Ruuka 13
13
Araabha mukarema okuta ebhibhiibhi bhyemwe murisingaarika
1Omwanya ogwoogwo, abhaanu abhandi nibhaaja nibhabhwira Yeesu ati, “Omutungi Piraato ꞉eetire Abhagariraaya abhandi, bhanu bhaariga nibheeta ebhitunganwa bhya ebhitambwa.#13:1 Ebhitambwa. Ku‑meeresyo amaafu, ringira Echoogo mu‑Meeresyo inguru ya Emisango Emikomeeye. Isagama ya abhaanu bhanu ꞉bheetirwe niisaasibhwa na orwamba rwa ebhitambwa bhinu bhaasoosisyaga Nyamuwanga.”
2Yeesu ˆnaabhabhwira ati, “Angu, omwitogera ati, Abhagariraaya abho, ꞉bhaafuuwe orufu rwa orwo kwa okubha abheene bhaariga bhari na ebhibhiibhi bhyafu okukira Abhagariraaya abhandi bhoone? 3Enibhabhwira ati, jitari kutyo! Nawe araabha mukarema okuta ebhibhiibhi bhyemwe, nikwo kutyo emwe bhoone murisingaarika. 4Amwi mwichuke abhaanu bharya ekumi na bhataanu na bhasatu, bhanu ꞉bhaagwiriiywe na obhutingo Sirowaamu erya, nibhafwa. Angu omwitogera ati, abheene bhaariga bhari na ebhibhiibhi bhyafu okukira abhaanu bhoone bhanu bhaariga bheekaaye Yerusareemu? 5Enibhabhwira ati, jitari kutyo! Nawe araabha mukarema okuta ebhibhiibhi bhyemwe, nikwo kutyo emwe bhoone murisingaarika.”
Echijekekanyo cha riiti rinu ritana matwasyo
6Neeya, Yeesu ˆnaabhwira abhaanu abho echijekekanyo, ˆnaayika ati, “Aariga ari‑wo omuunu umwi unu ꞉aayambire mw‑isambu ryaye rya emijabhiibhu, riiti rinu eritogwa ati ritiini. Ejire eeya, ˆnaagenda okuyenja‑ko amatwasyo, nawe ꞉ataabhwene‑ko echiinu choonechoone wuri. 7Mbe omuunu oyo, ˆnaabhwira omukosi wa mw‑isambu ryaye omwo ati, ‘Ringira! Ni miguuga esatu woori, niniija okuyenja amatwasyo kw‑iti rinu, nawe nichaariga okubhona‑ko echiinu choonechoone wuri! Nuuriteme, korereki risige okugenderera okunyamura risambu ryani era!’ 8Nawe omukosi oyo, ˆnaamusubhya ati, ‘Mwami waani, nuurisige‑wo omuguuga gunu, niriseejere na okuriwumira‑ko obhusa. 9Araabha rikatwasya amatwasyo, ni kisi! Nawe araabha rikarema okutwasya amatwasyo, uriteme.’”
Omugasi kaawosibhwa na Yeesu ku‑rusuku rwa Isabhaato
10Rusuku rumwi, ruri rusuku rwa Isabhaato, Yeesu aariga ari mu‑nju ya eriikofyanyo, ˆneeyigisyaga abhaanu. 11Mu‑nju ya eriikofyanyo omwo, aariga ari‑mo omugasi umwi unu aariga awungirwe na risambwa, omwanya gwa emiguuga ekumi na etaanu na esatu. Risambwa eryo, ryariga ryakorere omugongo gweyetere. Aariga atakutura okwigorora noorwo na akatyari.
12Yeesu ejire aamurora, ˆnaamubhirikira. ˆNaamubhwira ati, “Maayi, waawora, woori uri muwanga!” 13Yeesu ˆnaamutuura‑ko amabhoko, niwo ˆneemereeguru eemire chorwechorwe, ˆnaamba okukuuya Nyamuwanga.
14Omukuru wa inju ya eriikofyanyo eryo, ˆnaabhiyirwa muno kwa okubha, orusuku runu Yeesu ꞉aawosiisye omuunu oyo rwariga ruri rusuku rwa Isabhaato. ˆNaabhwira abhaanu ati, “Bhuri bhwoyo, jisiku ja okukora emirimu ni siku etaanu na rumwi. Mbe, muujega okuwosibhwa ku‑siku ejo, nawe musigega okuuja okuwosibhwa ku‑rusuku rwa Isabhaato!”
15Nawe, Raatabhugenyi Yeesu ˆnaabhasubhya ati, “Abheerimaanya emwe! Niga agati yeemwe unu atakwigurira iingʼa yaaye amwi isikiri yaaye okusooka mw‑igutu ayisire okunywa amanji ku‑rusuku rwa Isabhaato? 16Mbawo, omugasi unu ni wa mu‑ruganda rwa Bhurayimu, aamarire emiguuga ekumi na etaanu na esatu, abhoyerwega na Syetaani. Mbe, omwene wone jiteenderwe asuruumurwe okusooka mu‑ndwara ku‑rusuku rwa Isabhaato?”
17Yeesu ejire aayika kutyo, abhaanu bhanu bhaariga nibhabhambasyanya nage, nibheeswara. Nawe abhaanu abhandi, nibhakonderwa muno, ku‑songa ya emisango ja ebhiruguusyo jinu aariga ˆnaakora.
Echijekekanyo cha akaro ka iyaradaari na echa echifwimbya
(Mataayo 13:31‑33; Maariko 4:30‑32)
18Neeya, Yeesu ˆnaabhuusya abhaanu bhoone ati, “Obhukama bhwa Nyamuwanga obhususana na ki? Nibhususanye na ki? 19Obhususana rwa akaro ka iyaradaari, kanu omuunu ꞉aagegere ˆnaakayamba mw‑isambu ryaye. Akaro ako nikamera nikabha eti enene, jinyonyi nijiija na okuumbaka amooswi gaajo ku‑matabhi gaako.”
20Yeesu ˆnaabhabhwira rindi rwa kabhiri ati, “Angu obhukama bhwa Nyamuwanga nibhususanye na ki? 21Obhukama obhwo, bhuri rwa echifwimbya chinu omugasi kaagega na okusaasya mu‑syano ja ingano, ˆnaajituura mu‑madebhe gasatu. Echifwimbya echo, nichireterera jisyano joone okufwimba.”
Nyamuwanga atariramira abha ebhibhiibhi mu‑bhukama bhwaye
(Mataayo 7:13‑14, 7:21‑23)
22Omwanya gunu Yeesu aariga ari mu‑rugendo rwa okugenda Yerusareemu, eeyigisyaga abhaanu bha mu‑misi na mu‑nguuyo jinu aariga ˆnaatura‑mo. 23Rusuku rumwi, omuunu umwi ˆnaamubhuusya ati, “Raatabhugenyi, angu abhaanu bhanu abhachungurwa ni bhatooto era?”
Yeesu ˆnaabhasubhya ati, 24“Emwe, mwikomeesye okutura mw‑irango rifunde mwingire. Enibhabhwira ati, abhaanu bhaafu bhariregeeja okwingira, nawe bharitaamibhwa. 25Omwene inju ariigara orwigi, emwe muriimereeguru anja, nimwibhuura keenu nimukonoonaga ku‑rwigi nimwayikaga ati, ‘Raatabhugenyi, nuuchiigurire!’ Nawe, omwene aribhasubhya ati, ‘Nitakubhamenya emwe noorwo na akatyari! Ka wone, nitakumenya ati musookere aaki!’
26“Emwe murimubhwira ati, ‘Eswe neeswe bhanu ꞉chaariiye na okunywa aamwi na awe! Ka awe wone weeyigisyaga mu‑nguuyo jeeswe!’ 27Nawe omwene aribhabhwira ati, ‘Naabhabhwiriiye ati, nitakubhamenya na nitakumenya ati musookere aaki! Musooke anu, emwe abhakosi bha ebhibhiibhi!’
28“Niwo muririraga na okuguguna ameeno, kwa okubha murirora Bhurayimu, Isaaka, na Yakobho, na abharagi bhoone bhari mu‑bhukama bhwa Nyamuwanga, nawe emwe abheene muribhaga mujugunirwe anja! 29Abhaanu bhariija okusooka ebhuwuruka esuubha na ebhugwa esuubha, ebhuwanga na ebhurimbe. Bhariinyanja okurya ebhiryo mu‑bhukama bhwa Nyamuwanga.
30“Mutegeresye! Abhaanu bhanu bhasingiriiye woori, bharitangata. Ka wone, abhaanu bhanu bhatangatire woori, bharisingirira.”
Yeesu kaasurumbara inguru ya Yerusareemu
(Mataayo 23:37‑39)
31Omwanya ogwoogwo, Abhafarisaayo abhandi nibhaaja ku‑Yeesu nibhamubhwira ati, “Sooka anu, ugende orubhaara orundi, kwa okubha omukama Yeroode Atipaasi keenda okukwita.”
32Yeesu ˆnaabhasubhya ati, “Mugende, mubhwire rinyamubhwe riruru eryo ati, ‘Reero na mutondo, enisoosya amasambwa ku‑bhaanu, na okuwosya abharwaye. Orusuku rwa kasatu, enimara emirimu jaani.’#13:32 Enimara emirimu jaani. Obhugajuro obhundi obhutura okubha ati, enikuumisya obhukarariiye bhwani. 33Noorwo kutyo, ni bhusibhusi nigenderere na orugendo rwani rwa okuja Yerusareemu reero, mutondo na ejorirya, kwa okubha jeenderwe bhuri muragi afwire Yerusareemu, rutari rubhaara orundi wuri!
34“Emwe abhaanu bha Yerusareemu! Abhaanu bha Yerusareemu! Omwita abharagi na okubhuma amabhuyi abhaanu bhanu Nyamuwanga ꞉aatumire kw‑imwe. Ni kwiya karinga neendere okubhakumanya rwa kutyo ingʼoko eyikumanya ebhyanakoko bhyayo mu‑mabhabha gaayo, keemwe nimurema! 35Muringire! Woori Nyamuwanga aabhasiga emwe na orwibhuro rwemwe! Ni chimari nibhabhwira ati, mutarindora rindi, okukingira omwanya gunu muryayika ati, ‘Ayaanwe amabhando unu kaaja kw‑isiina rya Raatabhugenyi Nyamuwanga.’#13:35 Ringira Ijabhuri 118:26.”
Currently Selected:
Ruuka 13: jit
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.
