Luk 15
15
A Iesu isran v'nen ivrur sivsiv imln
(Matiu 18:12-14)
1 #
Luk 5:29,30. Arna naran lera arm'ertu na takis m'er m'ertu stu, hir udlani avrama asnn a ti apavv'rn ani. 2V'eti arvarisi m'er dui na v'nen hua avnanau kavsip'lani kavvr ti a, “Aulera ilav'r m'ertu stu kavhatat m'er.” 3Sena si lera isran v'nen laha asnr kavr ti a, 4“Ipavr ti kam'i kinkin ipamk sivsivan inelnal iv'amk (100), v'eti nki iamk ipamln, nsarei ipalnr inelsav'et pln isav'et (99) arna nut m'auar kadav'a katala a nki la imln ha, dav'a kapaslei. 5Naran ipaslei, ilav'i kataui arna van, karn ip'as ani. 6Dav'a naran ipahau ml, ipav'ara anr tv'aln m'er m'ertu avlak mima asnn, kavr anr kavr ti a, ‘Nakd udlani p'vrn ipap'as sena ti kana ntpasla sera sivsivak la imln hara.’ 7Kana nvr a kam'i a ti aparn ipap'as arna nut eia ipanap'i lera, sena m'ertu stu iamk la ivav v'ahienan karn istu a si stuan ha, ipasiv' ti aparn ipap'as a m'ertu p'as avnelsav'et pln isav'et (99) hara la ahavan si stu akvvav v'ahienar pr sanan.
A Iesu isran v'nen ivrur nav'et iamk imln
8V'aha ipavr ti tav'et kinkin iamk nav'etan inal, snal nen ipamln, nsarei hin ipatu nap' a lait kahsrasr eiman, katala mhmah ani dav'a kapaslei. 9Dav'a, naran ipapaslei, ipav'ara anr tv'aln m'er m'ertu avlak mima asnn, kavr ti a, ‘Nakd udlani p'vrn ipap'as, sena ti ntpasla sera nav'etak la imln hara.’ 10Inap'i lera, nvr a kam'i, enselan Atua avrn ip'as naran m'ertu stu iamk ivav nln.”
A Iesu isran v'nen ivrur malakal iamk iruh asn a tetian
11Ivri ml, kavr ti a, “Dui iamk a natn dui arru. 12Titiatah ivr an a tetian, kavr ti a, ‘Tatei, si la ipav'i nkak hara, patu kana hilaha.’ Sarei, itupr sian katau anr arru. 13Dav'a ti iap'arei titiatah lahara ilev' sian udlani kadav'a arna v'anu iamk iter iv'iv'a au, kasran sian udlani atlera arna p'kl stu iani. 14Dav'a naran itsran sera sian udlani, m'em'erien lil ier v'anu lera. Dav'a ti der iari sanan. 15Hin iv'a kan paria dui iamk arna v'anu lera. Laha, itap'ei iv'a a utan a ti ipamsnen puan. 16Laha, hin irn nam'er istudau kav'ah ti ip'as uaki a ti ipahan plah taru, iv'i suada pua. V'eti m'ertu kinkin iatu tim'ah ani.
17V'eti naran v'ahien p'asan im'alet ml asnn, ivr ti a, ‘M'ertu istudau avan parian a tetiak kavhatat kavrapd, kavln pnen, v'eti kana nut pa ti p'am'a sena m'em'erien. 18P'ilaph kadav'a asn a tetiak kavr ani, kavr ti a, “Tatei, kana nen si stu arna nahn Atua ilak eia, kan si stu arna nahm. 19Kana naviviln a ti apavr ti nv'i a natm ml. Patu kana a ti p'ev'i dui na m'akarienam ipamk.” ’
20Sarei, ilaph kadav'a asn a tetian. V'eti naran idlak v'iv'a uam, a tetian iklau kalei, karn istu ani kavrvr kadav'a asnn kalamamlei karkis m'ei. 21V'eti a natn ivr ani, kavr ti a, ‘Tatei, kana nten sera si stu arna nahn Atua ilak eia kan si stu arna nahm. Kana naviviln a ti p'ev'i a natm ml.’
22V'eti a tetian ivr anr m'ertu na m'akarienan, kavr ti a, ‘Pavrav'a ser kavlev' klus p'as isiv' klus uraur kavuirma kavtaui aranan, kavlev' rin kavhsi arna nirh lm'an, kavlev' sus kavhsi arna tln. 23Pavlev' lvna pluk imrmr kavuirma atlaha kavtrp'ni a ti p'van tim'ah kavhani kavrn ipap'as ani. 24Sena ti a natk laha itam'a sarei katsilv' ml. Itmln sarei, v'eti nvlei ml.’ Laha, avan tim'ah kavrn ip'as.
25Laha, arna naran nen, a natn titiamu ilak al pitvet. Naran iv'el kadama asn nmah, irn ti avhai kavan naval. 26Kav'ara a dui na m'akarien iamk kamiman sei avani. 27Ivrprani, kavr ti a, ‘Titiatah nam itama sarei. A tetiam ittrp'n sera lvna pluk iamk imrmr, sena ti a natn titiatah imam'alet ml asnn kasilv' kap'as.’
28V'eti hin nln irer ani kavr ti ikahv'a eim. Sarei, a tetian ima av'aran kamiman ani ihua. 29V'eti hin ivrpren a tetian kavr ti a, ‘Parn, kana nm'akaram arna pai inelnal. Naluvn a v'nenam naran kinkin, v'eti nakm kaatu kana lvna nani ki a ti p'en tim'ah karn ip'as m'er tv'alk. 30V'eti naran a natm lera im'alet ml, la itsran sera siam asnr tav'et na navanel ha, nakm ktrp'n lvna pluk imrmr sanan.’
31A tetian ivr ani, kavr ti a, ‘Natk, nakm klak asnk iel. Siak udlani iv'i nkam. 32Iviviln a ti nakd p'van tim'ah kavrn ipap'as. Sena ti tv'alm lera itam'a sarei katsilv' ml. Itmln sarei, v'eti nvlei ml.’ ”
Currently Selected:
Luk 15: nmb
Highlight
Share
Copy
Want to have your highlights saved across all your devices? Sign up or sign in
© 2023 Presbyterian Reformed Church of Australia
