Ruuka 14
14
Yeesu kaawosya omurwaye ku‑rusuku rwa Isabhaato
1Rusuku rumwi, ruri rusuku rwa Isabhaato, Yeesu ˆnaagenda ˆneengira mu‑nju ya omukuru umwi wa Abhafarisaayo okurya ebhiryo. Omwanya gunu Yeesu aariga ari mu‑nju omwo, Abhafarisaayo na abhaanu abhandi bhaariga bhamwiteganiiyega.
2Imbere ya Yeesu aariga ari‑wo omuunu umwi, unu aariga arwayega ifwafura. 3Yeesu ˆnaabhuusya Abhafarisaayo na abheeyigisya bha ebhiraagiro bhya Muusa ati, “Angu, ebhiraagiro bhya Muusa ebhichiikirisisya okuwosya abhaanu ku‑rusuku rwa Isabhaato tere wuri?” 4Nawe, abheene nibhajibhira jibhijibhi. Mbe, Yeesu ˆnaakuunʼya‑ko omurwaye oyo, ˆnaamuwosya, ˆnaamubhwira agende iika. 5Niwo, Yeesu ˆnaabhabhuusya ati, “Niga mw‑imwe araabha iingʼa yaaye, amwi isikiri yaaye#14:5 Isikiri yaaye. Jinyabhurira ejindi ejaayika ati, omwana waaye wa echirume. yaakagwa mu‑ryobho orusuku rwa Isabhaato, atakuyisoosya‑mo?” 6Abhaanu abho, ꞉bhataabhwene omusango gwa okumusubhya.
Ameeyigisyo inguru ya okwikora okubha abhakuru
7Yeesu aariga ˆnaarora abhagenyi bhanu bhaariga bhakokerwe mu‑bhugenyi obhwo, kutyo bhaariga nibheeyawurira abheene ebhitebhe bhya abhagenyi bha echibharo muno. Niwo, ˆnaabhabhwira echijekekanyo ˆnaayika ati, 8“Ukakokwa mu‑bhuregesi, waasiga okwitangasya nuwinyanja orubhaara rwa abhagenyi bha echibharo muno, kwa okubha kaatura okubha ari‑wo omuunu owundi wa echibharo muno okukukira awe unu wone akokerwe. 9Unu ꞉aabhakokere emwe bhabhiri bhoone, kaja okukubhwira ati, ‘Teera unu echitebhe echo.’ Awo niwo urirora jiswaro muno, kwa okubha urigenda okwinyanja ku‑chitebhe cha unu atari wa echibharo muno. 10Nawe, awe ukakokwa mu‑bhugenyi, genda winyanje ku‑chitebhe cha inyuma, korereki akaaja unu ꞉aabhakokere, akubhwire ati, ‘Musaani waani, iija imbere anu! Niwo wa ekisi.’ Kurwa ejo, uribhaga uyaaywe echibharo imbere ya abhagenyi bhoone. 11Okubha, omuunu woonewoone unu keeriinyagisya inguru, Nyamuwanga arimworomosya emwaro. Nawe omuunu woonewoone unu keekeeya, Nyamuwanga arimuriinyagisya inguru.”
12Neeya, Yeesu ˆnaabhwira unu aariga amukokere ati, “Ukeeraabhira abhaanu ebhiryo bhya mu‑mwisi amwi bhya keegoro bhya obhugenyi, waasiga okukoka abhasaani bhaawo, abhayiri bhaawo, abhaanu bha mu‑ruganda rwawo na abheekasyanya bhaawo na abhaniibhi era. Ukakora kutyo, abheene wone bharikukoka eweebhwe. Kurwa ejo, uriifurwa uriyirwe kwa okubha waakokwa.
13“Nawe, ukeeraabhira abhaanu ebhiryo bhya obhugenyi, uraasisyega abhataka, abharema, na abhawofu. 14Niwo uriyaanwa amabhando, kwa okubha abheene abho bhatari na echiinu cha okukuriya. Kurwa ejo, Nyamuwanga arikuriya omwanya gunu arisuurura abharengeresi.”
Echijekekanyo cha obhugenyi obhunene
(Mataayo 22:1‑14)
15Mbe, omugenyi umwi unu aariga eenyanjire aamwi na Yeesu ku‑nenda, ejire oongwa emisango ejo, ˆnaabhwira Yeesu ati, “Ari na ribhando omuunu unu arirya ebhiryo bhya obhugenyi, mu‑bhukama bhwa Nyamuwanga!”
16Yeesu ˆnaamusubhya kwa echijekekanyo, ˆnaayika ati, “Aariga ari‑wo omuunu umwi unu ꞉eeraabhire obhugenyi bhunene, ˆnaakoka abhaanu bhaafu. 17Omwanya gwa obhugenyi gwejire gwakinga, ˆnaatuma omugaya waaye agende okubhirikira abhaanu bhanu bhaariga bhakokerwe ati, ‘Muuje! Ebhiinu bhyone bhya obhugenyi bhyeraabhirwe!’
18“Nawe, abhaanu bhoone bhanu bhaariga bhakokerwe, bhuri umwi weebhwe ˆnaamusabhwa amufwire echigongo. Omuunu wa okwamba, ˆnaayika ati, ‘Nigurire risambu, ni bhusibhusi nigende okurirora. Enikusabhwa unfwire echigongo.’ 19Omuunu wa kabhiri ˆnaayika ati, ‘Nigurire jiingʼa ekumi ja okurimira, woori enigenda okujiregeeja. Enikusabhwa unfwire echigongo.’ 20Omuunu wa kasatu wone ˆnaayika ati, ‘Naamamara okutwara omugasi ejoriryajorirya anu, kurwa ejo, nitakutura okuuja.’
21“Omugaya oyo ejire aasubha, ˆnaabhwira omwami waaye emisango ejo joone. Mbe, omwami waaye oyo ˆnaabhiyirwa, ˆnaabhwira omugaya waaye ati, ‘Genda bhwangubhwangu ku‑njira jinene na ku‑bhiyira ebhitooto bhya mu‑musi gunu, ubhareete anu abhataka, abhawofu, na abharema.’
22“Omugaya oyo ejire aasubha, ˆnaabhwira omwami oyo ati, ‘Mwami waani, omusango gunu waandagirira okukora, naagukuumisya. Noorwo kutyo, guchaari‑wo omwanya gwa abhandi okwingira.’
23“Omwami oyo, ˆnaabhwira omugaya oyo rindi ati, ‘Mbe woori, nuugende anja ku‑maparapara amanene na ku‑mbibhi ja omusi, urembeereje abhaanu bhaaje bheengire, inju yaani yiijure. 24Nawe, enibhabhwira ati, abhaanu bhoone bhanu naariga nikokere ku‑bhwambiro, atari‑wo noorwo umwi weebhwe, unu kaja okurabha obhugenyi bhwani!’”
Jinu jeenderwe okubha omwiyigisibhwa wa Yeesu
(Mataayo 5:13, 10:37‑38; Maariko 9:50)
25Yeesu aariga ˆnaaruubhana na echise echinene cha abhaanu. Mbe ˆneekebhuukira, ˆnaabhabhwira ati, 26“Omuunu woonewoone unu kaanduubha kaabha omwiyigisibhwa waani araabha akanyenda anye muno okukira kutyo keenda esemwene, nyiramwene, omugasi waaye na abhaana bhaaye, abhamura bhaabho na abhayara bhaabho, na asige okwiyenda omwene. 27Omuunu woonewoone unu atakwenda okugega omusarabha gwaye na okunduubha, atakutura okubha omwiyigisibhwa waani.
28“Siga nibhabhwire. Niga agati yeemwe unu akeenda okuumbaka obhutingo, atakutangata okwinyanja okwamba, abhare jipirya jinu ari najo, amenye araabha obhukumi bhwajo obhuja okukuumisya obhuumbaki bhwone. 29Akarema okukora kutyo, kaatura okuumbaka orufuka era, ˆnaataamibhwa okugenderera okuumbaka indugu ya obhutingo obhwo. Abhaanu bharibhaga nibhamugaya okurora ataamiibhwe okubhukuumisya. 30Bharyayikaga ati, ‘Ringira omuunu unu! ꞉Aambire okuumbaka, nawe atari na obhuturo bhwa okumariisya obhuumbaki!’
31“Echijekekanyo echindi ni chinu, ni mukama ki, unu akeenda okuja okurwana riremo na omukama owundi, atakwinyanja okwamba eeganirisye araabha omwene na abhasirikare bhaaye ebhiwumbi ekumi, kaatura okurwana na omukama owundi oyo, unu ari na abhasirikare ebhiwumbi makumi gabhiri. 32Omukama wa abhasirikare ebhiwumbi ekumi, akarora ati atakuja okuyiga riremo eryo, kaatuma abhajuuma bhaaye bhwangwe ku‑mukama owundi wurya, bhagende bhamusabhwe achaari‑wo kura muno ati, riremo risige okubha‑wo, nawe gubhe omurembe.
33“Nyabhuriko kw‑imwe wone, omuunu unu atakutura okusiga ebhiinu bhyone bhinu ari nabhyo, atakutura okubha omwiyigisibhwa waani.
34“Omuunyu ni chiinu cha kisi. Nawe araabha gukabhurwa obhusambaaruke, ogutura kutiki okubhona obhusambaaruke bhwagwo rindi? 35Omuunyu gwa imbaga inu guteeyire noorwo okuwumirwa rwa imboreya ya ichumbichumbi, abhaanu abhagwesa era. Unu kaategeresya, noongwe!”
Currently Selected:
Ruuka 14: jit
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.
