JAŊ 12

Mari kag trusa ne Yeso ɓaale

(Mat 26.6-13; Mark 14.3-9)

1Naw hiiraʼ taŋgu Pag, Yeso kal rawge Betani ɓi leege maga Lasar de hayle ni mono, bloo maga á hay birn go mono. 2Á raw joŋ rege ne hẽn ni, Marta de joŋ peele ne hara lay, Lasar de hayle yoo jar maga wo de rege ɓiŋ Yeso ni mo lay. 3Mari raw maŋ nus lidir trusa maga yee solay pur debaŋ, de joŋge de nar sagsage, á raw kaa ge ɓe go ne Yeso ɓaale, raw saɗ ge ɓe go de riŋ ti ɓe. Ɓil tiŋ kol fõõ ge go diŋ fõõre no trusan sagsage. 4Jobo yoo jar ma wer ɓen wo, diŋ Judas Iskariyod, je maga wo ge go kaŋ taw ɓe mono, kal wãã ge ga : 5yee trusa ma kay go solay boo kis kis swaʼ ma hãge go ne jar coo wo gà nà gahãyla? 6À wãã sen mokay bay ga á de ɗig ti ti jar coo wo wa, werga á diŋ je freŋ, á diŋ je ɗaw ndar solay no, á horge go see solay maga á lagn ni mo lay. 7Yeso raw ga : Men we wãyn go eŋ. Men ne ɗaw trusan kay ma woge ɓoʼ mege ɓi tuu de ɓe. 8Nday joŋ ge mbay yaŋ de jar coo wo see ɓay la tum tum, ama ma ɓi nday daʼ ge ndi see ɓay la tum tum gà.

Jar Jwif wo ga saara mo ʼwar Lasar go

9Jar Jwif wo ngaɓa debaŋ raw wo laage ga Yeso yaŋ Betani, á kal wo rawge wo ni, bay wer Yeso tawa wa, ama maga saara mo wo ko Lasar je maga Yeso fer birgi ɓe go mono. 10Waŋre jar siɗ jag raw wo wããge ga saara mo ʼwar Lasar go lay, 11werga jar Jwif wo debaŋ raw wo men wããre waŋren wo go, raw wo yããge diŋ wããre Yeso wer maga á bir Lasar go mono.

Yeso kal ɓi leege Jerusalem

(Mat 21.1-11; Mark 11.1-11; Lug 19.28-40)

12Toŋ ɓe ngaɓa jar Jwif maga hay nduu wo ti few Pag mono, raw wo laage ga Yeso a we Jerusalem, 13Á raw wo car jag doo palme, laa wo go caa pel ɓe, raw wo togoɗ Baa ga : Daga Baa mo woo je maga day le age ti jag Waŋkluu mo caw no. Daga Baa mo woo Waŋ jar Israyeln wo. 14Yeso raw daʼ gerhẽẽ, raw hayge ne hẽn ti doo ga à de yerge ɓe go ga :

15Joŋ hẽẽne wa so may ma Siyoŋ no,

Koɗa waŋ ɓon yaŋ le age

De hayle ti wel mangerhẽẽ

16Jar ma wer ɓen hay bay wo de laa wer wããre sen mokay wa, ama Baa wo grag Yeso go de woore so mokay, á raw wo ɗig ti ga wããre sen hay wo go de yerge mono diŋ ti ɓe, day à raw ɓod jag wããre sen go doo maga se hay go de wããge ɓe nono.

17Jar maga hay wo ɓiŋ Yeso ti wur maga á ɗe Lasar le go ɓi tuu húulín, kaln le go ciŋ tenen mo ɓuy, raw wo sii wããre maga saara kon le wur sen go. 18Diŋ wersen á raw wo age caa pel ɓe mono, werga á hay laa wo ga Yeso joŋ fen mbuɗgi se no. 19Farisiyẽẽ raw wo wããge ti yoo ɓaara ga : Nday ko we ga nday kãã ma joŋ mopo gà so hase. Jar go de maŋ blam ɓe ɓuy.

Jar Greg po kiɗ wo Yeso

20Jar Greg po wo yoo jar maga hay a wo Jerusalem goŋ Baa wur few Pag, 21raw wo yaʼge see Filip (maga tiŋ ɓe Betsayda ɓi sir Galile) raw wo wiigi ɓe ga : A bloo no, wùr da ga wùr ko Yeso. 22Filip kal rawge riŋ Aŋdre, saara raw wo rawge ɓog ɓuy siigi ɓe ne Yeso.

23Yeso raw riŋ rage ga : Wur maga Wel je táabay grag go de woore a we go patala. 24Kidolgi ndi riŋ nday, à kap coore we nen sir, day á huu we go gà no, á joŋ mbe wo ni diŋ se boŋ tiʼ i, ama hayga á huu we go no, á raw rug mbèere nen puri. 25Wosela maga da ga se mo ʼwar se se go ti re ɓi wa, bas ge see ɓe go so yaw. Ama wosela maga tob see ɓe mbe go wer ɓi ti tamsir la, je ma sen kol ge tenen caw tum so yaw. 26Hayga wosela da we gà se joŋ wejõõ ɓi no, á mo maŋ blam ɓi, wersen wejõõ ɓin joŋ ge ti ngel maga ndi ni mo lay. Pan ɓi togoɗ wosela maga yaŋ diŋ wejõõ ɓi no.

Yeso de wããge ga se wo ge go huugi

27Patala jiili ɓi go de caage. Ndi mo wãã ɓa nà gahãy? Ndi mo wãã ga Pan ɓi mo yãã me go doo re maga day le a ge ti ɓi wara mo kaʼ la go yawla? Day ndi de age nà diŋ wersen, maga ndi mo hee nen joŋ ge coo sen pa so lay no. 28Á raw ɗe Baa ga : Baba, joŋ ren ɓuy ma ra ɗúu ɓo go. Gẽẽge po raw wããge le ciŋ ga : Ndi go de ra ɗúu yaw, day ndi fer yaŋ rage ɓe go tigriŋ pa.

29Jar ngaɓa maga hay wo ɓiŋ ɓe ni, laa wo gẽẽge no, raw wo riŋ gi ga : Á diŋ carge põõ Baa. Jar ma la wo ga : Je peele Baa wãã re ne hẽne. 30Yeso raw riŋ rage ga : Re sen wãã le mokay bay diŋ ne ndi wa, ama á wãã le diŋ ne nday. 31Patala diŋ wur maga à cag re jar ma ti tamsir wo mo so no, á wo yaŋ go nii waŋ jar ma ti tamsir lan gusi. 32Day ma ɓi, à wo we go maŋ mege ciŋ no, ndi tay ge jar téebeere wo le go see ɓi ɓuy. 33(Yeso wãã wããre ma kay, ma kaŋ nen jar ti húulí ɓe maga se wo ge huu gi doosen no mono.) 34Jar ngaɓa raw wo fer wããre ne hẽn ga : Wùr laa ɓil jag liŋgi ga : Mesi joŋ ge tenen caw hãã tum, day wer may ga ndo fer wãã ge ga a maŋ ge Wel je táabayn yaŋ go maŋ ge pa? Wel je táabay sen diŋ wose pa? 35Yeso raw riŋ rage ga : Ngel yaŋ go ler ge ne nday ti patala ɗa, ama á ig gi de lerge naw rab koɗe. Seɗ we nen ngel maga yaŋ go de lerge mono, nen maga nday mo fer seege nen suŋgu wa so, werga je maga see nen suŋgu, ko ngel maga á de seege wo ni mo gà. 36Kaŋ we ɗiggi ɓay ti je ma ler ngel gon de maga á yaŋ yoo ɓay la ɗa mono, maga á mo kol we go diŋ jar ma nen ngel maga go de lerge.

Jar Jwif laa wo yãã wããre Yeso gà

Blam maga á wãã wããre sen go mokay, á kal rawge, yoŋ wo go see ɓaara hãã. 37Yeso joŋ mbe fẽẽre mbuɗgi yoo ɓaara debaŋ, de sen ɓuy á laa wo yãã wããre ɓen gà. 38Wããre roo maga Esay je ndar nen wããre Baa go raan ga :

Waŋkluu, wose de yãã wããre wùr la?

Waŋkluu hay naa nen egre ɓen go ne wose ti boŋ la mono?

Wããre sen raw leʼ ge go ti jag ɓe so. 39Á kãã wo ma yãã wããre ɓen gà werga Esay wãã pa ga :

40Baa ga se rãɗ nen ɓaara go,

Tẽg ɗeŋ ɓaara go,

maga nen ɓaara mo ko wa,

Ɗeŋ ɓaara mo laa wer mopo wa,

A mo fer coo ɗiggi ɓaara ma de ɓlagge de deele tigriŋ wa,

Se mo pẽẽ saara go wa lay.

41Esay wãã doosen, diŋ ga á hay ko woore Yeso, day á raw wãã ge ti ɓe.

42De sen ni, yoo waŋre jar Jwif wo de see ɓaara, jar po wo debaŋ raw wo yãã wããre Yeso, ama de sen ɓuy, á laa wo ge go tinoo poɗag gà doo hẽẽne Farisiyẽẽ wo, maga á mo niɗ wo saara go ɓi tiŋ tosgen wa. 43Werga á da wo ga jar téebeere mo togoɗ wo saara daŋ maga Baa togoɗ ra mono.

Wããre maga Yeso wãɗn go baw ge jar yaŋ

44Yeso raw ngar jag ga : Wosela maga yãã wããre ɓi we, á yãã bay diŋ wããre ɓi tawa wa, ama á yãã diŋ wããre je maga ɓoʼ me le mo lay. 45Wosela maga ko me we no, ni á ko diŋ je maga ɓoʼ me le mono. 46Ma ɓi, ndi a ti tamsir la ler ngel go, maga wosela ɓuy yãã wããre ɓi we, mo hay nen suŋgu wa so. 47Hayga wosela coʼ sug wããre ɓin we, day day we yãã wããre ɓin gà no, je baw ge ɓe de wããre bay diŋ ndi wa, werga ndi a ti tamsir la bay ma baw jar de wããre wa, ama ma yãã rage go. 48Wosela maga tob me we go, day we yãã wããre ɓi gà sen diŋ fen baw ge ɓe de wããren tuu, diŋ wããre ɓi maga ndi had ne go mokay ɓoʼ ge re ne hẽn ti wurpo ti wur naw ma blam taw no. 49Werga ndi bay de wãã re po de ti ngel see ɓi boŋ wa, ama Pan ɓi maga ɓoʼ me le, wããre maga ndi mo wãɗ ne go wo de maga ndi mo had jar de ɓe ɓuy, hã ra me diŋ se de see ɓe. 50Day se de koge ga wããre ɓin kol jar tenen tum tiʼ i, mopo maga ndi wããn go, ndi wããn go diŋ doo ga Pan ɓi riŋ me de ɓe nono.

Currently Selected:

JAŊ 12: TUP

Highlight

Copy