Sun 15

A Iesu iv'i nahu dau

1Kana nv'i nahu dau iv'i krep, a Tetiak iv'i dui ip'auri. 2Hin itrlulua plka nahau udlani aranak navan ihei, katrlulua pna plka nahau navan iak a ti ipamhmah ani, a ti navan ipastudau mau. 3Hilaha kam'i kvp'as sena v'nen ntvr sarei a kam'i. 4Pavp'lt m'a Kana, Kana p'ep'lt m'a kam'i. Plka nahau ikatu navan, ipavr ti iap'lt m'a plen. Kam'i kvnap'i lera, navam'i ikahei ipavr ti kaavp'lt m'a Kana.

5Kana nv'i nahau, kam'i kvv'i plkan. Ipavr ti m'ertu kinkin ipap'lt m'a Kana naran Kana np'lt m'ei, hin navan ipastudau, sena ti kam'i kaavrndu ti pavan si kinkin, ipavr ti kaavp'lt m'a Kana. 6Ipavr ti m'ertu kinkin iap'lt m'a Kana, apasrani ipanep'a nut asran plka nahau inap'ei, dav'a im'aran. Laha, m'ertu avtktak ani kavsrani al nap' ihapu. 7Ipavr ti pavp'lt m'a Kana, m'a v'nenak ipater a nlm'i, pavmiman sei kvrni, laha ipatu hin asnm'i. 8Nahan a Tetiak ipav'a eia arna si lera, a ti kam'i navam'i ipastudau, laha pavrama kavv'i m'ertuak.

Vtmien m'a nl p'as

9Kana nlap'as a kam'i inep'a nut a Tetiak ilap'as a kam'i inap'ei. Kam'i pavp'lt arna vtmienak. 10Ipavr ti pavsapa v'nen huak, kam'i pavp'lt arna vtmienak, inep'a nut Kana nsapa v'nen huan a Tetiak kap'lt arna vtmienan inap'ei.

11Ntvr sera si lera a kam'i a ti kam'i pavrn ipap'as ipanep'a nut Kana nrn ip'as inap'ei, a ti kam'i pavrn ipap'as udlani. 12#Sun 13:34; 15:17; 1 Sun 3:23; 2 Sun 1:5.Si laha iv'i v'nen huak, a ti kam'i pavlap'sp'as a kam'i, inep'a nut Kana nlap'as a kam'i inap'ei. 13M'ertu ihei vtmienan ilil kasiv' m'ertu la itu silv'ienan sena tv'aln ha. 14Kam'i kvv'i tv'alk, ipavr ti kvan si udlani nvr a kam'i. 15Hilaha navr ti kvv'i m'ertu na m'akarienak ml, sena ti m'ertu na m'akarien iarndu sei a mlinan iani. V'eti Kana ntvr sera ti kvv'i tv'alk, sena ti ntv'iv'en sera si udlani a kam'i la ntrn sarei asn a Tetiak ha. 16Kam'i kaavv'li Kana, v'eti Kana nv'li kam'i katu kam'i sena ti pavrav'a, navam'i ipaiak, laha ti navam'i ipater dav'a. Laha, a Tetiak ipatu kam'i si udlani pavmimani arna nahak. 17Ntu v'nen hua udlani lera a kam'i a ti kam'i pavlap'sp'as a kam'i.

M'ertu na nadep' apavlep'la kam'i

18Ipavr ti m'ertu na nadep' avlep'la kam'i, pavrndu ti avlep'la Kana itauamu a kam'i. 19Imvr ti mvv'i m'ertu na nadep', m'ertu na nadep' amvlap'as a m'ertuar. V'eti kam'i kaavv'i m'ertu na nadep', sena ti ntv'li sera kam'i kalev'la kam'i arna nadep'. Sena si lera, m'ertu na nadep' avlep'la kam'i. 20#Mat 10:24; Luk 6:40; Sun 13:16.Pavv'ahur v'nen ntvr sarei a kam'i, ti m'ertu na m'akarien ialil kasiv' mlinan. Ipavr ti atvtp'ev' sera Kana, akvtp'ev' kam'i pr. Ipavr ti atvsapa sera v'nenak, apavsapa v'nenam'i. 21V'eti apavan si udlani lera a kam'i sena nahak, sena ti ahavrndu M'ertu itep'a Kana. 22Idvr ti m'dahma kav'ana m'er, amdavrndu si stuar, v'eti hilaha akavvr si kinkin ml kavtutuan si stuar. 23M'ertu ilep'la Kana, ilep'lei a Tetiak ml. 24Ipavr ti m'daan pari lilil arna nahr la m'ertu uraur ahavani ha, m'ertu idapasla si stuar. V'eti hilaha atvla sera Kana m'ei a Tetiak kavlep'la kam'em'. 25#Npin 35:19; 69:4.V'eti si lera itu hin, a ti v'nen la aulul ani arna v'nen huar ha ipama katu hin, ivr ti a, ‘Avlep'la Kana sena si kaka.’

26V'eti naran M'ertu la ipasr lm'am'i ha ipama, Hin ipavrur Kana. Hin iv'i M'im'iln na v'nen dau la idan asn a Tatei ha. Kana p'etap'ei ipama asnm'i, ipadan asn a Tatei kadama asnm'i. 27Kam'i ml pavv'i v'nenak, sena ti kvlak m'a Kana naran nendina pariak ier dika.

Currently Selected:

Sun 15: nmb

Highlight

Copy