TĨĨGI WERE 21
21
Biŋgi Isage
1Manwur kal naa nen de el ɓen see Sara doo maga á hay wãã go nono, Manwur kal joŋge doo maga se hay wããn go nono. 2Sara kal maŋ ɓiili, kal biŋ wel ne Abraham de tããbe ɓe no, ti wur maga Baa hay ngaɓ ne, day hay wãã ne hẽn ti ɓe mono. 3Abraham kal ɗe wel maga à biŋ ne hẽn ga Isage, je maga Sara biŋn ne hẽn mono. 4Abraham kal caa ɓĩĩni wel ɓe Isag go ti naw nenmaʼ doo maga Baa hay wããn go ne hẽn nono. 5Kiŋgi Abraham hay kisi, de maga á biŋ Isag mono. 6Diŋ doo kay no so no ga Sara ga : Baa joŋ me mbe ma sen diŋ ma feg ti lay so, werga jobo laan we no, á feg ge ti ɓi. 7Á kal wããge pa ga : Wose ii bà Abraham de sen ga Sara yaŋ mbe ma hã pãã ne weere ɗa pa mo la yaw? De sen bà mbe ɓuy ndi biŋ mbi mbarga ne hẽn de tããbe ɓen lay ɗe!
Agar go ti puuli
8Mbargan gẽẽ go, kal maʼ jag go ti pãã. Abraham kal joŋ few ma kluu wur maga Isag maʼ jag go ti pãã mono. 9Sara kal ko wel maga Agar may jar Ejipte hay biŋn ne Abraham mono ti fege. 10Á wii Abraham ga : Nii wãy sen de mbarga ɓe no, werga mbarga maygebe sen hoo ge taabúl de wel ɓin gà. 11Wããre sen mokay la co jag Abraham gà has wer wel ɓe no. 12Ama Baa wii Abraham ga : Ɓlag ɗiggi go wer weln wo de maygeben wa. Fen maga Sara wii mo ti ɓe mono joŋn ne hẽne, werga diŋ see Isag ga wer mani ɓon gwʼage go de ɗúu ɓo mono.
13Ndi joŋ ge mbi sir yaŋ go de wel mani maygeben tiʼ lay, werga á diŋ wer ɓo.
14Abraham kal urgi go ciŋ de jag toŋ mbuhu, hoo hoole pẽẽ, kaa bii ti ndar bii, hã ra ne Agare kaŋn ne hẽn soole, hã mbargan ne hẽn ni lay kal niigi ɓe. Agar kal rawge, wel wo go ti puuli ma Beer-Seba. 15De maga bii ma ɓi ndar biin taw go mono, á kal men mbargan nen cee sway yeʼe, 16kal yaʼge wo go hayge nen ɗee waa maga à jwaʼ ne yeʼe, werga á kal wããge ga : Daga nen ɓi mo ko wel ɓin huugi wa. Á kal hayge mbe le ɓaŋla ti roo ti ɓe degaʼdegaʼ yeʼ so. 17Baa kal laa gẽẽge wel no, je peele Baa raw ɗe Agar le ciŋ day wiin ga : Ẽla Agare? Joŋ hẽẽne wa, werga Baa laa gẽẽge mbargan we ti ngel maga á ni mo yeʼ no. 18Ur go ciŋ de wel no, ɗaw doo ɓe, werga ndi joŋ sir ma kluu tiʼ yaŋ de ɓe. 19Baa kal bul nen ɓe go, se ko gutug de bii ɓil kaʼa, á kal rawge ɗa bii, baa ndar biin go, kal hãge ne wel no. 20Baa kal joŋge de wel no, se gẽẽ go, kal joŋge de tiŋ ti puuli ni, kal kolge diŋ je jwag waa. 21Á kal hayge de tiŋ ti puuli ma Paran, man ɓe kal da may jar Ejipte ne hẽne.
Tayge jag maga Abraham joŋn de Abimeleg mono
22Ti wursen mono, Abimeleg kal wo age wer kããra de Pikol waŋ soode ɓe no, ma wããge ne Abraham doo kay nono ga : Fen maga ndo joŋn ɓuy mono, Baa de ɓo. 23Haʼ go me ti ɗúu Baa ga ndo jõõ ge ndi gà jãã ge weere ɓi wo gà jãã ge moore ɓi wo gà lay. Doo maga ndi joŋ mo de el nono, ndo joŋ ge me de el de sir maga ndo hay joŋ de tiŋ ni mo lay no. 24Abraham day ga : Ndi haʼ yaŋ mbi go ne ndo. 25Ama Abraham raw ruu Abimeleg ti wããre gutug po maga weere jõõre mani Abimeleg hay yããn wo de egre. 26Abimeleg kal fer wããre ga : Ndi bay bà de ko je joŋ sen mokay wa ɓuy yaw. Ndo hay wo bag blam wããre sen me gà lay, ndi de laage ɓe bà nà wara mokay ɗa no. 27Doo kay nono, Abraham kal hoo sããre wo, deere wo de fǐiri wo, kal hã rage ne Abimeleg, blam sen saara kal joŋ tayge jage. 28Abraham kal laa sããre ma tigliiri ma yoo horog ɓen wo go lag sar rename. 29Abimeleg day wii Abraham ga : Sããre ma se renamn wo go lag sar ma ẽla? 30Abraham kal fer wããre ne hẽn ga : Ndo yãã ge sããre se renamn wo diŋ doo mo ma kaŋ nen ga tee gutug sen diŋ ndi. 31Diŋ wersen ga à ɗe ngel sen ga Ber-Seba. Werga diŋ ti ngel sen ni ga á joŋ wo nen haɗge go ne kããra mono. 32Á kal wo joŋ tayge jag Ber-Seba, ga diŋ blam sen ga Abimeleg kal wo pudgi go ciŋ de Pikol je wãã wããre soode ɓen wo, kal ferge ɓi sir ni jar Filistẽẽ wo. 33Abraham kal peɗ koo tamaris Beer-Seba ni, kal ɗe ɗúu Manwuri, goŋ Baa ma tumtum no. 34Abraham joŋ de tiŋ ni jar Filistẽẽ wo wolaŋ.
Currently Selected:
TĨĨGI WERE 21: TUP
Highlight
Share
Copy
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.
