Yowana 20

Yeesu kaasuuruka

(Mataayo 28:1‑8; Maariko 16:1‑8; Ruuka 24:1‑12)

1Ku‑rusuku rwa okwamba rwa obhwoyo, Maryamu okusooka mu‑musi gwa Magidara ˆnaamweja katondo mu‑ruguru ku‑chituuro cha Yeesu. Ejire aakinga ˆnaasongʼana ribhuyi rinu ryariga rifundikiiye omuryango riyiringisiibhwe okusooka ku‑muryango gwa echituuro. 2Mbe, ˆnaabhirima okusooka arya, ˆnaagenda ku‑Simooni Peetero na ku‑mwiyigisibhwa unu Yeesu aariga eendere muno. ˆNaabhabhwira ati, “Abhaanu bhasoosiisye omutumbi gwa Raatabhugenyi weeswe okusooka mu‑fwa, ka wone chitakumenya anu bhaagutuura!”

3Peetero na omwiyigisibhwa owundi oyo, nibhagenda ku‑chituuro. 4Bhoone bhabhiri bhaariga nibhabhirima, nawe omwiyigisibhwa owundi oyo ˆnaabhirima okukira Peetero na okutangata okukinga ku‑fwa. 5ˆNeenama, ˆnaasungurira mu‑fwa, ˆnaarora risanda rinu bhaariga bhaswikiiye Yeesu, nawe ꞉ateengiiye mu‑fwa.

6Mbe, Simooni Peetero ˆnaamuruubha, ˆnaakinga arya, ˆneengira mu‑fwa na ˆnaasongʼana risanda rinu bhaariga bhaswikiiye Yeesu. 7Ka wone, ꞉aasongʼeene‑mo echitambaara chinu bhaariga bhabhoyere Yeesu ku‑mutwe. Echitambaara echo chaariga chitari aamwi na ebhitambaara ebhindi, nawe chaariga chikubhirwe na okutuurwa ku‑mbari. 8Mbe, omwiyigisibhwa owundi, unu ꞉aatangatire okukinga arya, omwene wone ˆneengira mu‑fwa. ˆNaarora, ˆneekirisya jinu aariga oonguuwe, 9noorwo kutyo bhaariga bhachaari okusombookerwa Ebhikaame Ebhyeru bhinu ebhyayika ati, Yeesu ni bhusibhusi asuuruke okusooka mu‑bhafuuwe. 10Mbe, abheeyigisibhwa bharya nibhasubha mu‑misi jeebhwe.

Yeesu kaasoromokera Maryamu wa Magidara

(Mataayo 28:9‑10; Maariko 16:9‑11)

11Nawe Maryamu wa Magidara ˆnaasigara eemereeguuyu anja ya iifwa, ˆnaariraga. Omwanya gunu aariga naarira, ˆneenama na okusungurira mu‑fwa, 12ˆnaarora bhamaraayika bhabhiri bhanu bhafwaye emyenda emyeru, bheenyanjire anu bhaariga bhamaamiisye omutumbi gwa Yeesu. Maraayika umwi ꞉eenyanjire emutwe, owundi ku‑bhurambirisyo. 13Bhamaraayika abho nibhamubhuusya ati, “Maayi, kurwa ki owurira?” Omwene ˆnaabhasubhya ati, “Abhaanu bhaagega omutumbi gwa Raatabhugenyi waani, ka wone nitakumenya anu bhaagutuura!” 14Maryamu ejire aamara okwayika emisango ejo, ˆneekebhuukira, ˆnaarora Yeesu eemereeguuyu awo, nawe Maryamu ꞉ataamenyere ati niwe Yeesu.

15Yeesu ˆnaamubhuusya ati, “Maayi, kurwa ki owurira? Angu, owuyenja ga?” Maryamu ˆneetogera ati omuunu oyo aariga ari mukosi wa mu‑mugunda, mbe ˆnaamusubhya ati, “Raata, araabha naawe ugegere omutumbi gwaye, mbwira anu waagutuura, nigende nigugege.” 16Yeesu ˆnaamubhirikira risiina ryaye ati, “Maryamu!” Mbe Maryamu ˆneekebhuukira, ˆnaarora Yeesu, ˆnaamubhwira mu‑nyaayika ya Echiyebhuraniya ati, “Rabhooni!” Rabhooni, obhugajuro bhwago ni ati, “Omwiyigisya.” 17Yeesu ˆnaamubhwira ati, “Nuusige okungwata‑ko. Nichaari okugenda mu‑rwire ku‑Raata. Mbe, genda ubhwire abhayiri bhaani,#20:17 Abhayiri bhaani. Obhugajuro bhwagwo ni ati, abheeyigisibhwa bhaani. ati enigenda mu‑rwire ku‑Raata waani, unu ari Esomwana wone, ku‑Nyamuwanga waani unu ari Nyamuwanga weemwe wone.” 18Mbe Maryamu wa Magidara ˆnaagenda ku‑bheeyigisibhwa bha Yeesu, ˆnaabhabhwira ati, “ˆNaarora Raatabhugenyi!” Mbe, ˆnaabhabhwira joone jinu Yeesu ꞉aamuragiriiye.

Yeesu kaasoromokera abheeyigisibhwa bhaaye

(Mataayo 28:16‑20; Maariko 16:14‑18; Ruuka 24:36‑49)

19Yejire yaakinga keegoro orusuku orwoorwo, abheeyigisibhwa bha Yeesu nibheekumanya mu‑nju imwi. Bhejire bheengira nibheegara jinjigi, isonga iri ati bhoobhayaga abhatangasya bha Abhayawudi. Noorwo kutyo jinjigi jaariga jigaaywe, Yeesu ˆnaabhonekana abhwerubhweru, na okwimereeguru agati yeebhwe, ˆnaabhabhwira ati, “Omurembe gubhe aamwi na emwe!” 20Yeesu ejire aamara okubhabhwira ejo, ˆnaabheeresya amabhoko gaaye na orubhafu rwaye. Abheeyigisibhwa bhaaye bhejire bhaarora Raatabhugenyi, nibhakonderwa. 21Yeesu ˆnaabhakeesya rindi ati, “Omurembe gubhe aamwi na emwe. Rwa kutyo Raata ꞉aantumire, nyabhuriko anye wone enibhatuma.” 22Ejire aamara okwayika ejo, ˆnaabhafuuyira omwika, ˆnaabhabhwira ati, “Muramire Mwoyo Mweru. 23Araabha mukafwira echigongo abhaanu ebhikayo bhyebhwe, Nyamuwanga wone kaja okubhafwira echigongo ebhibhiibhi bhyebhwe. Araabha mukarema okubhafwira echigongo, Nyamuwanga wone ataribhafwira echigongo ebhibhiibhi bhyebhwe.”

Yeesu kaasoromokera Tomaasi

24Omwiyigisibhwa umwi ku‑bheeyigisibhwa ekumi na bhabhiri bharya bha Yeesu, risiina ryaye aatogwaga Tomaasi, unu bhaabhirikiraga ati Marongo, aariga atari aamwi na abheeyigisibhwa abhandi omwanya gunu Yeesu ꞉aabhasoromokeeye. 25Mbe, abheeyigisibhwa abhandi bharya nibhamubhwira ati, “Eswe chaarora Raatabhugenyi.” Nawe omwene ˆnaabhasubhya ati, “Anye nitakutura okwikirisya ejo nichaari okurora jingʼofu ja emisumaari mu‑bhiganja bhya amabhoko gaaye, na okukuunʼya mu‑ngʼofu ejo na echaara chaani, na okukuunʼya mu‑mbafu jaaye na okubhoko kwani.”

26Jejire jaatura siku etaanu na esatu, abheeyigisibhwa bha Yeesu nibheekumanya aamwi rindi mu‑nju. Orusuku orwo Tomaasi wone aariga ari aamwi nabho. Bhaariga bheegaye jinjigi, nawe Yeesu ˆnaabhonekana abhwerubhweru, ˆneemereeguru agatigati yeebhwe, ˆnaabhakeesya ati, “Omurembe gubhe aamwi na emwe!” 27Mbe, Yeesu ˆnaabhwira Tomaasi ati, “Awe Tomaasi, nuukuunʼye anu na echaara chaawo. Ringira ebhiganja bhyani. Nuukuunʼye na okubhoko kwawo mu‑rubhafu rwani. Usige okugenderera okurema okwikirisya, tari wiikirisye.” 28Tomaasi ˆnaamusubhya ati, “Raatabhugenyi waani na Nyamuwanga waani!” 29Yeesu ˆnaamusubhya ati, “Weekirisya kwa okubha wandora. Bhari na amabhando bhanu bhanyikirisiisye noorwo bhachaari okundora.”

Obhukarariiye bhwa echitabho chinu

30Yeesu ꞉aakorere ebhibharikisyo ebhindi bhyafu bhinu abheeyigisibhwa bhaaye ꞉bhaarorere, na bhitakaamirwe mu‑chitabho chinu. 31Nawe ebhibharikisyo bhinu bhiri mu‑chitabho chinu, bhikaamirwe korereki mwikirisye ati Yeesu niwe Kirisito, Omwana wa Nyamuwanga, mu‑kwikirisya okwo, mubhone obhuwanga bhwa akajaanende koone kw‑isiina ryaye.

Currently Selected:

Yowana 20: jit

Highlight

Copy