TĨĨGI WERE 26

Isag ni jar Filistẽẽ wo

1Koŋne kal leʼge go ɓi sir no. Sen go sar bay diŋ koŋne ma taŋgu maga hay leʼ ti wur mani Abrahamn wa. Isag kal woge ɓiŋ Abimeleg waŋ jar Filistẽẽ wo Gerare. 2Manwur kal naa nen ne hẽne wiin ga : cegaɗ wo go Ejipte wa, ama hay ɓi sir maga ndi kaŋ ge nen ɓo ni mono. 3Hay mbo ɓi sir sen la, ndi yaŋ de ɓo, ndi kaŋ ge bosaʼ yaŋ mo ti, werga ndi hã ge sir sen wo mo deŋ ɓuy ne ndo de wer mani ɓo no. Diŋ doo kay ga ndi ɗaw ge haʼge maga ndi hay haʼ go ne pan ɓo Abraham mono. 4Ndi dusgi wer mani ɓon yaŋ doo gér ma ciŋ wo nono, sir sen wo mo deŋ ndi hã ge ra ne wer mani ɓo no. Wer sir ma gesiŋ la wo ɓuy kol ge wo yaŋ de bosaʼ ti diŋ nen doo wer mani ɓo no. 5Doo ga no, Abraham laa jag ɓi, á laa gẽẽge ɓi, á hoo sug ti jag ɓi, see wer jag liŋgi ɓin wo, de jag liŋgi ɓi ma de yergen wo, de jag liŋgi ɓin wo no.

6Diŋ doo kay ga Isag kal hayge de tiŋ Gerare.

7De maga jar ma ti ngel wo ni wii wo jag ɓe ti wãy ɓe mono, á kal wããge ne hara ga : Á diŋ maygeman ɓi. Á hay joŋ hẽẽne maga se mo wãã ga á diŋ wãy se, werga day la à ʼwar se go, werga Rebeka hay de woore. 8Doo ga Isag ig gi wo de tiŋ ni ɗa so mono, ti wurpo Abimeleg waŋ jar Filistẽẽ wo kal ko nen go ti fenedere, kal daʼ Isag joŋ hragge de wãy ɓe Rebeka. 9Abimeleg kal ga ɗe Isag le ne se day wiin ga : Á diŋ wãy ɓo mo pa ɓa! Diŋ wer may ga ndo hay wãã ga : Á diŋ maygeman ɓo ne? Isag kal fer wããre ne hẽn ga : Ndi wãã doosen nono diŋ doo hẽẽne maga ndi mo daʼ húulí wer ɓe wa. 10Abimeleg kal wiigi ɓe ga : Ndo joŋ wùr mo hãʼ joŋge ne? Á hay mo hãʼ so no, jobo yoo jar wùr wo mo jãã we meʼ ga se suu de wãy ɓon so no, ndo de hay kol wùr diŋ jar joŋ ɓlagge so mo pa. 11Doosen Abimeleg kal fer wããre go doo kay nono ne jar ɓen wo ɓuy ga : Je maga duʼ bloon mo yeʼ wo we de wãy ɓe no, á ii gi je ma sen go.

Isag joŋ ge tayge jag de Abimelege

12Isag kal joʼ fẽẽre ɓi sir sen ni, á kal we fẽẽre kal ma sen dedaŋ maga se hay joʼn gesiŋ ɓaale kisi, werga Manwur hay kaŋ bosaʼ ne hẽn ti. 13Bloo sen la hay kol de horoge, day se see pel ciŋ tum hãã kol de horog debaŋ.

14Á hay de kaw horog ma kleere wo de ma kluuri wo, hay de weere jõõre pur debaŋ lay.

15Gutug maga weere jõõre mani pan ɓe Abraham hay teen wo ti wur mani pan ɓen mono, jar Filistẽẽ ndeb wo ra go, bag wo ra go de siri. 16Doo kay nono Abimeleg wii Isag ga : see go see wùri, werga ndo de egre dedaŋ wùr debaŋ. 17Isag kal urgi go ti ngel ni, raw hayge ti por ma Gerar, kal joŋ tiŋ ni. 18Isag fer horge nen gutug maga à ter ra ti wur mani pan ɓe Abraham wo, ga jar Filistẽẽ hay ndeb wo ra go blam húulí pan ɓe mono. Á kal ɗe rage diŋ de ɗúu maga pan ɓe Abraham hay ɗe rage mo tawtaw pa. 19Weere jõõre mani Isagn tee wo gutug ti porn ni, kal wo daʼ bii ni yig-yiggi. 20Jar koɗ horog ma Gerar kiɗ wo dekwãy de Isag ga : Biin diŋ ma wùri! Á kal kaŋ ɗúu ne gutugn ga Eseg, werga á hay joŋ dekwãy de ɓe ni. 21Weere jõõre ɓen kal wo tee gutug ma tigriŋ maga á joŋ dekwãy ti ɓe pa. Á kal ɗe ge ɓe ga Sitna.

22Á kal hoo kaŋ ngel laggen go ni no taʼ no, kal tee gutug ma tigriŋ maga á joŋ dekwãy ti ɓe gà. Á kal ɗege ɓe ga Rehobod, werga á kal ga Manwur kaŋ naa we go ti diy so, naa tes yaŋ ɓi sirn la so.

23Ti ngel ni, se fer ɗiigi wo nen Beer-Seba. 24Manwur kal naa nen see ɓe ne hẽn de suŋ sen ni wiin gana : ndi diŋ Baa mani pan ɓo Abraham no. Joŋ hẽẽne wa, werga ndi yaŋ de ɓo. Ndi kaŋ ge bosaʼ yaŋ mo ti, ndi dus gi wer mani ɓon yaŋ, wer ti wejõõ ɓi Abraham.

25Isag kal boo ngel sii jag ni, kal ɗe ɗúu Manwuri goŋ ne. Á kal baa mburyug ti ngel ni, weere jõõre ɓen kal wo tee gutugi.

26Abimeleg kal age ɓin ɓe, wo de bar ɓe Ahusad, de Pikol waŋ soode ɓen wo no. 27Isag wii ra ga : nday a see ɓi joŋ may la, nday caa hee de ɓi nday nii me le go ni ɓay so lay no? 28Á kal wo fer wããre ga : wùr de koge de el ga Manwur yaŋ de ɓo. Diŋ wersen ga wùr ga : daga haʼge mo hay ti holaŋ naa, kaŋ nen ga ti holaŋ wùr de ɓo mono, naa joŋ tayge jage. 29Wer haʼge sen wùr joŋ ge ndo de ɓlagge gà de ngaɓge doo maga wùr hay duʼ mo le gà wùr hay joŋ see ɓo diŋ de el tawa, wùr men mo le rawge jam, ndo maga Manwur de kaŋ bosaʼ mo ti patala no mono. 30Isag kal joŋ rege ne hara debaŋ, saara kal rege kal joge.

31Blam ɓe saara pudgi go ciŋ de jag toŋ, kal wo haʼge go ne kããra. Isag kal men rage rawge, á kal wo rawge jam.

32Wur sen dera, weere jõõre mani Isag kal wo age bag blam wããre ne hẽn ti gutug maga saara tee ne. Á wiin wo ga : wùr daʼ bii we. 33Á kal ɗege ɓe ga : Sibeya. Diŋ wersen á kal kaŋ ɗúu ne ɓi leegen ga Beer-Seba hãã wara.

34De maga kiŋgi Esaw joŋ go doo naa mono, á kal da wãy, da Judid may ma Beeri je Hitid no, Basmad may ma Elon je Hitid no. 35Naaren kal wo joŋge diŋ jar car jiili go ne Isag wo de Rebeka.

Currently Selected:

TĨĨGI WERE 26: TUP

Highlight

Copy