Ruuka 15
15
Echijekekanyo cha inaama inu ibhurire
(Mataayo 18:12‑14)
1Omwanya ogwo, abhatobhesya bha rigooti na abhaanu abhandi abhakosi bha ebhibhiibhi, bhaariga nibhaaja ku‑Yeesu, korereki bhamutegeresye. 2Omusango ogwo nigukora Abhafarisaayo na abheeyigisya bha ebhiraagiro bhya Muusa bhajujuume ati, “Mbawo omuunu unu, kaakuma abhaanu abha ebhibhiibhi! Ka wone kaarya aamwi nabho!”
3Kurwa ejo, Yeesu ˆnaabhabhwira echijekekanyo ati, 4“Chaayike ati, owumwi weemwe, ari na jinaama egana. Aakamenya ati, eyimwi yaabhura‑ko, kaakora kutiki? Angu atakuja okusiga makumi gataanu na gana na etaanu na ena (99) mu‑bhureebhero eyo, agende okuronda inu yaabhura okukingira ayibhone? 5Aribha aayibhona, kaayibhatura na okuyiyeka ku‑mabhega enu ˆnaakonderwaga. 6Omwanya gunu kaakakinga iika, kaabhirikira abhasaani na abheekasyanya bhaaye, abhabhwire ati, ‘Mukonderwe aamwi na anye, kwa okubha inaama yaani inu ꞉yaabhurire, naayibhona!’
7“Enibhabhwira ati, nikwo kutyo riribha‑wo risandabha enene mu‑rwire, araabha omuunu umwi akata ebhibhiibhi bhyaye. Risandabha eryo, erikira rya abhaanu makumi gataanu na gana na bhataanu na bhana abharengeresi, bhanu bhatakukena okuta ebhibhiibhi.”
Echijekekanyo cha ipirya inu ibhurire
8Yeesu ˆnaabhabhwira echijekekanyo echindi ati, “Chaayike ati, omugasi umwi ari na jipirya ekumi.#15:8 Jipirya ekumi. Mu‑siku ejo, ipirya eyimwi eyo yaariga iri muyeero gwa orusuku rumwi ku‑mukosi wa emirimu. Araabha eyimwi ikabhura‑ko, angu, atakukongeesya idara na okweyerera inju yoone, ˆnaayironderesyaga okukingira ayibhone? 9Araabha aakayibhona, kaja okubhirikira abhasaani bhaaye na abheekasyanya bhaaye na okubhabhwira ati, ‘Mukonderwe aamwi na anye, kwa okubha ipirya inu yaariga ibhurire, naayibhona!’
10“Enibhabhwira ati, nikwo kutyo Nyamuwanga kaakonderwa imbere ya bhamaraayika,#15:10 Nyamuwanga kaakonderwa imbere ya bhamaraayika. Obhugajuro obhundi obhutura okubha ati, bhamaraayika bha Nyamuwanga abhakondererwa. araabha omuunu umwi owa ebhibhiibhi akata ebhibhiibhi bhyaye na okubhisiga.”
Echijekekanyo cha omwana unu abhurire
11Yeesu ˆnaagenderera okubhabhwira echijekekanyo echindi ati, “Aariga ari‑wo omuunu umwi. Omuunu oyo aariga ari na abhaana bhabhiri bha echirume. 12Omumura omutooto, ˆnaabhwira esemwene ati, ‘Raata, ngabhira‑ko omugabho gwani!’ Mbe, esemwene ˆnaabhagabhira ebhiinu bhyaye.
13“Jisiku nooto okutura, omumura omutooto oyo ˆnaakumanya omwandu gwaye gwone, gunu eswemwene aariga amuyaaye, ˆnaagenda mu‑chaaro cha kura. Ejire aakinga eyo, ˆnaagunyarambura bhuyagayaga inguru ya jitungwa jimbiibhi. 14Ejire aamara omwandu gwaye gwone, omweko mwafu nigwingira mu‑chaaro echo, ka omwene aariga atari na ebhiryo bhyonebhyone. 15Kurwa ejo, ˆnaagenda ku‑muunu umwi omwinengo wa mu‑chaaro echo, ˆnaamusabhwa emirimu ja okukora. Omwinengo oyo, ˆnaamutuma mw‑isambu ryaye okugabhisya jimbiiji jaaye. 16Omumura oyo ˆnoongwa omweko muno, ˆnaakingira okwigomba okurya amasusu ganu jimbiiji ejo jaariga nijirya! Nawe ꞉ataabhonekeene omuunu woonewoone unu ꞉aamuyaaye ebhiryo bhyonebhyone.
17“Ku‑bhuteero, obhwenge bhwaye nibhwamba okumusubha‑mo, ˆneeyayikira omwene ati, ‘Abhakosi bha raata, bhari na ebhiryo bhyafu, abharya nibheeguta okukingira nibhisigara! Nawe anye anu enifwa na omweko. 18Enija okusubha ku‑raata, nimubhwire ati, “Raata, anye naakora echibhiibhi ku‑Nyamuwanga, na naakukayira awe wone. 19Niteeyire okutogwa omwana waawo rindi. Kurwa ejo, enikusabhwa unkore nibhe owumwi wa abhakosi bhaawo.”’
20“Mbe, omwana oyo ˆneemuka, ˆnaamba orugendo rwa okusubha kw‑isemwene. Omwanya gunu aariga achaari‑wo kura, ˆnaagendaga, esemwene ˆnaamurora, ˆnaamufwira echigongo. ˆNaabhirimira omwana waaye oyo, ˆnaamufumbeera muno na okumubhuusu. 21Omwana oyo, ˆnaabhwira esemwene ati, ‘Raata, nikorere echibhiibhi ku‑Nyamuwanga, na nikayire imbere yaawo. Kurwa ejo, niteeyire okutogwa omwana waawo rindi.’
22“Nawe, esemwene ˆnaabhwira abhagaya bhaaye ati, ‘Mureete bhwangu omwenda gwa ekisi muno okukira joone mumufwafye. Mumufwafye inarye ku‑chaara na ebhiraato ku‑maguru. 23Mukamara, mugende mureete iingʼa inu iyamire, muyiite, mwiraabhe obhugenyi, chirye, chisandabhe, 24kwa okubha omwana waani unu, aariga afuuwe, woori anu aasuuruka. Aariga abhurire, woori anu aabhonekana rindi!’ Mbe, bhoone nibhaamba okusandabha.
25“Omwanya ogwo, omumura omukuru wa omukaruka oyo, aariga agendere mw‑isambu. Omwanya gunu aariga ˆnaasooka mw‑isambu, ejire aarebherera okukinga iika, ˆnoongwa omujiki niguriraga na abhaanu nibhabhinaga. 26ˆNaabhirikira omugaya umwi, ˆnaamubhuusya ati, ‘Chaabha‑wo ki iika awo?’ 27Omugaya oyo, ˆnaamubhwira ati, ‘Omumura waanyu omutooto aaja, na esomwana amwitira iingʼa irya inyame, kwa okubha aasubha rindi ari muwanga.’
28“Omumura omukuru oyo, ˆnaabhiyirwa muno, ˆnaarema noorwo okwingira iika. Niwo, esemwene ˆnaawuruka anja, ˆnaamwirembeeresya muno eengire iika. 29Omwana oyo, ˆnaasubhya esemwene ati, ‘Tegeresya raata! Ni miguuga eringa jinu naamarire ninkukorera emirimu, nichaariga okusiga wuri noorwo na akatyari okuruubha amaragiriro gaawo! Nawe uchaariga okunaana noorwo akaanabhusi, korereki nikore obhugenyi aamwi na abhasaani bhaani. 30Nawe, omwana waawo unu ꞉aanyamuuwe ebhiinu bhyawo na abhagasi bhanu abheegusya okwibhonera ribhona, omwene aakinga era, nuumwitira iingʼa inu inyame!’
31“Esemwene ˆnaamubhwira ati, ‘Omwana waani, awe wikaaye aamwi na anye anu siku joone, na ebhiinu bhyani bhyone ni bhyawo. 32Nawe omutooto waawo unu, jeenderwe chimukorere obhugenyi, chikonderwe na okusandabha aamwi. Okubha aariga ari wuti afuuwe, woori anu aasuuruka. Aariga abhurire, woori anu, aabhonekana rindi!’”
Currently Selected:
Ruuka 15: jit
Highlight
Share
Copy
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.
