Liike 13
13
Mì zɛ̀ní mí bɔ̀werà kɛ́ dàa bòo mí ɛ́ mí ɓén hí
1Ɛ́ pehɔ̀ yìi hũn, ɛ́ nìnbirìe dɔ̀ ɛ́ ɓɛrɛ yú Yiezu ɛ̀ ɓɛ̀ bie bòo lɛ ɛ́ Pilaate hàarí wɔ́ àá ɓɛ́ Kalile nìɛ dɔ̀ ɛ́ lɛ́ à ǹ. À den hàarí lɛ́ ɛ́ ɓɛ́ ɓɔ́ ɓɛ́, lè yìi lɛ ɛ́ hàarí ɛ́ hɔ̀ miyiɛ́ ɛ̀ wé lɛ́ Dɔfĩn hũn. 2Ɛ́ Yiezu zɔn bie lɛ́ ɓà ǹ nɛ làa: «Mí tĩì ɛ̀ mì nɛ ɓɛ́pe Kalile nìɛ lɛ húrun kɛ̀amu ɛ́ temu hàarí iè bɔ̀konwériè ɛ́ pɔ ɓɛ Kalile nìɛ lɛ kɛ́? 3Ńɓùé lò, ɛ́ nin bie lɛ́ miɛ ǹ nɛ kɛ́ mí yí zɛ̀ní mí tĩɛ̀ ɛ̀ mì fúansí mí bɔ̀koohɛ̃ wénlɔ́ ǹ, ɛ́ mí ɓén hí míkùi kɛ̀a ɓɛ. 4Ɛ̀ ɓɛ̀pe nìnbirìe pírú àá nìɛ hùutĩ lɛ ɛ́ hɔ́ Silowe zũ-tɔ́nù ɛ́ pɛ̃̀hṹ ɓúo síɛ fɛ̀cɛ́kɛa, ɛ́ mí tĩì ɛ̀ mì nɛ ɓɛpe ɛ́ temu hàarí iè bɔ̀konwériè ɛ́ pɔ ɓɛ Zerizalɛɛmu lóo nìɛ lɛ kɛ́ ɓɛ́kùi? 5Ńɓùé lò, ɛ́ nin bie lɛ́ miɛ ǹ nɛ kɛ́ mí yí zɛ̀ní mí tĩɛ̀ ɛ̀ mì fúansí mí bɔ̀koohɛ̃ wénlɔ́ ǹ ɛ́ mí ɓén hí míkùi kɛ̀a ɓɛ.»
Lè ńluunù lɛ yí dàa biè wĩ̀i
6Ɛ́ Yiezu ɛ́ khie wɛ̃̀ lè wĩ̀i lɛ ɛ́ lɛ́ ɓà ǹ ɛ́ nɛ làa: «Nùún dɔ̀ hàarí fɛ́ ńluunù mí mún hũn. Ɛ́ wurù dɔ̀ zɔn, à hĩ́nà ɓɛrɛ nɛ mii ɓen fua hɔ ńɓinɓi-tɔ̀rɔ́, á ɓɛrɛ khɔn. 7Á wo bie lɛ́ álɛ te le mún bòo ɛ́ húi ǹ nɛ làa: “Lɛ iè lɔ́líe bɔ̀nbɔ̀ tĩ kɛ́ ń wóo ɓen nɛ nin ɓen fua ńɓinɓi-tɔ̀rɔ́, ɛ̀ ǹ ɓen khe. Ɛ́ kɔ́ ɓúu lé tɛ́viɛní, iè hɔ̀ lɛ ɛ́ lé ɛ́ viì ɛ̀ fé kũ̀n.” 8Kɛ́ ápe lɛ te le mún bòo ɛ́ húi ɛ́ den zɔn kɔ̃́niɛ ɔ̀ nɛ làa: “Ɲunsɔ, bĩní fùansí lè ǹ duòni; nin cĩ́ kṹn ɛ̀ kíríkɛ lè ǹ, ɛ̀ ǹ kóo duurɔ́ lè ǹ. 9Ɛ́ wɔ́ khɔn ɛ́ lóo lɛ ɛ́ lé ɛ̀ lè ɛ́ hɛ bie. Kɛ́ lé den pɛ́wi ɛ́ yí hɛ bie, ɛ̀ kɔ̀ den wo fùansí nɛ ń ɓúu lé.”»
Hṹnu dɔ lɛ máahṹ kũnɛ wiɛnírɔ́ lè ńvũùnín sí zɔn
10Zuifuɓɛ ńvũùnín sí dɔ̀ zɔn, ɛ́ Yiezu ɛ́ zɔn ɓɛ̀ nìnbirìe ɛ̀ kɛ̀rán peɓɛ̀ ńkóoɓánlɔ̀n zũnù dɔ̀ hũn. 11Ɛ̀ hṹnu dɔ̀ hàarí wi yán kɛ́ ńɲíkĩ́rɔ ɛ́ wi-è ǹ lɛ iè pehɔ̀ lɔ́líe pírú àá bòo hùutĩ. á wo hàarí kũnɛ, ɛ́ yí dɛ̀ yáà yòó téní wɛ̀. 12Ɛ́ hɔ́ lɛ ɛ́ Yiezu mɔn ɔ̀ hṹnu sɔ, á vɔn ɔ̀ à zɔn bie lɛ́ à nɛ làa: «Hṹnu, kɔ̀ lɔ̀nbiè ɛ́ lɔ́ kɔ́ lɔ̀n.» 13À yòó bɔ̀ mí níhĩ́ piè lɔ̀n, ɛ́ mí laà hũn, á hṹnu yòó téniɛ, á wo khie ɛ́ Dɔfĩn ɛ̀ ɓàanínin. 14Á ńkóoɓánlɔ̀n zũnù hándí ɛ́ tĩì síɛ hĩ́nà iè hɔ̀ lɛ ɛ́ Yiezu ɛ́ wiɛniɛ nìnbírɔ lè ńvũùnín sí zɔn. Á khie bie lɛ́ ɓɛ́ nìzã̀amáa lɛ wi yán ǹ nɛ làa: «Hɔ̀ tɔnlɔ́ tánlɔ́ sítĩnlɔ́ ɛ́ iè huézĩ́, ɛ́ mí wóo ɓen nɛ ɓɛ wiɛní miɛ hɔ̀pe sítĩnlɔ́ sɔ hũn, kɛ́ mí bí wóo ɓen lè ńvũùnín sí zɔn wɛ̀.» 15Ɛ́ Ɲunsɔ Yiezu ɛ́ zɔn kɔ̃́niɛ ɔ̀ ɛ́ nɛ làa: «Mí hɛ̀ iè pe nìhĩ́dériè lò! Nɛ́ mìpe àá mí nì-cóohɛ̃, ɛ́ hɔ́rɔ wóò fuen mí nàa tàá mí ńnɛ̀kɛ̃nɓiì ɛ̀ vɛ ɲuuní lé ńvũùnín sí zɔn! 16Ápe hṹnu lɛ, lɛ iè ɔ̀ Abarahaamu hũn hãá dɔ̀ lɛ á Sitũanɛ ɛ́ can dĩniɛ lɛ iè pehɔ̀ lɔ́líe pírú àá bòo hùutĩ, iè pe ɛ́ ń yí fɔ́ɓán ɛ́ ǹ fuen lè ńvũùnín sí zɔn?» 17Ɛ́ hɔ́ lɛ ɛ́ Yiezu ɛ́ khɛ́ kɛ̀amu, ɛ́ lùwiè ɛ́ yòó ɓaa ɓà ńbíyanliè ɓɛ́kùi, kɛ́ ɓɛ́ nìzã̀amáa ɛ́ pe den wɛ ɓɛ́te hɔ̀ bɔ̀bɛ̃hɛ̃ lɛ á ɛ́ wé míkùi bòo hũn.
Bòo lɛ ɛ́ Dɔfĩn bɛ́záanú ɛ́ dàa lɔ́ɓán
Mat 13.31-33; Mar 4.30-32
18Ɛ́ Yiezu ɛ́ zɔn bie lɛ́ ɓà ǹ ɛ́ nɛ: «Dɔfĩn bɛ́záanú ɛ́ lɔ́ɓán àá ńdiɛ̀, hɔ ńɓùo ɛ́ ń wo niǹ dàá màaní lé? 19Lè lɔ́ɓán àá mutaade biì lɛ mìniɛ fĩ́i, lɛ ɛ́ nìnbírɔ dɔ̀ van zu mí kɔnlɔ́ hũn. Ɛ́ le síɛ lɔ́ ɛ́ hĩ́nà yòó wɔ́ lé vɛ̃̀hṹ, ɛ́ ɓɛ́ ńɲíizàani ɛ́ wóò ɓen tĩ́ ɓɛ́ ńwiɛhɛ̃ pelè ńnɛhɛ̃ hũn.»
20Ɛ́ Yiezu ɛ́ bĩniɛ zɔn nɛ làa: «Ɛ́ ń den nin màaní lé Dɔfĩn bɛ́záanú àá ńdiɛ̀? 21Lè lɔ́ɓán àá ɲɛfĩni lɛ ɛ́ hṹnu dɔ̀ mɔ̀ khie koo hɔ̀ dũmu lɛ buò hũn ɛ́ kan, ɛ́ hɔ́pe dũmu míkùi ɛ́ hĩ́nà pòó yòó.»
Lè zĩínù ɲunù lɛ mìniɛ bòo
Mat 7.13-14; 7.21-23
22Ɛ́ Yiezu khie bɔ̀ hɔ̀ lɔ́-bɛ̃hɛ àá hɔ́ lɔ́-cíni ǹ, ɛ́ ɓɛ̀ nìnbirìe ɛ̀ kɛ̀rán kɛ́ á kã́a Zerizalɛɛmu. 23Ɛ́ nìnbírɔ dɔ̀ ɛ́ zɔn ɔ̀ dìenin nɛ làa: «Ɲunsɔ, ɓɛ̀ sũǹ yí nìɛ ɓɛ̀ yiɛní ɛ́ temu ɓén fuen?» Ɛ́ Yiezu zɔn bie lɛ́ à ǹ nɛ làa: 24«Dɔfĩn bɛ́záanú zĩinù ɲunù ɛ́ mìniɛ, ɛ́ mì pĩ̀iní míte ɛ̀ mì zɔ àá lé, iè hɔ̀ lɛ ɛ́ nin bie hɔ lɛ́ miɛ ǹ nɛ nìnbirìe nìnbí-kuì ɛ́ ɓén bie nɛ ɓɛ zɔ àá lé, kɛ́ ɓɛ́ den yá ɓén dàń zɔ wɛ̀. 25Pɛ̃̀hṹ dɔ̀ vaá-ɓen à zũnù ɓàasɔ ɛ́ ɓén síɛ hĩ́ní ɛ́ khíi híɛ lé zĩínù ɲunù, à ɛ́ pe lè. Kɛ́ mípe ɛ́ wi hɔ yíe, ɛ́ mí den ɓén khíi ɓánɓɛ́ lépe zĩínù ɲunù ɛ̀ mì bie nɛ: “Ɲunsɔ, hán lé zĩínù ɲunù nɛ ke zɔ.” Á den zɔ bie ɛ́ lɛ́ miɛ ǹ nɛ: “Ń yí dũ mi lénlén wɛ̀.” 26Ɛ́ mí den ɛ́ zɔ́ bie lɛ́ à ǹ nɛ: “Ké dú ɛ̀ kè ɲún àá kɔ, ɛ̀ kɔ̀ kɛ̀rɛa ɓɛ̀ nìnbirìe kè lóo fɔ́hĩ́ hũn.” 27Á sĩ̀n zɔ́ bie lɛ́ miɛ ǹ nɛ: “Ń yí dũ mi lénlén wɛ̀. Mì vĩ́ lé niǹ sɛnù mìpe lɛ iè ɓɛ̀ bɔ̀konwériè mìkùi.” 28Ɛ́ sí den iè viì lɛ ɛ́ mí ɓén mi-ɛ Abarahaamu àá ɔ́ Yizaake Zakɔɔbu àá ɓɛ́pe Dɔfĩn bɔ̀háaníriè ɓɛ́kùi nin kɛ́ ɓɛ́ wi Dɔfĩn bɛ́záanú hũn, hɔ́rɔsí kɛ́ mípe ɛ́ ɓɛ́ den lɔ́ fùɛrɛ̀sínin hɔ̀ yíe. Ɛ́ mí den ɓén wírí kɛ́ mí ɛ́ mi ɲiɛ̀ khĩ. 29Ɛ́ ɓɛ́ nìnbirìe ɛ́ wóo ɓén vɛ lé àá lé wurù hànlén àá pelè línlén àá lè sṹsùnù sɛhĩ́ɛ lɛ khie kɛ́ hũn, ɛ́ ɓén páaní kansí ɛ̀ ɓɛ̀ ɛ́ dí Dɔfĩn bɛ́záanú hũn. 30Ɛ́ ɓɛ́ nìnbirìe dɔ̀ lɛ iè mɛ́ndíe hɔ̀ zoòni ɛ́ ɓén wé hándíe, ɛ̀ ɓɛ̀dɔ̀ lɛ iè hándíe hɔ̀ zoòni ɛ́ ɓén wé mɛ́ndíe.»
Yiezu hũn ɛ́ yaa ɓɛ̀ Zerizalɛɛmu nìɛ bòo hũn
Mat 23.37-39
31Ɛ́ pehɔ̀ yìi hũn, ɛ́ ɓɛ́ Farizĩɛɓɛ dɔ̀ ɛ́ ɓɛrɛ yú Yiezu ɛ̀ ɓɛ̀ bie lɛ́ à ǹ nɛ làa: «Híní lan vɛ àá vi-ɓuɛ̀, à Herɔɔde ɛ́ kɔ̀ cɛ̀, à wɛ mii ɓé kɔ̀.» 32Ɛ́ Yiezu zɔn bie lɛ́ ɓà ǹ nɛ làa: «Mì lan vɛ bie lɛ́ á ńbándiè sɔ ǹ nɛ zoòni àá yìrí ɛ́ nín ɓɛ̀ ńɲíkĩ́niɛ̀ ɲɛ líení ɓɛ́ nìnbirìe ǹ, ɛ̀ ɓɛ́ dɔriè ɛ́ ń lò ɛ́ wiɛní, kɛ́ pehɔ̀ wihĩ́ bɔ̀nbɔ̀tĩlán zɔn, ɛ̀ nin víení niǹ tɔnlɔ́. 33Kɛ́ ń sãawi ɛ̀ ǹ bè niǹ wṹn zoòni àá yìrí àá yìrí hɔ́rɔsí, iè hɔ̀ lɛ ɛ́ hɔ́ yí fɔ́ɓán ɛ̀ Dɔfĩn bɔ̀háanírɔ ɛ̀ hí vi-ɓuɛ̀ kɛ́ Zerizalɛɛmu hũn ɛ́ ɓen bòo mí. 34Mìpe Zerizalɛɛmu nìɛ, mìpe lɛ ɛ́ wóò ɓé ɓɛ́ Dɔfĩn bɔ̀háaníriè, ɛ̀ mì táa ɓɛ́pe lɛ ɛ́ Dɔfĩn tɔrɛ nɛ ɓɛ ɓen mì viì ɛ̀ ɓé, lɛ iè pehɔ̀ yìehɛ̃̀ yɛ kɛ́ ń dàa wóò nɛ nin fé miɛ ɛ̀ ɓen kóo ɓánlɔ̀n niǹ kòohɔ́ hũn, kɛ̀a bòo lɛ á kùé dàa wóò hiɛ mí nìɛ ǹ àá mí maa bòo sí, kɛ́ mí den pɛ̃́. 35Ɛ́ mì lóo ɛ́ ɓén fùansínin ɛ́ lɛ́ miɛ ǹ. Nin khɛ́ hɔ́ lɛ́ miɛ ǹ nɛ mí yá ɓén bĩní mi mi fúu ɛ̀ vɛ dɛ̃ le yìi lɛ ɛ́ mí wóo ɓén bie nɛ “Nɛ Ɲunsɔ Dɔfĩn ɛ̀ dúɓɛ́ álɛ ɛ́ ɓen pehɔ̀ yèrè lɔ̀n!”»
Currently Selected:
Liike 13: bwj
Highlight
Share
Copy
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation
