Sun 13

A Iesu isila tlr m'ertuan

1Naran tim'ah na Pasuva idahei, a Iesu itrndu sera ti naran nen itama sarei a ti ipaln nadep' laha kadav'a asn a Tatei. Hin ilap'as a m'ertuan arna nadep' kalap'as anr dav'a ier ti im'a.

2Naran avlak kavhatat, v'eti a Sitan ittu sarei arna nln a Sutas Iskariut, iv'i a natn a Saimun, a ti ipataui al lm'ar m'ertu avlep'lei. 3A Iesu itrndu sera ti a Tatei ittu sera si udlani al lm'an, karndu ti Hin idan asn Atua, dav'a ti ipam'alet ml asn Atua. 4Laha, kap'tir asn tiv' kahsla klusan kinkin kalev' taul kav'aui. 5Sarei, ilev' dis iamk kahs nauei a nln kasiladina tlr m'ertuan kava tlr, a taul la iv'aui ha. 6Dav'a kaier asn Saimun P'ita. Laha, a P'ita ivr ani, kavr ti a, “?Mlin, inap'i hin ksila tlk?”

7A Iesu ivrprani, kavr ti a, “Hilaha nakm kaarndu sei Kana nani, v'eti ipatauatah parndaui.”

8A P'ita ivr ani, kavr ti a, “!Ikahei!, !Nakm mkasila tlk naran kinkin!” A Iesu ivrprani, kavr ti a, “Ipavr ti Kana nkasila tlm, kaav'i m'ertuak”.

9A Saimun P'ita ivr ani, kavr ti a, “Mlin, masila tlk uaki, v'eti pasila lm'ak m'a ptk.”

10A Iesu ivrprani, kavr ti a, “Ipavr ti m'ertu itav sarei, iarn ti ipav ml, v'eti ipasila tln uaki, sena ti itav sarei. Kam'i kvtvav sarei, v'eti iav'i kam'i udlani.” 11Sena ti Hin itrndu sera m'ertu la ipataui al lm'ar m'ertu avlep'lei ha. Sena si lera ivr ti a, “Iav'i kam'i udlani ktvav sarei.”

12 # Luk 22:27. Laha, naran itsila sera tlr, iua klusan ml kalak asn tiv' kavr anr kavr ti a, “?Kam'i kvrndu sei nani asm'i? 13Kam'i kvr ti nv'i Tisa, kavvr ti nv'i Mlin. Kvvrdaui, sena ti nv'i si lera. 14V'eti ipavr ti Kana, la nv'i Mlinam'i kav'i Tisam'i ha, ntsila sera tlm'i, iviviln a ti kam'i pavsila tlr tv'elm'i. 15Sena ti Kana ntv'iv'en sera navanel a kam'i a ti kam'i pavani ipanep'a nut nani asnm'i inap'ei. 16#Mat 10:24; Luk 6:40; Sun 15:20.Nvrdaui nvr a kam'i, m'ertu na m'akarien ialil kasiv' mlinan. Dui atap'ei ialil kasiv' m'ertu la itap'ei ha. 17Ipavr ti kvrndu si lera, kam'i pavrn ipap'as ipavr ti pavani.

18 # Npin 41:9. Navrur kam'i udlani. Kana nrndu m'ertu ntv'li sarar, v'eti irn ti sei Paivul ivri ipatu hin, ivr ti a, ‘M'ertu nrhan p'ret m'ei itetvan tahn kamlen Kana.’ 19Nvr si lera a kam'i naran idatu hin, a ti naran ipama katu hin, pavv'ah ti Kana nv'i Dui nen. 20#Mat 10:40; Mak 9:37; Luk 9:48; 10:16.Nvrdaui nvr a kam'i, ipavr ti m'ertu kinkin ipalev' m'ertu kinkin Kana ntap'ei, hin ilev' Kana. Laha, m'ertu ilev' Kana ilev' M'ertu itep'a Kana.”

A Iesu ivrp'ep'a ti m'ertuan kinkin ipamk ipataui al lm'ar m'ertu avlep'lei

(Matiu 26:20-25; Mak 14:17-21; Luk 22:21-31)

21A Iesu ivr si lera karn istu arna nln kavrp'ep'ei kavr ti a, “Nvrdaui nvr a kam'i, kam'i kinkin ipamk ipatu Kana al lm'ar m'ertu avlep'la Kana.” 22Laha, arm'ertuan avp'ep'a hir, sena ti ahavrndu ti ivrur a hin ak.

23M'ertuan a Iesu ki iamk, la ilap'as ani istudau ha, iv'er arna mrn a Iesu. 24Sena si lera, a Saimun P'ita iah lm'an ani, a ti ipamiman ani ivrur a hin ak.

25Laha, dui iv'er arna mrn a Iesu ivr ani, kavr ti a, “?Mlin, iv'i ak?”

26A Iesu ivrprani, kavr ti a, “Iv'i dui la p'etu tk p'ret ntdi sarei ani ha.” Laha, naran itdi sera p'ret, itau an a Sutas Iskariut, iv'i a natn a Saimun. 27Naran a Sutas itlev' sera tk p'ret lera, a Sitan iv'a a nln. Laha, a Iesu ivr ani, kavr ti a, “Sei krn ti pani, pani ipalahml.” 28V'eti m'ertu kinkin ihei asn tiv' irndu sena v'ata ivr si lera ani. 29A Sutas iua pahus na nav'et. Sena si lera, hir kinkin avv'ah ti a Iesu ivr ani, kavr ti a, “Nakm pul sei nvrni sena tim'ah,” v'aha ivr ti ipatu si kinkin anr m'ertu siar ihei.

30Iv'amk m'a ti a Sutas ilev' tk p'ret kadav'a av'aran. Laha, nut im't.

V'nen hua m'dah

31Naran itav'a sarei av'aran, a Iesu ivr ti a, “Hilaha Kana, nv'i Net M'ertu, nahak ipav'a eia, nahan Atua ipav'a eia sena Kana. 32Ipavr ti nahan Atua ipav'a eia sena Kana, Atua uaki ipani ti nahak ipav'a eia. Aau, ipani ti nahak ipav'a eia ipalahml. 33#Sun 7:34.Armardel papak, p'elak m'a kam'i ipasusupa mau. Kam'i pavtala Kana, v'eti ipanep'a nut nvr anr m'ertu lililar Isrel inap'ei, kavr ti a, ‘Nut Kana p'av'a, kam'i mkavrama.’ Hilaha nvr a kam'i ml inap'i lera. 34#Sun 15:12,17; 1 Sun 3:23; 2 Sun 1:5.Kana ntu v'nen hua m'dah a kam'i a ti kam'i pavlap'sp'as a kam'i. Kam'i pavlap'sp'as a kam'i inep'a nut Kana nlap'as a kam'i inap'ei. 35M'ertu udlani apavrndu ti kvv'i m'ertuak, sena ti kvlap'sp'as a kam'i.”

A Iesu ivrp'ep'a ti a P'ita ipap'ep'ni

(Matiu 26:31-35; Mak 14:27-31; Luk 22:31-34)

36A Saimun P'ita ivr ani, kavr ti a, “?Mlin, pav'a ip'i?”

A Iesu ivrprani, kavr ti a, “Hilaha nakm mkasapa Kana arna nut p'av'a, v'eti ipatauatah pasapa Kana.”

37A P'ita ivr ani, kavr ti a, “?Mlin, inap'i hin nkasapah hilaha? Kana p'etu silv'ienak sanam.”

38A Iesu ivrprani, kavr ti a, “?Kvr ti patu silv'ienam sanak? Nvrdaui nvr anh, ntup'el ikdatiter ipaier naran nakm pavri ipav'atl kavr ti kaarndu Kana.

Currently Selected:

Sun 13: nmb

Highlight

Copy