Yowana 19

Yeesu kaaramurwa okubhumiirirwa ku‑musarabha

1Mbe, Piraato ˆnaaragirira abhasirikare bhaaye ati bhagege Yeesu, bhamubhume na jijaridi. 2Abhasirikare nibhasinga orutengya rwa amawa, nibhamufwafya ku‑mutwe. Ka wone nibhamufwafya omwingiro gwa ijambarawu, korereki abhonekane wuti ni mukama. 3Bhaariga nibhamujaa‑ko, nibhamukeesya kwa okumusiijaaka nibhaayikaga ati, “Kasinge, omukama wa Abhayawudi!” Nibhamubhaatuura amakoofi.

4Piraato ˆnaawuruka anja rindi, ˆnaabhwira echise cha abhaanu bharya ati, “Mutegeresye, enimureeta kw‑imwe anja anu, korereki mumenye ati nitakurora echikayo choonechoone ku‑muunu unu cha okumusitaaka.” 5Niwo Yeesu ˆnaawuruka anja enu afwaye orutengya rwa amawa na omwingiro gwa ijambarawu. Mbe, Piraato ˆnaabhabhwira ati, “Ringira, omuunu omwene niwe unu anu.”

6Abhakuru bha abhagabhisi na abhasirikare bheebhwe bha Riyekaru bhejire bhaarora Yeesu, nibhamwaya nibhaayikaga ati, “Mubhumiirire ku‑musarabha, mubhumiirire ku‑musarabha!” Mbe, Piraato ˆnaabhabhwira ati, “Mumugege, mugende okumubhumiirira emwe abheene ku‑musarabha, kwa okubha anye nitakurora echikayo choonechoone ku‑muunu unu cha okumusitaaka.” 7Abhatangasya bha Abhayawudi abho nibhamusubhya ati, “Eswe chiri na echiraagiro. Okuruubhana na echiraagiro echo, keendwa eetwe, kwa okubha keekora wuti ni Mwana wa Nyamuwanga.”#19:7 Ringira Abharaawi 24:16.

8Piraato ejire oongwa emisango ejo, ˆnoobhaya muno. 9Mbe, ˆneengira rindi mu‑nju ya obhutungi, ˆnaabhuusya Yeesu ati, “Awe usookere aaki?” Nawe Yeesu ꞉ataamusubhiisye omusango gwonegwone. 10Mbe, Piraato ˆnaamubhuusya ati, “Kurwa ki utakunsubhya? Angu, utakumenya ati niri na obhuturo bhwa okukwigurira, na obhwa okukubhumiirira ku‑musarabha?” 11Yeesu ˆnaamusubhya ati, “Utaakabheeye na obhuturo bhwonebhwone inguru yaani araabha ukabheeye utayaaywe na Nyamuwanga. Kurwa ejo, omuunu unu antuura mu‑mabhoko gaawo ari na echibhiibhi chinene muno okukira echaawo.”

12Mbe, Piraato ejire oongwa ejo, ˆnaaregeeja okuyenja injira ya okwigurira Yeesu, nawe abhatangasya bha Abhayawudi nibhamwaya rindi nibhaayikaga ati, “Araabha ukeegurira omuunu oyo, mbe awe utari musaani wa Kayisaari.#19:12 Kayisaari. Aariga ari mukama wa Abharuumi, ka wone niwe ꞉aatangasiisye ebhyaro bhyafu ku‑njira ya obhukoorooni, noorwo echaaro cha Yisirayeeri ku‑mwanya gurya. Ku‑meeresyo amaafu, ringira mu‑Meeresyo inguru ya Emisango Emikomeeye. Omuunu woonewoone unu keekora wuti ni mukama, kaayingirira Kayisaari.” 13Piraato ejire oongwa emisango ejo, ˆnaawurusya Yeesu anja. Piraato omwene ˆnaagenda okwinyanja ku‑chitebhe cha indamu, anu bhaabhirikiraga ati, Omwariro gwa Amabhuyi. Mu‑Chiyebhuraniya kaabhirikirwa ati, Gabhata. 14Jaariga jiri wuti saa etaanu na imwi orusuku rwa okwiraabha inguru ya ichikukuru ya Okwambuka.

Piraato ˆnaabhwira Abhayawudi abho ati, “Muringire, unu niwe omukama weemwe!” 15Abheene nibhamwaya, nibhaayikaga ati, “Nuumwite, nuumwite! Nuumubhumiirire ku‑musarabha!” Piraato ˆnaabhabhuusya ati, “Angu, omwenda nibhumiirire ku‑musarabha omukama weemwe?” Abhakuru bha abhagabhisi nibhamusubhya ati, “Eswe chitari na omukama owundi, tari Kayisaari eenyere!” 16Mbe, ku‑bhuteero Piraato ˆnaatuura Yeesu mu‑mabhoko geebhwe, korereki abhumiirirwe ku‑musarabha.

Yeesu kaabhumiirirwa ku‑musarabha

(Mataayo 27:32‑44; Maariko 15:21‑32; Ruuka 23:26‑43)

Mbe, abhasirikare nibhagega Yeesu na okugenda nage. 17ˆNaagega omusarabha gwaye omwene, ˆnaasooka mu‑musi, ˆnaagenda anu mu‑nyaayika ya Echiyebhuraniya kaatogwa ati Gorigoota, obhugajuro bhwagwo ni chiyanga cha omuunu. 18Bhejire bhaakinga arya, nibhamubhumiirira omwene na abhaanu abhandi bhabhiri ku‑misarabha, owumwi orubhaara rwa ebhuryo rwa omusarabha gwa Yeesu, na owundi orubhaara rwa ebhumoosi, na Yeesu aariga ari agatigati yeebhwe.

19Piraato ˆnaaragirira ati jikaamwe emisango ku‑kabhaawu na akabhaawu ako katuurwe inguru ya omusarabha gwa Yeesu. Emisango ejo jaariga jikaamirwe ati, “unu ni yeesu wa najareeti, omukama wa abhayawudi.” 20Emisango ejo ꞉jaakaamirwe mu‑nyaayika ya Echiyebhuraniya, Echiruumi na Echiyunaani. Abhayawudi bhaafu bhaariga nibhasoma emisango ejo, kwa okubha anu ꞉bhaamubhumiiriiye ku‑musarabha aariga ari yeeyi na Yerusareemu.

21Mbe, abhakuru bha abhagabhisi nibhabhwira Piraato ati, “Siga okukaama ati, ‘Unu ni mukama wa Abhayawudi,’ tari nuukaame ati, ‘Omuunu unu ꞉aayikire ati omwene niwe omukama wa Abhayawudi.’” 22Piraato ˆnaabhasubhya ati, “Wuri, amakaamo ago gasigare rwa kutyo gakaamirwe.”

23Abhasirikare bhejire bhaamara okubhumiirira Yeesu ku‑musarabha, nibhagega emyenda jaaye, nibhajigabhanya migabho ena. Bhuri musirikare ˆnaagega omugabho gwaye. Ka wone, nibhagega omwingiro gwaye. Omwingiro ogwo, gwariga gutabharirirwe, tari, gwariga gurukirwe kwa ebhaara rimwi era rya omwenda. 24Mbe, nibhaayikana ati, “Chisige okutemura omwingiro gunu, tari chigwitongisye, chirore ati, oguja okubha gwa ga.” Ejo ꞉jaakorekeene korereki jikuumire jinu jikaamirwe mu‑Bhikaame Ebhyeru ati, “꞉Bhaagabheene emyenda jaani, na okwitongya inguru ya omwingiro gwani.”#19:24 Ringira Ijabhuri 22:18. Nikwo kutyo abhasirikare abho ꞉bhaakorere.

25Mbe, bhaariga bhari‑wo abhagasi bhana bhanu bhaariga bheemereeguuyu ayeeyi na omusarabha gwa Yeesu. Abhagasi abho bhaariga bhari nyiramwene Yeesu, omuyara oweejaabho, Maryamu omugasi wa Kuroopa, na Maryamu okusooka mu‑musi gwa Magidara. 26Yeesu ejire aarora nyiramwene na omwiyigisibhwa unu Yeesu aariga eendere muno eemereeguuyu ayeeyi na nyiramwene, ˆnaayika ati, “Maayi, ringira oyo. Nuumukore okubha omwana waawo.” 27Ka wone ˆnaabhwira omwiyigisibhwa oyo ati, “Ringira oyo. Nuumukore okubha nyokomwana.” Mbe, okusookerera omwanya ogwo, nyira Yeesu ˆnaagegwa na omwiyigisibhwa oyo, ˆnaagenda okwikara nage mu‑musi gwaye.

Yeesu kaafwa

(Mataayo 27:45‑56; Maariko 15:33‑41; Ruuka 23:44‑49)

28Mbe, Yeesu ˆnaasombookerwa ati aariga aamarire okukora emirimu jaaye joone. Mbe, ˆnaayika ati, “Obhwiro bhwanyita.” Kurwa ejo, nijikuumira jinu jikaamirwe mu‑Bhikaame Ebhyeru.#19:28 Ringira Ijabhuri 69:21. 29Awo chaariga chiri‑wo echiinu chiijuuye isese. Mbe, nibhagega rigaafu, nibhariina mu‑sese omwo, nibharituura kw‑isekeyanda, nibhateera Yeesu ku‑munwa. 30Yeesu ejire aarabha isese eyo, ˆnaayika ati, “Naamara omurimu gwani!” Mbe, ˆneenamya omutwe gwaye, ˆnaafwa.

Omusirikare kaasoma Yeesu na richumu

31Rwariga ruri rusuku rwa okwiraabha inguru ya Isabhaato, ka wone orusuku orwo rwariga ruri rusuku runene okukira ejindi, kwa okubha ichikukuru ya Okwambuka yaariga niyamba. Abhatangasya bha Abhayawudi bhatendere emitumbi jisigare inguru ku‑musarabha ku‑rusuku rwa Isabhaato.#19:31a Bhatendere emitumbi jisigare inguru ku‑musarabha ku‑rusuku rwa Isabhaato. Ebhiraagiro bhya Muusa ꞉bhiteekirisiisye Abhayawudi bhasiike abhaanu ku‑rusuku rwa Isabhaato. Mbe nibhagenda ku‑Piraato, nibhamusabhwa ati abhasirikare bhagende bhabhuture amaguru#19:31b Bhabhuture amaguru. ꞉Bhaakorere kutyo korereki bhafwe rumwi. ga abhaanu bhanu ꞉bhaabhambirwe ku‑musarabha, na okusoosya‑ko emitumbi ejo. 32Mbe, abhasirikare nibhagenda, nibhabhutura amaguru ga omuunu wa okwamba na owa kabhiri ga bhanu bhaariga bhabhumiiriiywe aamwi na Yeesu. 33Nawe bhejire bhaagenda ku‑Yeesu, nibhamusongʼana afuuwe, kurwa ejo ꞉bhataamubhutuuwe amaguru. 34Nawe omusirikare umwi ˆnaasoma Yeesu richumu mu‑rubhafu. Mbe, awoawo isagama na amanji nibhiwurura. 35Emisango jinu ꞉jaakaamirwe na omuunu unu ꞉aarorere jinu jaariga nijikorekana. Obhubhambaasi bhwaye ni bhwa echimari, ka wone amenyere ati kaayika ja echimari, korereki emwe wone mwikirisye. 36Ejo ꞉jaakorekeene korereki jikuumire jinu jikaamirwe mu‑Bhikaame Ebhyeru ati, “Ritari‑wo riiwa ryaye noorwo rimwi rinu riribhutuka.”#19:36 Ringira Ijabhuri 34:20. 37Ka wone jikaamirwe mu‑Bhikaame Ebhyeru ati, “Bharirora omuunu unu ꞉bhaasomere.”#19:37 Ringira Jaakariya 12:10.

Yeesu kaasiikwa

(Mataayo 27:57‑61; Maariko 15:42‑47; Ruuka 23:50‑56)

38Ejo jejire jaawa, ˆnaaja omuunu umwi unu aariga ˆnaatogwa Jejefu. Omwene oyo, aariga asookere mu‑ruguuyo rwa Arimataaya. Aariga ari mwiyigisibhwa wa Yeesu, nawe bhumbise, kwa okubha aariga ˆnoobhaya abhatangasya bha Abhayawudi. Mbe, omuunu oyo ˆnaagenda ku‑Piraato, ˆnaamusabhwa ati agege omutumbi gwa Yeesu, agende okugusiika. Piraato ˆnaamwikirisisya. Mbe, Jejefu ˆnaagenda, ˆnaagega omutumbi gwa Yeesu.

39Noorwo Nikodeemu unu omwanya omurebhe ꞉aagendere ku‑Yeesu mu‑ngeta,#19:39 Ringira Yowana 3:1‑2. ˆnaaja na amafuta gasaasisye‑mo ebhirange na obhubhaani, obhusito bhwago bhwariga bhuri kiro makumi gasatu. 40Mbe, abhaanu abhabhiri abho nibhagega omutumbi gwa Yeesu, nibhagufwafya risanda, nibhagubhambaga amafuta garya ga ebhirange, okuruubhana na jitungwa ja Abhayawudi ja okusiika abhaanu abhafuuwe. 41Anu Yeesu ꞉aabhumiiriiywe ku‑musarabha gwariga guri‑wo omugunda. Mu‑mugunda murya yaariga iri‑mo iifwa inyaaya inu yaariga ichaari okusiikwa‑mo omuunu woonewoone.#19:41 Jitungwa ja Abhayawudi ja okusiika abhaanu jaariga jitaasyanyiisye na eja abhaanu abhandi. Abhayawudi bhaariga nibhatuura abhafuuwe mu‑senga na okufundikira omuryango gwayo na ribhuyi. Iifwa ya Yeesu yaariga iri mu‑senga. 42Mbe, nibhasiika Yeesu omwo, kwa okubha yaariga iri yeeyi, na Isabhaato yaariga niirebherera okwamba.

Currently Selected:

Yowana 19: jit

Highlight

Copy