Zãn 1

Yiezu Kirisa iè ńpiemu bienù lɛ wóò lɛ́ lé mɛkɛ̃nì ɓɛ̀ nìnbirìe ǹ

1Bòo míkùi fìi ɓánlén, Àpe lɛ iè lè bienù ɛ́ hṹn wi yán. Ápe lɛ iè lè Bienù hàarí wi àá Dɔfĩn, À lò hàarí iè Dɔfĩn. 2Ápe lɛ iè lè Bienù ɛ́ wo hàarí wi àá Dɔfĩn hɔ̀ bòo míkùi fìi ɓánlén. 3Àpe ɛ́ te bòo míkùi ɛ́ wɔ́, ɛ̀ bòo dɔ̀ lɛ wi lɛ Ápe ɛ́ yí teń yí wé ɛ́ mí wɛ̀. 4Àpe iè pe ɛ́ lé mɛkɛ̃nì ɛ́ wi nin, ɛ̀ lè mɛkɛ̃nì ɛ́ iè ɓɛ̀ nìnbirìe ńpiemu. 5Ɛ́ hɔ́ ńpiemu ɛ́ cĩ̀ hɔ̀ síbínú hũn, kɛ́ hɔ́ síbínú ɛ́ yí tɛ̀ hɔ̀ bòo wɛ̀. 6Ɛ́ nìnbírɔ dɔ̀ lɛ yèrè ɓɛ́ nɛ Zãn#1.6 À iè Zãn Batiisi ɛ́ ɓɛ́ nɛ̀, ɓɛ̀ ɓen nɛ Zãn Batiisi iè bòo ɛ́ nɛ a Zãn lɛ wóò líikɛ ɓɛ nìnbirìe hɔ̀ ɲumu hũn. ɛ́ Dɔfĩn hàarí tɔrɛ á ɓɛrɛ. 7À hàarí ɓɛrɛ ɛ́ mii ɓen khɛ́ Ápe lɛ iè hɔ ńpiemu bòo, bòo lɛ ɛ́ wé ɛ̀ hɔ̀ bòo lɛ á khɛ́ ɛ̀ lɛ́ ɛ̀ ɓɛ̀ nìnbirìe ɓɛ́kùi ɛ̀ dɛsĩ̀-ɛ pe lɛ iè hɔ̀ ńpiemu ǹ. 8Àpe Zãn kùusɔ temu hàarí yí hɔ́pe ńpiemu, kɛ́ á ɓɛrɛ ɛ́ mii bie hɔ ńpiemu bòo ɛ̀ lɛ́ ɓɛ́ nìnbirìe ǹ. 9Ápe lɛ iè hɔ̀ ńpiemu mí dòonún ɛ́ temu iè ńpiemu àá bɔ̀bín lɛ ɓɛrɛ lè dímíɲɛ́ hũn, ɛ́ ɓɛ̀ nìnbirìe ɓɛ́kùi ɛ̀ cienínin. 10À hàarí wi lè dímíɲɛ́ hũn, ɛ̀ lè dímíɲɛ́ á te ɛ́ mɛ́, kɛ́ ɓɛ́ dímíɲɛ́ nìɛ ɛ́ yí tɛ̀ dũń ɔ́ wɛ̀. 11Á van ɓá lóo hũn, kɛ́ ɓà lóo nìɛ ɛ́ van pɛ̃́ piè bòo. 12Kɛ́ ɓɛ́ nìnbirìe dɔ̀ ɛ́ pe tɛ̀ piè bòo, ɛ̀ ɓɛ̀ dũmuasɛ̃̀ à ǹ; ɛ́ ɓàasiè sɔ ɓɛ́kùi á lɛ́ ɛ́ ɓɛ́ dɛ̀rɛ wɔ́ Dɔfĩn nìɛ. 13Ɓàasiè sɔ ɛ́ yí wé Dɔfĩn nìɛ kɛ̀a bòo lɛ ɛ́ nìnbirìe dàa wóò te, tàá ɓɛ̀ yí wé Dɔfĩn nìɛ àá nìnbirìe tĩɛ̀ bòo, kɛ́ Dɔfĩn ɛ́ te ɓɛ wɔ́ àá mí nìɛ. 14Ápe lɛ iè lè Bienù ɛ́ wɔ́ nìnbírɔ, ɛ́ kɛrɛ kè tĩ́ihṹ kɛ́ Dɔfĩn hiì àá pehɔ̀ bɔ̀berà ɛ́ wi àá ɔ́. Ɛ́ ké húie piè ɓàarɔ́, hɔ̀ ɓàarɔ́ lɛ á Zú-cóoní ɛ́ yú ó Yàá viì. 15Àpe Zãn ɛ́ hàarí bie piè bòo àá tɛn-bɛhɔ́ ɛ́ nɛ làa: «À iè ɔ̀pe lɛ ɛ́ ń bie bòo nɛ ɓàasɔ lɛ mii khíi ɓen niǹ máahṹ ɛ́ ɓàań pɔ mi, iè hɔ̀ lɛ á hṹn sɛ̃̀nɛ́hã̀ wi yán kɛ́ ńpe ɛ́ ɲɛùn mí wɛ̀.» 16Ɛ́ képe kè kùi á wɔ́ àá hiì mí yírɛ́ bɔ̀bɛhɔ́ hũn, ɛ̀ hɔ̀ dúɓìɛ àá mí ɲúuhɛ̃ ɲúuhɛ̃ ɛ́ ké yú sɛ̃̀mɛ́kɛa ɓán. 17Hɔ̀ làndɛ́ ɛ́ Dɔfĩn te lɛ́ á Moyiize á lɛ́ kiè ǹ, ɛ̀ lè hiì àá hɔ́ bɔ̀berà ɛ́ Yiezu Kirisa ɛ́ te dàa ɓɛrɛ. 18Nìnbírɔ lɛ ɲɛùn mɔn Dɔfĩn ɛ́ mí wɛ̀. Kɛ́ á Zu-cóoní lɛ iè Dɔfĩn, lɛ wi-e pe Yàá Dɔfĩn viì ɛ́ temu lɛ́ ɛ́ ɓɛ́ nìnbirìe dàa dũnɛ à.

Zãn Batiisi bòo lɛ á bie Yiezu bòo hũn

Mat 3.1-12; Mar 1.1-8; Lik 3.1-18

19Lɛ iè hɔ̀ bòo lɛ á Zãn ɛ́ bie Yiezu bòo hũn. Hɔ̀ wɔ́ pɛ̃̀hṹ lɛ ɛ́ Zerizalɛɛmu Zuifuɓɛ hándíe ɛ́ dàa tɔrɛ Dɔfĩn khɛ̃́ndàariè àá ɓɛ́ Leviiteɓɛ dɔ̀ nɛ ɓɛ vɛ dìe ɔ̀pe Zãn nɛ ape ɛ́ iè wieni? 20Ɛ́ Zãn ɛ́ yí pĩ́ ɛ́ yí bie nɛ mí yá kɔ̃́ní ɓɛ́ wɛ̀. Kɛ́ á den zɔn bie lɛ́ ɓà ǹ wìée nɛ mípe yí-e pe Kirisa wɛ̀. 21Ɛ́ ɓɛ́ zɔn ɔ̀ diènin nɛ làa: «Ɛ́ kɔ́ wo iè wieni? Kɔ́ iè Elii yée?» Á nɛ mí yí-e pe wɛ̀. Ɛ́ ɓɛ́ nɛ a iè pe Dɔfĩn bɔ̀háanírɔ yée? Á nɛ ńɓùé. 22Ɛ́ ɓɛ́ zɔn nɛ ape ɛ́ den wo iè wie, ie ɓɛ́ fɔ́ɓán ɛ̀ ɓɛ́ khũ̀á vɛ bie bòo dɔ̀ ɛ̀ lɛ́ ɓɛ́lɛ te ɓɛ́ tɔrɛ ǹ. Ie pe míten ɛ́ den nɛ mí iè wieni? 23Ɛ́ Zãn zɔn kɔ̃́niɛ ɓɛ̀ ɛ́ nɛ làa:

«Ǹpe iè ɔ̀pe lɛ tɛmu ɛ́ tɛ̀ lè ńɲiherà hũn ɛ́ nɛ:

“Mì wóokɛ a Ɲunsɔ wṹn nɛ le cã̀aní sãàní!”»

Kɛ̀a bòo lɛ ɛ́ Dɔfĩn bɔ̀háanírɔ Ezayi ɛ́ dàa hàarí bie hɔ̀. 24Ɓɛ̀pe tɔnkɛriè lɛ ɛ́ ɓɛ́ hàarí tɔrɛ ɛ́ ɓɛ́ van ɔ̀ Zãn viì, ɛ́ ɓɛ́dɔ̀ hàarí iè Farizĩɛɓɛ. 25Ɛ́ ɓɛ́ bĩniɛ zɔn ɔ̀ dìenin nɛ làa: «Ɛ́ kɔ́ ɓen yí-e pe Kirisa, ɛ̀ kɔ̀ lò yí Elii, ɛ̀ kɔ̀ lò yí-e pe Dɔfĩn bɔ̀háanírɔ, ɛ́ kɔ́ wo wiɛ dàa ɛ́ ɓɛ̀ nìnbirìe ɛ̀ líiníkɛ hɔ ɲumu hũn?» 26Ɛ́ Zãn zɔn kɔ̃́niɛ ɓɛ̀ nɛ làa: «Ǹpe ɛ́ mì líinikɛ hɔ ɲumu hũn, kɛ́ á dɔ̀ ɛ́ vaá-ɓen nin máahṹ. Ɓàasɔ ɛ́ wi mi tĩ́ihṹ kɛ́ mí ɲɛùn yí dũ piè bòo wɛ̀. 27Ǹpe nin ɲún ɛ́ kɛ fĩi ɛ̀ ǹ síɛ lúnlúsí ɛ̀ fuen piè naahĩ́ huunìɛ.» 28Hɔ̀pe sí míkùi ɛ́ hṹn wé hɔ́ Betani#1.28 Hɔ̀ Betani lɛ ɛ́ ɓɛ́ bòo bie hũ̀nún ɛ́ kaǹlén yí dũ sãaniɛ wɛ̀. Kɛ́ hɔ́ wi mí dòonún àá hɔ́ Betani lóo lɛ lúwi hɔ̀ Zerizalɛɛmu ǹ. hũn, lɛ cánkɛa van lɔ́ wi le vṹn lɛ ɓɛ́ wóo nɛ Zurudɛ̃n máahṹ, lè viì lɛ á Zãn Batiisi ɛ́ hàarí ɛ́ ɓɛ̀ nìnbirìe ɛ̀ líinikɛ hũn.

Zãn ɛ́ zɛ̃́ní kɛ́ Yiezu ɛ́ iè Dɔfĩn Pi-zuú

29Ɛ́ pehɔ̀ sí ɛ́ van tɛ̃un, ɛ́ Zãn mii húi ɛ̀ Yiezu ɛ́ vɛ kãa ɔ̀. Á zɔn bie nɛ làa: «Lɛ iè ɔ̀ Dɔfĩn Pi-zuú, lɛ mii leń ɓɛ́ dímíɲɛ́ nìɛ bɔ̀koohɛ̃ ɛ̀ lé peɓɛ̀ lɔ̀n. 30“À iè ɔ̀pe lɛ ɛ́ ń bie bòo nɛ a nìnbírɔ lɛ ɛ́ mii khíi ɓen niǹ máahṹ ɛ́ ɓàń pɔ mi, iè hɔ̀ lɛ á hṹn sɛ̃̀nɛ́hã̀ wi yán kɛ́ ńpe ɲɛùn mí wɛ̀.” 31Ǹpe kùusɔ hṹn yí dũ a wɛ̀. Kɛ́ ń ɓɛrɛ ɛ́ ɓɛ̀ nìnbirìe ɛ̀ líiníkɛ hɔ ɲumu hũn bòo lɛ ɛ́ wé ɛ̀ ɓɛ̀ Yizarayɛɛle nìɛ dàá dũń ɔ́.» 32Ɛ́ Zãn bĩniɛ zɔn bie nɛ làa: «Ń mɔn lè Mɛkɛ̃n-Sãanu kɛ́ lé yòó lɔ́ hɔ́ hóohũn ɛ́ síɛ kɛsí piè lɔ̀n kɛ̀a ńmɛ̀nɓóohṹn bòo sí. 33Ǹpe hṹn ɲɛùn yí dũ a wɛ̀, kɛ́ hɔ́ Dɔfĩn lɛ tɔrɛ mi nɛ n ɓen líinikɛ ɓɛ nìnbirìe hɔ̀ ɲumu hũn ɛ́ bie lɛ́ mi ǹ nɛ làa: “À nìnbírɔ lɛ ɛ́ kɔ ɛ̀ mi kɛ́ lé Mɛkɛ̃n-Sãanu ɛ́ yòó lɔ́ hɔ́ hóohũn ɛ́ síɛ kɛsí lɔ̀n iè ɔ̀pe lɛ te ɓɛ nìnbirìe mii tíiní àá Mɛkɛ̃n-Sãanu.” 34Ɛ́ ńpe Zãn ɛ́ mɔn hɔ̀ míkùi ɛ́ ń dàa dũnɛ hɔ̀ ɛ́ bie nɛ ape nùún sɔ ɛ́ iè Dɔfĩn Zuú.»

Yiezu hán kɛ̀ránzɛ̀ɓɛ̀ bòo

35Ɛ́ pehɔ̀ sí van tɛ̃un, ɛ̀ Zãn sĩ̀n ɓɛrɛ wi le viì sɔ hũn àá mí kɛ̀ránzɛ̀ɓɛ̀ nìɛ ɓɛ̀ ɲu dɔ̀. 36Á mii húi ɛ̀ Yiezu ɛ́ khíi, á zɔn bie nɛ làa: «À Dɔfĩn pi-zuú sí#1.36 Vɛ húi 1.29.» 37Á Zãn kɛ̀ránzɛ̀ɓɛ̀ nìɛ ɓɛ̀ ɲu sɔ ɛ́ ɲɛ́ hɔ́ bòo lɛ á Zãn ɛ́ bie ɛ́ ɓɛ́ van bɔ̀ Yiezu máahṹ. 38Ɛ́ Yiezu khie mii húi ɛ̀ ɓɛ̀ bɔ̀ piè máahṹ, á zɔn ɛ́ ɓɛ̀ dìenin nɛ làa: «Hɔ ńɓùo ɛ́ mi ɛ́ cɛ̀?» Ɛ́ ɓɛ zɔn nɛ: «Rabbi kɔ́ ɛ́ zɔ àá yí?» Rabbi iè bòo ɛ́ ɓɛ́ nɛ Kɛ̀ránlɔ. 39Á zɔn kɔ̃́niɛ ɓɛ̀ nɛ làa: «Mì ɓen, ɛ́ mí ɓén mi yán.» Ɛ́ ɓɛ́ van mɔn lè viì lɛ á ɛ́ zɔ hũn, ɛ́ ɓɛ́ kɛsí àá ɔ́ pehɔ̀ zɔn. Hɔ̀pe sí ɛ́ wé ɛ̀ lè wurù ɛ́ wo pànkɛ́ ɛ́ vé. 40Ɓɛ̀pe nìɛ ɓɛ̀ ɲu lɛ hàarí ɲɛ́ á Zãn bienù ɛ́ ɓɛ́ van bɔ̀ Yiezu máahṹ, á nìcóoní ɛ́ hàarí iè ɔ̀ Simɔn Piɛre ɓà zuú Andere. 41Á hán nìnbírɔ lɛ á Andere ɛ́ van yú ɛ́ iè ɓà kúrú zuú Simɔn. Á bie lɛ́ à ǹ nɛ làa: «Ké mɔn ɔ̀ fuenírɔ, ɔ̀pe lɛ ɛ́ ɓɛ́ wóò vé nɛ “Masiya” ie bòo ɛ́ ɓɛ́ nɛ “Kirisa”». 42Á dàa ɔ̀ Simɔn ɛ́ dàa van Yiezu viì. Ɛ́ Yiezu huie ɔ̀ à zɔn bie ɛ́ nɛ làa: «Kɔ́ iè Simɔn lɛ iè Zãn yɛ̀nù. Ɓɛ̀ wóo ɓén ve kɔ nɛ “Sefaasi” iè bòo ɛ́ ɓɛ́ nɛ “Piɛre” (Piɛre iè bòo ɛ́ ɓɛ́ nɛ Lɛnù)».

43Ɛ́ pehɔ̀ sí lɛ ɛ́ tĩi, ɛ́ Yiezu hĩ́nà nɛ mí vaá-vɛ Kalile. Á lɔ́ mɔn Filiipu, á zɔn bie lɛ́ à ǹ nɛ a ɓen bè mí máahṹ. 44Àpe Filiipu ɛ́ lé Bɛtesayida lɛ lò ɓiɛ̀ iè Andere àá Piɛre ɓà lóo. 45Ɛ́ Filiipu ɛ́ van yú Natanayɛɛle, á bie lɛ́ à ǹ nɛ làa: «Ké mɔn ɔ̀pe lɛ á Moyiize bie bòo hɔ̀ landɛ́ vɛ̃hṹ hũn, lɛ iè ɔ̀pe lɛ ɛ́ ɓɛ́ Dɔfĩn bɔ̀háaníriè lò ɓiɛ̀ khɛ́ bòo ɓɛ́ vɛ̃hɛ̃ hũn, ɔ̀ Nazarɛɛte Yiezu, lɛ iè ɔ̀ Zozɛɛfu Zuú.» 46Ɛ́ Natanayɛɛle ɛ́ zɔn nɛ làa: «Bòo dɔ̀ lɛ sãa ɛ́ sũǹ dɛ̀ ɛ́ lé Nazarɛɛti?» Ɛ́ Filiipu ɛ́ zɔn bie lɛ́ à ǹ nɛ: «Ɓen, ɛ́ kɔ́ vɛ́ mi hɔ.» 47Ɛ́ Yiezu mii húi ɛ̀ Natanayɛɛle ɛ́ vɛ kãa ɔ̀, á zɔn bie pie bòo hũn ɛ́ nɛ làa: «Lɛ iè Yizarayɛɛle nùún àá bɔ̀bín, hɛ̀rí ɓúo dɔ̀ ɛ́ mí-ɛ̀ wɛ̀.» 48Ɛ́ Natanayɛɛle ɛ́ zɔn ɔ̀ dìenin nɛ làa: «Kɔ́ dũnɛ mi yí hũn?» Ɛ́ Yiezu zɔn bie lɛ́ à ǹ nɛ: «Ń sɛ̃̀nɛ́hã̀ mɔn kɔ lè ńluunù fìi hũn kɛ́ á Filiipu ɛ́ ɲɛùn yí ve kɔ wɛ̀.» 49Ɛ́ Natanayɛɛle ɛ́ den zɔn nɛ: «Kɛ̀ránlɔ́, kɔ́ iè Dɔfĩn Zuú, kɔ́ iè Yizarayɛɛle Bɛ́zuú.» 50Ɛ́ Yiezu zɔn khɛ́ lɛ́ à ǹ nɛ làa: «Hɔ̀ iè hɔ̀ lɛ ɛ́ ń khɛ́ lɛ́ kɔ̀ ǹ nɛ ń sɛ̃̀nɛ́hã̀ mɔn kɔ lè ńluunù fìi hũn ɛ́ kɔ́ dàa dũmuasɛ̃̀ mi ǹ. Kɔ́ ɓén bĩní mi bɔ̀bɛ̃hɛ̃ kɛ hɔ́ pɔ hɔpe lɛ.» 51Ɛ́ Yiezu bĩniɛ zɔn khɛ́ sĩiniɛ nɛ làa: «Nin bie lɛ́ miɛ ǹ àá bɔ̀bín nɛ mí ɓén mi hɔ hóohũn kɛ́ hɔ́ hɛ́rɛ, kɛ́ hɔ́ Dɔfĩn mɛlɛkɛɓɛ wóò yòó ɛ̀ ɓɛ̀ síɛ ɔ́ nìnbírɔ Zuú#1.51 Yiezu wóo ɓen nɛ nìnbírɔ Zuú, ɛ̀ hɔ̀ iè piè yɛ̀rɛ́ á ɛ́ nɛ̀. viì.»

Currently Selected:

Zãn 1: bwj

Highlight

Copy