Yowana 17

Yeesu kaasabhwa Nyamuwanga

1Yeesu ejire aamara okwayika ejo joone, ˆnaaragamira ku‑rwire, ˆnaasabhwa ati,

“Raata, omwanya gwakinga. Yeeresya abhaanu rikusyo ryani anye Omwana waawo, korereki anye wone nibheeresye rikusyo ryawo kutyo riri. 2Unaaye obhuturo bhwa okutangasya abhaanu bhoone, korereki nibhayaane obhuwanga bhwa akajaanende bhoone bhanu unaaye. 3Obhuwanga bhwa akajaanende nibhwo bhunu, abhaanu bhakumenye awe, Nyamuwanga eenyere wa chimari, ka wone, bhammenye anye Yeesu Kirisito, unu awe ꞉waantumire. 4Anye neeresya rikusyo ryawo ku‑bhaanu bhoone ku‑chaaro kunu, kwa okukuumisya emirimu jinu ꞉waantumire okuuja okukora. 5Raata, enikusabhwa undeete rindi mw‑ikusyo ryawo, rikusyo rinu naariga niri naryo, omwanya gunu naariga niri aamwi na awe, bhunu waariga uchaari kubhumba echaaro.

Yeesu kaasabhirwa abheeyigisibhwa bhaaye

6“Raata, naakuswerura kutyo uri ku‑bhaanu bhanu kara awo bhaariga bhari bha ku‑chaaro kunu. Abheene bhaariga bhari bhaawo, awe nuubhanaana. Ka wone bhagayukire omusango gwawo. 7Woori bhaasombookerwa ati bhyone bhinu ꞉waanaarire, ꞉bhyasookere kw‑awe, 8kwa okubha naabhabhwiriiye joone jinu ꞉waambwiriiye, abheene wone bhajiramiiye. Bhamenyere chimari ati nisookere kw‑awe, ka wone bheekirisiisye ati naawe unu ꞉waantumire. 9Enisabhirwa abho, kwa okubha ni bhaanu bhaawo. Nitakusabhirwa abhaanu bha ku‑chaaro kunu, nawe enisabhirwa bhanu awe ꞉waanaaye. 10Abhaanu bhaani bhoone ni bhaawo, ka wone abhaanu bhaawo bhoone ni bhaani. Rikusyo ryani risweruuywe okutura ku‑bheene. 11Anye eniija kw‑awe, mbe nitakuja okubha rindi ku‑chaaro kunu. Nawe abheene abhagenderera okubha ku‑chaaro kunu. Raata Omweru, ubharinde ku‑bhuturo bhwa risiina ryawo rinu unaaye, korereki bhabhe chiinu chimwi rwa kutyo anye na awe chiri chiinu chimwi. 12Omwanya gunu naariga niri aamwi nabho, naabharindaga ku‑bhuturo bhwa risiina ryawo rinu unaaye. ꞉Naabhaangariiye kisi korereki nisige okubhusya noorwo umwi ku‑bhanu, tari unu ꞉eenderwe okusingaarika, okukuumisya jinu jikaamirwe mu‑Bhikaame Ebhyeru.#17:12 Ringira Ijabhuri 41:9.

13“Raata, woori eniija kw‑awe. Enaayika emisango jinu omwanya gunu nichaari‑wo ku‑chaaro kunu, korereki abheeyigisibhwa bhaani bhabhe na rikonderwa ryani ryone mu‑myoyo jeebhwe. 14Naabhabhwira emisango jinu unaaye. Nawe abhaanu bha ku‑chaaro kunu abhabhasoka, kwa okubha abheeyigisibhwa bhaani bhatari bha ku‑chaaro kunu, rwa kutyo anye nitari wa ku‑chaaro kunu.

15“Raata, nitakukusabhwa ati ubhafurusye okusooka ku‑chaaro kunu, tari ati ubhachungure kusooka ku‑Mubhiibhi urya. 16Abheene bhatari bha ku‑chaaro kunu, rwa kutyo anye nitari wa ku‑chaaro kunu. 17Raata, enikusabhwa ubheesye mu‑chimari chaawo, kwa okubha omusango gwawo nigwo echimari. 18Rwa kutyo ꞉waantumire anye ku‑chaaro kunu, nyabhuriko anye wone naabhatuma ku‑chaaro kunu. 19Eniisoosya okukukorera emirimu ku‑songa yeebhwe, korereki abheene wone bheesibhwe mu‑chimari.

Yeesu kaasabhirwa bhanu bharimwikirisya

20“Nitakusabhirwa abheene era, tari nisabhirwa bhoone bhanu bharinyikirisya okuruubhana na jinu abheeyigisibhwa bhaani bharibheeyigisya. 21Enisabhwa ati abho bhoone bhabhe chiinu chimwi. Raata, enisabhwa ati bhabhe na obhumwi na eswe, rwa kutyo awe uri na obhumwi na anye, na anye wone niri na obhumwi na awe. Enisabhwa ati bhabhe chiinu chimwi, korereki abhaanu bha ku‑chaaro kunu bheekirisye ati chimari naawe ꞉waantumire. 22Rikusyo rinu ꞉waanaaye, anye wone naayaana abheeyigisibhwa bhaani, korereki bhabhe chiinu chimwi, rwa kutyo anye na awe chiri chiinu chimwi. 23Anye niri na obhumwi nabho, na awe uri na obhumwi na anye. Enisabhwa ati bhabhe chiinu chimwi kata, korereki ku‑njira eyo, abhaanu bha ku‑chaaro kunu bhasombookerwe ati naawe ꞉waantumire, ka wone bhasombookerwe ati ubheendere rwa kutyo unyendere.

24“Raata, eniigomba ati abhaanu bhanu unaaye bhabhe aamwi na anye anu niribha, korereki bharore rikusyo ryani rinu ꞉waanaaye, kwa okubha ꞉waanyendere noorwo uchaari okubhumba echaaro. 25Raata omurengeresi, abhaanu bha ku‑chaaro kunu bhatakukumenya. Nawe anye nikumenyere, ka wone abheeyigisibhwa bhaani abhamenya ati naawe ꞉waantumire. 26Anye nibheeyigisiisye kutyo uri, ka wone enija okugenderera okukora kutyo, korereki bheendane rwa kutyo awe unyendere, ka wone nibhe na obhumwi nabho.”

Currently Selected:

Yowana 17: jit

Highlight

Copy