JAŊ 14

Yeso diŋ faage ma woge de jar se Baa Pããbe no

1Yeso raw riŋ rage ga : Car we jiili go wa, hã we ɓil ne Baa, hã we ɓil me lay. 2Ngel lagge yaŋ le liŋ ni Pan ɓi debaŋ, ngel mo hay we le ni gà no, ndi de hay riŋ nday yaŋ de ɓe. Patala ndi raw kneʼ ngel ne nday. 3Blam maga ndi kneʼ ngeln we le go ne nday no, ndi fer ge yaŋ le ma hoo we ge, nen maga nday mo wo lagge ti ngel maga ndi de hayle ni mo lay. 4Nday yaŋ de ko faage ma woge ti ngel maga ndi de woge ni mono. 5Toma raw ɗege ɓe ga : Waŋkluu, wùr bay de ko ngel maga ndo de woge ni mo wa, day wùr kãã ma ko faagen koge la? 6Yeso raw fer wããre ne hẽn ga : Ndi diŋ faage, ndi diŋ cwãy, ndi diŋ tenen no. Jobo kãã ma woge see Pan ɓi bay heege ti ɓi gà. 7Hayga nday yaŋ de ko mege no, ni nday ko ge Pan ɓi yaŋ lay. Hay bo patala nday go de koge ɓe, nday kon we de nen ɓay.

8Filip raw ɗege ɓe ga : Waŋkluu, kaŋ nen wùr ti Pan ɓo seno, ni sen kãã wùr we. 9Yeso raw ɗege ɓe, Filip, ndi ig ɓiŋ ɓay debaŋ mo deŋ, nday bay de ko mege wa ɗa pa? Wosela maga ko me we, de ko Pan ɓi, day wer may ga ndo wãã ga : Ndi mo kaŋ nen ɓay ti Pããben pa? 10Ndo bay de koge ga ndi diŋ Pããbe no, Pããben diŋ ndi lay wa yawla? Wããre maga ndi wãɗ ne nday mo ɓuy, bay le de age diŋ ɓil ɓi wa. Pããbe maga wùr diŋ sen boŋ, de joŋ joŋre ɓen diŋ se de see ɓe. 11Yãã we wããre ɓi maga ndi wããn ga ndi diŋ Pããbe no, Pããben diŋ ndi lay mono. Haybà sen gà yãã we wããre ɓin wer joŋre ɓin wo. 12Kidolgi ndi riŋ we, wosela maga yãã wããre ɓin we no, joŋ joŋre maga ndi de joŋge ɓe yaŋ lay. Á joŋ ge yaŋ debaŋ de daŋ sen pa yaw, werga ndi de ferge see Pan ɓi. 13Day ndi joŋ ge fẽẽre maga nday wiɗn ge de ɗúu ɓi mo ɓuy yaŋ ne nday nen maga Weln mo naa nen woore Pan ɓen go. 14Hayga nday wii mopo we de ɗúu ɓi no, ndi joŋ fen sen yaŋ ne nday.

Yeso ga se ɓoʼ Nenterse yaŋ le

15Hayga nday yaŋ da mege no, ni nday ɗaw we wããre ɓi no. 16Ndi wii Pããben yaŋ ga á mo hã je kayge ma tigriŋ le we ma kay we ge, maga á mo hay see ɓay ma tum. 17Á diŋ Nenterse ma wãã cwãy maga jar ma ti tamsir la kãã wo ma daʼge ɓe gà werga á kon wo de nen ɓaara gà day daʼge wo wer ne hẽn gà has lay. Ma ɓay, nday kon we, werga á de hayle ɓiŋ ɓay, á ɓil ɓay lay.

18Ndi men ge nday go holge gà ndi fer yaŋ le see ɓay. 19Naw gwaʼ meʼ koɗe jar ma ti tamsir la ko ge wo nen ɓi gà so hase, ama ma ɓay, nday ko ge ndi yaŋ mbay, werga ndi tenene, day nday lag ge yaŋ tenen lay. 20Wur sen a ge we no, ni nday ko yaŋ ga ndi diŋ Pããbe no, nday ko yaŋ ga wùr de kããra boŋ lay.

21Wosela maga yaŋ ɗaw wããre ɓin wo, yaŋ yãã jag ɓi lay no, diŋ je da mege no. Pããben da ge wosela maga yaŋ da mege no, ndi da ge je sen lay, day ndi naa ge nen see ɓi ne hẽn lay. 22Judas (bay diŋ Judas Iskariyod wa) raw ga : Waŋkluu, sen joŋ ge mokay joŋ ge ga ndo naa nen see ɓo ne wùr tawa, bay ne jar ma ti tamsir la wo wa an la? 23Yeso raw fer wããre ne hẽn ga : Wosela maga yaŋ da mege no, yãã ge jag wããre ɓi maga ndi wãɗ ne yaŋ. Pããben da ge je se no, day wùr de Pããben, wur a ge ni je se no, day wùr lag ge ni ɓe ni. 24Wosela maga day we da mege gà day we yãã wããre ɓin wo gà lay. Wããre maga nday de laa ge ɓe jag ɓi, bay diŋ wããre ma ɓi wa, ama diŋ ma Pããbe maga ɓoʼ me le mono.

25Ndi wãã sen we go ne nday de maga ndi yaŋ see ɓay la ɗa mono. 26Ama je kay weege no, Nenterse ma bay ɗag maga Pããben ɓoʼ ne ge le ti ɗúu ɓi, had we ge yaŋ de fẽẽren wo ɓuy, fer yaŋ ɗig ti ɓay ti wããre maga ndi hay wãɗ ne go ne nday mo ɓuy no.

27Ndi de men we ge jam, ndi hã jam ɓin we ne nday, ndi hãn we doo ga jar ma ti tamsir hãn wo no gà car we jiili go wa, joŋ we hẽẽne wa. 28Nday yaŋ de laa wããre maga ndi hay riŋ we ga : Ndi raw, ama ndi fer yaŋ le see ɓay mono. Hayga nday yaŋ da mege, ni ɓil ɓay joŋ yaŋ go feh ti maga ndi de woge ɓiŋ Pããben mono. Werga Pããben kluu de daŋ ndi. 29Ndi riŋ we go de ɓe patala taŋgu maga re sen wo ge wo joŋ ge, nen maga re sen wo ge wo we joŋ ge go no, ni nday mo yãã we wããre ɓi no. 30Ndi wãã ge wããre ne nday debaŋ gà so hase, gahãyla waŋ ma ti tamsir lan de age, day egre ɓe bay mbe de kããge see ɓi wa. 31Ama daga jar ma ti tamsir mo ko wo ga ndi de da Pããbe no, ndi joŋ diŋ doo ga Pããben wãã me nono. Hoo we go ciŋ naa see.

Currently Selected:

JAŊ 14: TUP

Highlight

Copy