Popular Bible Verses from Sun 15

Share

Kana nv'i nahau, kam'i kvv'i plkan. Ipavr ti m'ertu kinkin ipap'lt m'a Kana naran Kana np'lt m'ei, hin navan ipastudau, sena ti kam'i kaavrndu ti pavan si kinkin, ipavr ti kaavp'lt m'a Kana.

Pavp'lt m'a Kana, Kana p'ep'lt m'a kam'i. Plka nahau ikatu navan, ipavr ti iap'lt m'a plen. Kam'i kvnap'i lera, navam'i ikahei ipavr ti kaavp'lt m'a Kana.

Ipavr ti pavp'lt m'a Kana, m'a v'nenak ipater a nlm'i, pavmiman sei kvrni, laha ipatu hin asnm'i.

Kam'i kaavv'li Kana, v'eti Kana nv'li kam'i katu kam'i sena ti pavrav'a, navam'i ipaiak, laha ti navam'i ipater dav'a. Laha, a Tetiak ipatu kam'i si udlani pavmimani arna nahak.

M'ertu ihei vtmienan ilil kasiv' m'ertu la itu silv'ienan sena tv'aln ha.

Hin itrlulua plka nahau udlani aranak navan ihei, katrlulua pna plka nahau navan iak a ti ipamhmah ani, a ti navan ipastudau mau.

Si laha iv'i v'nen huak, a ti kam'i pavlap'sp'as a kam'i, inep'a nut Kana nlap'as a kam'i inap'ei.

Nahan a Tetiak ipav'a eia arna si lera, a ti kam'i navam'i ipastudau, laha pavrama kavv'i m'ertuak.

Kana nv'i nahu dau iv'i krep, a Tetiak iv'i dui ip'auri.

Ipavr ti m'ertu kinkin iap'lt m'a Kana, apasrani ipanep'a nut asran plka nahau inap'ei, dav'a im'aran. Laha, m'ertu avtktak ani kavsrani al nap' ihapu.

Ntvr sera si lera a kam'i a ti kam'i pavrn ipap'as ipanep'a nut Kana nrn ip'as inap'ei, a ti kam'i pavrn ipap'as udlani.

Ipavr ti pavsapa v'nen huak, kam'i pavp'lt arna vtmienak, inep'a nut Kana nsapa v'nen huan a Tetiak kap'lt arna vtmienan inap'ei.

Ntu v'nen hua udlani lera a kam'i a ti kam'i pavlap'sp'as a kam'i.

Imvr ti mvv'i m'ertu na nadep', m'ertu na nadep' amvlap'as a m'ertuar. V'eti kam'i kaavv'i m'ertu na nadep', sena ti ntv'li sera kam'i kalev'la kam'i arna nadep'. Sena si lera, m'ertu na nadep' avlep'la kam'i.