Mataayo 21

Yeesu kaaramirwa Yerusareemu kwa esandabha

(Maariko 11:1‑11; Ruuka 19:28‑40; Yowana 12:12‑19)

1Omwanya gunu Yeesu na abheeyigisibhwa bhaaye ꞉bhaarebhereeye Yerusareemu, nibhakinga mu‑ruguuyo rwa Bheetifaage ku‑chiima cha Emijeyituuni. Niwo Yeesu ˆnaatuma abheeyigisibhwa bhaaye bhabhiri, ˆnaabhabhwira ati, 2“Mugende mu‑ruguuyo rurya ruri imbere yeemwe. Mukakinga omwo, omuja okurora isikiri isibhikirwe, aamwi na echinyara chaayo. Mbe mujisibhure, mujindeetere anu. 3Araabha omuunu woonewoone akabhabhuusya ribhuusyo ryoneryone, mumusubhye ati, ‘Raatabhugenyi kaajikena,’ awoawo kaja okubheekirisisya muuje najo.”

4Ejo joone ꞉jaakorekeene kutyo, korereki gukuumire omusango gunu Nyamuwanga ꞉aayikire ku‑njira ya omuragi waaye ati,

5“Bhwira abhaanu bha omusi gwa Sayuuni#21:5a Sayuuni. Ni siina erindi rya Yerusareemu. ati,

‘Ringira, omukama weemwe kaaja kw‑imwe,

ni mworooro, kaaja ariinyire ku‑sikiri,

ka isikiri eyo ichaari chinyara.’”#21:5b Yeesu ꞉aagendere Yerusareemu eenyanjire ku‑sikiri okweresya ati ni mukama wa omurembe. Ringira Jaakariya 9:9.

6Mbe, abheeyigisibhwa bhaaye abho nibhagenda, nibhakora rwa kutyo Yeesu ꞉aabharagiriiye. 7Omwanya gunu ꞉bhaasubhire ku‑Yeesu na isikiri irya aamwi na echinyara chaayo, nibhaanja emyenda inguru yaajo, Yeesu ˆneenyanja ku‑myenda okwo. 8Abhaanu bhaafu mu‑chise chirya nibhaanja emyenda jeebhwe ku‑njira. Abhandi nibhabhutura amatabhi amatooto ga amati na okugatuura ku‑njira ku‑songa ya okuyaana Yeesu echibharo. 9Abhaanu bhanu bhaariga bhamutangatiiye na bhanu bhaariga nibhamuruubha inyuma, nibhaamura obhuraka nibhaayikaga ati,

“Wosaana,#21:9a Wosaana. Mu‑nyaayika ya Echiyebhuraniya, obhugajuro bhwagwo bhwariga bhuri ati, chungura woori! Nawe mu‑siku ja Yeesu, omusango gunu gwariga nigukorerwa emirimu ja okukusya Nyamuwanga amwi Masiya. Ringira Ijabhuri 118:25. Omwana wa Dawudi!

Ayaanwe amabhando unu kaaja kw‑isiina rya Raatabhugenyi Nyamuwanga!#21:9b Ringira Ijabhuri 118:26.

Wosaana, Nyamuwanga unu ari mu‑rwire!”

10Omwanya gunu Yeesu ꞉eengiiye Yerusareemu, abhaanu bhoone nibharuguura muno. Nibhaamba okubhuusyanya ati, “Niga oyo?” 11Abhaanu abhandi mu‑chise echo nibhabhasubhya ati, “Unu ni Yeesu! Ni muragi urya wa Najareeti wa mu‑mukoowa gwa Gariraaya!”

Yeesu kaabhirimya abhasuruuja mw‑Iyekaru rya Nyamuwanga

(Maariko 11:15‑19; Ruuka 19:45‑48; Yowana 2:13‑22)

12Niwo Yeesu ˆneengira mu‑rubhuga rwa Riyekaru rya Nyamuwanga. Ejire eengira omwo, ˆnaasongʼana abhaanu bhaafu bhanu bhaariga nibhagusya na okugura ebhiinu, ˆnaabhabhirimya bhoone. ˆNaagaramura jimeeja ja abhaanu bhanu bhaariga nibhayingya jipirya, ˆnaagaramura wone ebhitebhe bhya abhaanu bhanu bhaariga nibhagusya ebhiguuti. 13Yeesu ˆnaabhabhwira ati, “Jikaamirwe mu‑Bhikaame Ebhyeru ati, ‘Inju yaani iribha inju ya risabhwa.’#21:13a Ringira Iisaya 56:7. Nawe emwe, muyikorere okubha isenga ya abhasaakusi!”#21:13b Ringira Yeremiya 7:11.

14Mbe, omwanya gunu Yeesu aariga achaari mu‑rubhuga rwa Riyekaru, abhawofu na abharema nibhamuuja‑ko, wone ˆnaabhawosya. 15Nawe abhakuru bha abhagabhisi na abheeyigisya bha ebhiraagiro bhya Muusa bhejire bhaarora ebhiruguusyo bhinu Yeesu ꞉aakorere, na bhejire bhoongwa abhaana nibhaayikaga mu‑rubhuga rwa Riyekaru ati, “Wosaana, Omwana wa Dawudi,” nibhabhiyirwa muno. 16Nibhabhuusya Yeesu ati, “Angu, owungwa kutyo abhaana bhanu abhaayika?” Yeesu ˆnaabhasubhya ati, “Enuungwa. Kasi muchaari kusoma emisango jinu jikaamirwe mu‑Bhikaame Ebhyeru ati,

‘Wibhoneeye jikuma,

okutura mu‑minwa ja abhaana abharera na bhanu abhaneena’#21:16 Ringira Ijabhuri 8:2.?”

17Yeesu ˆnaabhasiga awo, ˆnaasooka Yerusareemu, ˆnaagenda okuwongera mu‑ruguuyo rwa Bheetaniya.

Yeesu keeyiima ritiini rwa echibharikisyo

(Maariko 11:12‑14, 11:20‑24)

18Mwejo yende‑ko katondo, omwanya gunu Yeesu aariga ˆnaasubha Yerusareemu, ˆnoongwa omweko. 19Niwo ˆnaarora ku‑mbari ya injira riiti rimwi rinu eritogwa ati ritiini. ˆNaafogera ayeeyi, ˆnaasongʼana ritari‑ko amatwasyo goonegoone, tari riri na amasya era. Kutyo ˆnaabhwira riiti eryo ati, “Okwambira reero utaritwasya amatwasyo akajaanende!” Awoawo, riiti niriwotoka.

20Omwanya gunu abheeyigisibhwa bha Yeesu ꞉bhaarorere ejo, nibharuguura muno. Nibhamubhuusya ati, “Jaabha kutiki riiti rinu ryawotoka awoawo?” 21Yeesu ˆnaabhasubhya ati, “Ni chimari enibhabhwira ati, araabha muri na eriikirisya rinu ritari na echiitimaato, emwe wone muritura okukora rwa jinu naakorera riiti rinu. Ka wone mutarikora rwa ejo era, tari noorwo mukabhwira echiima chinu ati, ‘Iiyika anu na okweswa mu‑nyanja,’ jiribha kutyo. 22Araabha muri na eriikirisya, choonechoone chinu omusabhwa ku‑Nyamuwanga, muriramira.”

Ribhuusyo inguru ya obhuturo bhwa Yeesu

(Maariko 11:27‑33; Ruuka 20:1‑8)

23Yeesu ˆneengira rindi mu‑rubhuga rwa Riyekaru rya Nyamuwanga. Omwanya gunu eeyigisyaga, niwo abhakuru bha abhagabhisi na abhakuru bha Abhayawudi nibhaaja okumubhuusya ati, “Jinu owukora, owujikora ku‑bhuturo ki? Niga unu akuyaaye obhuturo obhwo?” 24Yeesu ˆnaabhasubhya ati, “Anye wone siga nibhabhuusye ribhuusyo rimwi. Araabha mukansubhya, niwo anye wone enija okubhabhwira ati, ni bhuturo ki bhunu enikorera emisango jinu. 25Angu, obhuturo bhwa Yowana Omubhatiija okubhatiija ꞉bhwasookere aaki? ꞉Bhwasookere ku‑Nyamuwanga unu ari mu‑rwire amwi ku‑bhaanu?”

Niwo nibhaamba okwayikana abheene era ati, “Araabha chikamubhwira ati ꞉bhwasookere ku‑Nyamuwanga, kaja okuchibhuusya ati, ‘Mbe, kurwa ki ꞉mutaamwikirisiisye?’ 26Ka wone, araabha chikamubhwira ati ꞉bhwasookere ku‑bhaanu, echuubhaya echise cha abhaanu bhanu, kwa okubha abheene bhamenyere ati, Yowana aariga ari muragi.” 27Kurwa ejo nibhamusubhya ati, “Chitakumenya.” Mbe, Yeesu wone ˆnaabhabhwira ati, “Anye wone nitakubhabhwira ati, ni kwa obhuturo ki enikora emisango jinu.”

Echijekekanyo cha omwana omungwani na omwana omunyamuke

28Yeesu ˆnaagenderera okwayika ati, “Woori, omurora kutiki inguru ya echijekekanyo chinu? Aariga ari‑wo omuunu umwi unu aariga ari na abhaana bhabhiri. ˆNaagenda ku‑mwana wa okwamba, ˆnaamubhwira ati, ‘Mwana waani, reero genda ukore emirimu mw‑isambu ryani rya emijabhiibhu.’ 29Omwana waaye oyo, ˆnaamusubhya ati, ‘Nitakugenda eyo!’ Nawe neeya, ˆnaayindura obhwiganirisya bhwaye, ˆnaagenda, ˆnaakora.

30“Niwo esemwene ˆnaagenda ku‑mwana waaye wa kabhiri na okumubhwira rwa kutyo ꞉aabhwiriiye wa okwamba urya. Omwene ˆnaamusubhya ati, ‘Enija okugenda raata!’ Nawe ꞉ataagendere.

31“Woori angu, mu‑bhabhiri abho, niga unu ꞉aakorere rwa kutyo esemwene ꞉eendere?” Abhakuru bha abhagabhisi na abhakuru bha Abhayawudi bharya, nibhamusubhya ati, “Ni urya wa okwamba.”

Niwo Yeesu ˆnaayika ati, “Ni chimari enibhabhwira ati, abhatobhesya bha rigooti na abhagasi bhanu abheegusya okwibhonera ribhona, bharibhatangatira okwingira mu‑bhukama bhwa Nyamuwanga. 32Yowana ꞉eejire kw‑imwe korereki abheeresye injira ya rirenga, emwe ꞉mutaamwikirisiisye. Nawe abhatobhesya bha rigooti na abhagasi bhanu abheegusya okwibhonera ribhona, nibho ꞉bhaamwikirisiisye. Noorwo kutyo emwe omwanya gunu ꞉mwarorere joone ejo, ꞉mwaremere okuyindura obhwiganirisya bhwemwe na okumwikirisya.”

Yeesu kaasusanya abhatangasya na abharimi abhajabhi

(Maariko 12:1‑12; Ruuka 20:9‑19)

33Yeesu ˆnaagenderera okwayika ati, “Mutegeresye echijekekanyo echindi. Aariga ari‑wo omuunu umwi unu aariga ari na risambu. Mw‑isambu ryaye omwo, aariga ayambire‑mo emijabhiibhu, ˆnaarisitira orugo, ˆnaasimba eryobho agatigati korereki amigirege‑mo omuta gwa emijabhiibhu, ka wone ˆnoombaka obhutara obhureera bhwa abhariisi. Ku‑bhuteero, ˆnaaweekesya risambu eryo ku‑bharimi abharebhe, ˆnaagenda orugendo.

34“Omwanya gwa okugesa gwejire gwakinga, omwene esambu oyo ˆnaatuma abhakosi bhaaye ku‑bharimi abho, korereki bhamugegere ribhaara ryaye rya amatwasyo. 35Nawe omwanya gunu abhakosi bhaaye ꞉bhaakingire, abharimi abho nibhabhagwata, umwi nibhamubhuma, owundi nibhamwita na owundi nibhamubhuma na amabhuyi. 36Niwo, omwene esambu ˆnaatuma rindi abhakosi abhandi, bhaafu okukira bhanu ꞉aatumire ku‑bhwambiro. Abharimi abho nibhabhakorera kubhiibhi rwa kutyo ꞉bhaakoreeye bha okwamba. 37Ku‑bhuteero, ˆnaatuma omwana waaye, ˆneeyayikiraga ati, ‘Unu ni mwana waani, omwene abhaja okumuyaana echibharo.’ 38Nawe abharimi bharya bhejire bhaarora omwana waaye, nibhaayikana ati, ‘Unu niwe aryanjura ebhiinu bhya esemwene. Chimwite korereki eswe neeswe chigege omwandu gwaye.’ 39Mbe, nibhamugwata, nibhamusira anja ya risambu, nibhamwitira eyo.”

40Yeesu ˆnaabhabhuusya ati, “Angu, omwene esambu akasubha okusooka mu‑rugendo rwaye, arikorera ki abharimi bharya?” 41Nibhamusubhya ati, “Arisingaarisya kubhiibhi abhajabhi abho na risambu ryaye aririweekesya ku‑bharimi abhandi bhanu bharimuyaana ribhaara ryaye rya amatwasyo kwa omwanya.”

42Niwo Yeesu ˆnaabhabhwira ati, “Angu, muchaariga okusoma jinu jikaamirwe mu‑Bhikaame Ebhyeru? Jikaamirwe ati,

‘Ribhuyi rinu abhoombaki ꞉bhaaremere,

niryo ryabha ribhuyi rinene rya orufuka.

Raatabhugenyi niwe aakora ogwo,

ogwo ni musango gwa okuruguusya kw‑iswe.’#21:42 Ringira Ijabhuri 118:22‑23.”

43Yeesu ˆnoongesya ati, “Enibhabhwira ati, ku‑songa eyo Nyamuwanga arisoosya‑wo obhukama bhwaye kw‑imwe na okuyaana abhaanu bha amaanga agandi bhanu bharitwasya amatwasyo inguru yaaye. 44Mbe, omuunu woonewoone unu kaja okugwa kw‑ibhuyi eryo, kaja okufunikafunika. Ka wone, omuunu woonewoone unu ririgwira, ririmusya.”

45Abhakuru bha abhagabhisi na Abhafarisaayo bhejire bhoongwa ebhijekekanyo bhya Yeesu, nibhasombookerwa ati nibho kaayikira. 46Kurwa ejo, nibhayenja injira ya okumugwata. Nawe nibhoobhaya echise cha abhaanu, kwa okubha abheene ꞉bheetogeeye ati Yeesu ni muragi.

Currently Selected:

Mataayo 21: jit

Highlight

Copy