LUG 8

Naare maŋ wo blam Yeso

1Blam sen Yeso kal rawge raŋ ɓi leege wo de progren wo ɓuy siɗ Wããre ma de Cõõre ma ti twaywaŋ mani Baan ne jare. Jar ma hwal ti ɓogn ma wer ɓen raw wo maŋ blam ɓe lay, 2naare maga á hay niɗ sõõre wo go ne hara ti, pẽɗ ra go jag cege ɓaaran wo, maŋ wo blam ɓe lay. Mari ma Magdala maga Yeso nii sõõre go ne hẽn ti renam wo 3de Jan wãy Kusa wejõõ Herod waŋ no, de Susan, de naare ma tigriŋ po wo ngaɓa, hay wo le kay Yeso de jar ma wer ɓen wo, de fẽẽre ma ɓaara wo de see ɓaara.

Jagjõõ ma de ngaɓ ge de je bug coore

(Mat 13.1-9; Mark 4.1-9)

4Jar raw wo tayge le see Yeso ngaɓa debaŋ, jar ma ɓi leege ma honla ɓuy á wo le see ɓe, á raw wãã jagjõõ ne hara so ga :

5Jobo kal go bug coore ɓe. Á de bug gi ɓe mo caw, maapo raw wo ray ge go ti faage, jar raw wo seege go ne hara ti, dweere raw wo sig rage go lay. 6Coore ma baapo raw wo ray ge go ti ngel ma de jeʼãy, á raw wo tĩĩ gi le go tuuseŋ, á raw wo hig gi go wer maga lom bay wer ɓaara wa. 7Coore ma lan raw wo ray ge ti ngel maga mbèere ɗewseŋ ni, á tĩĩ wo le go de cooren degaʼ ɓuy, raw wo gig gi go ne cooren wo ti. 8Coore ma lan raw wo ray ge ti ngel ma de sõʼ ge, cooren raw wo tĩĩ gi, raw wo rug mbèere lay, coore boŋ raw naa ti kluu riŋ. Blam sen Yeso raw riŋ rage ga : Wosela maga yaŋ de sug no, mo laa wer wããre se no.

Yeso wãɗ wããre diŋ de jagjõõ le la

(Mat 13.10-17; Mark 4.10-12)

9Jar ma wer Yeson raw wo wii gi ɓe ga wer jagjõõ sen ga hãy ɓa? 10Á raw riŋ rage ga : Ma ɓay à ɓoʼ wer fen ma de yoŋren we go we ti twaywaŋ mani Baa no, ama ma jar lan à ɓoʼ wer ɓe ne hara say diŋ de jagjõõ, maga

Á hõʼ wo mbaara nen ɓaara go ko ge ɓe ane, á mo ko wo wer ɓe go wa,

á coʼ wo mbaara sug ane, á mo laa wo wer ɓe go wa lay.

Yeso ɓoʼ wer jagjõõ sen go ne hara

(Mat 13.18-23; Mark 4.13-20)

11Yeso raw ga wer wããre jagjõõ sen mokay no, mbèeren diŋ wããre Baa. 12Jar po wo de maŋ jeŋ faage maga mbèeren ray go ni, á coʼ wo mbaara sugi, ama Manhúulí raw age ndar wããren go ne hara ɓili, maga á mo hã wo see ɓaara ne Baa wa, mo yãã ge wo go jag ɓlagge ɓaaran wa lay. 13Jar maga wo de maŋ ngel ma de jeʼãy, laa wo mbaara wããre no, yããn wo go ɓil fehe, ama á day wo men ge ɓe laa cẽw ɓil ɓaara ga, lag wo de hã ɓil ɓaara ne Baa meʼ koɗe, Manhúulí leʼ we jãɗ rage ga da ga á mo laa wo go joŋ re ma de ɓlagge, á raw wo mbuɗ faale ne wããren tuu. 14Mbèere maga ray wo ti ngel maga ɗewseŋ ni wo diŋ jar maga laa wo wããre no, ama ɗiggi fẽẽre ma gesiŋ la wo de koŋne horogren wo de fruygi maga riŋ ga saaran raw wo gig gi go ne hara ti ɓrid saara rug gà. 15Mbèere maga ray wo ti ngel ma de sõʼ gen wo diŋ jar maga laa wo wããre no, ɗawn wo ɓil ɓaara de el doo mo ɓaaran no, lag wo de el ngiŋ, hãã wo wo rug mbèere.

Jagjõõ ma de ngaɓ ge de gér ma de doʼ ge

(Mark 4.21-25)

16Jobo doʼ gér ɓe go kay fer kuɓ hãn go ne hẽn ti ga : noga kaŋn wer preŋ gà. Ama á kaŋn go diŋ ciŋ ti ngel kaŋ ge ɓe, maga jar laa wo we le tiŋma mo ko wo nen go poɗage. 17Fẽẽre maga jar bay wo ko ge ɓe wa ɗa mo ɓuy, à wo ge yaŋ ko ge ɓe go. Fẽẽre maga hay yaŋ de yoŋ ge ga jar ko sen ga ɗa, à wo ge go ko ge ɓe de naa nen go tinoo nen jar poɗage.

18Wersen joŋ we see ɓay de el ti wããre maga nday de laa ge ɓe mono. Werga je maga yaŋ de mopo doo, á hã hẽn ni pur pa, ama je maga ɓe bay wa has no, mo ma meʼ maga á hay ɗig ga sen diŋ ma se, á yãã sen go pa yaw.

Hẽẽre Yeso wo de man ɓe á wo see ɓe

(Mat 12.46-50; Mark 3.31-35)

19Hẽẽre Yeso wo de man ɓe raw wo ga saara wo see ɓe, ama á laa wo daʼ ngel ma a ge see ɓe ga doo ngaɓan wo. 20Á raw riŋ Yeso wo de wããre sen ga : Man ɓo wo de hẽẽre ɓon yaŋ wo le siigi mo lag no, á da wo ga saara á see ɓo.

21Yeso raw riŋ rage ɓuy ga : Man ɓi wo de hẽẽre ɓin wo diŋ jar maga coʼ wo sug wããre Baa, day see wo wer ɓe mono.

Yeso dig leege ga á mo fid wa

(Mat 8.23-27; Mark 4.35-41)

22Ti wurpo Yeso raw ɗii daage de jar ma wer ɓen wo, raw riŋ rage ga : Naa cegaɗ we go faale maarog ɓaŋla. Á raw wo raw ge. 23Á wo de tuŋ daagen mo sug, Yeso ɓen ti naa. Ko la, leege po raw urgi le fid gi ti maarogn de hãã debaŋ, daagen raw joŋge doo ga se baa go de biin no, á hay kos wo go mbaŋ ma bas ge. 24Jar ma wer ɓen raw wo yaʼge see ɓe pũy gi ɓe, raw wo ɗe ge ɓe ga : Waŋ, Waŋ, naa go de bas ge.

Yeso raw urgi ciŋ raw caa põõ ne leegen wo de maarog de egre. Á raw wo ham ge gesiŋ, raw wo lagge seɗem. 25Yeso raw riŋ jar ma wer ɓen wo ga : Ɓa hãge see ɓay ne Baan gen yaw ɓa?

Ama hẽẽne joŋ ra debaŋ, á ngris wo debaŋ lay, á raw wo riŋ kããra ga : Ɓa je sen mo deŋ diŋ wose ga car põõ ne leege wo de kaŋngaw bii, saara yãã jag ɓe lay ɓuy mo ɓa?

Yeso nii sõõre wo go ne jobo ti

(Mat 8.28-34; Mark 5.1-20)

26Á raw wo raw ge ɓi sir jar Jerjesen maga wo go faale maarog ɓaŋla no, ga wo ti Galile ɗeger mono. 27Yeso raw ɗii gi go gesiŋ, jobo ɓi leege ni raw caa pel Yeso le. Bloo sen de sõõre ti, sõõ ig joŋ bon ɓe debaŋ, bloo sen laa õõbe ti ɓe ga lay, day hay ge liŋ ga lay, hay diŋ yoo tipaale wo. 28Á wo ko Yeso mokay, á raw ngar jage, raw leʼ monɗra pel ɓe, raw ɗe ge ɓe kloŋ ga : Yeso wel Baa ma ciŋ no, ndo da ga ndo joŋ me joŋ ge la? Ndi kam ndo kam ge, joŋ bon ɓi wa ɗa la. 29Bloon wãã sen diŋ werga Yeso caa põõ ne sõõ ga sõõn mo kal go mono, werga sõõn hay joŋ ge ɓe tum tum debaŋ, à gorn gor ge de saɗ ge de receʼ wo, ɓoɗ gyam ne hẽne, de sen ɓuy se hrag gyam wo go, sõõn raw daŋ ge de ɓe ti puuli. 30Yeso raw wiigi ɓe ga : ɗúu ɓo gahãyne? Á raw ga : Ɗúu ɓi ga ngaɓa. Á wãã doo sen diŋ werga sõõren wo ti ɓe ngaɓa. 31Sõõren raw wo kam Yeso ga á mo laa saara wo ti ngel maga te saaran wo wo de joŋ bon ni mo wa.

32Gaduuru hay yaŋ wo ngaɓa kiɗ rege ti jeŋ húulì ni tiʼ i. Sõõren raw wo kam Yeso ga á mo men saara woge laage ɓil gaduurun wo, á raw men faage ne hara lay. 33Wersen sõõren raw wo laa ge le go, raw wo laa ge ɓil gaduurun wo. Gaduurun raw wo hoo ɗeere le ciŋ ti húulìn gesiŋ raw wo laa ge nen maarog no, jo wo bii go.

34Jar koɗ gaduurun wo wo ko re maga joŋ mo deŋ, á raw wo hoo ɗeere wo liŋ sii wããre sen go ɓi leegen wo jag kaw wo ɓuy. 35Jarn raw wo laa ge go ko re se no, á raw wo wo ge see Yeso, daʼ wo bloo maga sõõren hay wo ti ɓe, de hayle ɓiŋ Yeso de õõbe ti de daʼ see ɓe de el yeʼe. Hẽẽne raw joŋ rage debaŋ. 36Jar maga ko wo re sen de nen ɓaara mo ɓuy raw wo fer wããre sen ne hara ga bloo maga sõõre hay ti ɓe daʼ see ɓe we no kay no. 37Wersen jar ma ɓi sir Jerjesen raw wo kam Yeso ga á mo see go, mo men saara go, werga hẽẽne joŋ ra debaŋ. Yeso raw ɗii gi ɓi daage raw ferge le go. 38Bloo maga sõõren hay wo ti ɓe la, raw joŋ kam kam ne Yeso ga á mo men se wo ge wer ɓe lay. Ama Yeso laa day ge ga, raw riŋgi ɓe ga : 39See liŋ ni ɓo sii wããre maga Baa joŋ mo de ɓe mo ɓuy go. Á kal raw ge sii wããre maga Yeso joŋ ne de ɓe go ɓi leegen ɓuy.

Wããre may mani Jayrus wo de wãy maga duʼ õõbe Yeso mono

(Mat 9.18-26; Mark 5.21-43)

40Yeso wo le ferge de maga á hay hay le go faale maarog ɓaŋla mokay, jarn raw wo yãã ge ɓe go ɓil feh debaŋ, werga jar hay wo gor ge ɓe ɓuy. 41Jobo, à ɗen ga Jayrus, á diŋ je kluu ma wãã re tiŋ tosgen lay, raw age, leʼ monɗra pel Yeso kam ge ɓe ga á mo wo liŋ ni se, 42werga may ɓe yaŋ go doo ɓe ni no boŋ, kiŋgi hwal ti ɓoge, go de huu gi.

Yeso kal rawge wo ni, ngaɓan raw wo gig gi ne hẽn ti ɓridi. 43Wãy po hay yaŋ de gay ge go doo yuu way wer kiŋgi hwal ti ɓoge. Á taw fẽẽre ma doo ɓen wo go ɓuy ne dogtor wo, ama jobo laa kãã ge ma pẽẽ ge ɓe go yoo ɓaara boŋ ga hase. 44Á raw age le nen faale Yeso, raw duʼ jag õõbe ɓe no, way ɓen raw hoo ge tuuseŋ. 45Yeso raw wiigi ga : Wo se duʼ me lam ɓa? Ngaɓan ɓuy raw wo kaŋ kiŋ go ti re se no. Piyer raw ga : Waŋ, jar de gig gi mo ti mo ɓrid deŋ grid moge, ndo ko ga? 46Yeso kal ga : Jobo duʼ me mbe we, werga ndi ko egre ɓi kal go. 47Wãy wo koge ga re sen naa nen we gom kay, á raw age le daɗ ge caw, raw leʼ monɗra pel Yeso, raw wããge go ti re maga se duʼn ti ɓe, day se pẽẽ go lay ne hẽn pel ngaɓan kaʼ ɓuy. 48Yeso raw ɗe ge ɓe ga : May ɓi no, hãge see ɓo ne Baan pẽẽ ndo we go, see mbo jam so.

49Yeso de wãã ge doo sen deŋ ɗa, ko la soole raw age le liŋ ni Jayrus ga : May ɓon go de húulí, gay Waŋ wa so. 50Yeso wo laa sen mokay, kal riŋ Jayrus ga : Joŋ hẽẽne wa hase, hã mbo see ɓo ne Baa tawa, ni may ɓon pẽẽ yaŋ mbe go. 51Á wo nduu gi liŋ ni Jayrus mokay, laa men jobo kal ge wo wer ɓe ga hase, say diŋ Piyer, Jaŋ, Jag, pan mayn wo de man mayn tawa. 52Jar lan wo ɓuy de lagge le go sii gi rag ge law ge ɓe lagge. Yeso raw riŋgi ga : ra we wa, á bay de húulí wa, ama á leʼ diŋ naa. 53Á raw wo feg ge ti ɓe debaŋ, werga á wo go de ko ge ɓe ga á go de húulí. 54Yeso raw ɗaw doo ɓe, raw ɗe ge ɓe kloŋ ga : May no, ur go ciŋ. 55Nenterse ɓe raw hom ge le, á raw urgi go ciŋ tuuseŋ. Yeso raw riŋ rage ga á mo hã wo rege ne hẽne. 56Pan ɓe wo de man ɓe raw wo ngrisgi, ama Yeso raw ruu rage ga á mo riŋ wo jobo go de fen maga se joŋ ne mokay wa has ane.

Currently Selected:

LUG 8: TUP

Highlight

Copy