Sun 1

V'nenan Atua ilak itauamu dau

1Itauamu dau, V'nenan Atua ilak. Hin ilak m'ei a Mlin Eia kav'i Atua. 2V'nen lera ilak m'ei a Mlin Eia kav'i Atua, naran nadep' idatu hin. 3Hin ien si udlani. Arna si udlani itu hin, si kinkin ihei Hin iahani. 4Hin silv'ien ilak a nln. Silv'ien nen iv'i nut renar m'ertu. 5Nut ren lera iren al m'alk, m'alk iauakari.

A Sun Paptais ivrp'ep'a Nut Ren Dau

6 # Mat 3:1; Mak 1:4; Luk 3:1,2. Atua itep'a dui ki iamk, nahan iv'i a Sun. 7Hin ima kav'i v'nen a ti ipavrp'ep'a Nut Ren, sena ti arm'ertu apavrn v'nenan kavv'ahi. 8Hin iav'i Nut Ren lera, v'eti iv'i dui uaki ivrp'ep'a Nut Ren lahara. 9V'nen lera iv'i Nut Ren dau, la ier asnr m'ertu udlani avrama arna nadep' ha.

10Hin ien nadep' ka, v'eti naran ilak aranan, m'ertu udlani ahavrndaui. 11Hin ima arna utan v'eti arm'ertu a utan ahavrn ti apavlav'i. 12V'eti m'ertu udlani la avlav'i ha, Hin itu nut hua anr a ti apavrama kavv'i a natn a Mlin Eia, avv'i hir udlani la avv'ah nahan ha. 13Hir ahaviak arna di a uniar m'ei a tetiar, v'aha sena ti p'ak m'ertu irni, v'aha sena ti dui nen irni, v'eti sena ti Atua iani ti itu hin.

V'nenan Atua ima kav'i m'ertu

14V'nen lera ima kav'i m'ertu kalak m'a kam'em'. Kam'em' ntvla sera si p'sp'as udlanian. Si p'sp'as udlani lera iv'i nkan, sena ti Hin uaki iv'i a Natn a Tatei kamk, kaiak asnn kalini a vtmien m'a v'nen dau.

15Hin a Sun ivrp'ep'ei kav'ana eia kavr ti a, “Aulaha iv'i Dui la ntvrur sarei hara, naran nvr ti a, ‘Dui la ipama ipatauatah a kana, Hin ipalil kasiv' kana, sena ti ilak naran kana ndahiak.’ ”

16Hin ilini a si p'as. Nakd udlani nvlev' vtmien dav'a dav'a asnn. 17Sena ti nvlev' v'nen hua asn a Musis, v'eti nvlev' vtmien m'a v'nen dau asn a Iesu Kristu. 18M'ertu kinkin idamulelei Atua, v'eti a Natn uaki iamk la ilak mima asn a Tetian ha, Hin iv'iv'ani.

Nadl iv'ana arna nut kaka

(Matiu 3:1-12; Mak 1:2-8; Luk 3:1-18)

19Si laha iv'i v'nenan a Sun naran ardu lilil a Isrel avtep'a pris kinkin m'er dui kinkin avv'i Livait, avaan a Serusalem a ti apavmiman ani kavvr ti a, “?Nakm kv'i ak?”

20Hin iamamih v'eti ivrp'ep'ei kavr ti a, “Kana nav'i a Kristu.”

21 # Mal 4:5; TVH 18:15,18. Laha, avmiman ani kavvr ti a, “?Kv'i a hin ak? ?Kv'i a Ilaitsa?” Ivr ti a, “Ihei, nav'i hin.” “?Kv'i pruvet lahara?” Hin ivr ti a, “Ihei.”

22Sena si lera avvr ani kavvr ti a, “?Kv'i ak, sena ti p'vrndu ti p'vuirv'a prien nen asnr arm'ertu avtep'a kam'em'? Pavrurh, kv'i ak?”

23 # Aisaia 40:3. Ivr ti a, “Kana nv'i nadl iv'ara eia arna nut kaka, ‘Pavan mamh alan a Mlin Lilad’ inep'a nut Aisaia, iv'i pruvet, ivri inap'ei.”

24Ardu la avtap'er ha avv'i Varisi. 25Avmimani kavvr ti a, “?Inap'i hin nakm kan paptais a m'ertu, ipavr ti kaav'i a Kristu, v'aha a Ilaitsa, v'aha pruvet lahara?”

26A Sun ivrpranr kavr ti a, “Kana nen paptais a nauei. V'eti Dui iamk ip'tir a p't nut nam'i, kam'i kaavrndaui. 27Hin ima itauatah a kana kalil kasiv' kana. Kana naviviln a ti p'eiaul kahsla sitrav na susan.”

28Si lera itu hin arna nut a Petapara a tv'eliel na nauei a Surtan, iv'i nut a Sun ien paptais nakl.

Sivsivan Atua

29M'ih nen a Sun ilei a Iesu iv'el dama asnn, sarei kavr ti a, “Pavlei, Sivsivan Atua hilera, ipalev'la si stuar nelnal arna nadep'. 30Hin iv'i Dui la ntvrur sarei hara kavr ti a, ‘Ipatauatah a kana Dui ipamk ipama, ipalil kasiv' kana, sena ti Hin ilak, naran kana ndaiak.’ 31Kana naledaui, v'eti nma kan paptais a nauei, sena ti p'ev'iv'ani asnr m'ertu a Isrel.”

32A Sun ivruri ml kavr ti a, “Ntla sera M'im'iln Atua ima dan arna nut Eia kanep'a sera navimar kalak aranan. 33Kana narndaui itauamu, v'eti Atua la itep'a kana a ti p'en paptais a nauei ha, itvr sarei a kana kavr ti a, ‘Dui la pala M'im'iln P'as ipaan eia kalak aranan ha, Hin iv'i nki ipan paptais a M'im'iln P'as.’ 34Kana ntla sarei kavrp'ep'ei a ti Dui lera iv'i a Natn Atua.”

Dui arru arma karv'i m'ertuan a Iesu

35M'ih nen ml a Sun ip'tir m'er m'ertuan arru, 36kap'ei a Iesu ti Hin iv'el kadama, sarei kavr ti a, “Pavlei, Sivsivan Atua hilera.”

37Arm'ertuan arru lahara arrn v'nen lera karsapei a Iesu. 38Sarei, a Iesu iklup'la kala ti arsapei kavr anr kavr ti a, “?Krtala a v'ata?”

Arvr ani karvr ti a, “?Rapai” (v'nen lera iv'i tisa), “utam iter ip'i?” 39Ivr anr kavr ti a, “Parma karlei.” Laha, arv'a karla nut ilak karlak m'ei arna napn lera, sena ti itv'i sera m'etaneiel iv'a knarev'.

40Hir ki iamk la arrn v'nenan a Sun hara karsapei, nahan iv'i Adru, titiatah nan a Saimun P'ita. 41Hin ipasla tv'aln iv'i a Saimun itauamu, kavr ani, kavr ti a, “Ntvpasla sarei a M'isaia” (v'nen lera iv'i a Kristu). 42Hin iv'av'ei a Saimun iv'a asn a Iesu.

A Iesu ip'ei kavr ani, kavr ti a, “Nakm kv'i a Saimun, a natn a Suna. V'eti naham ipav'i a Sivas,” (v'nen lera iv'i a P'ita, inep'a ti iv'i nav'et).

A P'iliv' m'ei a Nataniel arma karv'i m'ertuan a Iesu

43M'ih nen a Iesu irn ti ipav'a arna nut a Kalili, sarei kapaslei a P'iliv' kavr ani, kavr ti a, “Pasapa Kana.” 44A P'iliv' iv'i dui a Petsaita, arna v'anuan Adru m'ei a P'ita. 45A P'iliv' ipaslei a Nataniel kavr ani, kavr ti a, “Ntvpasla sera dui la Musis ivruri arna v'nen hua, la pruvet avvruri hara. Hin iv'i a Iesu, dui a Nasaret, a natn a Susev'.”

46V'eti a Nataniel ivr ani, kavr ti a, “?Inap'i? ?Si p'as kinkin irndu ti ipaan a Nasaret?”

A P'iliv' ivr ani, kavr ti a, “Dahma kalei.”

47A Iesu ilei a Nataniel iv'el dama asnn kavruri kavr ti a, “Pavlei, dui dau a Isrel iamk, la ikahap'il naran kinkin ha.”

48A Nataniel ivr ani, kavr ti a, “?Inap'i hin krndu kana?”

A Iesu ivr ani, kavr ti a, “Kana nlah, naran a P'iliv' idav'ara anh, naran kdlak uam a nv' p'alak.”

49A Nataniel ivrprani, kavr ti a, “Tisa, kv'i a Natn Atua, kv'i Mlin Lil a Isrel.”

50A Iesu ivrprani, kavr ti a, “?Nakm kv'ah Kana sena ti nvr ti nlah naran klak a nv' p'alak? V'eti nakm pala sei ipalil ipasiv' si lera.” 51#Ap'u 28:12.Laha, ivr ani ml kavr ti a, “Nvrdaui nvr a kam'i, pavla p'knaran ipaiela hin kavlar enselan Atua apavrav'a eia kavrama a nadep' aranak, nv'i Net M'ertu.”

Currently Selected:

Sun 1: nmb

Highlight

Copy