TĨĨGI WERE 24

Dage wãy Isage

1Abraham taw tããbe go maŋ so, day Manwur hay kaŋ bosaʼ ne hẽn ti de fẽẽre ɓen wo ɓuy. 2Abraham wii wejõõ ɓe maga go taŋgu ɓaa liŋ ni, maga hay wãã wããre fẽẽre ɓen wo ɓuy ga : Ndo joŋ nen hee doo ɓo ti mankũũni ɓi. 3Day ndo joŋ ge nen haʼge go me ti ɗúu Manwuri, Baa ma ciŋ wo de Baa ma gesiŋ no, ga ndo da ge wãy ne wel ɓin yoo mayre mani jar Kanaan maga ndi de tiŋ yoo ɓaara lam gà. 4Ama ndo wo ge ɓi sir ɓi, ti ɓaŋ mani ɓi no ma da wãy ne wel ɓi Isage. 5Wejõõn kal fer wããre ne hẽn ga : Maapo wãyn day ge age go wer ɓi la gà ndi mo baa mbi wel ɓon wo wer ɓi sir maga ndo menn le go mono? 6Abraham kal fer wããre ne hẽn ga : Joŋ foo see ɓo ma baa wel ɓin wo go ni wa hase! 7Manwuri, Baa ma ciŋ maga joŋ ga ndi mo men tiŋ mani pan ɓin le go de ɓaŋ mani ɓin mono, á diŋ je maga hay wãã me ga se hã sir sen la yaŋ ne wer mani ɓi no. Á de see ɓe ɓoʼ je peele ɓe yaŋ mo pele. Wo diŋ ni ga ndo joŋ ge nen da wãy le ne wel ɓin mono. 8Hayga wãyn wãã we ga se day maŋ blam ɓo gà no, ni ndo yaʼ haʼge maga ndi srog wer ɓo haʼge we go see ɓo. Ama diŋ ga ndo baa wel ɓin wo go wer ɓo ni gà an tawa.

9Wejõõn raw hee doo ti mankũũni Abraham waŋ ɓe no, kal haʼge go ne hẽn ti glog wããre seno.

10Á kal hoo manyoŋyoŋ mani waŋ ɓen wo hwale, kal rawge de fẽẽre mani waŋ ɓe no, maga hay wo doo ɓe mo ɓuy no.

11Á kal urgi go ciŋ kal rawge Mesopotami, ɓi leege mani Nahor no. Á kal laa kõyõgre manyoŋyoŋn wo le go jag leege, jag gutug bii po de law, de wur maga naare laa wo le go ɗad bii mono.

12Blam ɓe á day ga : Manwuri, Baa mani waŋ ɓi Abraham no, kaŋ nen ɓi ti fen maga ndi a kiɗgi ɓe mono, ti ɓi mo sii ndi kam ndo, joŋ ɓil de el ɓon see waŋ ɓi Abraham! 13Ndi de oole jag bii mo deŋ la no, mayre mani jar sir sen la laa ge wo yaŋ le go ɗaa bii. 14Daga may maga ndi wãã we ne hẽn ga : Jel hoole ɓon le me ndi kam ndo, ndi jo ɗala, day se kal we fer wããre ga : Jo mbo, ndi hã yaŋ ne manyoŋyoŋ ɓon wo ni lay no, mo hay diŋ may maga le go de hãge ne wejõõ ɓo Isag mo so no!

15Á bay ɓoʼ jag wããren go kway, kola diŋ maga Rebeka may mani Betuwel kaa Milka wo de moo Nahor hẽn Abrahamn de hoole soole la caw tuu yaw. 16Á hay diŋ maytigli de woore nà foo gà. Á hay diŋ seram mayn tuu maga jobo bay de woge see ɓe wa ɗa. Á kal ɗiigi wo jag bii no, kal baa hoole ɓen le go. 17Wejõõ Abraham kal ur ɗee le caa pel ɓe, wiin ga : Hã bii ma ɓi hoole ɓon me ndi lig swaʼ ɗala. 18Á kal fer wããre ne hẽn ga : Jo mbo waŋ ɓi! Á kal jel bii ne hẽn deparday, kal hã bii ne hẽn joge. 19De maga á hã bii go ne hẽn hã mono, á day ga : Ndi ɗaa yaŋ go ne manyoŋyoŋ ɓon wo lay, nen maga á mo jo wo go de kããge lay. 20Á kal rawge bud bii ma ɓi hoolen go deparday ɓi daage no, kal rawge de ɗee ɗaage le ɓi gutug ni, ɗaa go ne manyoŋyoŋn wo ɓuy lay.

21Bloon la mbe de wii jag see ɓe gesiŋ so ma koge ga Manwur nà de joŋge ga ti se mo sii ti seele sen so yawla, baywa yawla, mbe koɗ so.

22De maga manyoŋyoŋn jo wo bii go jo mono, bloon kal maŋ boo ma ti wedoo nen gram hiiraʼa, de ɓeege boo biŋni ma doo ni ɓoge. Boŋ yoo ɓaara maŋ kelew dedaŋ kisi. 23Á day ga : Ndo diŋ may ma wo ne? Sii see ɓo me ɗa ndi kam ndo. Ngel naw yaŋ mbe liŋ ni pan ɓo? 24Á kal fer wããre ne hẽn ga : Ndi diŋ may ma Betuwele, mbarga maga Milka biŋn ne Nahor mono. 25Á day pa ga : Fíi de hõõ ɓuy wo mbaara liŋ ni wur deŋe, ngel naw yaŋ mbe lay. 26Doo sen bloon raw leʼ monɗra pel Manwuri, day ga : 27Bosaʼn mo hay diŋ ma Manwuri, Baa mani waŋ ɓi Abraham no, maga koge decoo ɓen wo de debay ndarge gog ɓen bay wo tawge go see waŋ ɓin wa mono. Ndi de see ɓi Manwur joŋ nen koɗ me ge le, a de ɓi liŋ ni hẽẽre waŋ ɓin wo no. 28May ma tiglin kal daŋge de ɗee liŋ bag blam wããre sen see man ɓe. 29Wegeman rebeka yaŋ, à ɗen ga Laban. Laban kal daŋge de ɗee see bloon jag bii no. 30Á hay ko boo ma ti wedoo wo de ɓeegen doo maygeman ɓe no, day se hay laa wããre maga Rebeka wããn ga, bloo sen wãã doo kay no mono. Á kal nduugi jag bii daʼ bloon de oole ɓiŋ manyoŋyoŋ ɓen wo deŋe. 31Á day ga : See le, je maga Manwuri, Baa de kaŋ bosaʼ ne ndo ti mono! Ndo oo wo go siigi la ni ga le! Ndi yaŋ le go de kneʼ tiŋ de ngel ne manyoŋyoŋ wo no. 32Bloon kal age liŋ, Laban kal horge fẽẽre ma ti manyoŋyoŋn wo go, kal lag fíi wo de hõõ ne hara. Hã bii ne bloon wo de jar maga hay wo wer ɓe ma yog ɓaale ɓaara.

33Blam ɓe à raw hã rege ne hẽne. Ama se day ga : Ndi re ge mopo bay wãã fen maga ndi de sãy wããge ɓe mo gà. Laban ga wãã mbo!

34Doo kay no no, se day ga : Ndi diŋ wejõõ Abraham. 35Manwur kaŋ bosaʼ ne waŋ ɓin ti debaŋ, day á kol diŋ je egre debaŋ. Á hã fǐiri ne hẽn de deere, de solay, de boo biŋni, de weere gebeere wo de mayre gebeere wo, de manyoŋyoŋ wo de gerhẽẽ wora. 36Sara wãy waŋ ɓin de tããbe ɓen kal biŋ wel ne waŋ ɓi no. Á kal hã fẽẽre ɓe maga se de ɓaara ɓuy ne hẽne. 37Waŋ ɓin kal joŋge ga ndi mo haʼ go ne se ga : Ndi dage wãy ne wel sen yoo mayre mani jar Kanaan maga se de tiŋ ɓi sir ɓaaran lam gà. 38Ama, ndi wo ge yaŋ liŋ ni pan se, ɓi feele ni se, da wãy ne wel se no. 39Ndi kal wããge ne waŋ ɓin lay ga tiga wãy sen day ge age wer ɓi gà lay bla la. 40Á kal fer wããre me ga : Manwur maga ndi hay see pel ɓe mono, ɓoʼ je peele ɓen yaŋ mo pele, day ti ɓo yiŋ yaŋ ti seele ɓo no. Day ndo da ge wãy le ne wel ɓin ti feele ni ɓi, liŋ ni pan ɓi. 41Ndo yaʼge wããre haʼgen go see ɓo mokay diŋ de maga ndo wo we le go liŋ ni pan ɓi no. 42Ndi nduu wara jag bii, day ndi kal wããge ga : Manwuri, Baa mani waŋ ɓi Abraham no, hayga ndo yaŋ de dage ga seele ɓi maga ndi a ti ɓe mo caw la ndo yiŋ ti ɓi yaŋ ni no, 43koɗa ndi oo jag bii mo deŋ la no, maytigli maga age ɗaa bii la day ndi wãã we ne hẽn ga : Hã bii ma ɓi hoole ɓon me ndi jo deʼ ɗa, ndi kam ndo, day se kal wããge we ga : 44Jo mbo de see ɓo, day ndi ɗaa yaŋ ne manyoŋyoŋ ɓon wo lay we no, daga may ma sen mo hay diŋ may maga Manwur le go de hãge ɓe ne je ni waŋ ɓin mono! 45De maga ndi bay taw wããre sen go jag jiili ɓi kway, kola diŋ maga Rebeka go de hoole ɓen bay la caw, kal ɗiigi wo jag bii no, kal ɗaage le. Ndi kal wiigi ɓe ga : Ndi kam ndo, hã bii ma joge me ɗala. 46Á kal jel hoole ɓen le bay ɓe deparday, day kal ga : Jo mbo, ndi hã yaŋ ma joge ne manyoŋyoŋ ɓon wo lay. Ndi jo, se kal hãge ne manyoŋyoŋn wo lay. 47Ndi kal wii jag ɓe, ndi day ga : Ndo diŋ may ma wo la? Á kal fer wããre me ga : Ndi diŋ may ma Betuwel je ni Nohor wo de Milka no. Ndi kal hee boo ne hẽn hũy, hee ne hẽn doo lay mono. 48Blam ɓe ndi kal leʼ monɗra gesiŋ pel Manwuri, ndi kal joŋ suseʼ ne Baa mani waŋ ɓi Abraham no, ga joŋ nen koɗ mege le de deele, nen maga ndi mo a daʼ may mani hẽn waŋ ɓin ne wel ɓen mono.

49Patala, hayga nday da we ga nday joŋ ɓil de el yaŋ de debay ndarge gog see waŋ ɓin no, ni nday sii we go me. Bay wa lay no ni nday wãã we go me lay, ndi fer nen ɓaŋ hun lay bla ndi fer lay.

50Laban kal wo fer wããre ne hẽn de Betuwel ga : Mo sen a le mokay ɓiŋ Baa, wùr kãã ma wãã de el ɓe noga ɓlagge ne ndo gà. 51Rebeka mo yeʼ see ɓo pel ɓo no, baan mbo, see mbay, á mo kol wãy waŋ ɓon mbe doo maga Manwur wããn go nono.

52De maga wejõõ Abraham laa wããre ɓaaran laa mono, á kal leʼ monɗra gesiŋ pel Manwuri. 53Wejõõn kal horge fẽẽre maga de joŋge de boo solay wo le go de boo biŋni wo le go, de õõbe wo, kal hã rage ne Rebeka. Á kal hã fẽẽre ne wegeman ɓen wo de man ɓe debaŋ lay. 54Diŋ blam sen so ga saara kal rege, kal joge de jar maga hay wo wer ɓe mono, saara kal nage lagge. De jag toŋ de maga á pud wo go ciŋ mono, wejõõn day ga : Men we ndi ferge ɓiŋ waŋ ɓi no. 55Wegeman Rebekan wo de man ɓe day wo ga : Daga may ma tiglin mo joŋ naw de wùr mbag ɗa, naw po hwal boŋ blam ɓe ni nday raw yaŋ. 56Wejõõn kal fer wããre ne hara ga : Yõõ we ti ɓi wa so, doo ga Manwur yiŋ ti seele ɓin we go. Men we me rawge ndi wo daʼ waŋ ɓi no. 57Doo kay no no, saara day ga : Naa ɗe may ma tiglin le, ni naa wii jag ɓe.

58Á raw wo ɗe Rebeka le so, day wiin wo ga : Ndo raw yaŋ mbo wer bloo sen mo yeʼ no? Á kal fer wããre ga ãã.

59Á kal wo men maygeman ɓaara Rebeka rawge de wãy ma hã pããn ne hẽn wer wejõõ Abrahamn de jar ɓen wo no. 60Á kal wo kaŋ bosaʼ ne Rebeka ti ga : O maygeman wùr Rebeka, daga ndo mo kol wer jar pur trostrose, day wer mani ɓon mo hay wo wãã wããre jar hee ɓaaran wo no.

61Rebeka kal urgi go ciŋ de mayre gebeere ɓen wo no. Á kal wo ɗiigi ti manyoŋyoŋ wo, kal wo rawge wer bloo no. Wejõõn kal baa Rebeka kal rawge.

62Ti sen ni, Isag hay le jag gutug ma Lasay-Roy no, fer we le lay. Á hay de hayle de tiŋ nen ɓaŋ Negefe. 63Wurpo de law, Isag hay kal go raŋge ɓi pay wo caw ɗiggi, á kal maŋ nen wo koge, kona, manyoŋyoŋ wo le de seege sugi. 64Rebeka maŋ nen wo kal ko Isage, kal ɗiigi le go ti manyoŋyoŋ ɓe no. 65Á wii wejõõn ga : sen diŋ je may le de seege caa pel naa ɓi pay mo caw ne? Wejõõn kal fer wããre ne hẽn ga á diŋ waŋ ɓi no. Doosen á raw hoo õõbe laa go ti ɓe. 66Wejõõn kal bag blam fẽẽre se maga hay joŋ wo mo ɓuy ne Isage. 67Isag kal rawge kaŋ Rebeka ɓi mburyug ni man ɓe Sara. Á kal baa rebeka maga joŋ ge diŋ wãy ɓe, á kal dage ɓe. Diŋ doo kay no no, ga Isag daʼ teŋge nen blam húulí man ɓe.

Currently Selected:

TĨĨGI WERE 24: TUP

Highlight

Copy