Liike 11
11
Yiezu ɛ́ mí kɛ̀ránzɛ̀ɓɛ̀ ɛ̀ kɛ̀rán àá Dɔfĩn hɛ̃nnɛ̀
Mat 6.9-13; 7.7-11
1Ɛ́ wurù dɔ̀ zɔn, ɛ́ Yiezu ɛ́ Dɔfĩn ɛ̀ hɛ̃nnin viì dɔ̀. Ɛ́ bòo lɛ á hɛ̃nnɛ vɔ, ɛ́ piè kɛ̀ránzuú dɔ̀ ɛ́ zɔn bie lɛ́ à ǹ nɛ làa: «Ɲunsɔ, kení kie àá Dɔfĩn hɛ̃nnɛ̀ kɛ̀a bòo lɛ á Zãn ɛ́ dàa keniɛ hɔ̀ àá mí kɛ̀ránzɛ̀ɓɛ̀.» 2Ɛ́ Yiezu zɔn bie lɛ́ ɓà ǹ nɛ làa: «Mí ɓen mii hɛ̃un Dɔfĩn ɛ̀ mì wóo bie nɛ làa:
“Kìe Yàá,
Lɛ́ nɛ nìnbirìe ɛ̀ dũń kɛ́ kɔ́ iè Dɔfĩn lɛ ɛ́ ce;
Lɛ́ nɛ kɔ bɛ́záanú ɛ̀ ɓen síɛ.
3Wóo lɛ́ ké ɲunù dínlɔ́ kie ǹ sítĩnlɔ́ àá sítĩnlɔ́.
4Dé ké bɔ̀koohɛ̃ sɛ́wɛ́rí ɛ̀ lɛ́ kie ǹ, iè hɔ̀ lɛ ké ɓiɛ̀ wóò dé sɛ́wɛ́rí ɛ̀ lɛ́ ɓɛ́lɛ ɛ́ wɔ́ khɔn àá kie;
Ɛ̀ kɔ̀ bí fùansí kie ǹ hɔ̀ hàanírɔ́ hũn wɛ̀.”»
5Ɛ́ Yiezu bĩniɛ zɔn bie lɛ́ ɓà ǹ nɛ làa: «Ɛ́ mí húi lò! Mìpe mì tĩ́ihṹ kɛ́ ádɔ̀ ɛ́ dàa pàá, kɛ́ á hĩ́nà van ɓá pàá sɔ viì hɔ̀ sínɛ̀hɛ̃ǹ, ɛ́ van ɓánɓɛ́a piè dìɛ à bie lɛ́ à ǹ nɛ làa: “Kè pàá, hĩ́ní ke díe bìcínbóo lɛ́ mi ǹ. 6Kè pàá dɔ̀ ɛ́ lɔ́ wṹn lɔ̀n ɛ́ ɓɛrɛ dɛ̃un niǹ yíe, kɛ́ ń den yí dàa bòo lɛ ɛ́ nin lɛ à ǹ wɛ̀.” 7Ɛ́ mí húi, kɛ́ ɓà pàá sɔ lɛ zɔn wi mí zũnù hũn ɛ́ zɔn bie lɛ́ à ǹ nɛ: “Bí kɛ́bí mi wɛ̀. Lè zĩínù ɲunù ɛ́ pɔn vɔ́, ɛ̀ ǹpe àá niǹ nìɛ ɛ́ dũmua, ɛ́ ń yí dɛ̀ díe ɛ́ yá hĩ́ní cɛ̀ ɛ́ lɛ́ kɔ̀ ǹ wɛ̀.” 8Ɛ́ nin bie hɔ lɛ́ miɛ ǹ nɛ hɛ̀rí kɛ́ á yí mii hĩ́ní lɛ́ hɔ́ díe ɔ̀ ǹ iè hɔ̀ lɛ á iè ɓà pàá, á ɓén hĩ́ní lɛ́ bòo lɛ á ɛ́ cɛ̀ míkùi ɔ̀ ǹ, iè hɔ̀ lɛ á dɛ̃̀ ɔ̀ kɛ́bí. 9Ɛ́ ńpe ɛ́ bie àá miɛ nɛ mi wóo hɛ̃un Dɔfĩn, ɛ́ Hɔ́ ɛ́ lɛ́ bòo miɛ ǹ, ɛ̀ mì cɛ̀, ɛ́ mí ɛ́ mi, ɛ̀ mì ɓánɓɛ́ lé zĩínù, ɛ́ ɓɛ́ ɛ́ hán lé ɛ́ lɛ́ miɛ ǹ. 10Iè hɔ̀ lɛ ɛ́ nìnbírɔ lɛ wòó hɛ̃un ɛ́ wóò yí, àlɛ ɛ́ wòó cɛ̀ ɛ́ wóò mi, àlɛ wòó ɓánɓɛ́ lé zĩínù ɛ́ ɓɛ́ wóò hán lé ɛ̀ lɛ́ nin. 11À yàá hɔ̀sɔ́ mì tĩ́ihṹ ɛ́ temu ɛ́ tɛ̀ ɛ́ khíi lɛ́ hóonú mí zuú ǹ, kɛ́ á lò iè cɔ á hɛ̃nnɛ piè viì? 12Tàá à tɛ̀ ɛ́ khíi lɛ́ naa ɔ̀ ǹ kɛ́ lé lò iè fũì á hɛ̃nnɛ? 13Ɛ́ mípe lɛ iè ɓɛ̀ mɛkɛ̃nɲiì ɓàasiè ɛ́ ɓen dũ bòo lɛ sãa ɛ́ wóò lɛ́ mí nìɛ ǹ, ɛ̀ mì dũń sãàní kɛ́ mì Yàá lɛ yòó wi hɔ hóohũn ɛ́ ɓén lɛ́ lé Mɛkɛ̃n-Sãanu ɓɛ̀lɛ ɛ́ lè hɛ̃nnin piè viì?»
Yiezu pànkɛ́ wi pɔ Sitũanɛ
Mat 12.22-30; Mar 3.22-27
14Yiezu ɛ́ hàarí ɛ́ ńɲíkĩ́rɔ dɔ̀ ɛ̀ ɲɛ líení nùún dɔ̀ ǹ. À ńɲíkĩ́rɔ sɔ ɛ́ hàarí lɛ́ á nùún sɔ ɛ́ yí dɛ̀ yáà bie wɛ̀. Ɛ́ hɔ́ lɛ á ńɲíkĩ́rɔ sɔ ɛ́ lɔ́, á nùún ɛ́ wo yú bie. Ɛ́ hɔ́ hɛ̀ yòokɛa ɓɛ̀ nìnbirìe lɔ̀n. 15Kɛ́ ɓɛ́dɔ̀ ɛ́ pe khie bie nɛ làa: «À iè Bɛlizebuule#11.15 Bɛlizebuule ɛ́ iè Sitũanɛ yèrè dɔ̀. lɛ iè ɓɛ̀ ńɲíkĩ́nìɛ bɛ́zuú ɛ́ te hɔ pànkɛ́ lɛ́ à ǹ á dàa ɓɛ̀ ńɲíkĩ́nìɛ ɛ̀ ɲɛ.» 16Ɛ̀ ɓɛ̀dɔ̀ ɛ́ hṹn cɛ̀ nɛ ɓɛ́ vĩ Yiezu mí biehĩ́ hũn, ɛ́ ɓɛ́ nɛ á wé yéréké bòo dɔ̀ lɛ ɛ́ zɛ̃́ní kɛ́ á lɔ́ Dɔfĩn viì nɛ ɓɛ́ mi. 17Kɛ́ Yiezu den dũ peɓɛ̀ hũn bòo, á zɔn bie lɛ́ ɓà ǹ nɛ làa: «Kɛ́ bɛ́záanú dɔ̀ nìɛ ɛ́ hɔ̀ hĩɛ̀ tɛ́ ɓán hũn ɛ́ lé bɛ́záanú sɔ ɛ́ wua, ɛ̀ pelè zĩhĩɛ́ ɛ́ ɓúukɛ síɛ ɓán hũn lò. 18Kɛ́ Sitũanɛ máahṹ nìɛ ɛ́ ɓen ɛ́ hɔ̀ hĩɛ̀ tɛ́ ɓán hũn, ɛ́ piè bɛ́záanú sɔ ɛ́ wo wiɛ dàa dɛ̀ wé yán, ɛ́ mí dàa nɛ nín ɓɛ̀ ńɲíkĩ́nìɛ ɛ̀ ɲɛ àá Bɛlizebuule pànkɛ́? 19Kɛ́ ńpe ɛ́ ɓen ɛ́ ɓɛ̀ ńɲíkĩ́nìɛ ɛ̀ ɲɛ àá Bɛlizebuule pànkɛ́, ɛ̀ mìpe mì nìɛ ɛ́ pe wóò ɲɛ ɓɛ àá wieni pànkɛ́? Ɛ́ sí iè hɔ̀ pe ɛ́ ɓɛ́pe mì nìɛ ɛ́ dàa te mi lìe ɛ́ ɓén lè. 20Kɛ́ hɔ́ lɛ ɛ́ hɔ́ iè Dɔfĩn pànkɛ́ ɛ́ ń dàa ɛ́ ɓɛ̀ ńɲíkĩ́nìɛ ɛ̀ ɲɛ, ɛ́ Dɔfĩn bɛ́záanú ɛ́ iè pe wo ɓɛrɛ dɛ̃un mì viì vɔ́. 21Kɛ́ nìnbírɔ lɛ pànkɛ́ wi ɛ́ can mí hĩɛ̀ tĩ̀ɛ ɛ́ dàa ɛ́ mí zũnù ɛ̀ hìénin míte ǹ, ɛ́ piè zũnù tĩ̀ɛ míkùi ɛ́ bòo dɔ̀ ɛ́ yí dɛ̀ yá wé wɛ̀. 22Kɛ́ nìnbírɔ dɔ̀ lɛ pànkɛ́ pɔ-a ɛ́ van ɓɛrɛ ɛ́ ɓen dɛrɛ-à, á ɛ́ vúa piè hĩɛ̀ tĩ̀ɛ lɛ á sieniɛ àá mí ɲún, à dí piè zũnù tĩ̀ɛ míkùi ɛ́ khíi sankɛ lɛ́ yán. 23Àlɛ ɛ́ mí ɓánlɔ̀n àá mi ɛ́ fi àá mi, àlɛ yá ɓɛ̀ nìnbirìe ve ɛ̀ ɓen kóo ɓánlɔ̀n àá mi iè wìe ɛ́ ɓɛ̀ saaníkɛ.»
À ńɲíkĩ́rɔ ńvɛkhũ̀áɓenlɔ́ á nìnbírɔ hũn
Mat 12.43-45
24Ɛ́ Yiezu ɛ́ zɔn bie ɛ́ nɛ làa: «Ńɲíkĩ́rɔ ɛ́ ɓen lɔ́ nìnbírɔ ǹ, à wóò vɛ bè hɔ̀ vuò lɛ hɔn ǹ ɛ̀ cɛ̀ lè ńvũùnín viì. Kɛ́ á ɓen cɛ̀ tan, à nɛ mii khũ̀á vɛ le zũnù lɛ ɛ́ mí lɔ́ hũn. 25Kɛ́ á ɓen khũ̀a van, à vɛ yí lé zũnù sɔ kɛ́ lé tàa ɛ́ wookɛa sãa sãa. 26À khũ̀á lan vɛ fé ɓá ńkɔhĩ́ ńɲíkĩ́nìɛ hùuɲu lɛ mɛkɛ̃nɲiì wi pɔ a ɛ̀ páa mí lɔ̀n, ɛ̀ ɓɛ̀ ɓen lè zũnù sɔ hũn, ɛ̀ zɔ páaní kansí yán. Ɛ̀ ɓàasɔ bòo lɛ á dàa hṹn dɛ̃̀ ɛ̀ bĩní wóokɛ kɛ̃́nkɛ̃́nlɔ́.»
Ɓɛ̀lɛ ɛ́ wóo vɛ bè Dɔfĩn biehĩ́ ǹ ɛ́ ɲúuhɛ̃ tĩ
27Ɛ́ hɔ́ lɛ ɛ́ Yiezu ɛ́ bie kɛ̀amu, ɛ́ hṹnu dɔ̀ ɓɛ̀ nìzã̀amáa hũn ɛ́ zɔn bérɛ ɛ́ nɛ: «À hṹnu lɛ te kɔ púo tù à lɛ́ mí yenlè kɔ ǹ ɛ́ kɔ́ yìɛ ɛ́ hɛ̀ ɲún tĩ!» 28Ɛ́ Yiezu ɛ́ zɔn bie nɛ làa: «Ũun! Kɛ́ ɓɛ́ nìnbirìe lɛ wóò ɲí lé Dɔfĩn bienù ɛ̀ ɓɛ̀ vɛ bè lè ǹ ɛ́ temu hɛ̀ ɲúuhɛ̃ wookɛa tĩ.»
Bòo lɛ ɛ́ Yiezu dàa pɛ̃́ nɛ mí yá wé yéréké bòo dɔ̀
Mat 12.38-42
29Ɛ́ hɔ́ lɛ ɛ́ ɓɛ́ nìzã̀amáa ɛ́ ɓɛrɛ ɛ́ Yiezu ɛ̀ kírínin, á zɔn bie lɛ́ ɓà ǹ ɛ́ nɛ làa: «Ɓɛ̀pe zoòni nìɛ sɔ lɛ ɛ́ hɛ̀ yí sãa hùúu! Yéréké bòo lɛ ɛ́ Dɔfĩn pànkɛ́ ɛ̀ zɛ̃́ní iè pe ɛ́ ɓɛ́ wóo nɛ ɓɛ ɛ̀ mi. Kɛ́ yéréké bòo dɔ̀ ɛ́ yí mii wé lɛ́ ɓà ǹ kɛ́ Dɔfĩn bɔ̀háanírɔ Zonaasi bòo lɛ hàarí wɔ́ à ǹ ɛ́ ɓen bòo mí. 30Kɛ̀a bòo lɛ ɛ́ hɔ́ bòo lɛ hàarí wɔ́ á Zonaasi ǹ ɛ́ dàa hàarí iè yéréké lɛ ɛ́ Dɔfĩn pànkɛ́ ɛ́ zɛ̃́ní ɓɛ́ Niniive siè yìe hũn, á Nìnbírɔ Zuú bòo ɛ́ ɓiɛ̀ ɓén wé yéréké lɛ ɛ́ Dɔfĩn pànkɛ́ ɛ̀ zɛ̃́ní hɔ̀pe zoòni lɛ nìɛ yìe hũn. 31Pɛ̃̀hṹ lɛ kɛ́ Dɔfĩn mii lè ɓɛ̀ nìnbirìe lìe, á Sabaa cɛ̃̀mɛ̀nɛ́ bɛ́hãá ɛ́ ɓén síɛ hĩ́ní ɛ́ bie nɛ hɔ̀pe zoòni lɛ nìɛ ɛ́ wɔ́ khɔn, iè hɔ̀ lɛ ápe ɛ́ hàarí van lɔ́ viì lɛ ni ni ɛ́ dàa ɓɛrɛ ɲɛ́ á Salomɔn bɔ̀dũmunù biehĩ́. Ápe nìnbírɔ lɛ wi hũ̀nún ɛ́ den pɔ ape Salomɔn. 32Pɛ̃̀hṹ lɛ kɛ́ Dɔfĩn mii lè ɓɛ̀ nìnbirìe lìe, ɛ́ Niniive lóo siè ɛ́ ɓén síɛ hĩ́ní ɛ́ bie nɛ hɔpe zoòni lɛ nìɛ ɛ́ wɔ́ khɔn, iè hɔ̀ lɛ ɛ́ ɓɛ́pe Niniive siè ɛ́ hàarí zɛ̀niɛ ɓɛ́ bɔ̀werà pɛ̃̀hṹ lɛ ɛ́ ɓɛ́ dàa ɲɛ́ á Zonaasi bòo lɛ á hàarí buie peɓɛ̀ lóo hũn. Ápe nìnbírɔ lɛ wi hũ̀nún ɛ́ den pɔ ape Zonaasi.»
Nìnbírɔ tɛkɛ̀a pɛ̃̀ntĩ́ní bòo
Mat 5.15; 6.22-23
33Ɛ́ Yiezu ɛ́ bĩniɛ zɔn bie ɛ́ nɛ làa: «Nìnbírɔ ɛ́ yáà ɲíi pɛ̃̀ntĩ́ní ɛ̀ khíi vɛ tànkɛ̀ní, tàá ɛ̀ khíi vɛ dé sóo fìi hũn wɛ̀. Kɛ́ á den wóò yòó bìsí lé mí bènlén, ɛ̀ ɓɛ̀lɛ ɛ̀ lè zũnù zɔ̀ ɛ̀ dàá mi hɔ ńpiemu. 34Nìnbírɔ yìi ɛ́ temu iè piè tɛkɛ̀a pɛ̃̀ntĩ́ní. Kɛ́ kɔ́ yìi ɛ́ dɛ̃̀ sãa, ɛ̀ kɔ̀ tɛkɛ̀a míkùi ɛ́ wi ńpiemu hũn. Kɛ́ kɔ́ yìi ɛ́ yí sãa, hɔ́rɔsí ɛ̀ kɔ̀ tɛkɛ̀a míkùi ɛ́ wi síbínú hũn. 35Ɛ́ si iè hɔ̀pe ɛ́ kɔ́ dàa ɓɛ́ɓɛ́ kɔ́te ǹ nɛ hɔ ńpiemu lɛ wi kɔ ǹ ɛ̀ bí wé síbínú wɛ̀. 36Kɛ́ kɔ́ tɛkɛ̀a míkùi ɛ́ hɔ́ ńpiemu ɛ́ cienínin, lɛ kɛ́ sɛnù dɔ̀ ɛ́ mí síbínú hũn, ɛ́ hɔ́pe kɔ̀ tɛkɛ̀a míkùi ɛ́ kań hɔ́pe ńpiemu hũn, kɛ̀a bòo lɛ ɛ́ lé pɛ̃̀ntĩ́ní dàa wóò ciení kɔ̀ ǹ àá mí ńpiemu bòo sí.»
Bòo lɛ ɛ́ Yiezu dàa ɛ́ fi àá ɓɛ́ Farizĩɛɓɛ àá ɓɛ́ làndɛ́ kɛ̀ránliè
Mat 23.1-36; Mar 12.38-40
37Ɛ́ hɔ́ lɛ ɛ́ Yiezu ɛ́ bie vɔ́, ɛ́ Farizĩɛ dɔ̀ ɛ́ khie vɔn ɔ̀ nɛ a ɓen dí bòo mí yíe. Ɛ́ Yiezu ɛ́ khie van piè yíe, ɛ́ van zɔn kɛsí ɛ́ dí. 38Á Farizĩɛ sɔ mii húi ɛ̀ Yiezu ɛ́ dí kɛ́ á yí tiɛ míte vé kɛ̀a bòo lɛ ɛ́ ɓà làndɛ́ dàa khɛ́ hɔ́ wɛ̀. Ɛ́ hɔ́ hɛ̀ yòokɛ̀a piè lɔ̀n. 39Ɛ́ Ɲunsɔ Yiezu ɛ́ zɔn bie lɛ́ à ǹ nɛ làa: «Mìpe Farizĩɛɓɛ, mí wóò wé lé ɲunlán dìɛ àá lé díe dìɛ máahṹ ɛ̀ mì tiɛ, kɛ́ mí hũn den zɔn tú àá kɛ̃̀míhĩ́ pɔnù àá mɛkɛ̃nɲiì. 40Mí hɛ̀ iè bɛ̃́nbṹa àá bɔ̀bín! Mí yí dũ kɛ́ Dɔfĩn lɛ te le máahṹ mɛ́ ɛ́ lò ɓiɛ̀ te le hũn ɛ́ zɔn mɛ́? 41Ɛ́ hɔ́ bòo lɛ wi mi ɲunlán tĩ̀ɛ hũn àá hɔ́lɛ wi mí díe tĩ̀ɛ hũn iè pe mí lɛ́ ɓɛ́ nìkherà ǹ, ɛ́ hɔ́ bòo míkùi ɛ́ den ɛ́ ce mi viì. 42Mì yìi ɓén mi hɔ mìpe Farizĩɛɓɛ, iè hɔ̀ lɛ ɛ́ hɔ́ zĩ́n-ɲɛkɛ̃̀a àá hɔ́ bòo lɛ ɛ́ mí wóò vɛ̀ lè kɔnlɔ́ hũn míkùi bòo pírú ɲún-cóoní ɛ́ mí wóò leń ɛ̀ lɛ́ Dɔfĩn, kɛ́ hɔ́ den ɓen kɛ́ hɔ́ bòo lɛ ɛ́ ɓɛ́ nɛ mi cã̀aní àá ɓɛ́ nìnbiriè ɛ̀ mì lò wɛní Dɔfĩn, ɛ̀ mì den ɛ́ hɔ́rɔ ɛ̀ khɛ̀ránkɛ mi zehĩ́ hũn. Kɛ́ sí lò den iè hɔ̀lɛ ɛ́ mí hṹn fɔ́ɓán ɛ̀ mì wé, lɛ kɛ́ mí lò yí fùansí hɔ́pe sí kɛ́ ǹ wɛ̀. 43Mìpe Farizĩɛɓɛ mì yìi ɓén mi hɔ! Iè hɔ̀ lɛ ɛ́ hɔ́ hán kaǹsílénɓɛ̀ iè pe ɛ́ mí wɛ hɔ̀ mì ńkooɓánlɔ̀n zĩhĩ́ɛ hũn, ɛ̀ mì lò bĩníɛ wɛ nɛ ɓɛ nìnbirìe wóo hùenkɛsí ɛ̀ fòoníkɛ miɛ hɔ̀ fɔ́hĩ́ hũn. 44Mì yìi ɓén mi hɔ, iè hɔ̀ lɛ ɛ́ mí kɛkɛà hɔ búo lɛ ɓɛ́ nìnbirìe yáà dé bòo, ɛ̀ ɓɛ̀ vɛ khíi pehɔ̀ lɔ̀n kɛ́ ɓɛ́ yí dũ hɔ wɛ̀.»
45Ɛ́ Moyiize làndɛ́ kɛ̀ránlɔ dɔ̀ ɛ́ zɔn bie lɛ́ Yiezu nɛ làa: «Kɛ̀ránlɔ, kɔ ɓen khɛ́ kɛ̀amu ɛ̀ hɔ̀ lò ɓiɛ̀ iè kèpe ɛ́ kɔ́ ɛ́ tòokɛ lò!» 46Ɛ́ Yiezu zɔn kɔ̃́niɛ ɔ̀ ɛ́ nɛ làa: «Mì yìi lò ɓiɛ̀ ɓén mi hɔ mìpe làndɛ́ kɛ̀ránliè! Iè hɔ̀ lɛ ɛ́ mí wóò bè hɔ̀ tìerɔ́ lɛ lùkúkú ɓɛ̀ nìnbirìe lɔ̀n, kɛ́ mí den yáà tɛ̀ nɛ mi nínkɛ́zuú ɛ̀ hɛ hɔ̀ ǹ wɛ̀. 47Mì yìi ɓén mi hɔ, iè hɔ̀ lɛ ɛ́ mí wóò te ɓɛ Dɔfĩn bɔ̀háaníriè búo sãa sãa, kɛ́ ɓɛ́ lò iè mì zĩkĩ́nɓɛ̀ ɛ́ te ɓɛ́pe bɔ̀háaníriè sɔ ɛ́ ɓɔ́. 48Ɛ́ mí iè biè ɛ́ zɛ̃́ní kɛ́ mí tɛ̀ mì zĩkĩ́nɓɛ̀ bòo lɛ ɛ́ ɓɛ́ wɔ́ lò! Iè hɔ̀ lɛ ɛ́ ɓɛ́pe ɛ́ ɓɔ́ ɓɛ́ Dɔfĩn bɔ̀háaníriè, ɛ̀ mìpe ɛ́ ɓiɛ̀ te peɓɛ̀ búo ɛ̀ te. 49Ɛ́ sí iè hɔ̀pe ɛ́ Dɔfĩn lɛ dũ bòo míkùi ɛ́ dàa hàarí khɛ́ hɔ́ ɛ́ nɛ làa: “Nin tɔn niǹ bɔ̀háaníriè àá niǹ tɔnkɛriè nɛ ɓɛ vɛ peɓɛ̀ viì. Ɛ́ ɓɛ́ ɓén vɛ ɓé ɓɛ́dɔ̀, ɛ̀ ɓɛ̀dɔ̀ ɛ́ ɓɛ́ ɛ́ vɛ́ ɲɛkɛ̃̀a.” 50Ɛ́ Dɔfĩn ɓén dìe ɓɛpe bɔ̀háaníriè sɔ cãani bòo àá hɔ́pe zoòni lɛ nìɛ, ɓɛ̀pe bɔ̀háaníriè lɛ ɛ́ ɓɛ́ ɓɔ́ ɓɛ́kùi ɛ̀ dàá vɛ mìí lé dímíɲɛ́ mínlɔ̀ ǹ. 51Ɛ̀ dàá vɛ mìí ɔ́ Abɛɛle ɓénlɔ́ yìi ǹ fúu ɛ̀ ɓen bì-è Zɛkɛri lɛ ɛ́ ɓɛ́ hàarí ɓɔ́ lé miyiɛ́ leǹlén dúekéré àá lé Dɔfĩn zũ-bɛhɔ́ pɛ̃̀ntĩ́ihṹ. Ũun, nín khɛ́ hɔ́ lɛ́ miɛ ǹ, nɛ Dɔfĩn ɓén dìe ɓɛpe sí ɓɛ́kùi cãani bòo àá hɔpe zoòni lɛ nìɛ. 52Mì yìi ɓén mi hɔ mìpe làndɛ́ kɛ̀ránliè! Iè hɔ̀ lɛ ɛ́ lé hĩì lɛ wóò hán hɔ́ bɔ̀dũmunù ɲunù ɛ́ mí te mɔ̀. Mí lò yá cɛ̀ mii zɔ, ɛ̀ mì lò sun ɓɛ̀lɛ ɛ́ cɛ̀ ɛ́ ɓɛ zɔ nɛ ɓɛ bí zɔ wɛ̀.» 53Ɛ́ bòo lɛ ɛ́ Yiezu zɔn lɔ́ á Farizĩɛ nùún sɔ zũnù hũn, ɛ́ ɓɛ́ làndɛ́ kɛ̀ránliè àá ɓɛ́ Farizĩɛɓɛ ɛ́ hɛ̀ tĩɛ̀ sun sun àá ɔ́, ɛ́ ɓɛ́ ɔ̀ dìekɛnin àá bòo cɛ̀rìɛɛ. 54Ɛ̀ ɓɛ̀ hṹn piè biehĩ́ ɛ̀ cĩ́, ɛ́ wɛ nɛ ɓɛ yí ben-koohɔ́ dɔ̀ lɛ mii lé àá piè ɲunù.
Currently Selected:
Liike 11: bwj
Highlight
Share
Copy
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation
Liike 11
11
Yiezu ɛ́ mí kɛ̀ránzɛ̀ɓɛ̀ ɛ̀ kɛ̀rán àá Dɔfĩn hɛ̃nnɛ̀
Mat 6.9-13; 7.7-11
1Ɛ́ wurù dɔ̀ zɔn, ɛ́ Yiezu ɛ́ Dɔfĩn ɛ̀ hɛ̃nnin viì dɔ̀. Ɛ́ bòo lɛ á hɛ̃nnɛ vɔ, ɛ́ piè kɛ̀ránzuú dɔ̀ ɛ́ zɔn bie lɛ́ à ǹ nɛ làa: «Ɲunsɔ, kení kie àá Dɔfĩn hɛ̃nnɛ̀ kɛ̀a bòo lɛ á Zãn ɛ́ dàa keniɛ hɔ̀ àá mí kɛ̀ránzɛ̀ɓɛ̀.» 2Ɛ́ Yiezu zɔn bie lɛ́ ɓà ǹ nɛ làa: «Mí ɓen mii hɛ̃un Dɔfĩn ɛ̀ mì wóo bie nɛ làa:
“Kìe Yàá,
Lɛ́ nɛ nìnbirìe ɛ̀ dũń kɛ́ kɔ́ iè Dɔfĩn lɛ ɛ́ ce;
Lɛ́ nɛ kɔ bɛ́záanú ɛ̀ ɓen síɛ.
3Wóo lɛ́ ké ɲunù dínlɔ́ kie ǹ sítĩnlɔ́ àá sítĩnlɔ́.
4Dé ké bɔ̀koohɛ̃ sɛ́wɛ́rí ɛ̀ lɛ́ kie ǹ, iè hɔ̀ lɛ ké ɓiɛ̀ wóò dé sɛ́wɛ́rí ɛ̀ lɛ́ ɓɛ́lɛ ɛ́ wɔ́ khɔn àá kie;
Ɛ̀ kɔ̀ bí fùansí kie ǹ hɔ̀ hàanírɔ́ hũn wɛ̀.”»
5Ɛ́ Yiezu bĩniɛ zɔn bie lɛ́ ɓà ǹ nɛ làa: «Ɛ́ mí húi lò! Mìpe mì tĩ́ihṹ kɛ́ ádɔ̀ ɛ́ dàa pàá, kɛ́ á hĩ́nà van ɓá pàá sɔ viì hɔ̀ sínɛ̀hɛ̃ǹ, ɛ́ van ɓánɓɛ́a piè dìɛ à bie lɛ́ à ǹ nɛ làa: “Kè pàá, hĩ́ní ke díe bìcínbóo lɛ́ mi ǹ. 6Kè pàá dɔ̀ ɛ́ lɔ́ wṹn lɔ̀n ɛ́ ɓɛrɛ dɛ̃un niǹ yíe, kɛ́ ń den yí dàa bòo lɛ ɛ́ nin lɛ à ǹ wɛ̀.” 7Ɛ́ mí húi, kɛ́ ɓà pàá sɔ lɛ zɔn wi mí zũnù hũn ɛ́ zɔn bie lɛ́ à ǹ nɛ: “Bí kɛ́bí mi wɛ̀. Lè zĩínù ɲunù ɛ́ pɔn vɔ́, ɛ̀ ǹpe àá niǹ nìɛ ɛ́ dũmua, ɛ́ ń yí dɛ̀ díe ɛ́ yá hĩ́ní cɛ̀ ɛ́ lɛ́ kɔ̀ ǹ wɛ̀.” 8Ɛ́ nin bie hɔ lɛ́ miɛ ǹ nɛ hɛ̀rí kɛ́ á yí mii hĩ́ní lɛ́ hɔ́ díe ɔ̀ ǹ iè hɔ̀ lɛ á iè ɓà pàá, á ɓén hĩ́ní lɛ́ bòo lɛ á ɛ́ cɛ̀ míkùi ɔ̀ ǹ, iè hɔ̀ lɛ á dɛ̃̀ ɔ̀ kɛ́bí. 9Ɛ́ ńpe ɛ́ bie àá miɛ nɛ mi wóo hɛ̃un Dɔfĩn, ɛ́ Hɔ́ ɛ́ lɛ́ bòo miɛ ǹ, ɛ̀ mì cɛ̀, ɛ́ mí ɛ́ mi, ɛ̀ mì ɓánɓɛ́ lé zĩínù, ɛ́ ɓɛ́ ɛ́ hán lé ɛ́ lɛ́ miɛ ǹ. 10Iè hɔ̀ lɛ ɛ́ nìnbírɔ lɛ wòó hɛ̃un ɛ́ wóò yí, àlɛ ɛ́ wòó cɛ̀ ɛ́ wóò mi, àlɛ wòó ɓánɓɛ́ lé zĩínù ɛ́ ɓɛ́ wóò hán lé ɛ̀ lɛ́ nin. 11À yàá hɔ̀sɔ́ mì tĩ́ihṹ ɛ́ temu ɛ́ tɛ̀ ɛ́ khíi lɛ́ hóonú mí zuú ǹ, kɛ́ á lò iè cɔ á hɛ̃nnɛ piè viì? 12Tàá à tɛ̀ ɛ́ khíi lɛ́ naa ɔ̀ ǹ kɛ́ lé lò iè fũì á hɛ̃nnɛ? 13Ɛ́ mípe lɛ iè ɓɛ̀ mɛkɛ̃nɲiì ɓàasiè ɛ́ ɓen dũ bòo lɛ sãa ɛ́ wóò lɛ́ mí nìɛ ǹ, ɛ̀ mì dũń sãàní kɛ́ mì Yàá lɛ yòó wi hɔ hóohũn ɛ́ ɓén lɛ́ lé Mɛkɛ̃n-Sãanu ɓɛ̀lɛ ɛ́ lè hɛ̃nnin piè viì?»
Yiezu pànkɛ́ wi pɔ Sitũanɛ
Mat 12.22-30; Mar 3.22-27
14Yiezu ɛ́ hàarí ɛ́ ńɲíkĩ́rɔ dɔ̀ ɛ̀ ɲɛ líení nùún dɔ̀ ǹ. À ńɲíkĩ́rɔ sɔ ɛ́ hàarí lɛ́ á nùún sɔ ɛ́ yí dɛ̀ yáà bie wɛ̀. Ɛ́ hɔ́ lɛ á ńɲíkĩ́rɔ sɔ ɛ́ lɔ́, á nùún ɛ́ wo yú bie. Ɛ́ hɔ́ hɛ̀ yòokɛa ɓɛ̀ nìnbirìe lɔ̀n. 15Kɛ́ ɓɛ́dɔ̀ ɛ́ pe khie bie nɛ làa: «À iè Bɛlizebuule#11.15 Bɛlizebuule ɛ́ iè Sitũanɛ yèrè dɔ̀. lɛ iè ɓɛ̀ ńɲíkĩ́nìɛ bɛ́zuú ɛ́ te hɔ pànkɛ́ lɛ́ à ǹ á dàa ɓɛ̀ ńɲíkĩ́nìɛ ɛ̀ ɲɛ.» 16Ɛ̀ ɓɛ̀dɔ̀ ɛ́ hṹn cɛ̀ nɛ ɓɛ́ vĩ Yiezu mí biehĩ́ hũn, ɛ́ ɓɛ́ nɛ á wé yéréké bòo dɔ̀ lɛ ɛ́ zɛ̃́ní kɛ́ á lɔ́ Dɔfĩn viì nɛ ɓɛ́ mi. 17Kɛ́ Yiezu den dũ peɓɛ̀ hũn bòo, á zɔn bie lɛ́ ɓà ǹ nɛ làa: «Kɛ́ bɛ́záanú dɔ̀ nìɛ ɛ́ hɔ̀ hĩɛ̀ tɛ́ ɓán hũn ɛ́ lé bɛ́záanú sɔ ɛ́ wua, ɛ̀ pelè zĩhĩɛ́ ɛ́ ɓúukɛ síɛ ɓán hũn lò. 18Kɛ́ Sitũanɛ máahṹ nìɛ ɛ́ ɓen ɛ́ hɔ̀ hĩɛ̀ tɛ́ ɓán hũn, ɛ́ piè bɛ́záanú sɔ ɛ́ wo wiɛ dàa dɛ̀ wé yán, ɛ́ mí dàa nɛ nín ɓɛ̀ ńɲíkĩ́nìɛ ɛ̀ ɲɛ àá Bɛlizebuule pànkɛ́? 19Kɛ́ ńpe ɛ́ ɓen ɛ́ ɓɛ̀ ńɲíkĩ́nìɛ ɛ̀ ɲɛ àá Bɛlizebuule pànkɛ́, ɛ̀ mìpe mì nìɛ ɛ́ pe wóò ɲɛ ɓɛ àá wieni pànkɛ́? Ɛ́ sí iè hɔ̀ pe ɛ́ ɓɛ́pe mì nìɛ ɛ́ dàa te mi lìe ɛ́ ɓén lè. 20Kɛ́ hɔ́ lɛ ɛ́ hɔ́ iè Dɔfĩn pànkɛ́ ɛ́ ń dàa ɛ́ ɓɛ̀ ńɲíkĩ́nìɛ ɛ̀ ɲɛ, ɛ́ Dɔfĩn bɛ́záanú ɛ́ iè pe wo ɓɛrɛ dɛ̃un mì viì vɔ́. 21Kɛ́ nìnbírɔ lɛ pànkɛ́ wi ɛ́ can mí hĩɛ̀ tĩ̀ɛ ɛ́ dàa ɛ́ mí zũnù ɛ̀ hìénin míte ǹ, ɛ́ piè zũnù tĩ̀ɛ míkùi ɛ́ bòo dɔ̀ ɛ́ yí dɛ̀ yá wé wɛ̀. 22Kɛ́ nìnbírɔ dɔ̀ lɛ pànkɛ́ pɔ-a ɛ́ van ɓɛrɛ ɛ́ ɓen dɛrɛ-à, á ɛ́ vúa piè hĩɛ̀ tĩ̀ɛ lɛ á sieniɛ àá mí ɲún, à dí piè zũnù tĩ̀ɛ míkùi ɛ́ khíi sankɛ lɛ́ yán. 23Àlɛ ɛ́ mí ɓánlɔ̀n àá mi ɛ́ fi àá mi, àlɛ yá ɓɛ̀ nìnbirìe ve ɛ̀ ɓen kóo ɓánlɔ̀n àá mi iè wìe ɛ́ ɓɛ̀ saaníkɛ.»
À ńɲíkĩ́rɔ ńvɛkhũ̀áɓenlɔ́ á nìnbírɔ hũn
Mat 12.43-45
24Ɛ́ Yiezu ɛ́ zɔn bie ɛ́ nɛ làa: «Ńɲíkĩ́rɔ ɛ́ ɓen lɔ́ nìnbírɔ ǹ, à wóò vɛ bè hɔ̀ vuò lɛ hɔn ǹ ɛ̀ cɛ̀ lè ńvũùnín viì. Kɛ́ á ɓen cɛ̀ tan, à nɛ mii khũ̀á vɛ le zũnù lɛ ɛ́ mí lɔ́ hũn. 25Kɛ́ á ɓen khũ̀a van, à vɛ yí lé zũnù sɔ kɛ́ lé tàa ɛ́ wookɛa sãa sãa. 26À khũ̀á lan vɛ fé ɓá ńkɔhĩ́ ńɲíkĩ́nìɛ hùuɲu lɛ mɛkɛ̃nɲiì wi pɔ a ɛ̀ páa mí lɔ̀n, ɛ̀ ɓɛ̀ ɓen lè zũnù sɔ hũn, ɛ̀ zɔ páaní kansí yán. Ɛ̀ ɓàasɔ bòo lɛ á dàa hṹn dɛ̃̀ ɛ̀ bĩní wóokɛ kɛ̃́nkɛ̃́nlɔ́.»
Ɓɛ̀lɛ ɛ́ wóo vɛ bè Dɔfĩn biehĩ́ ǹ ɛ́ ɲúuhɛ̃ tĩ
27Ɛ́ hɔ́ lɛ ɛ́ Yiezu ɛ́ bie kɛ̀amu, ɛ́ hṹnu dɔ̀ ɓɛ̀ nìzã̀amáa hũn ɛ́ zɔn bérɛ ɛ́ nɛ: «À hṹnu lɛ te kɔ púo tù à lɛ́ mí yenlè kɔ ǹ ɛ́ kɔ́ yìɛ ɛ́ hɛ̀ ɲún tĩ!» 28Ɛ́ Yiezu ɛ́ zɔn bie nɛ làa: «Ũun! Kɛ́ ɓɛ́ nìnbirìe lɛ wóò ɲí lé Dɔfĩn bienù ɛ̀ ɓɛ̀ vɛ bè lè ǹ ɛ́ temu hɛ̀ ɲúuhɛ̃ wookɛa tĩ.»
Bòo lɛ ɛ́ Yiezu dàa pɛ̃́ nɛ mí yá wé yéréké bòo dɔ̀
Mat 12.38-42
29Ɛ́ hɔ́ lɛ ɛ́ ɓɛ́ nìzã̀amáa ɛ́ ɓɛrɛ ɛ́ Yiezu ɛ̀ kírínin, á zɔn bie lɛ́ ɓà ǹ ɛ́ nɛ làa: «Ɓɛ̀pe zoòni nìɛ sɔ lɛ ɛ́ hɛ̀ yí sãa hùúu! Yéréké bòo lɛ ɛ́ Dɔfĩn pànkɛ́ ɛ̀ zɛ̃́ní iè pe ɛ́ ɓɛ́ wóo nɛ ɓɛ ɛ̀ mi. Kɛ́ yéréké bòo dɔ̀ ɛ́ yí mii wé lɛ́ ɓà ǹ kɛ́ Dɔfĩn bɔ̀háanírɔ Zonaasi bòo lɛ hàarí wɔ́ à ǹ ɛ́ ɓen bòo mí. 30Kɛ̀a bòo lɛ ɛ́ hɔ́ bòo lɛ hàarí wɔ́ á Zonaasi ǹ ɛ́ dàa hàarí iè yéréké lɛ ɛ́ Dɔfĩn pànkɛ́ ɛ́ zɛ̃́ní ɓɛ́ Niniive siè yìe hũn, á Nìnbírɔ Zuú bòo ɛ́ ɓiɛ̀ ɓén wé yéréké lɛ ɛ́ Dɔfĩn pànkɛ́ ɛ̀ zɛ̃́ní hɔ̀pe zoòni lɛ nìɛ yìe hũn. 31Pɛ̃̀hṹ lɛ kɛ́ Dɔfĩn mii lè ɓɛ̀ nìnbirìe lìe, á Sabaa cɛ̃̀mɛ̀nɛ́ bɛ́hãá ɛ́ ɓén síɛ hĩ́ní ɛ́ bie nɛ hɔ̀pe zoòni lɛ nìɛ ɛ́ wɔ́ khɔn, iè hɔ̀ lɛ ápe ɛ́ hàarí van lɔ́ viì lɛ ni ni ɛ́ dàa ɓɛrɛ ɲɛ́ á Salomɔn bɔ̀dũmunù biehĩ́. Ápe nìnbírɔ lɛ wi hũ̀nún ɛ́ den pɔ ape Salomɔn. 32Pɛ̃̀hṹ lɛ kɛ́ Dɔfĩn mii lè ɓɛ̀ nìnbirìe lìe, ɛ́ Niniive lóo siè ɛ́ ɓén síɛ hĩ́ní ɛ́ bie nɛ hɔpe zoòni lɛ nìɛ ɛ́ wɔ́ khɔn, iè hɔ̀ lɛ ɛ́ ɓɛ́pe Niniive siè ɛ́ hàarí zɛ̀niɛ ɓɛ́ bɔ̀werà pɛ̃̀hṹ lɛ ɛ́ ɓɛ́ dàa ɲɛ́ á Zonaasi bòo lɛ á hàarí buie peɓɛ̀ lóo hũn. Ápe nìnbírɔ lɛ wi hũ̀nún ɛ́ den pɔ ape Zonaasi.»
Nìnbírɔ tɛkɛ̀a pɛ̃̀ntĩ́ní bòo
Mat 5.15; 6.22-23
33Ɛ́ Yiezu ɛ́ bĩniɛ zɔn bie ɛ́ nɛ làa: «Nìnbírɔ ɛ́ yáà ɲíi pɛ̃̀ntĩ́ní ɛ̀ khíi vɛ tànkɛ̀ní, tàá ɛ̀ khíi vɛ dé sóo fìi hũn wɛ̀. Kɛ́ á den wóò yòó bìsí lé mí bènlén, ɛ̀ ɓɛ̀lɛ ɛ̀ lè zũnù zɔ̀ ɛ̀ dàá mi hɔ ńpiemu. 34Nìnbírɔ yìi ɛ́ temu iè piè tɛkɛ̀a pɛ̃̀ntĩ́ní. Kɛ́ kɔ́ yìi ɛ́ dɛ̃̀ sãa, ɛ̀ kɔ̀ tɛkɛ̀a míkùi ɛ́ wi ńpiemu hũn. Kɛ́ kɔ́ yìi ɛ́ yí sãa, hɔ́rɔsí ɛ̀ kɔ̀ tɛkɛ̀a míkùi ɛ́ wi síbínú hũn. 35Ɛ́ si iè hɔ̀pe ɛ́ kɔ́ dàa ɓɛ́ɓɛ́ kɔ́te ǹ nɛ hɔ ńpiemu lɛ wi kɔ ǹ ɛ̀ bí wé síbínú wɛ̀. 36Kɛ́ kɔ́ tɛkɛ̀a míkùi ɛ́ hɔ́ ńpiemu ɛ́ cienínin, lɛ kɛ́ sɛnù dɔ̀ ɛ́ mí síbínú hũn, ɛ́ hɔ́pe kɔ̀ tɛkɛ̀a míkùi ɛ́ kań hɔ́pe ńpiemu hũn, kɛ̀a bòo lɛ ɛ́ lé pɛ̃̀ntĩ́ní dàa wóò ciení kɔ̀ ǹ àá mí ńpiemu bòo sí.»
Bòo lɛ ɛ́ Yiezu dàa ɛ́ fi àá ɓɛ́ Farizĩɛɓɛ àá ɓɛ́ làndɛ́ kɛ̀ránliè
Mat 23.1-36; Mar 12.38-40
37Ɛ́ hɔ́ lɛ ɛ́ Yiezu ɛ́ bie vɔ́, ɛ́ Farizĩɛ dɔ̀ ɛ́ khie vɔn ɔ̀ nɛ a ɓen dí bòo mí yíe. Ɛ́ Yiezu ɛ́ khie van piè yíe, ɛ́ van zɔn kɛsí ɛ́ dí. 38Á Farizĩɛ sɔ mii húi ɛ̀ Yiezu ɛ́ dí kɛ́ á yí tiɛ míte vé kɛ̀a bòo lɛ ɛ́ ɓà làndɛ́ dàa khɛ́ hɔ́ wɛ̀. Ɛ́ hɔ́ hɛ̀ yòokɛ̀a piè lɔ̀n. 39Ɛ́ Ɲunsɔ Yiezu ɛ́ zɔn bie lɛ́ à ǹ nɛ làa: «Mìpe Farizĩɛɓɛ, mí wóò wé lé ɲunlán dìɛ àá lé díe dìɛ máahṹ ɛ̀ mì tiɛ, kɛ́ mí hũn den zɔn tú àá kɛ̃̀míhĩ́ pɔnù àá mɛkɛ̃nɲiì. 40Mí hɛ̀ iè bɛ̃́nbṹa àá bɔ̀bín! Mí yí dũ kɛ́ Dɔfĩn lɛ te le máahṹ mɛ́ ɛ́ lò ɓiɛ̀ te le hũn ɛ́ zɔn mɛ́? 41Ɛ́ hɔ́ bòo lɛ wi mi ɲunlán tĩ̀ɛ hũn àá hɔ́lɛ wi mí díe tĩ̀ɛ hũn iè pe mí lɛ́ ɓɛ́ nìkherà ǹ, ɛ́ hɔ́ bòo míkùi ɛ́ den ɛ́ ce mi viì. 42Mì yìi ɓén mi hɔ mìpe Farizĩɛɓɛ, iè hɔ̀ lɛ ɛ́ hɔ́ zĩ́n-ɲɛkɛ̃̀a àá hɔ́ bòo lɛ ɛ́ mí wóò vɛ̀ lè kɔnlɔ́ hũn míkùi bòo pírú ɲún-cóoní ɛ́ mí wóò leń ɛ̀ lɛ́ Dɔfĩn, kɛ́ hɔ́ den ɓen kɛ́ hɔ́ bòo lɛ ɛ́ ɓɛ́ nɛ mi cã̀aní àá ɓɛ́ nìnbiriè ɛ̀ mì lò wɛní Dɔfĩn, ɛ̀ mì den ɛ́ hɔ́rɔ ɛ̀ khɛ̀ránkɛ mi zehĩ́ hũn. Kɛ́ sí lò den iè hɔ̀lɛ ɛ́ mí hṹn fɔ́ɓán ɛ̀ mì wé, lɛ kɛ́ mí lò yí fùansí hɔ́pe sí kɛ́ ǹ wɛ̀. 43Mìpe Farizĩɛɓɛ mì yìi ɓén mi hɔ! Iè hɔ̀ lɛ ɛ́ hɔ́ hán kaǹsílénɓɛ̀ iè pe ɛ́ mí wɛ hɔ̀ mì ńkooɓánlɔ̀n zĩhĩ́ɛ hũn, ɛ̀ mì lò bĩníɛ wɛ nɛ ɓɛ nìnbirìe wóo hùenkɛsí ɛ̀ fòoníkɛ miɛ hɔ̀ fɔ́hĩ́ hũn. 44Mì yìi ɓén mi hɔ, iè hɔ̀ lɛ ɛ́ mí kɛkɛà hɔ búo lɛ ɓɛ́ nìnbirìe yáà dé bòo, ɛ̀ ɓɛ̀ vɛ khíi pehɔ̀ lɔ̀n kɛ́ ɓɛ́ yí dũ hɔ wɛ̀.»
45Ɛ́ Moyiize làndɛ́ kɛ̀ránlɔ dɔ̀ ɛ́ zɔn bie lɛ́ Yiezu nɛ làa: «Kɛ̀ránlɔ, kɔ ɓen khɛ́ kɛ̀amu ɛ̀ hɔ̀ lò ɓiɛ̀ iè kèpe ɛ́ kɔ́ ɛ́ tòokɛ lò!» 46Ɛ́ Yiezu zɔn kɔ̃́niɛ ɔ̀ ɛ́ nɛ làa: «Mì yìi lò ɓiɛ̀ ɓén mi hɔ mìpe làndɛ́ kɛ̀ránliè! Iè hɔ̀ lɛ ɛ́ mí wóò bè hɔ̀ tìerɔ́ lɛ lùkúkú ɓɛ̀ nìnbirìe lɔ̀n, kɛ́ mí den yáà tɛ̀ nɛ mi nínkɛ́zuú ɛ̀ hɛ hɔ̀ ǹ wɛ̀. 47Mì yìi ɓén mi hɔ, iè hɔ̀ lɛ ɛ́ mí wóò te ɓɛ Dɔfĩn bɔ̀háaníriè búo sãa sãa, kɛ́ ɓɛ́ lò iè mì zĩkĩ́nɓɛ̀ ɛ́ te ɓɛ́pe bɔ̀háaníriè sɔ ɛ́ ɓɔ́. 48Ɛ́ mí iè biè ɛ́ zɛ̃́ní kɛ́ mí tɛ̀ mì zĩkĩ́nɓɛ̀ bòo lɛ ɛ́ ɓɛ́ wɔ́ lò! Iè hɔ̀ lɛ ɛ́ ɓɛ́pe ɛ́ ɓɔ́ ɓɛ́ Dɔfĩn bɔ̀háaníriè, ɛ̀ mìpe ɛ́ ɓiɛ̀ te peɓɛ̀ búo ɛ̀ te. 49Ɛ́ sí iè hɔ̀pe ɛ́ Dɔfĩn lɛ dũ bòo míkùi ɛ́ dàa hàarí khɛ́ hɔ́ ɛ́ nɛ làa: “Nin tɔn niǹ bɔ̀háaníriè àá niǹ tɔnkɛriè nɛ ɓɛ vɛ peɓɛ̀ viì. Ɛ́ ɓɛ́ ɓén vɛ ɓé ɓɛ́dɔ̀, ɛ̀ ɓɛ̀dɔ̀ ɛ́ ɓɛ́ ɛ́ vɛ́ ɲɛkɛ̃̀a.” 50Ɛ́ Dɔfĩn ɓén dìe ɓɛpe bɔ̀háaníriè sɔ cãani bòo àá hɔ́pe zoòni lɛ nìɛ, ɓɛ̀pe bɔ̀háaníriè lɛ ɛ́ ɓɛ́ ɓɔ́ ɓɛ́kùi ɛ̀ dàá vɛ mìí lé dímíɲɛ́ mínlɔ̀ ǹ. 51Ɛ̀ dàá vɛ mìí ɔ́ Abɛɛle ɓénlɔ́ yìi ǹ fúu ɛ̀ ɓen bì-è Zɛkɛri lɛ ɛ́ ɓɛ́ hàarí ɓɔ́ lé miyiɛ́ leǹlén dúekéré àá lé Dɔfĩn zũ-bɛhɔ́ pɛ̃̀ntĩ́ihṹ. Ũun, nín khɛ́ hɔ́ lɛ́ miɛ ǹ, nɛ Dɔfĩn ɓén dìe ɓɛpe sí ɓɛ́kùi cãani bòo àá hɔpe zoòni lɛ nìɛ. 52Mì yìi ɓén mi hɔ mìpe làndɛ́ kɛ̀ránliè! Iè hɔ̀ lɛ ɛ́ lé hĩì lɛ wóò hán hɔ́ bɔ̀dũmunù ɲunù ɛ́ mí te mɔ̀. Mí lò yá cɛ̀ mii zɔ, ɛ̀ mì lò sun ɓɛ̀lɛ ɛ́ cɛ̀ ɛ́ ɓɛ zɔ nɛ ɓɛ bí zɔ wɛ̀.» 53Ɛ́ bòo lɛ ɛ́ Yiezu zɔn lɔ́ á Farizĩɛ nùún sɔ zũnù hũn, ɛ́ ɓɛ́ làndɛ́ kɛ̀ránliè àá ɓɛ́ Farizĩɛɓɛ ɛ́ hɛ̀ tĩɛ̀ sun sun àá ɔ́, ɛ́ ɓɛ́ ɔ̀ dìekɛnin àá bòo cɛ̀rìɛɛ. 54Ɛ̀ ɓɛ̀ hṹn piè biehĩ́ ɛ̀ cĩ́, ɛ́ wɛ nɛ ɓɛ yí ben-koohɔ́ dɔ̀ lɛ mii lé àá piè ɲunù.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation