Yowana 14

Injira ya okugenda ku‑Nyamuwanga

1Yeesu ˆnaagenderera okwiyigisya ˆnaayika ati, “Musige okusurumbara mu‑myoyo jeemwe, mwikirisye Nyamuwanga, ka wone munyiikirisye na anye. 2Mu‑nju ya Raata waani bhuri‑mo obhwikaro bhwafu. Araabha jitaakabheeye kutyo, naakabhabhwiriiye. Woori enigenda eyo okubheerabhira obhwikaro. 3Omwanya gunu nirimara okubheerabhira obhwikaro, niriija rindi okubhagega korereki anu niribha, emwe wone niwo muribha aamwi na anye. 4Emwe omumenya injira ya okukinga enu enija.”

5Niwo, Tomaasi ˆnaabhuusya Yeesu ati, “Raatabhugenyi awe, eswe chitakumenya enu owuja. Angu, echitura kutiki okumenya injira?” 6Yeesu ˆnaamusubhya ati, “Anye naanye injira, echimari, na obhuwanga. Atari‑wo omuunu woonewoone unu kaatura okuuja ku‑Raata araabha ataturire kw‑anye. 7Araabha mukammenyere anye, mwakamenyere na Raata waani wone. Okwambira woori, omumumenya, ka wone mwamurorere.”

8Firipo ˆnaamubhwira ati, “Raatabhugenyi awe, cheeresye Raata, ogwo ogubha gwiyire.” 9Yeesu ˆnaamusubhya ati, “Firipo, niikaaye aamwi na emwe omwanya omureera gunu, uchaari kummenya? Omuunu woonewoone unu andorere, ararorere Raata. Mbe, kurwa ki owumbwira ati, ‘Cheeresye Raata’? 10Angu, utakwikirisya ati anye niri na obhumwi na Raata, na Raata ari na obhumwi na anye? Emisango jinu enibhabhwira jitakusooka mu‑bhwiganirisya bhwani, nawe Raata, unu ari na obhumwi na anye, niwe kaakora emirimu jaaye okutura kw‑anye. 11Mwikirisye jinu enaayika ati niri na obhumwi na Raata, na ati omwene ari na obhumwi na anye. Nawe araabha emwe mutakwikirisya jinu enaayika, mbe mwikirisye ku‑songa ya emirimu jinu enikora. 12Ni chimari enibhabhwira ati, omuunu woonewoone unu kaanyikirisya, arikora emirimu jinu anye enikora. Ka wone arikora minene okukira jinu enikora, kwa okubha enigenda ku‑Raata. 13Araabha mukasabhwa echiinu choonechoone kw‑isiina ryani, anye enija okubhakorera. Kurwa ejo, rikusyo rya Raata riribhonekana okutura kw‑anye Omwana waaye. 14Araabha mukasabhwa echiinu choonechoone kw‑isiina ryani, enija okuchikora.

Yeesu kaayika rindi inguru ya okuuja kwa Mwoyo Mweru

15“Araabha mukanyeenda, murigwata ebhiraagiro bhyani. 16Mbe, anye nirisabhwa Raata abhayaane Omusakisi owundi, korereki abhe aamwi na emwe siku joone. 17Oyo niwe Mwoyo Mweru unu kaja okuswerurira abhaanu echimari. Abhaanu bha ku‑chaaro kunu bhatakutura okumuramira kwa okubha bhatakumurora, ka wone bhatakumumenya. Nawe emwe omumumenya Mwoyo oyo, kwa okubha eekaaye aamwi na emwe, ka wone kaja okubha mw‑imwe.

18“Nitaribhasiga abheene rwa bhanu bhafwiriiywe abheebhusi bheebhwe, tari niriija rindi kw‑imwe. 19Guchaari mwanya mufuyi era abhaanu bha ku‑chaaro kunu bhatarindora. Nawe emwe murindora kwa okubha anye enirama, emwe wone murirama. 20Ku‑rusuku orwo murimenya ati, anye niri na obhumwi na Raata waani, na emwe muri na obhumwi na anye, na anye niri na obhumwi na emwe. 21Omuunu woonewoone unu kaamenya na okugwata ebhiraagiro bhyani, oyo niwe aanyendere. Na omuunu unu aanyendere, Raata waani arimwenda. Na anye nirimwenda na okwiyeresya ku‑mwene.”

22Mbe, omwiyigisibhwa umwi risiina ryaye Yuuda, atari Yuuda Isikariyooti, ˆnaabhuusya Yeesu ati, “Raatabhugenyi, eyiturikana kutiki okwiyeresya kw‑iswe, nawe utakwiyeresya ku‑bhaanu abhandi bha ku‑chaaro kunu?” 23Yeesu ˆnaamusubhya ati, “Omuunu woonewoone unu aanyendere, arigwata emisango jaani na Raata waani arimwenda. Ka wone anye na Raata chiriija ku‑mwene na okwikara aamwi nage. 24Nawe omuunu woonewoone unu atakunyenda, atakugwata emisango jaani. Emisango jinu omuungwa jitari jaani, tari ni ja Raata unu antumire kw‑imwe.

25“Naabhabhwira joone ejo omwanya gunu nichaari aamwi na emwe. 26Nawe Omusakisi oyo, Mwoyo Mweru, unu Raata arituma kw‑imwe kw‑isiina ryani, aribheeyigisya na okubheechukya joone jinu naabhabhwira. 27Enibhasigira omurembe, omurembe gwani enibhayaana. Omurembe ogwo gutari rwa gunu ogusooka ku‑bhaanu bha ku‑chaaro kunu. Musige okusurumbara mu‑myoyo jeemwe, ka wone musige okuubhaya choonechoone. 28꞉Mwoonguuwe jinu ꞉naabhabhwiriiye ati, ‘Enigenda, nawe niriija rindi kw‑imwe.’ Araabha chimari mwakanyendere, mwakabheeye nimukonderwa okuungwa ati enigenda ku‑Raata, kwa okubha Raata ni mukuru okukira anye.

29“Woori naabhabhwira joone ejo, omwanya gunu jichaari okukorekana, korereki jirikorekana munyiikirisye. 30Nitakutura okwayika na emwe emisango myafu rindi, kwa okubha Syetaani, omukuru wa echaaro chinu kaaja. Nawe atari na obhuturo inguru yaani. 31Jinu enikora nijo jinu Raata andagiriiye okukora, korereki abhaanu bhoone bhasombookerwe ati nimwendere.

“Woori, mwimereeguru chisooke anu.”

Currently Selected:

Yowana 14: jit

Highlight

Copy