Liike 14
14
Bòo lɛ ɛ́ Yiezu dàa wiɛniɛ dɔrɔ dɔ̀ ńvũùnín sí zɔn
1Ɛ́ Zuifuɓɛ ńvũùnín sí dɔ̀ zɔn, ɛ́ Yiezu van ɓɛ̀ Farizĩɛɓɛ hándí dɔ̀ yíe, ɛ́ mii vɛ dí yán. Ɛ́ ɓɛ́ nìnbirìe lɛ wi yán ɛ́ ɔ̀ nii cɛ̃̀un. 2Ɛ́ nùún dɔ̀ lɛ hòokɛa ɛ́ hṹn dɛ̃̀ Yiezu híɛhɔ́. 3Ɛ́ Yiezu zɔn ɓɛ̀ làndɛ́ kɛ̀ránliè àá ɓɛ́ Farizĩɛɓɛ ɛ̀ dìenin nɛ làa: «Kè làndɛ́ ɛ́ sũ̀n nɛ ké dɛ̀ nìnbírɔ ɛ́ wiɛní lé ńvũùnín sí zɔn yée kɛ́ hɔ́ nɛ ké yí dɛ̀ hɔ̀ yá wé?» 4Ɛ́ ɓɛ́ hĩɛ. Ɛ́ Yiezu khie wieniɛ ɔ̀ dɔrɔ sɔ à nɛ a lan. 5À khie ɛ́ bie àá ɓɛ́ nɛ làa: «Á wieni mì tĩ́ihṹ kɛ́ piè zuú tàá piè nàa ɛ́ kùerɛ zɔn buì á yá leń wɔ́ fùa fùa hɛ̀rí kɛ́ hɔ́ iè ńvũùnín sí zɔn?» 6Ɛ́ ɓɛ́ hɛ̀ yí dàń ɔ́ yí zɔ kɔ̃́ní àá bòo dɔ̀ wɛ̀.
Te síɛnírɔ́ bòo
7Ɛ́ Yiezu mii húi, ɛ̀ ɓɛ̀ nìnbirìe lɛ ɓɛ́ vɔn hɔ̀ díe dínlén ɛ́ wɔ́ hɔ́ hán vuò ɛ́ ɓɛ́ ɛ́ cɛ̀ ɛ́ ɓɛ vɛ kankɛsí hũn, á zɔn wɛ̃̀ lè wĩ̀i lɛ ɛ́ lɛ́ ɓà ǹ: 8«Kɛ́ nìnbírɔ dɔ̀ ɛ́ vɔn kɔ yaamu díe dínlén, ɛ̀ kɔ̀ yɛ̃̀nbí vɛ kansí lé hán wànlè lɔ̀n wɛ̀. Iè hɔ̀ lɛ ɛ́ ɲún yí tĩ àdɔ̀ lɛ ɲún lì pɔ kɔ ɛ́ ɓɛ́ ɓiɛ̀ vɔn. 9Ápe lɛ te miɛ vɔnkɛ ɛ́ ɓén bie ɛ́ lɛ́ kɔ ǹ nɛ kɔ síɛ hĩ́ní ɛ̀ kɔ̀ lɛ́ lé wànlè ɔ̀ ǹ. Ɛ́ kɔ wo ɛ́ síɛ hĩ́ní àá kɔ́ lùwiè ɛ́ khíi vɛ́ kansí lé máahṹ wànlè lɔ̀n. 10Kɛ́ ɓɛ́ ɓen vɔn kɔ yaamu díe dínlén, ɛ̀ kɔ̀ vɛ kansí lé máahṹ wànlè lɔ̀n. Kɛ́ ápe lɛ te kɔ vɔn ɛ́ ɓen ɓɛrɛ, á den ɓén bie lɛ́ kɔ ǹ nɛ làa: “Kè biɛ̀, hĩ́ní ɓen yòó àá híɛhɔ́.” Ɛ́ kɔ́ den ɛ́ dí yèrè ɓɛ̀lɛ kɛsí àá kɔ ɓɛ́kùi yìe hũn. 11Ɛ́ nìnbírɔ lɛ wóò ɓàaní míte ǹ ɛ́ Dɔfĩn ɓén síɛnínin, àlɛ wóò síɛní míte ǹ ɛ́ Dɔfĩn ɛ́ ɓén hóoní.»
12Ɛ́ Yiezu ɛ́ khie ɛ́ bie àá ɔ́pe nùún lɛ tie vɔn van perɛnin ɛ́ nɛ làa: «Kɔ ɓen kɔ tɛ́ wúsɔn-díe tàá sṹnúhṹn díe ɛ̀ ve ɓɛ nìnbirìe ɛ̀ ɓen pennin, ɛ̀ kɔ̀ bí wé mì pàáɓɛ́ tàá mì zɛ̀ɓɛ̀, tàá mì nìɛ, tàá mì yíe bòo ɓàasiè ɛ̀ kɔ̀ ve wɛ̀; iè hɔ̀ lɛ ɛ́ ɓɛ́pe ɓiɛ̀ dɛ̀ kɔ ɛ́ ɓén yìrí ve ɛ́ vɛ pennin, ɛ́ kɔ́ wo ɛ́ yí hɔ́ bòo lɛ ɛ́ kɔ́ lɛ́ ɓà ǹ sàanín. 13Kɛ́ kɔ́ den ɓen kɔ tɛ́ sɛ́rí díe ɛ̀ ve ɓɛ́ nìnbirìe, ɛ̀ ɓɛ̀ nìkherà àá ɓɛ́ nìnbirìe lɛ tɛkɛà lɛ̀, àá ɓɛ́ lóohĩ́ àá ɓɛ́ muaɓɛ̀ iè pe ɛ́ kɔ́ ve ɛ̀ vɛ pennin. 14Ɛ́ kɔ́ ɲún ɛ́ den ɓén tĩìní, iè hɔ̀ lɛ ɛ́ ɓɛ́pe ɛ́ yí dɛ̀ kɔ yá sàaní wɛ̀. Ɛ́ ɓɛ́ bɔ̀tente wériè vìerɔ́ zɔn, ɛ́ Dɔfĩn ɛ́ lɛ́ kɔ́ bɔ̀tente wénlɔ́ sàanín kɔ ǹ.»
Lè wĩ̀i lɛ wɛ̃̀ ɓɛ̀ nìɛ dɔ̀ lɛ ɛ́ ɓɛ́ vɔn hɔ̀ sɛ́rí díe dínlén kɛ́ ɓɛ́ pɛ̃́ bòo
Mat 22.1-10
15Ɛ́ ɓɛ́pe lɛ kɛsí ɛ́ dí ɛ́ ɲɛ́ hɔ́ lɛ ɛ́ Yiezu bie, ádɔ̀ ɛ́ zɔn bie lɛ́ à nɛ làa: «Nìnbírɔ lɛ ɓén dí lé sɛ́rí Dɔfĩn bɛ́záanú hũn, ɛ́ hɛ̀ ɲún tĩ.» 16Ɛ́ Yiezu ɛ́ zɔn wɛ̃̀ lè wĩ̀i lɛ ɛ́ lɛ́ à nɛ làa: «Nùún dɔ̀ ɛ́ tɛ́ díe bɔ̀kùi, à vɔn ɓɛ̀ nìnbirìe bìkuì. 17Ɛ́ hɔ́ díe dínlɔ́ yìi van dɛ̃un, á tɔrɛ mí tɔntɛ́ nɛ a vɛ biekɛ lɛ́ ɓɛ́ nìnbirìe lɛ mí vɔnkɛ ǹ nɛ ɓɛ ɓen, nɛ hɔ bòo míkùi ɛ́ wo sɛ́sɛ́a vɔ́. 18Kɛ́ ɓɛ́pe lɛ á vɔnkɛ ɓɛ́kùi àá ɓɛ́ nì-cóohɛ̃ ɛ́ hɛ̀ nɛ ɓɛ́ yí dɛ̀ yá ɓén wɛ̀: à hán nìnbírɔ ɛ́ bie lɛ́ á tɔntɛ́ ǹ nɛ: “Ń yɛ̀ mún dɔ̀, ɛ́ ń fɔ́ɓán ɛ̀ ǹ vɛ húi lé, ɛ́ kɔ́ vɛ bie lɛ́ mí ɲúnsɔ ǹ nɛ ń hɛ̀ yí dɛ̀ yá ɓén ɓen wɛ̀, nɛ a hɛ̀ wé mì hiì.” 19Ádɔ̀ bĩniɛ van bie lɛ́ à ǹ nɛ: “Ń yɛ̀ nɛ̀-vɛ̀riè ɲúuhɛ̃ hùanú, ɛ́ ń lɛ pe wo cɔ́ vaá-vɛ peɓɛ̀ hàanílén; ɛ́ kɔ́ hɛ̀ wé kɔ́ hiì.” 20Àdɔ̀ bĩniɛ van bie lɛ́ à tɔntɛ́ ǹ nɛ: “Ń lɛ iè pe wo yan ɔ̀ hũnu sáalɛ, sí iè pe temu lɛ́ ɛ́ ń dàa yí dɛ̀ yá ɓen wɛ̀.” 21Á tɔntɛ́ ɛ́ khũ̀a van bie hɔ̀ bòo lɛ ɛ́ ɓɛpe nìɛ sɔ sí ɛ́ khɛ́ ɛ́ lɛ́ ɓɛ́ ɲúnsɔ ǹ. Ápe ɲúnsɔ ɛ́ hɛ̀ tĩì síɛ hĩ́nà, á bie lɛ́ mí tɔntɛ́ ǹ nɛ làa: “Kɛ̀a sáalɛ ɛ́ kɔ́ wo fuie vɛ hɔ fɔ́hĩ́ hũn àá hɔ́ wũuhɛ̃ lɔ̀n, ɛ̀ vɛ dàá ɓɛ́ nìkherà àá ɓɛ́lɛ tɛkɛà lɛ̀ àá ɓɛ́ muaɓɛ̀ àá ɓɛ́ lóohĩ́ ɛ̀ dàá ɓen hũ̀nún.” 22Á tɔntɛ́ ɛ́ van khũ̀a ɓɛrɛ bie lɛ́ ɓɛ́ ɲúnsɔ ǹ nɛ: “Ɲunsɔ ǹ wɔ́ hɔ́ bòo lɛ ɛ́ kɔ́ nɛ ń wé míkùi, kɛ́ hɔ́ kaǹsílénɓɛ̀ dɔ̀ ɛ́ pɛ́wi kɛ́ wi yán.” 23Á ɲúnsɔ ɛ́ bie lɛ́ mí tɔntɛ́ ǹ nɛ: “Ɛ́ kɔ́ vɛ hɔ̀ mɛ-wũuhɛ̃ lɔ̀n, àá hɔ́ kɔnlɔ́ sɛhĩ́ɛ, ɛ̀ vɛ mɛmɛkɛ ɓɛ nìnbirìe lɛ kɔ ɛ̀ mi yán ɓɛ́kùi nɛ ɓɛ ɓen niǹ zũnù hũn, bòo lɛ ɛ́ wé ɛ̀ lè tí. 24Nin khɛ́ hɔ́ lɛ́ miɛ ǹ nɛ ɓɛpe lɛ ɛ́ ń hṹn sɛ̃̀nɛ́hã̀ vɔn ɓɛ́kùi ɛ́ hɛ̀rí nìnbírɔ ɛ́ yá ɓén díndí niǹ díe wɛ̀.”»
Bòo lɛ ɛ́ nìnbírɔ lɛ wɛ mii wé Yiezu kɛ̀ránzuú fɔ́ɓán à wé
Mat 10.37-38
25Ɛ́ wurù dɔ̀ zɔn, ɛ́ nìnbí-dũmu dɔ̀ ɛ́ lɔ́ bɔ̀ lè wṹn àá Yiezu. Á bĩniɛ míte ɛ́ khie ɛ́ bie àá ɓɛ́ ɛ́ nɛ làa: 26«Kɛ́ nìnbírɔ ɛ́ wɛ ɛ́ mii bè niǹ máahṹ, à fɔ́ɓán à wɛní mi ɛ̀ pɔní ɓá yàá àá ɓá nín àá ɓá hṹnu àá mí nìɛ àá ɓá zɛ̀ɓɛ̀ àá ɓá hĩ́ini, à bĩní wɛní mi ɛ̀ pɔní mí kùrú te, kɛ́ dàa bòo mí, á yí dɛ̀ yá wé niǹ kɛ̀ránzuú wɛ̀. 27Ɛ̀ nìnbírɔ kɛ́ á yí mìí mí kùrú ɓáalén dãanù ɛ́ yí tìé ɛ̀ dàá bè niǹ máahṹ, á yí dɛ̀ yá wé niǹ kɛ̀ránzuú wɛ̀.
28Á wieni mì tĩ́ihṹ kɛ́ á mii te lɔ́nkɔ́ zunù, á yá síɛ kansí à ɛ́ zɛ̀sí pelè teǹlán màa ɛ́ vé, ɛ́ dàá húi kɛ́ á dàa dɛ̀ lè ɛ́ ɓén ɓooní? 29Kɛ́ dàa bòo mí kɛ́ á síɛ ɲɛ̀ pelè fìi à khie yí dɛ̀ lè yá ɓooní, ɛ́ ɓɛ́ nìnbirìe lɛ ɓɛ mi le ɓɛ́kùi ɛ́ yaakɛ a, 30kɛ́ ɓɛ̀ ɛ́ bie nɛ: “Àpe nùún lɛ ɛ́ ɓɛ́ mí zũnù fìi, à den yí dɛ̀ lè yá ɓooní wɛ̀.”
31Ɛ́ sí iè hɔ̀pe ɓà ńmaà, kɛ́ bɛ́zuú dɔ̀ lɛ iè hĩtɛ́riè muasié pírú á dàa, ɛ́ mii vɛ tɛ́ hĩɛ̀ àá bɛ́zu-ɓuiɛ̀ dɔ̀ lɛ pe mii ɓen sĩ́ɓán àá ɔ́ àá hĩtɛ́riè muasié ɓénlé, á den ɛ́ síɛ kansí à húi vé, kɛ́ á ɓen dɛ̀ ɛ́ vɛ́ sĩ́ɓán àá ɔ́ àá mí hĩtɛ́riè muasié pírú sɔ. 32Kɛ́ á huie kɛ́ á yí dɛ̀ hɔ̀, á sɛ̀nɛ́hã̀á tɔn mí nìnbirìe dɔ̀ ɛ́ ɓɛ́ vɛ́ sĩ́-ɛ pe bɛ́zuú lɛ mii ɓen tɛ́ hɔ́ hĩɛ̀ àá ɔ́ híɛhɔ́ kɛ́ pie viì van ni, bòo lɛ ɛ́ wé ɛ̀ ɓɛ̀ ɲí ɓán, ɛ̀ hɔ̀ hĩɛ̀ tánlɔ́ ɛ̀ dàá yiè bí lé wɛ̀.»
33Ɛ́ Yiezu ɛ́ zɔn khɛ́ sĩiniɛ nɛ làa: «Ɛ́ sí iè hɔ̀ pe, kɛ́ álɛ mì tĩ́ihṹ ɛ́ yí fùansí hɔ́ bòo lɛ á dàa míkùi ǹ, á yí dɛ̀ niǹ kɛ̀ránzuú ɛ́ yá wé wɛ̀.»
Hɔ̀ yɔ́mú lɛ tĩmù vɔ́ bòo
Mat 5.13; Mar 9.50
34«Hɔ̀ yɔ́mú ɛ́ iè bòo lɛ sãa. Kɛ́ hɔ́ yɔ́mú tĩmù ɛ́ ɓen vɔ́, ɛ̀ ńɓùo iè pe ɛ́ nìnbírɔ dɛ̀ ɛ́ wé ɛ́ pehɔ̀ tĩmù ɛ́ dàá bĩní khũ̀á ɛ́ wé? 35Ɛ̀ pehɔ̀ tũ̀nú ɛ́ wo bĩniɛ mí lé sṹsùnù lɔ̀n, ɛ̀ hɔ̀ lò yí dɛ̀ duurɔ́ yá wé wɛ̀. Ɛ́ ɓɛ́ wo ɛ́ mìí hɔ́ ɛ́ lé kóosí hɔ́ yíe. Nìnbírɔ kɛ́ á dàa ɲɛkɛ̃̀a ɛ́ dàa wóò ɲí bòo à ɲí hɔ́lɛ ɛ́ nin bie sãàní.»
Currently Selected:
Liike 14: bwj
Highlight
Share
Copy
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation
