Yowana 18

Yeesu kaagwatwa

(Mataayo 26:47‑56; Maariko 14:43‑50; Ruuka 22:47‑53)

1Yeesu ejire aamara okusabhwa, ˆneemuka na abheeyigisibhwa bhaaye ˆnaagenda ku‑ngego ya akasima ka Kedironi anu ryariga riri risambu rya emijeyituuni. Nibhakinga nibheengira mw‑isambu omwo.

2Mbe, Yuuda unu ꞉aaromeeye Yeesu iniku, aariga amenyere risambu eryo, kwa okubha Yeesu aagendaga‑mo kwiya kaafu aamwi na abheeyigisibhwa bhaaye. 3Kurwa ejo, Yuuda ˆnaatangasya echise cha abhasirikare bha Echiruumi, aamwi na abhasirikare bha Riyekaru okusooka ku‑bhakuru bha abhagabhisi na ku‑Bhafarisaayo. Nibhagenda mw‑isambu eryo, bhagwatiriiyega jidara, ebhisiriira na ebhigwato.

4Yeesu ꞉aamenyere joone jinu jaariga jeenderwe jikorekane ku‑mwene. Mbe, ˆnaafogera imbere kutooto, ˆnaabhuusya abhaanu bhanu bhaariga bheejire awo ati, “Angu, omuyenja ga?” 5Abheene nibhamusubhya ati, “Echiyenja Yeesu wa Najareeti.” Yeesu ˆnaabhasubhya ati, “Naanye.”

Yuuda unu ꞉aaromeeye Yeesu iniku, aariga eemereeguuyu aamwi na abhasirikare abho. 6Mbe, Yeesu ejire aabhabhwira ati, “Naanye,” abhasirikare abho nibhasubha inyuma nibhagwa aasi. 7Yeesu ˆnaabhabhuusya rindi ati, “Angu, omuyenja ga?” Abheene nibhamusubhya ati, “Echiyenja Yeesu wa Najareeti.” 8Yeesu ˆnaabhasubhya ati, “Naabhabhwira ati naanye. Araabha naanye omunyenja, mbe musige abheeyigisibhwa bhaani bhanu bhagende.” 9Yeesu ꞉aayikire kutyo korereki jikuumire jinu ꞉aayikire ku‑bhwambiro ati, “Naariga nimbangarira kisi bhanu ꞉waanaaye, korereki nisige okubhusya noorwo umwi weebhwe.”#18:9 Ringira Yowana 6:39, 17:12.

10Simooni Peetero aariga ari na imbanda. Mbe, ˆnaayisoromora, ˆnaabhuma omugaya wa omugabhisi omukuru, na okutema‑ko okutwi kwaye kwa ebhuryo. Omugaya oyo, aariga ˆnaatogwa ati Maako. 11Nawe Yeesu ˆnaaragirira Peetero ati, “Peetero, nuusubhye imbanda yaawo mu‑ruubhu rwayo. Angu, utakumenya ati jeenderwe ninyaasibhwe rwa kutyo Raata aramuuye?”#18:11 Jeenderwe ninyaasibhwe rwa kutyo Raata aramuuye? Jinyabhurira ejindi ejaayika ati, naasiga okunywera omutawo gunu Raata anaaye korereki ninywere‑mo?

Yeesu kaasirwa imbere ya Anaasi

(Mataayo 26:57‑58; Maariko 14:53‑54; Ruuka 22:54)

12Mbe, omukuru wa abhasirikare bha Echiruumi, aamwi na echise chaaye cha abhasirikare, na abhasirikare bharya okusooka ku‑bhatangasya bha Abhayawudi, nibhagwata Yeesu, nibhamubhoya. 13Mbe, nibhamusira okwamba ku‑Anaasi esebhuko Kayaafa. Kayaafa niwe aariga ari mugabhisi omukuru ku‑mwanya ogwo. 14Ku‑bhwambiro, Kayaafa oyo niwe ꞉aatongeeye abhatangasya bha Abhayawudi ati jiiyire omuunu umwi afwe inguru ya abhaanu bhoone.#18:14 Ringira Yowana 11:50.

Peetero keegaana Yeesu

(Mataayo 26:58, 26:69‑70; Maariko 14:54, 14:66‑68; Ruuka 22:55‑57)

15Simooni Peetero na omwiyigisibhwa owundi bhaariga nibharuubhirira Yeesu inyuma. Omwiyigisibhwa owundi wurya, aariga amenyekeene ku‑mugabhisi omukuru. Kurwa ejo, omwene oyo niwe ꞉eengiiye na Yeesu mu‑rubhuga rwa inju ya omugabhisi omukuru. 16Nawe Peetero ˆneemereeguru anja kw‑irango. Niwo omwiyigisibhwa owundi unu aariga amenyekeene ku‑mugabhisi omukuru, ˆnaaja anja. ˆNaaroma na omuyarakaji unu aariga ari muriisi wa kw‑irango awo, na omwene ˆneekirisya Peetero eengire mu‑rubhuga.

17Mbe, omuriisi wa echigasi oyo, ˆnaabhuusya Peetero ati, “Angu, awe wone utari umwi wa abheeyigisibhwa bha omuunu oyo?” Peetero ˆnaamusubhya ati, “Nitari anye.”

18Okubha omwanya ogwo yaariga iri‑wo imbewo, abhagaya na abhasirikare bha Riyekaru bharya bhaariga bheemereeguuyu anu bhaariga bhakumire echooto cha amakara, nibhabhiraga omuriro. Peetero wone aariga eemereeguuyu aamwi nabho, ˆnaabhiraga omuriro.

Omugabhisi omukuru kaabhuusirisya Yeesu

(Mataayo 26:59‑66; Maariko 14:55‑64; Ruuka 22:66‑71)

19Omwanya ogwo, omugabhisi omukuru, ˆnaabhuusya Yeesu inguru ya abheeyigisibhwa bhaaye na ameeyigisyo gaaye. 20Yeesu ˆnaamusubhya ati, “Naariga ninaayika na abhaanu bhoone abhwerubhweru. Omwanya gwone naariga niniiyigisya abhaanu mu‑nju ja ameekofyanyo geemwe na mu‑rubhuga rwa Riyekaru munu Abhayawudi bhaafu abheekumanya aamwi. ꞉Nitaayikire wuri musango gwonegwone mu‑bhumbise. 21Mbe kurwa ki owumbuusya? Kurwa ki utakubhuusya abhaanu bhanu bhaariga nibhantegeresya omwanya gunu naabheeyigisyaga? Abheene abhamenya jinu naariga ninaayika.” 22Yeesu ejire aayika kutyo, omusirikare umwi unu aariga eemereeguuyu ayeeyi nage ˆnaamubhaatuura rikoofi, ˆnaamubhuusya ati, “Nikwo kutyo owusubhya omugabhisi omukuru?” 23Yeesu ˆnaamusubhya ati, “Araabha naayika kubhiibhi, yayika obhubhiibhi bhwani. Nawe araabha naayika echimari, mbe kurwa ki owumbuma?” 24Mbe, Anaasi ˆnaaragirira ati bhagege Yeesu abhoyerwe kutyokutyo, bhamusire ku‑mugabhisi omukuru, Kayaafa.

Peetero keegaana Yeesu rindi

(Mataayo 26:71‑75; Maariko 14:69‑72; Ruuka 22:58‑62)

25Omwanya ogwo, Simooni Peetero aariga acheemereeguuyu ˆnaabhiraga omuriro. Mbe, abhaanu abharebhe nibhamubhuusya ati, “Angu, awe wone utari umwi wa abheeyigisibhwa bha omuunu oyo?” Peetero ˆneegaana ˆnaayika ati, “Nitari anye.” 26Nawe umwi wa abhagaya bha omugabhisi omukuru unu aariga ari muyiri wa omuunu unu Peetero ꞉aatemere okutwi, ˆnaamubhuusya ati, “Enitogera ati ꞉naakurorere uri aamwi nage mw‑isambu.” 27Peetero ˆneegaana rindi ati, “Nitari anye.” Awoawo, rikookorome nirikookoroma.

Abhatangasya bha Abhayawudi abhasira Yeesu ku‑Piraato

(Mataayo 27:1‑2; Maariko 15:1‑5; Ruuka 23:1‑5)

28Mbe bhwejire bhwacha, abhatangasya bha Abhayawudi nibhagega Yeesu okusooka ku‑Kayaafa. Nibhagenda nage mw‑iyumba rya omutungi wa Echiruumi. Nawe abheene ꞉bhateengiiye‑mo,#18:28 ꞉Bhateengiiye‑mo. Okuruubhana na jitungwa ja Abhayawudi, araabha Omuyawudi akeengira mu‑nju ya omuunu unu atari Omuyawudi, aariga ˆneejabhiyasya, ataakaturire okurya ebhiryo bhya mu‑chikukuru ya Okwambuka. korereki bhaasiga okwijabhiyasya nibhataamibhwa okurya ebhiryo bhya ichikukuru ya Okwambuka. 29Mbe omutungi wa Echiruumi, risiina ryaye Piraato, ˆnaawuruka anja na okugenda anu bhaariga bhari, ˆnaabhabhuusya ati, “Angu, omuunu unu akorere ebhikayo ki bhinu omumusitaaka?” 30Abheene nibhamusubhya ati, “Araabha omuunu unu akabheeye atari na ebhikayo, ꞉chitaakamureetere kw‑awe.” 31Piraato ˆnaabhabhwira ati, “Mbe mumugege mugende okumuramura emwe abheene okuruubhana na ebhiraagiro bhyemwe.” Nawe Abhayawudi nibhamusubhya ati, “Chitari na obhuturo bhwa okuramura omuunu woonewoone ati afwe.” 32Ejo ꞉jaakorekeene kutyo, korereki emisango jinu Yeesu ꞉aayikire jikuumire okweresya kutyo kaja okufwa.

Piraato kaabhuusirisya Yeesu

33Mbe, Piraato ˆneengira rindi mu‑nju, ˆnaaragirira ati bhasire Yeesu ku‑mwene, ˆnaamubhuusya ati, “Angu, awe naawe omukama wa Abhayawudi?” 34Yeesu ˆnaamusubhya ati, “Angu, jinu owumbuusya ejisooka mu‑bhwiganirisya bhwawo amwi abhaanu abhandi nibhwo bhaakubhwira emisango jaani?” 35Piraato ˆnaamusubhya ati, “Angu, anye niri Muyawudi? Abhaanu bha riyanga ryawo aamwi na abhakuru bha abhagabhisi nibho bhaakureeta kw‑anye korereki nikuramure. Angu, ukorere chikayo ki?” 36Yeesu ˆnaamusubhya ati, “Obhukama bhwani bhutari bhwa ku‑chaaro kunu. Araabha bhwakabheeye bhuri bhwa ku‑chaaro kunu, mbe abheeyigisibhwa bhaani bhakandwaniriiye korereki nisige okugwatwa na abhatangasya bha Abhayawudi. Nawe obhukama bhwani bhutari bhwa ku‑chaaro kunu.”

37Mbe, Piraato ˆnaamubhuusya ati, “Kutyo mbe, awe uri mukama?” Yeesu ˆnaamusubhya ati, “Naawe waayika ati, anye niri mukama. Anye ꞉neebhuuywe na okuuja ku‑chaaro kunu, korereki niiyigisye abhaanu echimari. Omuunu woonewoone unu kaaruubha echimari, kaategeresya emisango jaani.” 38Piraato ˆnaamubhuusya ati, “Echimari niki?”

Piraato ejire aayika ejo, ˆnaawuruka anja rindi, ˆnaabhwira abhatangasya bha Abhayawudi ati, “Anye nitaarora echikayo choonechoone cha okusitaakira omuunu unu. 39Nawe emwe omubhaga na itungwa ya okunsabhwa niigurire omubhoywa umwi ku‑mwanya gwa ichikukuru ya Okwambuka. Angu, omwenda nibheegurire omukama wa Abhayawudi?” 40Nawe abhaanu bhoone nibhamwaya nibhaayikaga ati, “Unu wuri! Tari nuuchiigurire Bharaabha.” Bharaabha aariga abhoyerwe mw‑ibhoyero inguru ya okwenda okugaramura obhutungi bhwa Abharuumi.

Currently Selected:

Yowana 18: jit

Highlight

Copy