Zãn 8

À hṹnu dɔ̀ lɛ ɛ́ ɓɛ́ ɓaa hɔ̀ bɛ́fénlɔ́ hũn bòo

1Ɛ́ Yiezu ɛ́ khie cɔ́ van yòó hɔ́ Olive vɛ̃̀hɛ̃ ɓúkìe lɔ̀n. 2Ɛ́ pehɔ̀ sí lɛ ɛ́ tĩ ɲɛǹbín dùdù, à khũ̀a ɓen síɛ ɛ́ khie van Dɔfĩn zũ-bɛhɔ́ dànkɔ̀ hũn. Ɛ́ ɓɛ́ nìzã̀amáa van ɓɛrɛ ɓen kírie ɔ̀ ǹ, á síɛ kɛsí à ɓɛ̀ kɛ̀rán. 3Ɛ́ ɓɛ́ làndɛ́ kɛ̀ránliè àá ɓɛ́ Farizĩɛɓɛ ɛ́ van dàa ɔ̀ hṹnu dɔ̀ lɛ ɓɛ́ van yòokɛa lɔ̀n kɛ́ à bɛrɔ ɛ̀ fé ɛ́ dàa ɓɛrɛ ɛ́ ɓen dĩ̀niɛ ɓɛ̀ nìnbirìe tĩ́ihṹ. 4Ɛ̀ ɓɛ̀ zɔn bie lɛ́ Yiezu ǹ nɛ làa: «Kɛ̀ránlɔ, àpe hṹnu lɛ ɛ́ ké van yòokɛa lɔ̀n kɛ́ á ɛ́ bɛ́rɔ ɛ̀ fé. 5À Moyiize lò den khɛ́ hɔ́ làndɛ́ vɛ̃hṹ hũn ie ɓɛ́pe hã́a sɔ sí ɓà ńmaà ɛ́ ké fɔ́ɓán ɛ̀ kè wóo taa ɓé àá sɛ̀nlɛ̀a. Ɛ́ kɔ́pe nɛ wɛrɛ?» 6Ɓɛ̀ ɛ́ bie kɛ̀amu, kɛ́ hɔ́ iè bòo ɛ́ ɓɛ́ ɔ̀ pɛ, ɛ̀ dàá yí bie nɛ a wɔ́ khɔn. Kɛ́ Yiezu den síɛ lúnlúosí ɛ́ wĩ́ lé sṹsùnù lɔ̀n àá mí nínkɛ́zuú. 7Kɛ́ hɔ́ lɛ ɛ́ ɓɛ́ dɛ̃̀ ɛ́ ɔ̀ dìekɛnin fúu, ɛ́ Yiezu síɛ hĩ́nà yòó dɛ̃̀ à zɔn khɛ́ lɛ́ ɓà ǹ nɛ làa: «Mìpe mì tĩ́ihũ álɛ ɛ́ ɲɛùn yí wé bɔ̀koohɔ́ yí mi ɛ̀ dí hɔ́ híɛhɔ́ ɛ̀ mìí lé sɛ̃̀nlè à tɛ́ à ǹ.» 8À bĩniɛ síɛ lúnlúosí ɛ́ wĩ́ lé sṹsùnù lɔ̀n. 9Ɛ́ hɔ́ lɛ ɛ́ ɓɛ́ ɲɛ́ hɔ́pe biehĩ́ sɔ sí, ɛ́ ɓɛ́ khie saakɛa cɔ́kɛ àá nì-cóohɛ̃ cóohɛ̃, ɛ̀ dàá mìí àá ɓɛ́ nìkĩ́ihɛ̃ ɛ̀ dàa van síɛ vieniɛ àá ɓɛ́lɛ kɛ́. Ɛ̀ hɔ̀ kɛ́ á hṹnu mí dòonún temu dɛ̃̀ Yiezu híɛhɔ́. 10Ɛ́ Yiezu síɛ hĩ́nà yòó dɛ̃̀ à khɛ́ lɛ́ à ǹ nɛ làa: «Ɓɛ̀ nìnbirìe lɛ te kɔ ɛ́ dàa ɓɛrɛ ɛ́ wi àá yí? Àdɔ̀ yí tɛ́ kɔ ǹ?» 11Á hṹnu zɔn nɛ: «Ɲunsɔ, àdɔ̀ yí tɛ́ mi ǹ wɛ̀.» Ɛ́ Yiezu zɔn nɛ: «Ɛ́ ńpe lò ɓiɛ yí nin bie nɛ kɔ́ fɔ́ɓán ɛ̀ kɔ̀ taa wɛ̀. Khíi lan ɓɔ, kɛ́ kɔ̀ bí bĩní wé bɔ̀koohɔ́ wɛ̀.»]

Yiezu iè lè dímíɲɛ́ ńpiemu

12Ɛ́ Yiezu sĩ̀n khie ɛ́ bie àá ɓɛ́ nìzã̀amáa ɛ́ nɛ làa: «Ǹpe iè lè dímíɲɛ́ ńpiemu. Nìnbírɔ lɛ bɔ̀ niǹ máahṹ ɛ́ yí dɛ̀ yá vɛ síbínú hũn, kɛ́ á ɛ́ yí hɔ́ ńpiemu lɛ wóò lɛ́ lé mɛkɛ̃nì.» 13Ɛ́ ɓɛ́ Farizĩɛɓɛ zɔn khɛ́ lɛ́ à ǹ nɛ làa: «Kɔ̀pe kɔ̀te ǹ ɛ́ te kɔ kùrú bòo ɛ́ khɛ́, ɛ́ hɔ́pe lɛ ɛ́ kɔ́ ɛ́ khɛ́ ɛ́ yí be wɛ̀.» 14Ɛ́ Yiezu zɔn nɛ làa: «Ǹpe yɛ̀rɛ́ hṹn te niǹ kùrú bòo ɛ́ khɛ́, ɛ̀ hɔ̀ pɛ́ bɔn iè hɔ̀ lɛ ɛ́ ńpe ɛ́ dũ viì lɛ ɛ́ ń lɔ́, à lé viì lɛ ɛ́ ń vaá vɛ. Kɛ́ mípe ɛ́ yí dũ viì lɛ ɛ́ ń lɔ́, àá lé viì lɛ ɛ́ ń vaá-vɛ wɛ̀. 15Mí wóò lè hɔ̀ lìe kɛ̀a ɓɛ nìnbirìe lìe lènlɔ́; ɛ̀ ǹpe ɛ́ yá nìnbírɔ dɔ̀ lìe ɛ̀ lè wɛ̀. 16Kɛ́ ń yɛ̀rɛ́ hṹn lìe lè, ɛ̀ hɔ̀ iè bɔ̀berà lìe, iè hɔ̀ lɛ ɛ́ hɔ́ yí ńpe niǹ dòonún ɛ́ te hɔ lìe sɔ ɛ́ lè, kɛ́ kìe Yàá lɛ tɔrɛ mi ɛ́ wi àá mi. 17Ɛ́ hɔ́ wɛ̃́ mí làndɛ́ vɛ̃hṹ hũn nɛ nìɛ ɓɛ̀ ɲu bòo lɛ ɛ́ ɓɛ́ mɔn ɛ́ bie nɛ hɔ bɔn, ɛ́ temu iè bɔ̀berà. 18Ɛ́ ńpe ɛ́ hɔ̀ bɔ̀berà ɛ́ munkɛ niǹ bòo hũn, ɛ̀ kìe Yàá lɛ tɔrɛ mi ɛ́ lò ɓiɛ̀ ɛ́ hɔ̀ bɔ̀berà ɛ̀ munkɛ niǹ bòo hũn.» 19Ɛ́ ɓɛ́ zɔn ɔ̀ dìenin nɛ làa: «Mì Yàá wi yí?» Ɛ́ Yiezu zɔn kɔ̃́niɛ nɛ làa: «Mí yí dũ mi, ɛ̀ mì lò yí dũ kìe Yàá wɛ̀. Kɛ́ mí hṹn dũ mi, ɛ́ mí ɓiɛ̀ ɓén dũń kìe Yàá.» 20Yiezu ɛ́ bie hɔ̀pe biehĩ́ sɔ sí pɛ̃̀hṹ lɛ á dàa ɓɛ̀ nìnbirìe kɛ̀rán lé Dɔfĩn zũ-bɛhɔ́ dànkɔ̀ hũn, lè dáanú lɛ ɛ́ hɔ́ ɓunɓuò lɛ ɛ́ ɓɛ́ nìnbirìe ɛ́ wóò ɓen kóo hɔ́ hɛ̃mù bòo hũn ɛ̀ lɛ́ Dɔfĩn ɛ́ wi nin. Ɛ́ nìnbírɔ dɔ̀ yí ɓaà ɔ̀, iè hɔ̀ lɛ ɛ́ piè pɛ̃̀hṹ ɛ́ hṹn ɲɛùn yí dɛ̃ wɛ̀.

21Ɛ́ Yiezu bĩniɛ zɔn bie lɛ́ ɓà ǹ nɛ làa: «Ǹpe vaá-lan. Mí ɓén cɛ̀ mi, kɛ́ mí ɓén hí mí bɔ̀koohɛ̃ hũn. Lè viì lɛ ɛ́ ń vaá-vɛ ɛ́ mí yí dɛ̀ yá vɛ hũn wɛ̀.» 22Ɛ́ ɓɛ́ Zuifuɓɛ zɔn bie nɛ làa: «Á wìe mii ɓé míte yée, á dàa nɛ ké yí dɛ̀ yá vɛ le dáanú lɛ mí vaá-vɛ hũn?» 23Ɛ́ Yiezu zɔn bie lɛ́ ɓà ǹ nɛ làa: «Mìpe ɛ́ lé àá lé sṹsùnù, ɛ̀ ǹpe ɛ́ lé àá hɔ́ hóohũn. Mìpe bòo ɛ́ sɛ̃̀ lè dímíɲɛ́ sɔ lɛ ǹ, ɛ̀ ǹpe bòo ɛ́ yí sĩ̀ lè ǹ wɛ̀. 24Ɛ́ sí iè hɔ̀pe, ɛ́ ń dàa nɛ mí ɓén hí mí bɔ̀koohɛ̃ hũn. Kɛ́ mí yí dɛsĩ̀ nɛ ńpe ɛ́ iè ɔ̀pe lɛ ɛ́ wi, ɛ́ mí ɓén hí mí bɔ̀koohɛ̃ hũn.» 25Ɛ́ ɓɛ́ zɔn ɔ̀ dìenin nɛ làa: «Ɛ́ kɔ́pe iè wieni?» Ɛ́ Yiezu zɔn nɛ làa: «Nín ɔ̀pe lɛ ɛ́ nín bòo ɛ̀ khɛ́ àá miɛ fúu àá niǹ biehĩ́ fìi ɓánlén. 26Ń dàa boò bɔ̀kùi ɛ́ nin bie mi bòo hũn, ɛ̀ ǹ dàa lìe ɛ́ nin lè mì bòo hũn. Kɛ́ á lɛ ɛ́ tɔrɛ mi iè bɔ̀berà ɓàasɔ, ɛ́ hɔ́ bòo lɛ ɛ́ ń ɲɛ́ piè viì iè pe ɛ́ nín khɛ́ lé dímíɲɛ́ hũn.» 27Ɛ́ ɓɛ́ yí dũń kɛ́ á iè Yàá Dɔfĩn bòo á bie wɛ̀. 28Ɛ́ Yiezu zɔn bie lɛ́ ɓà ǹ nɛ làa: «Mí ɓen ɓáa ɔ̀ nìnbírɔ Zuú lè dã̀anù lɔ̀n ɛ́ hóoniɛ yòoniɛ vɔ́, ɛ́ mí den ɓén dũń kɛ́ ńpe iè ɔ̀pe lɛ ɛ́ wi, ɛ̀ ǹ yáà wé bòo dɔ̀ niǹte ǹ, kɛ́ hɔ́ bòo lɛ ɛ́ ń wóò bie iè hɔ̀ lɛ ápe Yàá lɛ tɔrɛ mi ɛ́ kɛ̀rɛa àá mi. 29Àlɛ te nin tɔrɛ ɛ́ wi àá mi, à yí fùansí mi ǹ niǹ dòonún wɛ̀; iè hɔ̀ lɛ ɛ́ hɔ́ bòo lɛ á wɛ iè pe ɛ́ ń wóò wé.» 30Ɛ́ hɔ́ lɛ ɛ́ Yiezu ɛ́ bie kɛ̀amu, ɛ́ nìnbí-kùi ɛ́ dũmuasɛ̃̀ à ǹ.

31Ɛ́ Yiezu zɔn bie lɛ́ ɓɛ́ Zuifuɓɛ lɛ dũmuasɛ̃̀ à ǹ ɛ́ nɛ làa: «Kɛ́ mí ɓɛ́ɓɛa niǹ biehĩ́ ǹ, ɛ̀ mì iè niǹ kɛ̀ránzɛ̀ɓɛ̀ àá bɔ̀bín. 32Ɛ́ mí ɓén dũń hɔ́ bɔ̀berà, ɛ́ hɔ́pe bɔ̀berà ɛ́ ɓén lɛ́ ɛ́ mí teń míte.» 33Ɛ́ ɓɛ́ zɔn nɛ làa: «Kèpe iè Abarahaamu hũn nìɛ, ɛ́ ké ɲɛùn yí wé nìnbírɔ dɔ̀ wɔhĩ́ ɛ́ yí mi wɛ̀. Ɛ́ hɔ́ iè ńɓùo ɛ́ kɔ́ dàa nɛ ké ɓén teń kéte?» 34Ɛ́ Yiezu ɛ́ zɔn bie lɛ́ ɓà ǹ nɛ làa: «Nin bie hɔ lɛ́ miɛ ǹ àá bɔ̀bín nɛ nìnbírɔ yée nìnbírɔ lɛ wóò wé bɔ̀koohɔ́, à iè bɔ̀koohɔ́ wɔnù. 35À wɔnù ɛ́ yáà kań ɓɛ́ zũnù ɓàasɔ zũnù nìɛ hũn fúu wɛ̀; kɛ́ á zũnù ɓàasɔ zuú pe wóò kań àá ɓɛ́ fúu. 36Kɛ́ á Zuú ɛ́ ɓen lerɛ mì ɲún ǹ, ɛ́ mí ɓén teń míte àá bɔ̀bín. 37Ń dũ kɛ́ mí iè Abarahaamu hũn nìɛ. Kɛ́ mí den cɛ̀ ɛ̀ mì ɓé mi, iè hɔ̀ lɛ ɛ́ mí pɛ̃́ niǹ biehĩ́ bòo. 38Hɔ̀ bòo lɛ ɛ́ nín khɛ́ àá miɛ iè hɔ̀ lɛ ɛ́ ń mɔn kìe Yàá viì; ɛ̀ mìpe ɓìɛ wóò wé hɔ́ bòo lɛ ɛ́ mí ɲɛ́ mì yàá viì.» 39Ɛ́ ɓɛ́ zɔn nɛ làa: «Kìe yàá iè Abarahaamu.» Ɛ́ Yiezu zɔn khɛ́ lɛ́ ɓà ǹ nɛ làa: «Kɛ́ mí hɛ̀ hṹn iè Abarahaamu hũn nìɛ àá bɔ̀bín, nɛ mì wóò wí-e pe Abarahaamu bòo lɛ á hàarí wɔ́. 40Kɛ́ hɔ́ lɛ lɔ̀n, ɛ́ mí den cɛ̀ mii ɓé mi, ǹpe lɛ iè hɔ̀ bɔ̀berà lɛ ɛ́ ń ɲɛ́ Dɔfĩn viì, ɛ́ ń munkɛa ɛ́ lɛ́ miɛ ǹ. Ɛ́ Abarahaamu den yí wé hɔ́pe sí ɓà ńmàa ɛ́ yí mi lò! 41Mìpe iè mì yàá bɔ̀werà iè pe ɛ́ mí wóò wé.» Ɛ́ ɓɛ́ zɔn nɛ làa: «Kèpe ɛ́ yí nìɛ lɛ kɔnkɔnlɔ́ wɛ̀. Dɔfĩn mí dòonún temu iè kìe Yàá.» 42Ɛ́ Yiezu zɔn bie lɛ́ ɓà ǹ nɛ làa: «Kɛ́ Dɔfĩn hɛ̀ hṹn iè mì Yàá àá bɔ̀bín, nɛ mì hṹn ɓén wɛní mi, iè hɔ̀ lɛ ɛ́ ńpe ɛ́ lɔ́ àá hɔ́pe Dɔfĩn viì, ɛ̀ hɔ̀ iè pehɔ̀ ɲunù lɔ̀n ɛ́ ń dàa ɓɛrɛ. Ń yí ɓen niǹ kùrú ɲunù lɔ̀n, kɛ́ kìe Yàá ɛ́ te nin tɔrɛ. 43Ɛ́ hɔ́ iè ńɓùo temu lɛ́ ɛ́ mí dàa yí dũ hɔ bòo lɛ ɛ́ nín khɛ́ lɛ́ miɛ ǹ ɲún? Mí yí dũ pehɔ̀ ɲún iè hɔ̀ lɛ ɛ́ mí yá cɛ̀ ɛ̀ mì ɲí niǹ biehĩ́ wɛ̀. 44Mìpe mì yàá iè Sitũanɛ, ɛ́ mí wɛ mii wé mì Yàá tĩì bòo. Àá lé dímíɲɛ́ fìi ɓánlén kɛ́ ápe iè nìɓé. Àpe ɲɛùn yí munkɛ bɔ̀berà ɛ́ yí mi, iè hɔ̀ lɛ ɛ́ bɔ̀berà mínɛ ɔ̀ ǹ wɛ̀. À ɓen hɔ̀ ɓúo ɛ̀ ɓúukɛ, ɛ̀ piè biehĩ́ sɔ ɛ́ lɔ́ piè kùrú tĩì hũn, iè hɔ̀ lɛ á iè ɓɔ́-ɓúukɛ à lò iè ɓúo ɓà yàá. 45Ɛ̀ ǹpe ɛ́ mí yí dɛsĩ̀ niǹ, iè hɔ̀ lɛ ɛ́ ń wóò khɛ́ hɔ́ bɔ̀berà. 46À iè wie mì tĩ́ihṹ ɛ́ temu dɛ̀ ɛ́ zɛ̃́ní kɛ́ ń wɔ́ bɔ̀koohɔ́? Kɛ́ ń ɓen wóò munkɛ hɔ bɔ̀berà, ɛ̀ ńɓùo temu lɛ́ ɛ́ mí dàa yí dɛsĩ̀ mi ǹ? 47À nìnbírɔ lɛ bòo sɛ̃̀ Dɔfĩn ɛ́ wóò ɲí hɔ́pe Dɔfĩn biehĩ́. Kɛ́ mípe ɛ́ bòo yí sĩ̀ hɔ̀ Dɔfĩn wɛ̀, ɛ́ sí iè pe temu lɛ́ ɛ́ mí dàa yáà ɲí pehɔ̀ biehĩ́ wɛ̀.»

Yiezu àá Abarahaamu bòo

48Ɛ́ ɓɛ́ Zuifuɓɛ zɔn nɛ làa: «Kè bòo tĩ ɛ̀ kè bie nɛ kɔ́ iè Samari nùún, ńɲíkĩ́rɔ ɛ́ wi kɔ ǹ.» 49Ɛ́ Yiezu zɔn nɛ làa: «ńɲíkĩ́rɔ mínɛ mi ǹ wɛ̀, kɛ́ á iè kìe Yàá ɛ́ nín ɓàanínin, ɛ̀ mìpe ɛ́ nìǹ khɛ̀ránkɛ mi laà hũn. 50Ǹpe yá cɛ̀ nɛ ɓɛ nìnbirìe ɛ̀ ɓàaní mì ǹ wɛ̀. Kɛ́ ádɔ̀ wi yán ɛ́ te niǹ ɓàarɔ́ bòo ɛ́ húi, ápe ɛ́ ɓén lɛ́ hɔ́ bɔ̀berà mì ǹ. 51Niin bie hɔ lɛ́ miɛ ǹ àá bɔ̀bín, nɛ nìnbírɔ lɛ tɛ̀ bɔ̀ niǹ biehĩ́ mí tĩì lɔ̀n, ɛ́ yá hí yá mi wɛ̀.» 52Ɛ́ ɓɛ́ Zuifuɓɛ zɔn khɛ́ lɛ́ à ǹ nɛ làa: «Hɔ̀pe lɛ lɔ̀n, ɛ́ ké hɛ̀ wo dũ kɛ́ ńɲíkĩ́rɔ ɛ́ wi kɔ ǹ! À Abarahaamu ɛ́ húrun, ɛ̀ ɓɛ̀ Dɔfĩn bɔ̀háaníriè ɛ́ lò húrunkɛ, ɛ̀ kɔ̀pe nɛ alɛ ɓen bɔ̀ kɔ̀ biehĩ́ mí tĩì lɔ̀n, á yá hí yá mi wɛ̀. 53Kɔ́ wiè pɔ kìe yàá Abarahaamu lɛ húrun? Ɛ̀ ɓɛ̀pe Dɔfĩn bɔ̀háaníriè ɛ́ ɓiɛ̀ húrunkɛ. Ɛ́ kɔ́pe ɛ́ kɔ̀te ɛ̀ mìí à wieni?» 54Ɛ́ Yiezu zɔn nɛ làa: «Kɛ́ ńpe ɓen te niǹte ɛ́ ɓàanínin, ɛ̀ pehɔ̀ ɲún mínɛ wɛ̀. Àlɛ ɛ́ nìn ɓàanínin ɛ́ iè kìe Yàá, àpe lɛ ɛ́ mí wóò ve nɛ mi Dɔfĩn, 55hɔ́rɔsí ɛ̀ mì lò den yí dũ-a wɛ̀. Ɛ̀ ǹpe dũ-a. Kɛ́ ń hṹn zɔn bie nɛ ń yí dũ-a, ɛ̀ ǹ iè ɓɔ́-ɓúukɛ kɛ̀a mipe. Kɛ́ ń den dũ-a, ɛ̀ ǹ bɔ̀ piè biehĩ́ niǹ tĩì lɔ̀n. 56Mì yàá Abarahaamu ɛ́ hàarí ɓen nùún nɛ mí ɓén mi niǹ wurù, à wɛní míte. Á mɔn lè, á hɛ̀ wɛniɛ míte cɛ̃̀un.» 57Ɛ́ ɓɛ́ Zuifuɓɛ zɔn nɛ làa: «Kɔ̀pe ɲɛùn yí dɛ̃ lɔ́líe dɛ̀wɛ́ àá pírú (50) ɛ̀ kɔ̀ pɛ́ mɔn Abarahaamu?» 58Ɛ́ Yiezu zɔn bie lɛ́ ɓà ǹ nɛ: «Nin khɛ́ hɔ́ lɛ́ miɛ ǹ àá bɔ̀bín nɛ pɛ̃hṹ lɛ ápe Abarahaamu ɛ́ ɲɛùn mí, ɛ̀ ǹpe wi.» 59Ɛ́ ɓɛ́ wo khie khuie hɔ̀ sɛ̃̀nlɛ̀a ɛ́ nɛ ɓɛ́ taa ɔ. Kɛ́ Yiezu ɛ́ den tànkɔ̀niɛ míte ɛ́ khie lɔ́ lé Dɔfĩn zũ-bɛhɔ́ dànkɔ̀ hũn.

Currently Selected:

Zãn 8: bwj

Highlight

Copy