Sun 16

Nelnal apavsran m'ertuan a Iesu

1Ntvr sera si lera a kam'i a ti mavrars. 2Apavsran kam'i arna sasar arm'ertu a Isrel. Aau, naran nen ipama a ti m'ertu kinkin iparpep'n kam'i kav'ah ti ien parian Atua. 3Apavan si lera a kam'i sena ti ahavrndau a Tetiak m'a Kana. 4V'eti ntvr sera si lera a kam'i a ti, naran napn nen ipama, kam'i pavv'ahur ti Kana ntvr sera si lera a kam'i.

V'eti navr si lera a kam'i itauamu, sena ti ndlak uam asnm'i.

Parian a M'im'iln P'as

5V'eti hilaha Kana p'av'a asn M'ertu itep'a Kana, v'eti kam'i kaavmiman a Kana kavvr ti a, ‘?Pav'a ip'i?’ 6V'eti kvrn istu ihuadau sena ti ntvr sera si lera a kam'i. 7V'eti nvrdaui nvr a kam'i, iviviln a ti p'eln kam'i, sena ti ipavr ti nkaln kam'i, M'ertu ipasr lm'am'i ikahma asnm'i. V'eti ipavr ti p'eln kam'i, p'etap'ei ipama asnm'i. 8Laha, naran ipama, hin ipav'iv'en anr m'ertu arna nadep' si stuar, kav'iv'en p'kl viviln, kav'iv'en ti Atua ipav'ana hua m'a m'ertu. 9Ipav'iv'en si stuar, sena ti ahavv'ah Kana. 10Ipav'iv'en p'kl viviln, sena ti Kana p'av'a asn a Tetiak, laha mkavla Kana ml. 11Ipav'iv'en ti Atua ipav'ana hua m'a m'ertu, sena ti Atua itv'ana hua sarei m'a mlin na nadep' ka.

12Nrn p'evr sei ipastudau uam a kam'i, v'eti hilaha kam'i kaavhua a ti pavuada v'nenak. 13V'eti naran Hin, la iv'i M'im'iln na v'nen dau ha, ipama, ipav'ev'a kam'i a ti pavrndu v'nen dau udlani, sena ti ikavrur Hin, v'eti ipavrp'ep'a v'nen udlani irni asn Atua, kav'iv'en a kam'i sei ipatu hin. 14Hin ipani ti nahak ipav'a eia, sena ti ipalev' si p'sp'asak kav'iv'en a kam'i. 15Si udlanian a Tetiak iv'i nkak. Sena si lera nvr ti ipalev' si p'sp'asak kav'iv'en a kam'i.

M'ertuan a Iesu apavrn istu, v'eti ikap'arei apavrn ipap'as ml

16Ikap'arei kam'i mkavla Kana ml, dav'a ikap'arei pavla Kana ml, sena ti Kana p'av'a asn a Tatei.”

17Laha, m'ertuan kinkin avvrvr a hir kavvr ti a, “?Inap'i hin ivr a nakd kavr ti a, ‘Ikap'arei kam'i mkavla Kana ml, dav'a ikap'arei pavla Kana ml?’ kavr ti a, ‘Sena ti Kana p'av'a asn a Tatei’?” 18Sena si lera avvrvr a hir kavvr ti a, “?Inap'i hin ivr ti a, ‘Ikap'arei’? Navrndu sei ivri.”

19A Iesu irndu ti avrn ti apavmiman sei ani, laha kavr anr kavr ti a, “?Kam'i kvvrvr a kam'i kavvrur si lera a ti nvr ti a, ‘Ikap'arei kam'i mkavla Kana ml, dav'a ikap'arei pavla Kana ml’? 20Nvrdaui nvr a kam'i, Kam'i pavvalau kavtakal, v'eti m'ertu na nadep' apavrn ipap'as. Kam'i pavrn istu, v'eti dav'a mkavrn istu ml. Kam'i pavvav v'ahienam'i uam a ti pavrn ipap'as ipastudau. 21Tav'et, naran ilev' sei, irn istu arna p'akn sena ti naran nen itama. V'eti iv'amk m'a ti itlev' sarei a natn, iav'ahur deran ml, sena ti irn ip'as istudau a ti m'ertu iamk iak arna nadep'. 22Kam'i kvnap'i lera. Hilaha kvrn istu, v'eti p'ela kam'i ml, dav'a pavrn ipap'as ipastudau arna nlm'i. Laha, m'ertu kinkin ikahani ti pavrn istu ml.

23Arna naran nen mkavmiman si kinkin a Kana. Nvrdaui nvr a kam'i, si udlani kam'i pavmiman asn a Tatei arna nahak, hin ipatu kam'i. 24Hilaha kdavmiman si kinkin a Kana. Pavmimani kavlav'i, a ti pavlini a nl p'as.

A Iesu ihua kasiv' si udlani arna nadep'

25Ntvr sera si lera a kam'i arna v'nen tutuah, v'eti naran nen ipama a ti nkav'ana m'a kam'i ml arna v'nen tutuah, v'eti p'evrp'ep'a mamh a Tetiak a kam'i. 26Arna napn lera kam'i pavmiman sei arna nahak. V'eti navr a kam'i kavr ti Kana p'emiman sei asn a Tatei sanam'i. 27Sena ti a Tatei, Hin ilap'as a kam'i, sena ti kam'i kvlap'as a Kana, kavv'ah ti ndan asn Atua. 28Kana ndan asn a Tatei kadama arna nadep'. Hilaha p'eln nadep' ml kadav'a asn a Tatei.”

29Arm'ertuan avvr ani kavvr ti a, “Parni, hilaha kvrp'ep'a mamahi. Kaav'ana arna v'nen tutuah ml. 30Hilaha nvrndu mamahi ti Nakm krndu si udlani. Krndaui naran m'ertu adavmiman anh. Sena si lera, nvrndu ti Nakm kdan asn Atua.”

31A Iesu ivrpranr kavr ti a, “?Kam'i kvv'ah Kana hilaha? 32Pavrni, naran nen ipama, aau, itama sarei, a ti kam'i udlani pavamamkp'sev', kavln Kana a ti p'elak mamk. V'eti nalak mamk, sena ti a Tetiak ilak m'a Kana. 33Ntvr sera si lera a kam'i a ti kam'i pavp'lt m'a Kana kavlak arna tamat. Arna nadep' ka der ipaier kam'i, v'eti pavrn ipap'as uaki, sena ti Kana nhua katsiv' sera si udlani arna nadep'.”

Currently Selected:

Sun 16: nmb

Highlight

Copy