Sun 2

Nauei ima kav'i naui m'iel

1Arna nitla napn, lheien iamk iak arna nut a Keina a Kalili. A unian a Iesu ilak atlera. 2Atvv'ara sarei an a Iesu m'er arm'ertuan, a ti apavrama arna lheien lera. 3Naran naui m'iel m'am'ar ihiris, a unian a Iesu ivr ani, kavr ti a, “Naui m'iel m'am'ar itama dau.”

4V'eti a Iesu ivr ani, kavr ti a, “?Tav'et, inap'i hin ktu si lera aranak? Naranak idahma.”

5A unian ivr anr ardu na parei kavr ti a, “Kam'i pavan sei Hin ivr a kam'i.”

6Putel lil ilm'sei na nauei aani a nav'et aviak atlera, sena p'klr arm'ertu a Isrel a ti apavsisil nakl, avviviln a lita ipanelsatl (80) v'aha inelnal iv'amk (100) arna nki iamk. 7A Iesu ivr anr kavr ti a, “Pavah nauei ipav'a al putel lera ipalini udlani.” Sarei, avah nauei a nlr ilini. 8Sarei, ivr anr kavr ti a, “Hilaha pavtven ki kavuirv'a asn mlin na tim'ah.” Laha, avuirv'a. 9Naran mlin na tim'ah im'ndina nauei, la ima kav'i naui m'iel ha, iarndu nut iendan. V'eti ardu na parei la avtven nauei ha, hir avrndaui. Laha, mlin na tim'ah lahara iv'ara a dui ien lheien, 10kavr ani, kavr ti a, “Iel, m'ertu udlani avtu naui m'iel p'as itauamu, v'eti naran ardu atvm'nm'n dav'a, avlev' ki iap'as, v'eti nakm kuada terp'as dav'a ier hilaha.”

11Ki laha iv'i m'akarien lilan a Iesu iani itauamu arna nut a Keina a Kalili, kav'iv'en si p'sp'asan a nelnal, sarei arm'ertuan avv'ahi.

12 # Mat 4:13. Itauatah a si lera, hin iv'a auei asn nut a Kapaniam, a unian isapei, m'er artv'aln m'er arm'ertuan. V'eti avlak isusupa uaki arna nut lera.

A Iesu itp'ev' m'ertu stu al nmah tamat

(Matiu 21:12,13; Mak 11:15-17; Luk 19:45,46)

13 # Avruh 12:1-27. Ihih napn na Pasuva iv'i tim'ahar ardu a Isrel, a Iesu iv'a eia arna nut a Serusalem. 14Eim al nmah tamat hin ipasla dui istudau avulul a pluk m'a sivsiv m'a navimar, kala dui uraur avlak asn tiv' kavtupapren nav'etar arm'ertu nakl. 15A Iesu ilev' nahau papa kinkin kani iv'i nam'et, katp'av'r ardu lahara m'a pluk m'a sivsivar avruh al nmahan a Mlin Eia. Hin ivavp'la tiv'ar arm'ertu la avlak kavtupapren nav'et nakl ha, kahsran udlen nav'etar ivrlis unanut. 16Laha, iv'ana m'er ardu avulul a navimar kavr ti a, “Kam'i pavlev'la si laha kavuirv'a av'aran. Mavani ti nmahan a Tetiak ipama kav'i nmah apulul a sei a nln.” 17#Npin 69:9.Laha, arm'ertuan avv'ahur v'nen arna Paivul, ivr ti a, “Kana nlap'as a nmaham istudau. Si lera inep'a nap' iv'en a nlk.”

18Ardu Isrel kinkin avv'ana m'ei kavmiman ani kavvr ti a, “?Nakm pan pari lil v'ata kav'iv'en ti iviviln a ti kan si udlani lera?”

19 # Mat 26:61; 27:40; Mak 14:58; 15:29. A Iesu ivrpranr kavr ti a, “Kam'i pavkapr nmah laha, v'eti arna napn ipatl Kana p'ehluri ipap'tir ml.”

20Laha, ardu a Isrel lahara avvrprani kavvr ti a, “Nelnal avm'akar arna nmah lera pai inelv'a pln ilm'sei. (46) ?V'eti Nakm kv'ah ti pani ipap'tir arna napn ipatl uaki?”

21V'eti ivrur nmah iv'i p'akn. 22Itauatah naran a Iesu ithal ml arna m'ien, arm'ertuan avv'ahur ti ivr si lera anr, kavv'ah v'nen arna Paivul m'a v'nenan a Iesu lera.

A Iesu irndu nl m'ertu udlani

23Naran Hin ilak a Serusalem sena tim'ah na Pasuva, m'ertu istudau avv'ah a nahan, naran avla pari lilil hin iani nakl. 24V'eti a Iesu irndu mamh nelnal udlani, iarn ti hir apavrndu udlen v'ahienan. 25A Iesu m'ertu kinkin ikav'iv'en p'kl m'ertu ani, sena ti hin irndu nl m'ertu udlani.

Currently Selected:

Sun 2: nmb

Highlight

Copy