Yowana 16

1“Naabhabhwira joone ejo korereki mwasiga okusiga eriikirisya ryemwe. 2Abhaanu bharibhakindika mu‑nju ja ameekofyanyo. Oguuja omwanya gunu bhuri muunu unu aribheetaga, ariitogera ati kaakora emirimu ja Nyamuwanga. 3Bharibhakorera emisango ejo, kwa okubha bhatakumenya Raata, noorwo anye wone bhatakummenya. 4Naabhabhwira emisango ejo, korereki omwanya ogwo aribha gwakinga, mwichuke jinu ꞉naabhabhwiriiye.

Emirimu ja Mwoyo Mweru

“꞉Nitabhabhwiriiye ejo joone ku‑bhwambiro, kwa okubha naariga niri aamwi na emwe. 5Mbe, woori enigenda ku‑Raata, oyo niwe ꞉aantumire kw‑imwe. Nawe atari‑wo woonewoone agati yeemwe wa okumbuusya ati, ‘Angu, owuja aaki?’ 6Mwasurumbara muno mu‑myoyo jeemwe, kwa okubha naabhabhwira ati enigenda ku‑Raata.

7“Ni chimari enibhabhwira ati, ni kisi kw‑imwe anye nigende ku‑Raata. Araabha nikaremere okugenda, Omusakisi urya ataakaturire okuuja kw‑imwe. Nawe araabha nikagenda, enija okumutuma kw‑imwe. 8Omusakisi urya akaaja, aribhaga ˆneeresya abhaanu bha ku‑chaaro kunu ati ni bhakosi bha ebhibhiibhi, na ati anye niri murengeresi, ka wone ati Nyamuwanga aribharamura. 9Aribhaga ˆnaabheeresya ati ni bhakosi bha ebhibhiibhi, kwa okubha bhatakunyikirisya. 10Aribheeresya ati anye niri murengeresi, kwa okubha enigenda ku‑Raata na mutarindora rindi. 11Aribhaga ˆnaabheeresya ati Nyamuwanga aribharamura, kwa okubha aaramuuye Syetaani omukuru wa echaaro chinu.

12“Nichaari na emisango myafu ja okubhabhwira, nawe omwanya gunu mutakutura okujisombookerwa. 13Mwoyo wa echimari oyo, aribha aaja kw‑imwe, aribhatangasya okusombookerwa echimari choone. Ataryayika ku‑bhuturo bhwaye omwene, tari aryayika jinu aryungwa na okubhabhwira jinu jirikorekana. 14Mwoyo oyo aribhaga ˆnaabheeresya rikusyo ryani, kwa okubha aribhabhwira joone jinu aryungwaga okusooka kw‑anye. 15Bhyone bhinu Raata ari nabhyo ni bhyani. Nikwo okukora enaayika ati, Mwoyo oyo aribhabhwira joone jinu koongwa okusooka kw‑anye.

Obhusurumbaaye bhuriyinduka okubha rikonderwa

16“Kachaasigaaye‑wo katungu katooto era, mutakuja okundora, ka wone akatungu ako kaakawa, murindora rindi.” 17Mbe, abheeyigisibhwa bhaaye abhandi nibhabhuusyanya ati, “Angu, obhugajuro bhwaye niki okwayika ati, ‘Kachaasigaaye‑wo katungu katooto era, mutakuja okundora, ka wone akatungu ako kaakawa, murindora rindi,’ na ati, ‘Kwa okubha enigenda ku‑Raata’?” 18Mbe, nibhagenderera okubhuusyanya ati, “Obhugajuro bhwa ‘Katungu katooto’ niki? Eswe chitakusombookerwa jinu kaayika.” 19Yeesu ˆnaasombookerwa ati bheendaga okumubhuusya ku‑misango jinu aayika, mbe omwene ˆnaabhabhuusya ati, “Angu, omubhuusyanya inguru ya jinu naayika ati, ‘Kachaasigaaye‑wo katungu katooto era, mutakuja okundora, nawe akatungu ako kaakawa, murindora rindi’? 20Ni chimari enibhabhwira ati, emwe muririra na okusurumbara, nawe abhaanu bha ku‑chaaro kunu bharikonderwa. Murisurumbara, nawe obhusurumbaaye bhwemwe bhuriyinduka okubha rikonderwa. 21Emisango ejo, jiri rwa omugasi unu kaarumwa obhusungu, omwanya gwaye gwa okwibhura gukakinga. Nawe akamara okwibhura, kaarabhirwa chimwi obhusungu obhwo inguru ya rikonderwa rya okwibhura omwana ku‑chaaro kunu. 22Emwe wone ku‑mwanya gunu musurumbaaye. Nawe niribhaaja‑ko rindi, na murikonderwa mu‑myoyo jeemwe. Atari‑wo omuunu unu arisoosya rikonderwa eryo mu‑myoyo jeemwe. 23Ka wone orusuku orwo rurikinga, mutarikena okumbuusya omusango gwonegwone.

“Ni chimari enibhabhwira ati, joone jinu omuja okusabhwa okutura kw‑isiina ryani, Raata kaja okubhayaana. 24Noorwo woori, muchaari kusabhwa echiinu choonechoone ku‑Nyamuwanga okutura kw‑isiina ryani. Musabhwe Nyamuwanga, kaja okubhayaana. Ku‑njira eyo rikonderwa ryemwe erija okukuumira.

Yeesu ayigire amanaga ga obhujabhi ku‑chaaro

25“Naabhabhwira emisango ejo joone ku‑bhijekekanyo. Omwanya oguuja gunu nitaryayika na emwe ku‑bhijekekanyo, nawe niribhabhwira abhwerubhweru inguru ya Raata. 26Ku‑mwanya ogwo, muribhaga nimusabhwa Nyamuwanga kw‑isiina ryani. Nitakwayika ati anye niribhaga nimbasabhirwa ku‑Raata. 27Raata omwene abheendere emwe, kwa okubha emwe wone munyendere anye, ka wone mwikirisiisye ati ꞉naasookere ku‑Raata. 28꞉Neejire ku‑chaaro kunu okusooka ku‑Raata, nawe woori enisooka ku‑chaaro kunu, enisubha rindi ku‑Raata.”

29Mbe abheeyigisibhwa bhaaye nibhamubhwira ati, “Woori waamba okwayika na eswe abhwerubhweru, noorwo jitari ku‑bhijekekanyo! 30Woori chaasombookerwa ati umenyere joone, ka wone utakukena omuunu akubhuusye omusango gwonegwone. Ejo nijo jaakora chiikirisye ati, usookere ku‑Nyamuwanga.” 31Yeesu ˆnaabhabhuusya ati, “Angu, woori mweekirisya? 32Ringira omwanya ogufogera, ka wone guri yeeyi muno, gunu bhoone murinyaragana. Emwe bhoone murigenda mu‑misi jeemwe, na okunsiga anye eenyere. Nawe nitaribha anye eenyere, kwa okubha Raata ari aamwi na anye. 33Naabhabhwira ejo joone, korereki mubhe na omurembe mu‑myoyo jeemwe, kwa okubha muri na obhumwi na anye. Ku‑chaaro anu muribhona ebhinyaasyo bhyafu, nawe mwasiga okuyaya, kwa okubha anye ꞉naayigire echaaro.”

Currently Selected:

Yowana 16: jit

Highlight

Copy