Yowana 15

Yeesu niwe riiti rya rijabhiibhu rya echimari

1Yeesu ˆnaagenderera okwiyigisya ati, “Anye naanye riiti rya rijabhiibhu gwa echimari, na Raata waani niwe omurimi. 2Bhuri tabhi rinu ritakutwasya amatwasyo keenu riri kw‑anye, Raata kaaritema okusooka kw‑anye. Nawe bhuri tabhi rinu eritwasya amatwasyo, Raata kaarikongorera korereki ritwasye amatwasyo maafu muno. 3Emwe mwakongoreeywe na okubha abheeru#15:3 Abheeru. Ku‑meeresyo amaafu, ringira Iinyeru mu‑Meeresyo inguru ya Emisango Emikomeeye. ku‑songa ya ameeyigisyo ganu naabheeyigisya. 4Mubhega na obhumwi na anye, anye wone enija okubha na obhumwi na emwe. Rwa kutyo ritabhi ritakutura okutwasya amatwasyo eryene era rikabha ritari kw‑iti rya rijabhiibhu, nikwo kutyo emwe wone mutakutura okukora okwenda kwa Nyamuwanga mukabha mutari kw‑anye.

5“Anye niri riiti rya rijabhiibhu, emwe muri matabhi. Omuunu unu ari na obhumwi na anye, anye wone enibha na obhumwi nage, oyo aribhaga naatwasya amatwasyo maafu, kwa okubha mukarema okubha na obhumwi na anye, mutakutura okukora gwonegwone. 6Omuunu woonewoone unu atari na obhumwi na anye kaasusana na ritabhi rinu eryeswa na okuuma. Mbe, abhaanu abharibhooja na okuryesa mu‑muriro, nirisingaarika. 7Araabha mukabha na obhumwi na anye, na emisango jaani jikabha mu‑myoyo jeemwe, mbe woori musabhwe Raata choonechoone chinu omwenda, omwene kaja okubhayaana. 8Araabha mukatwasya amatwasyo maafu na okubha abheeyigisibhwa bhaani bha echimari, omubha nimweresya abhwerubhweru rikusyo rya Raata waani. 9Rwa kutyo Raata aanyendere anye, nikwo kutyo anye wone nibheendere emwe. Mbe murame mu‑ryenda ryani. 10Araabha mukagwata ebhiraagiro bhyani, omuja okugenderera okurama mu‑ryenda ryani, rwa kutyo anye enigayuka ebhiraagiro bhya Raata waani na okurama mu‑ryenda ryaye.

11“Naabhabhwira ejo korereki rikonderwa ryani ribhe mu‑myoyo jeemwe, na rikonderwa ryemwe rikuumire. 12Echiraagiro chinu nicho enibharagirira ati, mwendanega, rwa kutyo anye nibheendere. 13Atari‑wo omuunu unu ari na eryenda rinene okukira omuunu unu kaasoosya obhuwanga bhwaye inguru ya abhasaani bhaaye. 14Araabha mukakora jinu nibharagiriiye, emwe muri bhasaani bhaani. 15Nitachaabhatoga rindi ati, muri bhagaya, kwa okubha omugaya atakumenya gunu omwami waaye kaakora. Nawe emwe naabhaswerurira joone jinu noongwa okusooka ku‑Raata waani, kutyo niraabhatogega ati, muri bhasaani bhaani. 16Mutari emwe bhanu ꞉mwansorere anye, tari naanye ꞉naabhasorere emwe. ꞉Naabhasorere, korereki mugende mutwasye amatwasyo ganyatawaa‑wo wuri. Mukakora kutyo, joone jinu omuja okusabhwa okutura kw‑isiina ryani, Raata kaja okubhayaana. 17Mbe woori, enibharagirira ati, mwendanega.”

Abhaanu bha ku‑chaaro kunu abhasoka bhanu abheekirisya Yeesu

18Yeesu ˆnaagenderera okwiyigisya ati, “Araabha abhaanu bha ku‑chaaro kunu bhaakabhasoka, mumenye ati ꞉bhaambire okunsoka anye. 19Araabha mukabheeye muri bhaanu bha ku‑chaaro kunu, abheene bhaakabheendaga rwa kutyo abheenda abhaanu bheende‑ko. Nawe emwe mutari bhaanu bha ku‑chaaro kunu, kwa okubha nibhasorere okusooka ku‑chaaro kunu. Eyo niyo isonga inu eyikora abhaanu bha ku‑chaaro kunu nibhabhasoka. 20Mwasiga okurabhirwa omusango gunu ꞉naabhabhwiriiye ati, ‘Omugaya atakutura okubha omukuru okukira omwami waaye.’ Mbe, araabha ꞉bhaanyaasiisye anye, emwe wone bharibhanyaasya. Nawe araabha ꞉bheekirisiisye ameeyigisyo gaani, ageemwe wone abhaja okugeekirisya. 21Nawe abhaja okubhakorera joone ejo kwa okubha omunduubha, ka wone kwa okubha bhatakumenya unu antumire. 22Araabha nikabheeye ꞉niteejire ku‑bheene na okwayika nabho, mbe bhatakabheeye na echibhiibhi. Nawe woori, bhatakutura okwibhagira ati bhatari na echibhiibhi. 23Omuunu woonewoone unu kaansoka, kaasoka na Raata waani wone. 24Nikorere ebhiruguusyo ebhinene bhinu omuunu owundi achaariga okukora. Araabha bhakabheeye bhatabhirorere, bhatakabheeye na echibhiibhi. Nawe woori, bharorere joone jinu ꞉naakorere, noorwo kutyo bhachaansokere na Raata waani wone bhamusokere. 25Jinu jikorekeene korereki jikuumire emisango jinu jikaamirwe mu‑Bhikaame Ebhyeru ati, ‘꞉Bhaansokere kutyo era.’#15:25 Ringira Ijabhuri 35:19, 69:4.

26“Nirituma kw‑imwe Omusakisi, niwe Mwoyo Mweru, unu kaja okuswerurira abhaanu echimari. Omusakisi oyo, kaasooka ku‑Raata, na omwanya gunu aribhakinga‑ko, arisoosya obhubhambaasi bhwa echimari inguru yaani. 27Noorwo emwe wone murisoosya obhubhambaasi inguru yaani, kwa okubha mwariga muri aamwi na anye okusookerera ku‑bhwambiro.

Currently Selected:

Yowana 15: jit

Highlight

Copy