Sun 14

A Iesu iv'i navanel, kav'i v'nen dau kav'i silv'ien

1Kam'i mavrn istu arna nlm'i. Ktvv'ah sarei Atua, v'eti pavv'ah Kana ml. 2Al nmahan a Tetiak m'lna m'ertu istudau iter. Imvr ti imanap'i lera, m'tvr sarei a kam'i. Kana p'av'a a ti p'endedp' a m'lnam'i. 3P'av'a kandedp' a m'lnam'i, sarei kadama ml kalev' kam'i a ti pavlak asnk, a ti kam'i pavlak asnk arna nut Kana p'elak 4Kam'i ktvrndu sera nut p'av'a katvrndu sera navanel.”

5A Tumas ivr ani, kavr ti a, “Mlin, kam'em' navrndu nut Nakm pav'a. ?P'vrndu navanel ipanap'i?”

6A Iesu ivr ani, kavr ti a, “Kana nv'i navanel kav'i v'nen dau kav'i silv'ien. M'ertu kinkin ikahmk ikahma asn a Tetiak, ipavr ti ikap'lt m'a Kana.

M'ertu kinkin ila Kana, hin ilei a Tatei

7Amvr ti mvrndu Kana, mvrndau a Tetiak ml, v'eti hilaha kvrndu Atua kavlei.”

8A P'iliv' ivr ani, kavr ti a, “Mlin, pav'iv'en a Tatei a kam'em', laha nkavrn si uraur ml.”

9A Iesu ivr ani, kavr ti a, “P'iliv', nlak asnm ip'arei dav'a, inap'i hin kaarndu Kana? Ipavr ti m'ertu kinkin ila Kana, hin ilei a Tatei. Inap'i hin kvr ti a, ‘?Pav'iv'en a Tatei a kam'em'?’ 10Kaav'ah ti Kana np'lt m'ei a Tatei, a Tatei ip'lt m'a Kana? V'nen nvr a kam'i iahandan asnk. V'eti a Tatei, la ilak a nlk ha, hin ien parei. 11Pavv'ah Kana a ti np'lt m'ei a Tatei, a Tatei ip'lt m'a Kana. V'aha, ipavr ti kaavv'ah v'nenak, pavv'ah Kana sena pari lililak.

Si udlani pavmimani arna nahak, Kana p'en si lera

12Nvrdaui nvr a kam'i, M'ertu iv'ah Kana, hin ipan parei Kana nani kan parei ipalil kasiv' pariak, sena ti Kana p'av'a asn a Tetiak. 13Si udlani pavmimani arna nahak, Kana p'en si lera, a ti Kana, nv'i a Natn Atua, p'ani ti nahan a Tatei ipav'a eia. 14Ipavr ti pavmiman si kinkin arna nahak, Kana p'ani.

A Iesu ivr ti ipatep'a M'im'iln P'as

15Ipavr ti pavlap'as a Kana, pavsapa v'nen huak. 16Laha, Kana p'emiman an a Tatei, laha Hin ipatep'a M'ertu uraur ipasr lm'am'i a ti ipalak m'a kam'i dav'a ikahiris naran. 17Hin iv'i M'im'iln na v'nen dau. M'ertu na nadep' akavlav'i, sena ti ahavlei, ahavrndaui. V'eti kam'i kvrndaui, sena ti ilak m'a kam'i dav'a ipalak a nlm'i. 18Kana nkaln kam'i a ti pavlak kavududl uaki. Kana p'ama asnm'i.

A Tatei m'ei a Natn aparlak a nl m'ertu iv'ahi

19Ikap'arei, m'ertu na nadep' akavla Kana ml. V'eti kam'i kvla Kana. Sena ti Kana nsilv', kam'i ml pavsilv'. 20Arna napn lera kam'i pavrndu ti Kana np'lt m'ei a Tetiak. Kam'i pavp'lt m'a Kana, Kana p'ep'lt m'a kam'i. 21M'ertu iuada v'nen huak kasapei, hin ilap'as a Kana. Laha, m'ertu ilap'as a Kana, a Tetiak ipalap'as ani. Kana p'elap'as ani kav'iv'en Kana asnn.”

22A Sutas, iav'i Iskariut, ivr ani, kavr ti a, “?Mlin, inap'i hin pav'iv'anh a kam'em', v'eti mkav'iv'anh asnr m'ertu na nadep'?”

23A Iesu ivrprani, kavr ti a, “Ipavr ti m'ertu kinkin ipalap'as a Kana, hin ipasapa v'nenak. Laha, a Tetiak ipalap'as ani, dav'a p'erma karlak m'ei. Laha, nln ipav'i nmaham'em'. 24M'ertu ialap'as a Kana iasapa v'nenak. V'nen la kvrni ra, iav'i nkak uaki, v'eti iv'i nkan a Tetiak la itep'a Kana ha.

A Iesu ivr ti tamatan ipater arna m'ertuan

25Nvr si lera a kam'i naran ndlak uam asnm'i. 26V'eti M'ertu ipasr lm'am'i, iv'i M'im'iln P'as, la a Tetiak ipatap'ei arna nahak ha. Hin ipav'iv'en si udlani a kam'i, kani ti pavv'ahur v'nen udlani nvr a kam'i. 27Kana p'eln kam'i arna tamat katu kam'i tamatak. Natu si lera a kam'i inep'a nut m'ertu na nadep' avtaui inap'ei. Kam'i mavrn istu arna nlm'i kavdedrn. 28Kam'i ktvrn sera ti nvr a kam'i kavr ti p'eln kam'i dav'a kadama ml asnm'i. Amvr ti mvlap'as a Kana, mvrn imp'as naran nvr ti p'av'a asn a Tetiak, sena ti a Tetiak ilil kasiv' Kana.

29Ntvrp'ep'a sera si lera a kam'i naran idatu hin, a ti naran ipatu hin, kam'i pavv'ah Kana. 30Hilaha nkav'ana m'a kani ml ikstudau, sena ti mlin na nadep' ka itama, v'eti hin nut huan ihei aranak. 31V'eti Kana nen si udlani a Tatei ivr a Kana a ti p'ani, sena ti m'ertu na nadep' apavrndu ti Kana nlap'as an a Tatei. Pavthal, p'vruh atlaha.

Currently Selected:

Sun 14: nmb

Highlight

Copy