TĨĨGI WERE 9

Baa joŋ tayge jag de Nowe

1Baa raw kaŋ bosaʼ ne Nowe ti de weere ɓen wo ɓuy day riŋ ra gano : Hay we tesge, dus we, ni nday baa we tamsir go. 2Nday joŋ ge yaŋ diŋ jar joŋ hẽẽne ma de hãã ne nàyre ma gesiŋ wo la ɓuy, ne dweere ma ciŋ wo ɓuy, de fẽẽre ma seɗge de ɓil wo, de cẽẽ ma nen bii wo ɓuy. Á wo go de hãge ne nday ɓi coo doo. 3Fẽẽre maga wo tenen ɓuy mo ɓuy, de maga seɗ wo de ɓil mo ɓuy, joŋ ge wo diŋ rege ɓo. Ndi hã ra ne ndo doo maga ndi hay joŋ ti fẽẽre ma de tĩɗgi wo no lay. 4Diŋ ga ane, nday re ge này de tenen ɓen ɓuy gà kaŋ nen ga de cíi ɓe no. 5Ndi fer ge yaŋ wii cíi ɓo maga diŋ tenenn tuu lay ge, ndi fer ge wiigi ɓe doo horog ma honla ɓuy. Doo je táabay ma honla tenen caw ɓuy mono, ndi wiigi tenen ɓen doo ɓe. 6Je maga kaa cíi jobo we go no jobo kaa ge cíi ɓe go lay.

7Werga Baa joŋ je táabay de maŋge ɓe. Day nday, tes we, dus we ti yoo ɓay, lag we go ti tamsiri, dus we wo go ti ɓe ɓuy.

8Baa fer wii Nowe wo de weere ɓen tigriŋ ɓuy pa gano : 9Ma ɓin ndi joŋ ge tayge jag yaŋ de ɓay, de wer mani bay wo no. 10Fẽẽre ma tenen maga nday de kããra mono, weere dweere wo de horog wo ɓuy, de nàyre ma gesiŋ la wo ɓuy, maga laa wo le go ɓi daagen mo ɓuy no, de nàyre ma gesiŋ la wo ɓuy. 11Ndi joŋ ge tayge jag ɓin yaŋ de ɓay. Mopo joŋ ge de maŋ sen nen maga fẽẽre ma de hõõgese wo ɓuy mo taw wo go de bii maŋge gà so. Bii maŋge joŋ ge ma ɓlag tamsir go gà so. 12Baa day ga : Mokay diŋ fen kaŋ nen maga ndi kaŋn ti holaŋ ɓay de ɓi, de fẽẽre ma tenen maga wo de ɓay ti tĩĩgi were, day hãã wo pel mono. 13Ndi naa ge manyaabaa ɓin yaŋ nen swaare, day á joŋ ge yaŋ diŋ fen kaŋ nen ti holaŋ ɓi de tamsiri. 14De maga ndi ndar ge swaare wo we le ciŋ ti tamsir no, manyaabaa naage ge yaŋ le yoo swaare no. 15Day ni ndi ɗig gi ti yaŋ ti tayge jag ɓi maga ti holaŋ ɓay de ɓi no, de fẽẽre ma tenen ma gesiŋ wo lam ɓuy no, day ni biin kol ge diŋ bii maŋge ma taw hõõgese wo go ɓuy gà so. 16Manyaabaa naa ge yaŋ yoo swaare no, ndi kon ge yaŋ, day ndi fer yaŋ ɗiggi ti tayge jag ma tum ma ti holaŋ Baa wo de fẽẽre ma tenen maga wo gesiŋ lam ɓuy no. 17Baa wii Nowe ga : Mokay diŋ fen kaŋ nen maga ndi kaŋn ti holaŋ ɓi de fẽẽre ma de hõõgese maga wo gesiŋ lam ɓuy no.

Nowe wo de jar ni ɓe

18Jar ni Nowe maga laa wo le go ɓi daagen hay wo diŋ Sem, Kam wo de Jafede. Kam joŋge diŋ pan Kanaan. 19Jar ni ɓe ma swaʼ fer wo joŋ ngaɓa jar ti tamsiri.

20Nowe kal yaʼge jee siri, kal kaŋ pay tlalum. 21Á kal jo yii taa go, kal gwaʼge go glog koɗ tiʼ ɓi mburyug ɓe no. 22Kam pan Kanaan ko pan ɓe go glog koɗe, kal rawge wããge ɓe wo go siigi ne hẽẽre ɓe ma ɓog wo no. 23Doo kay nono Sem wo de Jafed raw wo hoo õõbe ma kluu, laan wo soole ɓaara ɓog ɓuy, see wo wo de faale, kal wo yoŋ glog pan ɓaara. Doo ga nen ɓaara hay wo go de ngiɗgi so mono, saara kãã ma ko glog pan ɓaara gà. 24De maga yiin naa ge le go ne Nowe ti so mono, à kal bir wããre maga je ni ɓe ma kluun joŋ ne de ɓe mono. 25Á kal wããge so ga :

Kanaan mo hay go de faɗge!

Daga á mo hay diŋ gebee gebeeren wo

Gebee ma hẽẽre ɓen wo!

26Á day pa ga :

Bosaʼn mo hay diŋ ma Manwuri, Baa mani Sem no.

Daga Kanaan mo hay diŋ gebee ɓaara!

27Daga Baa mo kaŋ Jafed ti diy!

Daga á mo hay ɓil mburyug mani Sem wo no,

Ni Kanaan mo hay diŋ gebee ɓaara!

28Nowe fer kiŋgi ni kiskis swaʼ ti ɓe doo dwee blam maŋge biin ɗa pa. 29Kiŋgi maga Nowe joŋ ne caw baa jag go ɓuy kiskis kaawaʼ ti ɓe doo dwee, blam ɓe á kal huugi go.

Currently Selected:

TĨĨGI WERE 9: TUP

Highlight

Copy