Mataayo 26

Abhakuru bha Abhayawudi abharoma iniku ya okwita Yeesu

(Maariko 14:1‑2; Ruuka 22:1‑2; Yowana 11:45‑53)

1Yeesu ejire aamara okwayika emisango ejo joone, ˆnaabhwira abheeyigisibhwa bhaaye ati, 2“Rwa kutyo mumenyere, jikatura siku ebhiri, echija okubha na ichikukuru ya Okwambuka.#26:2 Ichikukuru ya Okwambuka. Ichikukuru inu ni bhugenyi bhwa Abhayisirayeeri inguru ya okwichuka kutyo Nyamuwanga ꞉aachunguuye bhasaaja waabho okusooka mu‑bhugaya mu‑chaaro cha Miisiri. Obhuchungusi obhwo ꞉bhwakorekeene ku‑mwanya gwa Muusa. Ku‑meeresyo amaafu, ringira Okwambuka mu‑Meeresyo inguru ya Emisango Emikomeeye. Ku‑rusuku orwo, anye Omwana wa Omuunu, nirituurwa mu‑mabhoko ga abhasoko, korereki nibhambwe ku‑musarabha.”

3Mbe, omwanya ogwo abhakuru bha abhagabhisi na abhakuru bha Abhayawudi, nibheekumanya mu‑nju ya omugabhisi omukuru#26:3 Omugabhisi omukuru. Ku‑meeresyo amaafu, ringira Abhagabhisi mu‑Meeresyo inguru ya Emisango Emikomeeye. unu risiina ryaye aatogwaga ati Kayaafa. 4Omwo, nibhaayikana kutyo bhaariga nibheenda okugwata Yeesu bhurigerige, korereki bhamwite. 5꞉Bhaayikeene ati, “Nawe chaasiga okukora jinu ku‑chikukuru ya Okwambuka, abhaanu bhaasiga okukora injogere.”

Yeesu kaabhambagwa amafuta

(Maariko 14:3‑9; Yowana 12:1‑8)

6Niwo Yeesu ˆnaagenda mu‑ruguuyo rwa Bheetaniya, ˆneekara mu‑nju ya Simooni unu kara aariga arwaye ebhigenge. 7Omwanya gunu Yeesu aariga eenyanjire ku‑nenda okurya, omugasi umwi ˆnaamujaa‑ko ari na ichupa ya arabhasita.#26:7 Ichupa ya arabhasita. Ichupa inu yaariga ikonjerwe kwa ribhuyi rya arabhasita. Ichupa inu ꞉yaabhikirwaga‑mo amafuta ga obhurambu obhunene. Mu‑chupa eyo, gaariga gari‑mo amafuta ga ebhirange na ga obhurambu bhunene muno. Omugasi oyo, ˆnaasuka amafuta ago ku‑mutwe gwa Yeesu okweresya echibharo.

8Abheeyigisibhwa bhaaye bhejire bhaarora ejo, nibhabhiyirwa. Nibhaayika ati, “Bhamura! Kurwa ki omugasi unu kaanyamura amafuta ga obhurambu bhunene kutyo? 9Jikabheeye kisi araabha amafuta ganu gakagusiibhwe kwa jipirya nyafu muno, na okugabhira abhataka!”

10Yeesu ˆnaasombookerwa obhwiganirisya bhwebhwe, ˆnaabhabhwira ati, “Kurwa ki omunyaasya omugasi unu? Omwene aankorera omurimu gwa ekisi muno. 11Abhataka bhari aamwi na emwe siku joone, nawe anye nitaribha aamwi na emwe siku joone. 12Omugasi unu anyitiririra amafuta, okunyiraabha orusuku rwa okusiikwa kwani. 13Ni chimari enibhabhwira ati, woonewoone anu Emisango ja Ekisi inguru yaani jiriraasibhwa ku‑chaaro choone, omusango gwa ekisi gunu omugasi unu aankorera guryayikwa, na abhaanu bharimwichuka.”

Yuuda Isikariyooti keekirisya okuromera Yeesu iniku

(Maariko 14:10‑11; Ruuka 22:3‑6)

14Mbe Yuuda Isikariyooti, umwi ku‑bheeyigisibhwa ekumi na bhabhiri bha Yeesu, ˆnaagenda ku‑bhakuru bha abhagabhisi, 15ˆnaabhabhuusya ati, “Omuja okundiya ki araabha nikatuura Yeesu mu‑mabhoko geemwe?” Niwo nibhamuriya jipirya makumi gasatu.#26:15 Ringira Jaakariya 11:12; Mataayo 27:9. 16Okwambira omwanya ogwo, Yuuda Isikariyooti ˆnaamba okuyenja injira ya okutuura Yeesu mu‑mabhoko geebhwe.

Yeesu kaarya ebhiryo bhya Okwambuka aamwi na abheeyigisibhwa bhaaye

(Maariko 14:12‑26; Ruuka 22:7‑23; Yowana 13:21‑30; 1 Abhakoriito 11:23‑25)

17Ku‑rusuku rwa okwamba rwa ichikukuru ya emikaate jinu jitakutuurwa‑mo echifwimbya, abheeyigisibhwa bha Yeesu nibhamuuja‑ko, nibhamubhuusya ati, “Oweenda chije aaki chikwiraabhire ebhiryo bhya Okwambuka?” 18Yeesu ˆnaabhabhwira risiina rya omuunu omurebhe ˆnaayika ati, “Mugende mu‑musi gwa Yerusareemu ku‑muunu oyo, mumubhwire ati, ‘Omwiyigisya aachituma kw‑awe na kaayika ati, “Omwanya gwani gwafogeeye. Anye na abheeyigisibhwa bhaani echija okurya ebhiryo bhya Okwambuka mu‑nju yaawo.”’” 19Abheeyigisibhwa bhaaye nibhagenda nibhakora joone rwa kutyo Yeesu ꞉aabharagiriiye, nibheeraabha ebhiryo bhya Okwambuka omwo.

20Yejire yaakinga keegoro, Yeesu na abheeyigisibhwa bhaaye ekumi na bhabhiri nibheenyanja okurya ebhiryo bhya Okwambuka. 21Omwanya gunu bhaariga nibharya, Yeesu ˆnaabhabhwira ati, “Ni chimari enibhabhwira ati, umwi mw‑imwe arintuura mu‑mabhoko ga abhasoko.”

22Abheeyigisibhwa bhaaye nibhasurumbara muno, nibhaamba umwiumwi okumubhuusya ati, “Raatabhugenyi, angu naanye?” 23Yeesu ˆnaasubhya ati, “Ni unu keenyirisya mu‑rutubha rumwi na anye, niwe arintuura mu‑mabhoko ga abhasoko. 24Anye Omwana wa Omuunu, niriitwa rwa kutyo jikaamirwe mu‑Bhikaame Ebhyeru. Nawe jiribhona omuunu unu arintuura mu‑mabhoko ga abhasoko. Jikabheeye kisi ku‑muunu oyo araabha ataakeebhuuywe!”

25Mbe, Yuuda unu ꞉eekirisiisye okutuura Yeesu mu‑mabhoko ga abhasoko, wone ˆnaamubhuusya ati, “Omwiyigisya, angu naanye?” Yeesu ˆnaamusubhya ati, “Naawe omwayiki.”

26Mbe, omwanya gunu bhaariga nibharya, Yeesu ˆnaagega omukaate, ˆnaasiima Nyamuwanga, ˆnaagubheganya, ˆnaayaana abheeyigisibhwa bhaaye, ˆnaabhabhwira ati, “Mugege murye, gunu nigwo omubhiri gwani.” 27ˆNaagega omutawo gunu gwariga guri‑mo echifuufu, ˆnaasiima Nyamuwanga, ˆnaabhayaana, ˆnaabhabhwira ati, “Mugege echifuufu chinu, munywe bhoone. 28Echifuufu echo, niyo isagama yaani ya indagano.#26:28 Indagano. Ku‑meeresyo amaafu, ringira mu‑Meeresyo inguru ya Emisango Emikomeeye. Isagama yaani iriitika inguru ya abhaanu bhaafu, korereki Nyamuwanga abhafwire echigongo ebhibhiibhi bhyebhwe. 29Enibhabhwira ati, nitarinywa echifuufu rindi okukingira ku‑rusuku runu nirinywa echifuufu echiyaaya aamwi na emwe mu‑bhukama bhwa Raata waani.”

30Niwo nibhamariisya kwa okwimba orwimbo rwa okukusya Nyamuwanga. Nibheemuka awo, nibhagenda ku‑chiima cha Emijeyituuni.

Yeesu kaayika ati Peetero arimwigaana

(Maariko 14:27‑31; Ruuka 22:31‑34; Yowana 13:36‑38)

31Mbe, Yeesu ˆnaabhwira abheeyigisibhwa bhaaye ati, “Mu‑ngeta ya reero, emwe bhoone omuja okunyiiruka na okunsiga. Jiribha rwa kutyo Nyamuwanga ꞉aayikire mu‑Bhikaame Ebhyeru ati, ‘Niriita omureefi wa jinaama na riyijo rya jinaama ririnyarambuka.’#26:31 Ringira Jaakariya 13:7. 32Nawe omwanya gunu nirisuuruka, niribhatangatira okugenda Gariraaya.”

33Niwo Peetero ˆnaabhwira Yeesu ati, “Noorwo araabha abheejaasu bhoone bharikusiga, anye nitarikusiga wuri!” 34Yeesu ˆnaamusubhya ati, “Ni chimari enikubhwira ati, mu‑ngeta inu, rikookorome richaari okukookoroma, owubha waanyigaanire kasatu.” 35Peetero ˆnaamusubhya ati, “Noorwo araabha jikeendwa nifwe aamwi na awe, anye nitarikwigaana wuri!” Abheeyigisibhwa abhandi bhoone, wone nibhaayika kutyokutyo.

Yeesu kaasabhwa Nyamuwanga mw‑isambu rya Getisemaani

(Maariko 14:32‑42; Ruuka 22:39‑46)

36Mbe, Yeesu ˆnaagenda na abheeyigisibhwa bhaaye mw‑isambu rinu eribhirikirwa ati Getisemaani. ˆNaabhabhwira ati, “Mwinyanje anu okwamba, anye nigende erya okusabhwa Nyamuwanga.” 37ˆNaagega Peetero aamwi na abhamura bhabhiri bha Jebhedaayo. ˆNaamba okusurumbara na okunyaaka muno mu‑mwoyo gwaye. 38ˆNaabhabhwira ati, “Omwoyo gwani gusurumbaaye muno okukingira okwenda okufwa. Mwinyanje anu okwamba, mutengeeje aamwi na anye.”

39ˆNaafogera imbere kutooto, ˆnaagwa bhwifumbike, ˆnaasabhwa Nyamuwanga ati, “Raata waani, araabha ejiturikana, enikusabhwa unsoosisye‑wo omutawo gunu gwa ebhinyaasyo! Nawe jisige okubha rwa kutyo anye eneenda, tari rwa kutyo awe oweenda.”

40Mbe, Yeesu ˆnaasubha anu aariga asigire abheeyigisibhwa bhaaye, ˆnaasongʼana bhawongeeye. ˆNaabhuusya Peetero ati, “Angu, mwataamibhwa okutengeeja aamwi na anye noorwo esaa rimwi? 41Mutengeeje na okusabhwa Nyamuwanga, korereki mwasiga okuregeejwa. Omwoyo ogwenda okwigumiirisya amaregeejo, nawe omubhiri gugotookere.”

42Yeesu ˆnaabhasiga awo rindi, ˆnaagenda eyo rwa kabhiri, ˆnaasabhwa Nyamuwanga ati, “Raata waani, jikabha ati omutawo gunu gwa bhinyaasyo jitakuturikana okunsooka‑ko, mbe jikorekane rwa kutyo oweenda.”

43Mbe, omwanya gunu ꞉aasubhire ku‑bheeyigisibhwa bhaaye, ˆnaasongʼana bhawongeeye rindi, kwa okubha ameeso geebhwe gaariga geejuuywe tiro. 44Yeesu ˆnaabhasiga rindi, ˆnaagenda okusabhwa Nyamuwanga rwa kasatu, ˆnaasubhiirira emisango jiryajirya.

45Mbe, omwanya gunu ꞉aasubhire rindi ku‑bheeyigisibhwa bhaaye, ˆnaabhabhwira ati, “Muchaawongeeye era na okwigorora? Ringira! Omwanya gwakinga gunu anye Omwana wa Omuunu enituurwa mu‑mabhoko ga abhakosi bha ebhibhiibhi. 46Mwimuke, chigende. Ringira! Omuunu unu kaja okuntuura mu‑mabhoko ga abhasoko ari yeeyi!”

Yeesu kaagwatwa

(Maariko 14:43‑50; Ruuka 22:47‑53; Yowana 18:3‑12)

47Omwanya gunu Yeesu aariga achaaroma emisango ejo, ringira Yuuda, umwi ku‑bheeyigisibhwa bhaaye ekumi na bhabhiri, ˆnaaja aamwi na echise echinene cha abhaanu abha jimbanda na jindungu. Echise echo chaariga chitumirwe na abhakuru bha abhagabhisi na abhakuru bha Abhayawudi. 48Yuuda unu ꞉aagendere okutuura Yeesu mu‑mabhoko ga abhasoko, aariga atangatire okweresya abhaanu abho echibharikisyo. ꞉Aabhabhwiriiye ati, “Omuunu unu enija okukeesya kwa okumufumbeera, niwe mugwate.”

49Mbe, Yuuda ˆnaafogerera Yeesu, ˆnaamubhwira ati, “Naakukeesya Omwiyigisya!” Niwo ˆnaamufumbeera. 50Yeesu ˆnaamubhwira ati, “Musaani, kora chinu wiijire okukora.”

Mbe abhaanu abho nibhafogera ku‑Yeesu, nibhamugwata na okumubhoya. 51Niwo umwi mu‑bhaanu bhanu bhaariga bhari aamwi na Yeesu, ˆnaasoromora bhwangu imbanda yaaye, ˆnaabhuma na okutema‑ko okutwi kwa omugaya wa omugabhisi omukuru. 52Nawe Yeesu ˆnaamubhwira ati, “Subhya imbanda mu‑ruubhu rwayo, kwa okubha abhaanu bhoone bhanu abhagwata imbanda korereki bheete, wone bhariitwa kwa imbanda! 53Angu, utakumenya ati enitura okusabhwa obhusakisi okusooka ku‑Raata waani, wone ˆnaantumira bhamaraayika bhaaye okukira ebhise ebhinene ekumi na bhibhiri? 54Angu, araabha nikakora kutyo, mbe ejitura kutiki okukuumira jinu jikaamirwe mu‑Bhikaame Ebhyeru ati, nikwo kutyo ejikenwa jikorekane?”

55Niwo Yeesu ˆnaabhwira abhaanu bha echise echo ati, “Angu, mwaja na jimbanda na jindungu okungwata wuti anye niri musaakusi? Mbawo siku joone naariga niniiyigisya mu‑rubhuga rwa Riyekaru rya Nyamuwanga, nawe ꞉mutaangwatire! 56Nawe jinu joone jaakorekana, korereki jikuumire jinu abharagi ꞉bhaakaamire mu‑Bhikaame Ebhyeru.” Mbe, abheeyigisibhwa bhaaye bhoone nibheeruka, nibhasiga Yeesu omwene.

Yeesu imbere ya abhakuru bha Abhayawudi

(Maariko 14:53‑65; Ruuka 22:54‑55, 22:63‑71; Yowana 18:13‑14, 18:19‑24)

57Mbe, abhaanu bhanu ꞉bhaagwatire Yeesu, ꞉bhaamusirire ku‑Kayaafa, omugabhisi omukuru. Mu‑nju ya omugabhisi oyo, nimwo bhaariga bheekumanyiisye abheeyigisya bha ebhiraagiro bhya Muusa na abhakuru bha Abhayawudi. 58Peetero aaruubhiriraga Yeesu ari‑wo kura, okukingira ku‑rubhuga rwa inju ya omugabhisi omukuru. Niwo ˆneengira, ˆneenyanja aamwi na abhariisi, korereki arore jinu ejija okukorekana.

59Abhakuru bha abhagabhisi na ribharaja rikuru ryone rya Abhayawudi,#26:59 Ribharaja rikuru ryone rya Abhayawudi. Ku‑meeresyo amaafu, ringira Ribharaja rikuru rya Abhayawudi mu‑Meeresyo inguru ya Emisango Emikomeeye. bhaariga nibheenda obhubhambaasi bhwa orubheeyi, korereki bhabhone injira ya okwita Yeesu. 60꞉Bheejire abhabhambaasi bha orubheeyi bhaafu, nawe ꞉bhataabhwene obhubhambaasi bhwonebhwone bhunu ꞉bhwabheeyire. Ku‑bhuteero, abhabhambaasi bhabhiri nibhaaja, 61nibhaayika ati, “Omuunu unu ꞉aayikire ati, ‘Enitura okufumya Riyekaru rya Nyamuwanga na okuryumbaka rindi mu‑siku esatu.’”

62Niwo omugabhisi omukuru ˆneemereeguru, ˆnaabhuusya Yeesu ati, “Angu, utakusubhya noorwo omusango gwonegwone ku‑jinu abhaanu bhanu abhakusitaaka?” 63Nawe Yeesu ꞉ataasubhiisye omusango gwonegwone.

Mbe, omugabhisi omukuru oyo ˆnaamubhwira rindi ati, “Enikurayisya kw‑isiina rya Nyamuwanga omuwanga, nuuchibhwire araabha naawe Kirisito, Omwana wa Nyamuwanga.” 64Yeesu ˆnaamusubhya ati, “Naawe omwayiki. Nawe enibhabhwira ati okwambira woori, murindora anye Omwana wa Omuunu niinyanjire orubhaara rwa ebhuryo rwa Nyamuwanga owa amanaga goone.#26:64a Ringira Ijabhuri 110:1. Ka wone murindora omwanya gunu niriija niri mu‑meere okusooka mu‑rwire.”#26:64b Ringira Danyeeri 7:13.

65Mbe, omugabhisi omukuru ejire oongwa emisango ejo, ˆnaatemura emyenda jaaye, ˆnaayika ati, “Keefumirisya Nyamuwanga! Ni bhabhambaasi ki rindi bhanu echeenda? Mweyungwirwa emwe abheene kutyo keefumirisya Nyamuwanga! 66Woori emwe omwayika ki?” Nibhamusubhya ati, “Eeyire eetwe!”

67Niwo, nibhaamba okufubhurira Yeesu amachwata mu‑bhusu, nibhamubhuma jinguumi. Abhandi nibhamubhaatuura amakoofi, 68na okumubhwira ati, “Awe Kirisito, bharikisya, niga unu aakubhaatuura?”

Peetero keegaana Yeesu

(Maariko 14:66‑72; Ruuka 22:56‑62; Yowana 18:15‑18, 18:25‑27)

69Ku‑mwanya ogwo, Peetero aariga eenyanjire anja awo mu‑rubhuga. Niwo omukosi umwi wa echigasi ˆnaafogera ku‑Peetero, ˆnaamubhwira ati, “Awe waariga uri aamwi na Yeesu wa Gariraaya.” 70Peetero ˆneegaana imbere ya abhaanu bhoone awo, ˆnaayika ati, “Nitakumenya gunu owaayika!”

71Niwo ˆnaasooka awo. Omukosi owundi wa echigasi ˆnaamurora, ˆnaabhwira abhaanu bhanu bhaariga bhari awo ati, “Omuunu unu aariga ari aamwi na Yeesu wa Najareeti.” 72Peetero ˆneegaana rindi, ˆnaarayira ati, “Nitakumenya omuunu oyo!”

73Gwejire gwatura mwanya mufuyi, abhaanu bhanu bhaariga bheemereeguuyu awo, nibhafogera ku‑Peetero, nibhamubhwira ati, “Chimari, awe uri umwi ku‑bhaanu bhanu bhari aamwi na Yeesu. Noorwo inyaayika yaawo era, eyeeresya abhweru ati owusooka Gariraaya!”

74Peetero ˆnaamba okwiyendera omwene amabhiibhi na okurayira ati, “Nitakumenya omuunu oyo!” Awoawo, rikookorome nirikookoroma. 75Niwo Peetero ˆneechuka emisango jinu Yeesu ꞉aamubhwiriiye ati, “Rikookorome richaari okukookoroma, owubha waanyigaanire kasatu.” Niwo, ˆnaawuruka anja, ˆnaamba okurira kwa obhusurumbaaye muno.

Currently Selected:

Mataayo 26: jit

Highlight

Copy