Luk 14
14
A Iesu ien mamh dui iamk p'akn iereren arna Sapat
1Dav'a, arna Sapat iamk, iv'a al nmaha dui lilar Varisi iamk, a ti ipahatat. Laha, avp'ei. 2Laha, pavrni, dui iamk ilak atlera, p'akn iereren. 3Laha, a Iesu ivr anr dui na v'nen hua m'er arvarisi kavr ti a, “?Iviviln a ti apamhmah a m'ertu arna m'etien arna Sapat?”
4V'eti hir ahavvr si kinkin. Sarei, iuadei kamhmah ani katap'ei ihau. 5#Mat 12:11.Kavrpranr kavr ti a, “?Hin ak asnm'i, ipavr ti tukian v'aha plukan ipars al tah na nauei arna Sapat, ikalev'lei ipalahml?” 6Laha, ahavrndu ti apavvrpren si kinkin ani.
Palak arn m'lna m'ertu ialil
7Naran ila ti arm'ertu la avv'ara anr ha avtala a m'lna m'ertu lil, isran v'nen asnr kavr ti a, 8#V'nen 25:6,7.“Naran m'ertu kinkin ipamimanh a ti pama arna tim'ah na lheien, malak arna m'lna m'ertu lil. Imahei ti ipamiman dui kinkin ilil kasiv'h a ti ipama arna tim'ah. 9Sarei, dui itmiman sarah m'a dui lahara ipama asnm kavr anh kavr ti a, ‘Pam'ahu a ti dui laha ipalak arna m'lnam.’ Laha, nakm pamamih kadav'a kalak arna m'lnam a nadep'. 10V'eti naran m'ertu kinkin ipama kamimanh, nakm pav'a kalak arna m'lnam a nadep', a ti m'ertu iv'ara anh ipama kavr anh kavr ti a, ‘Tv'alk, pama kalak arna m'lnam eia laha.’ Sarei, naham ipav'a eia arna nah nelnal avlak m'ah arna tim'ah. 11#Mat 23:12; Luk 18:14.Sena ti m'ertu iani ti nahan iv'a eia, hin nahan ipav'a a nadep', v'eti m'ertu v'ahienan iter a nadep', hin nahan ipav'a eia.”
12Sarei, ivri ml a dui iv'ara ani, kavr ti a, “Naran pan tim'ah arna lihalm'au v'aha knarev', mav'ara anr tv'alm, v'aha tiamk, v'aha m'ertu arna nl nam'elam, v'aha m'ertu siar istudau la avlak mima asnm ha, sena ti hir avrndu ti apavv'ara anh ml kavtu m'lna tim'aham. 13V'eti naran nakm pan tim'ah, pav'ara anr m'ertu siar ihei, m'ertu avv'i sparasp, m'ertu ahavv'eldri, m'a m'etapar. 14Sarei, parn ipap'as ani, sena ti akavtu m'lna tim'aham, v'eti Atua ipatu m'lnen ml naran m'ertu p'as apavthal arna m'ien.”
A Iesu isran v'nen ivrur tim'ah lil iamk
(Matiu 22:1-10)
15Naran m'ertu iamk ilak m'ei asn tiv' irn v'nen lera, ivr ani, kavr ti a, “M'ertu ipahan p'ret arna v'anuan Atua iparn ipap'as.”
16V'eti Hin ivr ani, kavr ti a, “Dui iamk ien tim'ah lil iamk kav'ara a m'ertu istudau. 17Katep'a dui na m'akarienan arna naran na tim'ah a ti ipavr anr m'ertu la itv'ara sarei anr ha, kavr ti a, ‘Pavrama, sena ti atmhmah sarei a si udlani itrah kam'i.’ 18V'eti iv'amk m'a ti hir udlani avvrkrkar hir. Nki itauamu ivr ani, kavr ti a, ‘Kana ntul sera nadep' iamk nkav'a pr kalei. Usa, pamhmah a kana sena ti nkav'alet.’ 19Laha, nki uraur ivr ti a, ‘Kana ntul sera pluk inal, arruru nakl karrv' sei. Nkav'a pr kandina ler. Usa, pamhmah a kana sena ti nkav'alet.’ 20Nki uraur ml ivr ti a, ‘Kana np'hul tav'etak ser, sena si lera nkahma.’
21Sarei, dui na m'akarien lahara ima kavrp'ep'a si udlani lera an a mlinan. Laha, mlin na nmah lera nln irer kavr a dui na m'akarienan kavr ti a, ‘Pav'el ipalahml arna navanel lilil m'a navanel papa arna v'anu lil kalav'r m'ertu siar ihei, m'ertu avv'i sparasp, m'ertu ahavv'eldri m'a m'ertu avv'i m'etapar.’ 22Dav'a dui na m'akarien ivr ti a, ‘Mlin, sei kvri kana nten sarei, v'eti m'lna m'ertu iak uam.’ 23Laha, mlin ivr a dui na m'akarien kavr ti a, ‘Pav'a kasapa navanel lilil m'a navanel na pitvet kani ti m'ertu apavrama a ti nmahak ipalini. 24Sena ti nvr anh, m'ertu iahamk la ntv'ara sarei ani ha, ipama kahatat arna tim'ahak.’ ”
Pavln si udlani kavsapei a Iesu
(Matiu 10:37,38)
25M'ertu istudau avsapa navanel m'ei. Laha, ivav hin kavr anr kavr ti a, 26#Mat 10:37.“Ipavr ti m'ertu kinkin iamk ipama asnk, v'eti ialep'lei a tetian, a unian, a naun m'er a natn, tv'aln m'er a v'nn, aau, kalep'la silv'ienan, hin ikav'i m'ertuak. 27#Mat 10:38; 16:24; Mak 8:34; Luk 9:23.M'ertu iaua su lamu nen kasapa Kana, ikav'i m'ertuak. 28Ipavr ti kam'i kinkin irn ti ipahl nmah p'arei ki ipamk, ipalak kaspan ulienan ipatauamu. Imahei ti ikahiris ani sena ti nav'etan ipadakrdau. 29Sena ti ipavr ti ipah nakalamu, sarei ti ikahiris ani, m'ertu udlani la apavlei ha, apavsip'lani, 30kavvr ti a, ‘Aulera ihldina nmah v'eti iahiris ani.’ 31V'aha ipavr ti mlin kinkin irn ti ipan naur m'a mlin uraur, ip'as a ti ipalak kav'ahuri ipatauamu karndu ti hin m'er m'ertuan avv'i tausen inal (10,000) apavviviln a ti apavan naur m'a mlin uraur la m'ertuan avv'i tausen inelru (20,000) ha. 32Imvr ti imahei, imtep'a m'ertu avv'i v'nenan a ti apavmiman nut apavan tamat ipanap'ei, naran mlin lera idlak au uam. 33Inap'i lera, ipavr ti kam'i kinkin ikaln si udlanian, ikav'i m'ertuak.
Sul ialalm iap'as a si kinkin
(Matiu 5:13; Mak 9:50)
34Sul ip'as. ?V'eti ipavr ti sul ialalm ml, ipalalm ml ipanap'i? 35Iaviviln a ti apataui al pitvet v'aha apuhei m'a ns pluk kataui al naml, v'eti apasrani uaki. M'ertu drlnan iak a ti iparn sei, ipav'rn ani.”
Currently Selected:
Luk 14: nmb
Highlight
Share
Copy
Want to have your highlights saved across all your devices? Sign up or sign in
© 2023 Presbyterian Reformed Church of Australia
