TĨĨGI WERE 17

Ɗúu Abram kol ga Abraham

1De maga kiŋgi Abram joŋ doo kaawaʼ ti kaawaʼ mono, Manwur wiin ga : Ndi diŋ Baa ma de Egre-Ɓuy no. See pel ɓi keɗede. 2Ndi joŋ ge tayge jag yaŋ de ɓo, day ndi dus gi ndo yaŋ debaŋ tuu. 3Abram kal leʼge gesiŋ, jel nen ɓe gesiŋ, Baa kal fer wããre ne hẽn doo kay nono : 4Ga ma ɓin mokay diŋ tayge jag ɓi de ɓo no. Ndo kol ge yaŋ diŋ pan wer sir wo ngaɓa dusglugi. 5Á ɗe ge ndo ga Abram gà so, ama ɗúu ɓo joŋ ge ga Abraham, werga ndi kol ndo yaŋ diŋ pan wer sir wo ngaɓa dusglugi. 6Ndi kol ndo yaŋ diŋ je tesge debaŋ tuu, ndi joŋ ge yaŋ ga wer sir mo laa wo le see ɓo, waŋre laa ge wo yaŋ le go see ɓo. 7Ndi joŋ ge tayge jag yaŋ de ɓo, de wer mani ɓon wo blam ɓo, ti wer ɓaara maga ndar ge wo wo mo ɓuy no. Á joŋ ge diŋ tayge jag ma tum, day diŋ wer tayge jag sen ga ndi joŋ ge diŋ Baa ɓo, de wer mani ɓon wo blam ɓo.

8Sir maga ndo le de urgi wara la ni mono, ndi hãn ge ne ndo de wer mani ɓon wo blam ɓo, sir Kanaan ɓuy joŋ ge diŋ ɓaara ma tum, day ndi joŋ ge diŋ Baa ɓaara.

9Baa wii Abraham ga : Ma ɓon ndo ɗaw ge tayge jag ɓi no, ndo de wer mani ɓon wo blam ɓo ɓuy, ti wer mani ɓaara maga ndar ge wo le blam mo ɓuy no. 10Mokay diŋ faage maga ndi joŋ tayge jagn ge de ɓay de wer mani ɓon wo blam ɓo mono. Je twar ma ti holaŋ ɓay ɓuy joŋ ge go de caa ɓĩĩni. 11Nday car ge ɓĩĩni, sen diŋ fen ma kaŋ nen ti tayge jag ma ti holaŋ ɓin de ɓay mono. 12Naw nenmaʼ blam biŋgi mbarga ma twar mono, à joŋ ge nen caa ɓĩĩni mbarga ma twar ma yoo ɓayn go ɓuy. Sen diŋ ti wer mani ɓay maga ndar ge wo wo mo ɓuy, maga biŋ yoo ɓay ni, noga maga à yeen le yoo ɓay waare ni yeege ga bay ti wer mani ɓayn ni wa mono. 13Ndo joŋ ge nen caa ɓĩĩni je maga biŋ liŋ ni ɓo ni go, de je maga ndo yeen le yeege de solay ɓo mono. Sen joŋ ge diŋ mo ma de kaŋge go mo ti hããgsee ti tayge jag naa ma tum no. 14Je twar ma bay caa ɓĩĩni, maga bay de lam faage caage ɓĩĩnin ti hõõgese ɓe wa no, à naa ge je sen go ti holaŋ jar ni ɓe wo, doo ga á ɓlag tayge jag ɓin go. 15Baa kal wii Abraham pa ga : Ma wãy ɓo Saray mono, ndo ɗen ge ga Saray gà so, ama ɗúu ɓe joŋ ge ga Sara. 16Ndi kaŋ ge bosaʼ yaŋ ne hẽn ti, ndo daʼge mbarga yaŋ de ɓe lay. Ndi kaŋ ge bosaʼ yaŋ ne hẽn ti day á biŋ gi wer wo sir yaŋ ngaɓa, waŋre wer sir wo debaŋ laa ge wo yaŋ le go see ɓe. 17Abraham kal leʼge gesiŋ jel nen ɓe gesiŋ, kal leʼ fege, wãã de ɓil ɓe ga : Jobo kiŋgi kis biŋ mbarga? Day Sara patala de kiŋgi doo kaawaʼ biŋ gi mbarga? 18Blam ɓe Abraham wii Baa ga : O! Ismayel mo hay mbe pel ɓo ni caw! 19Ama Baa day ga : Hay de koge ga wãy ɓo Sara biŋ gi mbarga yaŋ mbe mo, ni ndo kaŋ ge ɗúu ne hẽn ga Isage. Ndi joŋ ge tayge jag maga diŋ tayge jag ma tum yaŋ de ɓe, de wer mani ɓen blam ɓe. 20Ti Ismayel mono, ndi laa mbi wããre ɓon we. Ndi kaŋ ge bosaʼ yaŋ ne hẽn ti, ndi tesn ge yaŋ, ndi dusn gi yaŋ debaŋ tuu. Á joŋ ge yaŋ diŋ pan waŋre wo hwal ti ɓoge, ndi joŋ ge sir yaŋ de ɓe kluu buy tiʼ i. 21Ama ti ɓaŋ wããre tayge jag ɓin mo lay no, ndi joŋn ge diŋ de Isag maga Sara biŋn gi ne ndo deebo doo sen la no mono.

22De maga á taw wããren go ne hẽn so mono, Baa kal urgi go ciŋ ti Abraham.

23Abraham kal baa wel ɓe Ismayel, de jar maga biŋ wo liŋ ni ɓe ni, de jar maga se yeɗ ra de solay ɓe, de ma twerpiiri maga hay wo jar ma liŋ ni ɓen wo ni ɓuy, á kal caa ɓĩĩni ɓaara go wur sen ɓuy doo maga Baa hay wããn ne hẽn nono. 24Kiŋgi Abraham hay doo kaawaʼ ti kaawaʼ de maga á caa ɓĩĩni mono. 25Kiŋgi Ismayel hay hwal ti swaʼ de maga á caa ɓĩĩni mono. 26Diŋ wursen tuu ga Abraham caa wo ɓĩĩni go de wel ɓe Ismayel. 27De tayge de jar ma twerpiiri ma liŋ ni ɓen wo ɓuy, maga biŋ wo liŋ ni ɓe ni mono, noga de maga á yeɗ ra le yeɗge waare de solay ɓe, ɓuy caa wo ɓĩĩni go wer ɓe ni.

Currently Selected:

TĨĨGI WERE 17: TUP

Highlight

Copy