a ti palev' tav'et ipamk ipav'i a naun a natk arna nl nam'elak m'a nmahan a tetiak. 41Turanien laha ikauadah naran paier nl nam'elak, ipavr ti ahavrn ti apavtu tav'et anh. Arna naran lera, turanien laha ikauadah ml.’
42Dav'a dika nma asn tah na nauei kavr ti a, ‘U Mlin Atuan a mlinak Epraham, ipavr ti hilaha krn ti pamhmah a kana arna navanel nsapei, 43Palei, ntp'tir sarei asn tah na nauei. Ipavr ti uarav'aran ipamk ipama a ti ipav' nauei, dav'a ipavr ti kana p'evr ani, kavr ti a, “Patu kana nauei al paketam a ti p'em'ni ipasusupa,” 44Laha, ipavr ti hin ipavr a kana kavr ti a, “Pam'nm'n, laha p'ev' ki ml katau a kam'elam a ti apavm'ni,” pani ti hin ipav'i tav'et la a Mlin Eia ittu sarei ha, a ti ipav'i tav'etan a natn a mlinak.’
45V'eti naran ndahiris a v'nenak arna nlk, parn, a Ripeka ima kaua paketan arna van, kadav'a auei al tah na nauei kav' nauei. Laha, nvr ani, kavr ti a, ‘?Pam'ahu a ti pam'n nauei kinkin?’ 46Sarei, irakn kalev'la paket arna van kavr ti a, ‘Pam'nm'n, laha p'ev' ki ml sena kam'elam a ti apavm'ni.’ Laha, kana nm'nm'n, sarei ti hin itu nauei a kam'el ml a ti apavm'ni. 47Sarei, nmiman ani, kavr ti a, ‘?Nakm kv'i a natn a hin ak?’ Hin ivr ti a, ‘Nv'i a natn a Petuel, iv'i a natn a Nahur, la a Milka ilav'i asnn ha.’ Laha, kana ntu hapir al drlnan katu lulu arna lm'an. 48Kaiaul kan ptk iv'a a nadep' katu tamat asn a Mlin Eia kapatei a Mlin Eia, iv'i Atuan a mlinak, a Epraham, la itv'ev'a sera kana arna navanel viviln a ti p'elev' a natn a tv'aln a mlinak, a ti ipav'i a naun a natn. 49Hilaha, ipavr ti pavrn ti pavan si p'as m'a sei viviln m'ei a mlinak, pavvr a kana. V'eti ipavr ti ikahei, pavvr a kana, a ti p'esapa navanel arna m'ldauk v'aha arna m'ir nak.”
50Sarei, a Lapan m'ei a Petuel arvrprani karvr ti a, “Si lera iaan asn a Mlin Eia. Kam'em' nkavvr si stu kinkin v'aha si p'as kinkin anh. 51A Ripeka hilaha. Palav'i karhau a ti ipav'i tav'etan a natn a mlinam, ipanep'a nut a Mlin Eia itvr sarei inap'ei.”
52Laha, naran dui na m'akarienan a Epraham irn v'nenar, ipatei a Mlin Eia kasisihpu a nadep'. 53Sarei, dui na m'akarienan hara ilev' neiau avani a silva, neiau avani a kul, m'a klus katau an a Ripeka, katu si p'sp'as ml an a m'ann m'ei a unian.
54Sarei, hir m'er arm'ertu avlak asnn, avhatat kavm'nm'n kavlak atlera arna lihat udlani, kavthal m'etav'aran. Laha, ivr ti a, “Pavm'ahu a ti p'ahau asn a mlinak.”
55V'eti a m'ann m'ei a unian arvr ti a, “Pam'ahu a ti vitar laha ipalak napn kinkin asnm'em' uam. Nsarei napn ipanal, sarei ti ipav'el.”
56V'eti ivr anr kavr ti a, “Mavtukar kana, sena ti a Mlin Eia itmhmah sarei a navanelak. Pavm'ahu a ti p'ev'el kadahau asn a mlinak.”
57Laha, arvr ti a, “P'erv'ara a vitar laha karmiman ani sera lei.” 58Sarei, arv'ara an a Ripeka karvr ani karvr ti a, “?Nakm krn ti pasapa dui laha?” Ivr ti a, “P'esapei.”
59Sarei, avtap'ei a Ripeka, iv'i a v'nr, m'a tav'et na m'akarienan, m'a dui na m'akarienan a Epraham m'er m'ertuan a ti apavrahau. 60Kavmhmah an a Ripeka kavvr ani kavvr ti a, “V'nm'em', nvrn ti nakm pav'i a uniar m'ertu apavsiv' tausan kavsiv' tausen ipastudau aranan ml dav'a. Nvrn ti a natm apavua v'anuar arm'ertu avlep'lar.”
61Sarei, a Ripeka m'er vitar na m'akarienan avp'tir kavv'el arna kam'el kavsapa dui nen. Laha, dui na m'akarien ilev' a Ripeka kasapa navanel.
62Dav'a Aisak iendan arna navanel iv'a asn tah na nauei, nahan iv'i Lahai Rui, sena ti ilak arna nut arna Saut. 63Laha, Aisak iv'el a ti ipatu tamat al pitvet knarev'. Laha, parn, iklau kala kam'el kinkin avrama. 64Sarei, a Ripeka iklau kalei Aisak kasisi arna kam'el kadav'a a nadep'. 65Sena ti itvr sarei a dui na m'akarien kavr ti a, “?Dui la iv'el al pitvet a ti ipala nakd ha, iv'i a hin ak?” Laha, dui na m'akarien ivr ti a, “A mlinak ra.” Sena si lera ilev' kalik katnahkar nahn.
66Sarei, dui na m'akarien ivr an Aisak si udlani iten tapei. 67Laha, Aisak iv'ev'a tav'et iv'a al nmah kanuisan a unian, iv'i a Sera, kauei a Ripeka ima kav'i tav'etan, kalap'as ani. Laha, Aisak irn ip'as ml itauatah a ti a unian im'a.
Currently Selected:
Ap'u 24: nmb
Highlight
Share
Copy
Want to have your highlights saved across all your devices? Sign up or sign in
© 2023 Presbyterian Reformed Church of Australia
