Mataayo 25

Echijekekanyo cha abhayara ekumi

1Niwo Yeesu ˆnaabhwira abheeyigisibhwa bhaaye echijekekanyo echindi ati, “Ku‑mwanya ogwo, obhukama bhwa mu‑rwire bhurisusana na abhayara ekumi bhanu ꞉bhaagegere jidara jeebhwe na okugenda okuramira omutwasi. 2Bhataanu mw‑ikumi abho, bhaariga bhari bhataamutaamu nawe abhandi bhaariga bhari abha obhwengeeso. 3Abhataamutaamu ꞉bhaagegere jidara jeebhwe, nibhasiga okugega amafuta agandi ga okwongesya‑mo. 4Nawe abheengeeso bhataanu bharya, ꞉bhaagegere jidara jeebhwe, na mu‑bhiinu bhyebhwe ebhindi nibhagega amafuta ga okwongesya mu‑dara ejo.

5“Omutwasi ejire aakoora okuuja, abhayara abheengeeso na abhataamutaamu bhoone, nibhaamba okuwuunirira, nibheeya nibhawongera tiro sito. 6Nawe mu‑bhwire agati, abhaanu nibhamwaya ati, ‘Muringire, omutwasi kaaja! Muwuruke, muje okumuramira!’ 7Awoawo, abhayara abho bhoone nibheemuka, nibheeraabha jidara jeebhwe. 8Abhayara abhataamutaamu bharya, nibhabhwira abhayara abheengeeso bharya ati, ‘Echisabhwa muchisakire‑ko amafuta matooto, kwa okubha jidara jeeswe ejisima.’ 9Nawe abhayara abheengeeso nibhabhasubhya ati, ‘Jitakuturikana! Chitakutura okubhasakira, kwa okubha amafuta ganu chiri nago, gatakutura okwiya eswe na emwe. Akiri mugende ku‑bhanu abhagusya amafuta, mwigurire ageemwe.’

10“Mbe, abhayara abhataamutaamu nibhagenda okugura amafuta. Omwanya gunu bhaariga bhachaagenda era okugura amafuta, omutwasi ˆnaakinga. Abhayara abheengeeso bhanu bhaariga bheeraabhire, nibheengira aamwi nage mw‑iyumba rinu obhuregesi bhwariga nibhukorekana. Niwo, orwigi nirwigarwa. 11Omwanya mufuyi okutura, abhayara abhataamutaamu bharya nibhasubha okusooka okugura amafuta, nibhasongʼana orwigi rwegaywe. Niwo nibheemereeguru anja nibhabhirikira ati, ‘Mwami! Mwami! Nuuchiigurire orwigi!’ 12Nawe omutwasi ˆnaabhasubhya ati, ‘Ni chimari enibhabhwira, nitakubhamenya emwe!’”

13Awo Yeesu ˆnaamariisya kwa okwayika ati, “Mbe, mwiyangarire, kwa okubha mutakumenya orusuku noorwo isaa inu nirisubha.”

Abhagaya abheeyikanyibhwa na bhanu bhatari bheeyikanyibhwa

(Ruuka 19:11‑27)

14Yeesu ˆnaagenderera okusoosya echijekekanyo echindi, ˆnaayika ati, “Ka wone, obhukama bhwa mu‑rwire bhurisusana na omuunu unu ꞉eendere okuja orugendo. Omwanya gunu aariga achaari kwamba orugendo rwaye, ˆnaabhirikira abhagaya bhaaye, ˆnaabhayaana obhuniibhi bhwaye, korereki bhabhwimereegururu. 15ˆNaayaana bhuri mugaya okwingana na obhuturo bhwaye. ˆNaayaana owa okwamba jipirya nyafu, nijikingaga jitaranta#25:15 Jitaranta. Itaranta imwi yaariga niyingana na omuyeero gwa okuriya omukosi wa emirimu ku‑mwanya gwa emiguuga makumi gabhiri amwi okukira awo. etaanu, wa kabhiri jitaranta ebhiri na owa kasatu itaranta imwi. Niwo ˆnaagenda mu‑rugendo.

16“Awoawo, omugaya unu ꞉aayaaywe jitaranta etaanu, ˆnaagenda okukora ebhyasara na okubhona jitaranta ejindi etaanu. 17Kutyokutyo, omugaya unu ꞉aayaaywe jitaranta ebhiri, ˆnaagenda okukora ebhyasara na okubhona jitaranta ejindi ebhiri. 18Nawe omugaya unu ꞉aayaaywe itaranta imwi, omwene ˆnaagenda okusimba eryobho na okuyisiikira itaranta ya omwami waaye.

19“Gwejire gwatura omwanya omureera, omwami weebhwe ˆnaasubha. Niwo ˆnaabhirikira abhagaya bhaaye, korereki bhamubhwire kutyo ꞉bhaakoreeye obhuniibhi bhwaye. 20Omugaya unu ꞉aayaaywe jitaranta etaanu, ˆnaaja na jitaranta ejindi etaanu, ˆnaabhwira omwami waaye ati, ‘Mwami waani, ꞉waanaaye jitaranta etaanu korereki nijikorere emirimu. Ringira, nibhwene jitaranta ejindi etaanu jinu.’

21“Mwami waaye ˆnaamubhwira ati, ‘Ukorere kisi muno. Awe uri mugaya wa ekisi na omwiyikanyibhwa! Wamaabha omwiyikanyibhwa ku‑bhitooto bhinu ꞉naakuyaaye, kurwa ejo enija okukukora okubha omwangarisi wa obhuniibhi bhwafu. Nuuwuuje chikonderwe aamwi.’

22“Omugaya unu ꞉aayaaywe jitaranta ebhiri, wone ˆnaaja na jitaranta ebhiri ejindi, ˆnaabhwira omwami waaye ati, ‘Mwami waani, ꞉waanaaye jitaranta ebhiri korereki nijikorere emirimu. Ringira, nibhwene jitaranta ejindi ebhiri jinu.’

23“Mwami waaye ˆnaamubhwira ati, ‘Ukorere kisi muno. Awe uri mugaya wa ekisi na omwiyikanyibhwa! Wamaabha omwiyikanyibhwa ku‑bhitooto bhinu ꞉naakuyaaye, kurwa ejo enija okukukora okubha omwangarisi wa obhuniibhi bhwafu. Nuuwuuje chikonderwe aamwi.’

24“Nawe omugaya unu ꞉aayaaywe itaranta imwi, ˆnaaja ˆnaabhwira omwami waaye ati, ‘Mwami, ꞉naamenyere ati awe uri mukomeeye muno. Awe uri muunu unu kaanogora amatwasyo anu ꞉ataayambire na okukumanya anu ꞉ataanyaraganyiisye. 25꞉Noobhayire okubhusya itaranta yaawo, kurwa ejo ningenda okuyisiikira mu‑mayaru. Woori, gega itaranta yaawo inu.’

26“Omwami waaye ˆnaamusubhya ati, ‘Awe uri mugaya omubhiibhi na omurenga! Araabha ꞉waamenyere ati anye eninogora anu ꞉nitaayambire na enikumanya anu ꞉nitaanyaraganyiisye, 27mbe kurwa ki ꞉utaateeye itaranta yaani mw‑ibhiikiro rinu eriibhusya‑mo? Omwanya gwa okusubha kwani, naakagegere itaranta yaani aamwi na omuriiro gwayo.’ 28Niwo omwami waaye ˆnaatuma abhandi ati, ‘Mumuteesye itaranta eyo, muyaane omugaya unu ari na jitaranta ekumi. 29Omuunu woonewoone unu kaakorera emirimu jinu nimuyaaye, nirimwongesya‑ko na ebhindi bhyafu. Nawe omuunu woonewoone unu atakukorera emirimu ebhityari bhinu nimuyaaye, noorwo ebhityari bhinu ari nabhyo, nirimuteesya. 30Omugaya oyo, atari na omuriiro gwonegwone. Mumwese anja mu‑chisuute munu bhaririraga na okuguguna ameeno.’”

Obhuramusi ku‑rusuku rwa obhuteero

31Yeesu ˆnaagenderera okwayika na abheeyigisibhwa bhaaye, ˆnaabhabhwira ati, “Omwanya gunu anye Omwana wa Omuunu niriija mw‑ikusyo ryani, aamwi na bhamaraayika abheeru bhoone, niwo niriinyanja rwa omukama ku‑chitebhe chaani cha rikusyo. 32Abhaanu bha amaanga goone bhariikofyanya imbere yaani.#25:32 Ringira Iisaya 66:18; Yoweeri 3:2. Anye niribhataaganya rwa kutyo omureefi kaataaganya jinaama okusooka mu‑mbusi. 33Rwa kutyo omureefi kaatuura jinaama orubhaara rwaye rwa ebhuryo na jimbusi orubhaara rwaye rwa ebhumoosi, kutyokutyo, anye wone nirituura abhaanu abhandi orubhaara rwani rwa ebhuryo na abhandi orubhaara rwani rwa ebhumoosi.

34“Niwo anye Omukama, niribhwira abhaanu bhanu bhari orubhaara rwani rwa ebhuryo ati, ‘Muuje, emwe bhanu Raata waani ayaaye amabhando. Mwingire mu‑bhukama bhunu Nyamuwanga abheeraabhiiye okusookerera bhunu ꞉aabhumbire echaaro. 35Okubha omwanya gunu naariga niri na omweko, ꞉mwanaaye ebhiryo. Omwanya gunu naariga niri na obhwiro, ꞉mwanaaye amanji ga okunywa. Omwanya gunu naariga niri mugenyi, ꞉mwankumire mu‑nju jeemwe. 36Omwanya gunu naariga niri tuyu, ꞉mwanfwafiifye emyenda. Omwanya gunu naariga nirwaye, ꞉mwejire okundooja. Ka wone, omwanya gunu naariga niri mw‑ibhoyero, ꞉mwejire okundora.’

37“Niwo, abharengeresi imbere ya Nyamuwanga bharinsubhya ati, ‘Raatabhugenyi, ni mwanya ki gunu ꞉chaakurorere uri na omweko nichikuyaana ebhiryo? Amwi uri na obhwiro nichikuyaana amanji ga okunywa? 38Ka wone, ni mwanya ki gunu ꞉chaakurorere uri mugenyi nichikukuma mu‑nju jeeswe? Amwi uri tuyu nichikufwafya emyenda? 39Ka wone, ni mwanya ki gunu waariga uri murwaye nichiija okukurooja, amwi uri mw‑ibhoyero nichiija okukurora?’ 40Niwo anye Omukama, niribhasubhya ati, ‘Ni chimari enibhabhwira ati, choonechoone chinu ꞉mwakoreeye woonewoone mu‑bharuubhirisya bhaani unu kaabhonekana wuti atari wa obhusibhusi, mbe ꞉mwakoreeye anye.’

41“Niwo, niribhwira bhanu bhari rubhaara rwani rwa ebhumoosi ati, ‘Musooke anu, emwe bhanu Nyamuwanga eeyiimire! Mugende mu‑muriro gwa akajaanende koone gunu Nyamuwanga eeraabhire inguru ya Syetaani na bhamaraayika bhaaye. 42Musooke anu, kwa okubha bhunu naariga niri na omweko, ꞉mutaanaaye ebhiryo. Bhunu naariga niri na obhwiro, ꞉mutaanaaye amanji ga okunywa. 43Omwanya gunu naariga niri mugenyi, ꞉mutaankumire mu‑nju jeemwe. Omwanya gunu naariga niri tuyu, ꞉mutaanfwafiifye emyenda. Omwanya gunu naariga niri murwaye, ꞉muteejire okundooja. Ka wone omwanya gunu naariga niri mw‑ibhoyero, ꞉muteejire okundora.’

44“Niwo, bhanu bhari mu‑kubhoko kwani kwa ebhumoosi bharinsubhya ati, ‘Raatabhugenyi, ni mwanya ki gunu ꞉chaakurorere uri na omweko, amwi uri na obhwiro, amwi uri omugenyi, amwi uri tuyu, amwi uri murwaye, amwi uri mw‑ibhoyero, na eswe ꞉chitaakusakiiye?’ 45Niwo anye niribhasubhya ati, ‘Ni chimari enibhabhwira ati, choonechoone chinu ꞉mutaakoreeye woonewoone mu‑bharuubhirisya bhaani unu kaabhonekana wuti atari wa bhusibhusi, mbe ꞉mwaremere okukorera anye.’

46“Kurwa ejo, abhakosi bha ebhibhiibhi abho, bharigenda okuramira jimbuma ja akajaanende koone. Nawe abharengeresi imbere ya Nyamuwanga, abho bhariingira mu‑bhuwanga bhwa akajaanende koone.”

Currently Selected:

Mataayo 25: jit

Highlight

Copy