Zãn 2

Hɔ̀ yaamu lɛ wɔ́ hɔ́ Kanan lóo hũn bòo

1Ɛ́ pehɔ̀ wihĩ́ bɔ̀nbɔ̀ tĩ máahṹ, ɛ̀ yaamu dɔ̀ ɛ́ cɛ hɔ Kanan lóo hũn, hɔ̀ Kalile pɛ̃̀hɛ̃ hũn. Ɛ́ Yiezu ɓà nín ɛ́ hàarí wi yán. 2Ɛ́ Yiezu àá mí kɛ̀ránzɛ̀ɓɛ̀ ɛ́ ɓɛ́ ɓiɛ̀ hàarí vɔn hɔ̀pe yaamu sɔ hũn. 3Ɛ́ hɔ́ lɛ ɛ́ hɔ́ divɛ̃n ɛ́ van yèrɛ, ɛ́ Yiezu ɓà nín ɛ́ khie bie lɛ́ á ǹ nɛ peɓɛ̀ divɛ̃n ɛ́ yèrɛ. 4Ɛ́ Yiezu zɔn bie lɛ́ à ǹ nɛ làa: «Hṹnu, Hɔ̀ yí kɔ́pe ɛ́ temu fɔ́ɓán ɛ̀ kɔ̀ bie hɔ bòo lɛ ɛ́ ń fɔ́ɓán ɛ̀ ǹ wé ɛ̀ lɛ́ mi lò! Niǹ bòo wénlɔ́ pɛ̃̀hṹ ɛ́ ɲɛùn yí dɛ̃ wɛ̀.» 5Ɛ́ ɓà nín ɛ́ khie bie lɛ́ ɓɛ́ bɔ̀sankɛriè ǹ nɛ làa: «Mì wé hɔ́ bòo lɛ á ɓén bie ɛ́ lɛ́ miɛ ǹ míkùi.» 6Ɛ̀ sɛ̃̀nlɛ̀a láa-bɛ̃hɛ̃ huezĩ́ dɔ̀ hṹn wi yán ɛ́ ɓɛ́ Zuifuɓɛ ɛ́ wóò hĩ́ hɔ́ ɲumu ɛ̀ kóo hũn ɛ̀ dàá tiɛ ɓɛte kɛ̀a bòo lɛ ɛ́ peɓɛ̀ làndɛ́ dàa khɛ́ hɔ́. Hɔ̀ láa-bɛ̃hɛ̃ sɔ ɛ́ dìcóoní ɛ́ litiriɓɛ ɓaàtĩ àá pírú (70) tàá khĩminù (100) ɛ́ dɛ̀ ɛ́ zɔ. 7Ɛ́ Yiezu khie bie lɛ́ ɓɛ́ bɔ̀sankɛriè ǹ nɛ làa: «Mì vɛ hĩ́ hɔ́ ɲumu ɛ̀ ɓen tíiní hɔ́ láahɛ̃ sɔ.» Ɛ́ ɓɛ́ van hɛ̃́ hɔ́ ɲumu ɛ́ ɓen tíiniɛ hɔ̀ ɛ́ hɔ́ mii cáa. 8Ɛ́ Yiezu zɔn bie lɛ́ ɓà ǹ nɛ làa: «Mì wo kìɛ́ hɔ́pe ɲumu sɔ dɔ̀ ɛ̀ lan vɛ lɛ́ ápe lɛ te le sɛ́rí bòo ɛ́ húi ǹ. Ɛ́ ɓɛ́ kìɛ ɛ́ van lɛ́ à ǹ.» 9Ápe lɛ te le sɛ́rí bòo ɛ́ húi ɛ́ yòó díndie hɔ́ ɲumu lɛ zɛ̀niɛ wɔ́ dìvɛ̃́n, á den yí dũ viì lɛ ɛ́ hɔ́ divɛ̃n sɔ ɛ́ lɔ́ nin wɛ̀. Kɛ́ ɓɛ́ bɔ̀sankɛriè lɛ te hɔ ɲumu sɔ hɛ̃́ ɛ́ pe dũ hɔ. 10Á khie vɔn ɔ̀pe yaamu ɓàasɔ à bie lɛ́ à ǹ nɛ làa: «Ɓɛ̀ nìnbirìe ɓɛ́kùi ɛ́ wóò sɛ̃̀nɛ́hã̀á lɛ́ hɔ́ divɛ̃n lɛ tĩ, kɛ́ ɓɛ́ nìnbirìe ɓen ɲun tù, ɛ̀ ɓɛ̀ den lɛ́ hɔ́ lɛ yí mɛnkɛa tĩ. Kɛ́ kɔ́pe ɛ́ den wo bɔ̀sí hɔ́pe lɛ tĩ fúu ɛ́ lé pɛ̃̀hṹ lɛ ɛ́ ɓen dɛ̃un.» 11Lɛ iè Yiezu bòo lɛ á dàa ɓɛ́ mí yéréké bòo wénlɔ́ fìi hɔ̀ Kanan lóo hũn, hɔ̀ Kalile pɛ̃̀hɛ̃ hũn. À zɛ̃́niɛ mí ɓàarɔ́ kɛ̀amu ɛ́ piè kɛ̀ránzɛ̀ɓɛ̀ ɛ́ dũmuasɛ̃̀ à ǹ. 12Ɛ́ pehɔ̀ máahṹ, àpe àá ɓá nín àá ɓá zɛ̀ɓɛ̀ àá mí kɛ̀ránzɛ̀ɓɛ̀ ɛ́ hĩ́nà van síɛ Kapɛrɛnayiimu lóo hũn ɛ́ van síɛ wɔ́ wihĩ́ bɔ̀nbɔ̀ yiɛní yán.

Yiezu ɛ́ ɓɛ̀ bɔ̀yìɛníriè ɛ̀ ɲɛ líení lé Dɔfĩn zũ-bɛhɔ́ dànkɔ̀ hũn

Mat 21.12-13; Mar 11.15-17; Lik 19.45,46

13Ɛ́ bòo lɛ ɛ́ ɓɛ́ Zuifuɓɛ Nyiewɛlɔn sɛ́rí ɛ́ van lúwí, ɛ́ Yiezu hĩ́nà van yòó hɔ́ Zerizalɛɛmu. 14Á van zɔn lè Dɔfĩn zũnù dànkɔ̀ ɛ́ zɔn yú ɓɛ́ bɔ̀yìɛníriè lɛ ɛ́ ɓɛ̀ nɛ̀ɓɛ̀ àá ɓɛ́ pirìe àá ɓɛ́ ńmɛ̀nɓóohɛ̃ ɛ̀ yìɛní. À lò yú ɓɛ́lɛ ɛ́ hɔ̀ màa ɛ̀ zɛ̀ní kɛ́ ɓɛ́ kɛsí. 15Á khie mɔ̀ lè hurɔ́ dɔ̀ ɛ́ wɔ́ àá ńhùenú à ɲɛun ɓɛ̀ ɓɛ́kùi ɛ́ líeniɛ àá ɓɛ́ piriè, àá ɓɛ́ nɛ̀ɓɛ̀. Ɛ̀ ɓɛ̀ mɛ̀zɛ̃̀níkɛ̀riè tɛ̀bɛ́hĩ́ á dɔ́nkɛa ɛ́ kóokɛasí àá mí màa. 16À bie lɛ́ ɓɛ́ ńmɛ̀nɓóohɛ̃ yìɛníriè nɛ: «Mì khui hɔ́pe sí míkùi ɛ̀ lé yán. Mì bí wé kìe Yàá zũnù àá dɛrɛ̀ zũnù wɛ̀.» 17Ɛ́ piè kɛ̀ránzɛ̀ɓɛ̀ ɛ́ síɛ lieniɛ kɛ́ hɔ́ wɛ̃́ lé Dɔfĩn bienù vɛ̃hṹ hũn ɛ́ nɛ làa: «Dɔfĩn, kɔ̀ zũnù wanminù ɛ́ wi niǹ tĩì hũn cɛ̃̀un, ɛ̀ hɔ̀ ɛ́ nìn cĩ̀ní kɛ̀a hɔ dṹn bòo sí.» 18Ɛ́ ɓɛ́ Zuifuɓɛ hándíe ɛ́ zɔn ɔ̀ dìenin nɛ làa: «Hɔ̀ iè yéréké bòo hɔ́sɔ ɛ́ kɔ ɛ̀ wé ɛ̀ dàá zɛ̃́ní lɛ́ kiè ǹ kɛ́ kɔ́ dàa ɲunù lɛ dɛ̀ hɔ̀ ɓà ńmà ɛ́ wé?» 19Ɛ́ Yiezu zɔn bie lɛ́ ɓà ǹ nɛ làa: «Mì wúa lepe Dɔfĩn zũnù sɔ lɛ, ɛ́ nín hóoní lé ɛ́ ɓooní wihĩ́ bɔ̀nbɔ̀ tĩ hũn.» 20Ɛ́ ɓɛ́ Zuifuɓɛ hándíe ɛ́ zɔn nɛ làa: «Lè Dɔfĩn zũnù sɔ pɛ̃hṹ tɔn lɔ́líe dɛ̀wɛ́ àá bòo huezĩ́ (46) hũn, ɛ́ kɔ́pe wo wiɛ dàa dɛ̀ lè ɛ́ hóoní wihĩ́ bɔ̀nbɔ̀ tĩ tĩ́ihṹ?» 21Kɛ́ lé Dɔfĩn zũnù lɛ á Yiezu ɛ́ bòo bie ɛ́ iè pie tɛkɛà. 22Ɛ́ hɔ́ khie míɛ, ɛ́ hɔ́ lɛ ɛ́ Yiezu húrun ɛ́ vìé lɔ́ hɔ́ húmu hũn, ɛ́ piè kɛ̀ránzɛ̀ɓɛ̀ den síɛ lièniɛ kɛ́ á hàarí khɛ́ hɔ́, ɛ́ ɓɛ́ den wo dũmuasɛ̃̀ hɔ̀ bòo lɛ wɛ̃́ lé Dɔfĩn bienù vɛ̃hṹ hũn, àá hɔ́ biehĩ́ lɛ ɛ́ Yiezu hàarí khɛ́ ǹ.

Yiezu ɛ́ dũ nìnbirìe ɓɛ́kùi tĩɛ̀ bòo

23Ɛ́ pɛ̃̀hṹ lɛ ɛ́ Yiezu ɛ́ wi hɔ Zerizalɛɛmu lóo hũn, hɔ̀ Nyiewɛlɔn sɛ́rí hũn, ɛ́ nìnbirìe cɛ̀rìɛɛ ɛ́ dũmuasɛ̃̀-à ǹ iè hɔ̀ lɛ ɛ́ ɓɛ́ loo hɔ yéréké bòo lɛ á wé. 24Kɛ́ Yiezu pe den yí dɛsĩ̀ ɓà ǹ wɛ̀, iè hɔ̀ lɛ á dũ ɓɛ sãaniɛ ɓɛ́kùi. 25À lò yá cɛ̀ nɛ ɓɛ bie nìnbírɔ dɔ̀ bòo ɛ̀ lɛ́ mí ǹ vé ɛ́ mí dàá dũń ɓàasɔ wɛ̀. Àpe míte ǹ ɛ́ dũ bòo lɛ wi nìnbírɔ tĩì hũn.

Currently Selected:

Zãn 2: bwj

Highlight

Copy